“Lui, Nīfai, pea mo e Pianó,” Kaumeʻá, ʻEpeleli 2024, 30–31.
Lui, Nīfai, pea mo e Pianó
PLUNK! Naʻe faingataʻa ʻa e konga ko ʻeni ʻo e foʻi hivá.
Naʻe hoko ʻa e talanoá ni ʻi Taiuani.
“Kuó ke maau, Lui?” Ko e fehuʻi atu ia ʻa Misi Lií.
Naʻe kamo pē ʻa Lui. Naʻá ne ʻai hono louhiʻi nimá ki he ngaahi kī ʻuliʻuli mo hinehina ʻo e pianó pea kamata ke ne tā. Plink, plink, plink. Naʻá ne saiʻia ʻi hono tā kotoa ʻo e ngaahi notá ke tā ha hivá. Naʻá ne tā kotoa ʻa e peesi ʻuluakí pea hoko atu ki he peesi hono hokó.
PLUNK. Uehe. Naʻe faingataʻa maʻu pē ke ne tā ʻa e konga ko iá. Naʻe lahi ha ngaahi nota vave ʻi ai. Naʻe toe foki ʻa Lui ki he kamataʻangá.
PLUNK. Naʻe fakafulofula ʻa Lui. ʻOku toe hala pē!
Naʻe pehē ange ʻe Misi Li, “ʻOku sai pē ia. Ta toe feinga pē kae tā māmālie.”
Naʻe hokohoko atu e akoako ʻa Luí kae tokoni ki ai ʻa Misi Lī. Ka naʻe ʻikai pē ke ne lava ʻo tā ʻa e konga ko iá ke tonu.
Naʻe pehē ange ʻe Misi Li, “ʻOku faingataʻa ʻa e konga ko ʻení, ka ʻoku ou ʻilo te ke lava pē ʻo tā ia. ʻOkú ke pehē te ke lava ʻo akoako lahi ange ʻi ʻapi kimuʻa pea fai e fakaʻaliʻalí?”
Naʻe pehē ange ʻe Lui,“ʻOku ou tui ki ai.”
ʻI he ʻaho hono hokó, naʻe hoko atu e ako tā piano ʻa Luí. Ka naʻe kei hala pē ʻa e konga tatau! Plink, plink, PLUNK.
Naʻe hū mai ʻa e Teti ki he lokí. Naʻá ne ʻeke ange, “ʻOku fēfē?”
Ne tuhu leva ʻa Lui ki he nota ʻi he laʻipepa hivá. “ʻOku faingataʻa ʻaupito ʻa e konga ko ʻení. ʻOku ou fefokifokiʻaki pē hono tā ʻa e konga ko iá!”
Naʻe pehē ange ʻe Teti, “ʻOku hā ngali faingataʻa ia. Ka ʻoku fakamanatu mai ʻe he meʻá ni kiate au ha talanoa ʻi he Tohi ʻa Molomoná. Ko e talanoa ʻo e foki ʻa Nīfai ke ʻomi ʻa e ʻū lauʻi peletí.”
Naʻe fofonga tokanga atu ʻa Lui. “ʻOku ou saiʻia ʻi he talanoa ko iá! Naʻe toutou foki pē ʻa Nīfai ʻo toe feinga. Pea naʻe tokoniʻi ia ʻe he Tamai Hēvaní.”
Naʻe malimali ʻa Teti. “ʻIo, ko ia. ʻOku ou tui kapau te ke toutou feinga pē, ʻe tokoniʻi koe ʻe he Tamai Hēvaní ʻo hangē pē ko ʻene tokoniʻi ʻa Nīfaí.”
Naʻe kamokamo pē ʻa Lui peá ne toe kamata foʻou. Naʻe tangutu ʻa Teti ʻi ha sea naʻe ofi kia Lui ke fakafanongo. Naʻe tokanga taha ʻa Lui ki he konga naʻe faingataʻá. Naʻá ne tā māmālie ʻa e foʻi nota takitaha.
Hili iá naʻe toe tā kakato ʻe Lui ʻa e foʻi hivá. Ko e taimi kotoa pē naʻá ne tā aí, naʻe fakaʻau ke ne toe vave ange. Naʻe faifai pea tonu kotoa e ngaahi notá heʻene taá! Naʻá ne ongoʻi fiefia ʻaupito. Naʻe ʻikai ke ne fakatokangaʻi ʻe ia ʻa hono lōloá.
Naʻe pehē ange ʻe Teti, “Kuó ke lavaʻi ia! Tōtōatu.”
Naʻe tuʻu mai ʻa Mami ʻi he matapaá. “Naʻe ongo mālie ia Lui!”
Naʻe pehē ange ʻe Lui, “Mālō. Kuo faifai peá u lava ʻo tā ʻa e konga naʻe faingataʻá.”
Naʻe fāʻofua ʻa Mami kia Lui. “ʻOku ou laukau ʻaki koe ʻi hoʻo ngāue mālohí.”
Naʻe manavasiʻi ʻa Lui ʻi he pō naʻe fai ai ʻa e fakaʻaliʻalí. Naʻe vave ʻa e tā hono mafú. Naʻe pupuhaʻia hono ongo nimá.
Naʻe faifai pea ui mai hono hingoá. Naʻá ne lue atu ki he funga siteisí ʻo sio ki he ngaahi mātuʻá mo e fānaú. Naʻá ne fakahā ʻene foʻi hivá, peá ne tangutu hifo leva ʻi he sea fefeká.
Naʻe mihi fakamānava loloa ʻa Lui pea hili hifo hono ongo nimá ʻi he ngaahi kī ngingilá. Naʻá ne ʻiloʻi kuó ne fai ʻa e meʻa kotoa pē naʻá ne malavá. ʻE tokoniʻi ia ʻe he Tamai Hēvaní.
Naʻe kamata leva ke tā ʻa Lui. Naʻe faingofua pē hono tā ʻo e notá ʻo hangē pē ko e meʻa naʻá ne akó. Naʻe aʻu leva ki he konga faingataʻá.
Naʻe tonu ʻa e foʻi nota kotoa pē naʻá ne taá. Naʻe ʻikai ke fuʻu faingataʻa fēfē ia he taimí ni!
Naʻe fāifai peá ne tā ʻa e foʻi nota fakaʻosi ʻo e foʻi hivá. Naʻe pasipasi ʻa e taha kotoa pē ʻi he taimi naʻe ʻosi ai ʻene taá. Naʻe malimali pē ʻa Lui mo punou. Naʻá ne sio atu ki he pasipasi mo e malimali mai ʻa Mami mo Tetí, mo hono ngaahi tuofāfiné. Kuó ne lavaʻi lelei ia! Naʻá ne toe feinga pē ʻo aʻu ki he taimi naʻe faingataʻa aí, ʻo hangē pē ko Nīfaí. Pea naʻe tokoniʻi ia ʻe he Tamai Hēvaní.
Tā Fakatātaaʻi ʻe Toby Newsome