“Ngaahi Foʻi Hina ʻo e ʻOfá,” Kaumeʻá, ʻEpeleli 2024, 40–41.
Tohi ʻe Koe
Ngaahi Foʻi Hina ʻo e ʻOfá
Naʻá ku tokoni ʻi ha ngāue ʻi he akó ke ngaohi ha “ngaahi foʻi hina ʻo e ʻofá,” ʻa ia ko ha ngaahi foʻi hina pelesitiki ʻoku fakafonu ʻaki ha ʻū meʻa pelesitiki ʻoku fakaʻaongaʻi tuʻo taha pē. Ko ha ngaahi meʻa ʻeni ʻoku fakaʻaongaʻi tuʻo taha pea laku leva, ʻo hangē ko e ʻū milemila pelesitikí. Naʻe ngaohi ʻe he fāmili takitaha ha ngaahi foʻi hina ʻo e ʻofá ʻo ʻave ia ki he ʻapiakó. Naʻe ʻave leva ʻa e ngaahi foʻi hiná ki ha kautaha naʻa nau liliu ia ko e piliki pelesitiki. ʻE lava ke fakaʻaongaʻi ʻa e piliki ko ʻení ke langa ʻaki ha ʻū sea ki tuʻa mo ha ngaahi fale maʻá e kakai faingataʻaʻiá.
Naʻá ku fakatokangaʻi ʻoku lahi ha ngaahi meʻa pelesitiki ʻoku fakaʻaongaʻi fakaʻaho ʻe hoku fāmilí, ʻa ia ko ha palopalema lahi ia ki he ʻātakaí. Naʻá ku loto ke u kamata tokangaʻi lelei ʻa e ʻātakaí. Ka he ʻikai ke u lava ʻo fakahoko toko taha ia. Ko ia naʻá ku fakakaukau ke kole ki he kāingalotú ke nau tokoni mai. Naʻá ku talanoa mo ʻeku kau takí mo e pīsope ʻo e uōtí. Naʻá ne kole mai ke u talanoa fekauʻaki mo e ngāué ni ʻi ha fakataha. Naʻe tokolahi ha kakai naʻa nau kau mai ki he ngāué ni. Hili ha ngaahi māhina siʻi, naʻa mau lava ke tānaki ha ngaahi foʻi hina ʻo e ʻofá ʻe 100 tupu!
ʻOku kei hokohoko atu pē ʻa e ngāué ʻi he ʻahó ni. ʻI he taimi ʻoku ou tānaki ai ʻa e ngaahi foʻi hiná ʻo lahí, ʻoku ou ʻalu mo hoku fāmilí mo e ngaahi kaungāmeʻa Palaimelí ki he feituʻu ʻoku ʻave ʻo tuku ki aí. ʻOku mau tuku ai ʻa e ngaahi foʻi hiná ke ngaohi mei ai ha ʻū naunau langa.
ʻOku ou saiʻia ʻi he ngāue ko ʻení. ʻOkú ne ʻai ke u ongoʻi te u lava moʻoni ʻo tokoni ki he māmani ko ʻeni naʻe fakatupu ʻe he ʻOtuá maʻatautolú. ʻOku tokoni ia ke u mahuʻingaʻia mo fakaʻapaʻapaʻi ʻa natula mo e fanga monumanú. Ko e founga ʻe taha ʻe lava ke u muimui ai ki he Fakamoʻuí ko hono tokangaʻi lelei ʻo natula. ʻOku ou saiʻia foki ai he ko ha founga ia ke tokoniʻi ai ʻa e niʻihi kehé.
Ko e taimi ʻe niʻihi ʻoku faingataʻa ke maʻu ha taimi ke ngaohi ai ʻa e ngaahi foʻi hina ʻo e ʻofá. Ka ʻoku ou ongoʻi te tau lava ʻo liliu pea fili ke fai ha fanga kiʻi ngāue iiki mo lelei fakaʻaho. Naʻá ku ako foki ʻo ʻilo ko hono fai ha ngāue “lahí” te tau fiemaʻu e tokoni ʻa e niʻihi kehé. Te tau lava ʻo tākiekina ʻa e niʻihi kehé mo tokoniʻi ke nau kau ʻi he liliú. ʻOku ou tui ko ha konga mahuʻinga ʻeni ʻo e ongoongolelei ʻo Sīsū Kalaisí: ke liliu, tokoniʻi ʻa e niʻihi kehé, pea fai ha ngāue lelei ʻi he māmaní.
ʻŪ tā fakatātā ʻa Simini Blocker