“Ko e Hā Mo Ha Toe Meʻa Te U Lava ʻo Fai maʻa Hoku Ngaahi ʻOfefiné?,” Liahona, ʻEpeleli 2024.
Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní
Ko e Hā Mo Ha Toe Meʻa Te U Lava ʻo Fai maʻa Hoku Ngaahi ʻOfefiné?
Naʻá ku loto ke fakamālohia fakalaumālie hoku ngaahi ʻofefiné, ko ia naʻá ku fai ha lotu ki he Tamai Hēvaní.
Laʻitā naʻe maʻu ʻi he angalelei ʻa e tokotaha faʻu tohí
ʻOku ou faiako ʻi he ʻapiako pē ko ia ʻoku ako ai hoku ngaahi ʻofefiné. Kuo pau ke mau ʻalu fakavavevave he ʻaho kotoa pē ʻi he 6:00 a.m. ʻI heʻemau aʻu ki he ʻapiakó, ʻoku ou ʻalu au ki hoku lokiakó ka nau ō kinautolu ki honau lokiakó.
ʻI he tuku ʻa e akó, ʻoku mau fakavavevave ki ʻapi, kai, pea toe fakavave ki he ngaahi ʻekitivitī kehé, hangē ko e ngaahi lēsoni ʻa e Kau Finemuí mo e lēsoni mūsiká. Ko hoku husepānití ʻa e palesiteni ʻo e kōlomu ʻo e kaumātuʻá, ko ia ʻokú ne fuʻu femoʻuekina foki mo ia.
Naʻe kamata ke u ongoʻi ʻoku fuʻu femoʻuekina homau fāmilí. Naʻe ʻikai ke mau maʻu ha taimi ke aleaʻi fakatāutaha mo vāofi ai ʻa e ongoongoleleí, tuku kehe pē ʻa e ʻaho Sāpaté.
ʻOku ou loto ke fakatupulaki ʻe hoku ngaahi ʻofefiné ha fakamoʻoni mālohi ki he Fakamoʻui ko Sīsū Kalaisí mo ʻEne ongoongoleleí—ʻo kamata he taimí ni, lolotonga ʻenau kei siʻí. ʻI heʻema hoko ko ʻenau ongomātuʻá, ʻokú ma ʻiloʻi mo hoku husepānití ko homa fatongia ia (vakai, Tokāteline mo e Ngaahi Fuakava 68:25). Naʻá ku fakakaukau ke lotua ia.
Naʻá ku fehuʻi ki he Tamai Hēvaní, “Makehe mei hono fakahoko ʻo e efiafi fakafāmili ʻi ʻapí mo ʻave ʻema fānau fefiné ki he lotú, ko e hā mo ha toe meʻa te ma lava ʻo fai?”
Ko e tali naʻá ku maʻú ke lau ʻa e folofolá ʻi he pongipongí pea fakaʻaongaʻi ʻa e hivá. Ko ia, ʻi heʻemau fononga ʻi he vēní ki he akó he pongipongi kotoa, naʻá ku kamata tā ha ngaahi himi mo ha ngaahi fasi lelei. Pea hili ha ngaahi miniti siʻi ʻo ʻemau aʻu ki he akó, naʻe kamata ke mau lau fakataha ʻa e folofolá, aleaʻi ʻa e ongoongoleleí, mo fai ha lotu kimuʻa pea mau takitaha ʻalu ki he kalasí. Naʻe aʻu ki hoku ʻofefine taʻu nimá naʻá ne loto ke kau mai.
Ko ha meʻa fakaʻofoʻofa ke mamata ki heʻeku fānaú ʻoku nau laukonga mo fakamoʻoni kia Sīsū Kalaisi pea mo sio ki hoku ongo ʻofefine lalahí, taʻu 9 mo e 12, ʻokú na loto-vēkeveke ke tokoniʻi ʻa e siʻisiʻi taha ʻoku taʻu 5, ke ne lau ʻa e folofolá.
Hili ʻemau tānaki atu ha fakataha lotu nounou ki homau pongipongi angamaheni femoʻuekiná, naʻá ku ʻeke ange ki hoku ngaahi ʻofefiné, “Ko e hā hoʻomou laú?” Naʻe ongo ki hoku lotó ʻa ʻenau talí.
Naʻe pehē mai ʻe ha taha ʻiate kinautolu, “Naʻe fai haʻaku sivi he ʻahó ni, pea naʻá ku fuʻu ilifia ʻaupito. Ka naʻá ku manatuʻi mei heʻetau fealeaʻaki ʻi he pongipongi ní te tau lava ʻo kole tokoni ki he ʻOtuá. Naʻá ku lotu pē ʻi hoku lotó, ʻo kole kiate Ia ke tokoni mai ke u ongoʻi nonga, pea naʻá Ne tokoni mai.”
Naʻe pehē mai ʻe ha tokotaha, “Mama, ʻoku ou ʻiloʻi ha taʻahine ʻoku ʻikai ke fie lea ki ai ha taha ia. Naʻá ku manatuʻi mei heʻetau fakataha lotú ʻoku ʻofa ʻa e ʻOtuá ki he tokotaha kotoa pē, ko ia naʻá ku fakakaukau ke u talanoa kiate ia peá u hoko ko hono kaungāmeʻa.”
ʻOku ou fakamālō lahi ki he Tamai Hēvaní ʻi Heʻene tokoniʻi au ke u fakahoko lelei ange ʻa hoku fatongia fakaefaʻeé. ʻOku ou ʻiloʻi ʻokú Ne tali ʻa e ngaahi lotú pea kuó Ne foaki mai ʻa e ongoongoleleí ke tau fiefia ai.