“Ulo Atu,” Kaumeʻá, ʻEpeleli 2024, 18–19.
Ulo Atu
Naʻe loto ʻa Lini ke ne fai ʻa e meʻa naʻe mei fai ʻe he Fakamoʻuí.
Naʻe hoko ʻa e talanoá ni ʻi Simipāpuē.
Naʻe ulo ʻa e laʻaá, pea naʻe lele ʻa Lini ki tuʻa ke vaʻinga. Naʻe vaʻinga ʻakaʻaka ʻa e fānau kehe ʻi he koló ʻaki ha foʻi pulu. Naʻa nau ngaohi ha foʻi pulu pē ʻanautolu ʻaki hono nusinusi ʻa e pepá pea kofu maʻu ʻaki ia ha ʻū milemila.
Naʻe fakavave atu ʻa Lini ke nau vaʻinga. Ka naʻe ʻi ai ha meʻa naʻá ne taʻofi ia.
Naʻe tangutu ha taʻahine ko hono hingoá ko ʻŌsamu ʻi ha lalo ʻakau ofi mai pē. Naʻe ʻi ai ha fānau kehe naʻa nau tuhu kiate ia ʻo kataʻi ia. Ka naʻe ʻikai ke kata ʻa ʻŌsamu ia. Ka naʻá ne fakapuliki hono matá ʻaki hono nimá. Naʻe tafe hifo ʻa e loʻimatá ʻi hono kouʻahé.
Ne ʻikai fuoloa kuo kau ʻa e fānau kehé ki he ʻakaʻaka foʻi pulú pea nau tukunoaʻi ʻa ʻŌsamu.
Naʻe sio ʻa Lini ki he fiefia ʻa e fānaú. Pea naʻá ne sio kia ʻŌsamu. Naʻá ne loto ke fai ʻa e meʻa naʻe mei fai ʻe Sīsū Kalaisí.
“ʻOkú ke sai pē?” Ko e fehuʻi atu ia ʻa Liní. Naʻá ne malimali atu kia ʻŌsamu.
Naʻe holoholoʻi ʻe ʻŌsamu hono loʻimatá peá ne kamokamo ange.
Naʻe toʻo hake ʻe Lini ha ongo kiʻi vaʻakau peá ne ʻoange ha vaʻakau ʻe taha kia ʻŌsamu. “Te ke fie tā fakatātā mo au?”
“ʻIo.” Naʻe toʻo hake ʻe ʻŌsamu ʻa e vaʻakaú ʻo tā ha foʻi siakale ʻi he kelekelé.
Naʻe pehē ange ʻe Lini, “ʻOku hangē ia ha foʻi laʻaá. ʻOku ʻai maʻu pē ʻe he laʻaá ke u fiefia.” Naʻá na makiʻikiʻi pē mo tā ha ʻū fakatātā kehekehe. Naʻe saiʻia ʻa Lini ʻia ʻŌsamu.
Fakafokifā pē kuo maʻu ʻe Lini ha foʻi fakakaukau. “Te ke loto ke ta ʻalu ki he lotú ʻapongipongi? Te tau hivaʻi ha ngaahi hiva mo ako ʻo kau kia Sīsū Kalaisi. ʻOku fakalata ʻaupito ia.”
Naʻe talaange ʻe ʻŌsamu, “ʻOku sai ia. Te u kole ange ki heʻeku faʻeé.”
ʻI he lele ʻa ʻŌsamu ʻo kumi ʻene faʻeé, naʻe kiʻi ongoʻi manavasiʻi ʻa Lini. Naʻá ne ʻiloʻi ʻoku ʻi ai ha kakai ʻe niʻihi ʻi honau feituʻú naʻe ʻikai ke nau saiʻia ʻi he Siasí.
Ka naʻe vave pē ʻa e foki mai ʻa ʻŌsamú. “Naʻe talamai ʻe heʻeku faʻeé ʻio!” Naʻá ne fāʻofua kia Lini. “Naʻá ku talaange ko hoku kaungāmeʻa lelei tahá koe!”
ʻI he pongipongi hono hokó naʻe ʻalu ʻa Lini mo ʻŌsamu ki he lotú. Ko ha foʻi lue lōloa ia. Lolotonga ʻena luelue ki he lotú, naʻe akoʻi ʻe Lini ha ngaahi hiva Palaimeli ʻe niʻihi kia ʻŌsamu.
ʻI heʻena fonongá, naʻá na sio ki ha fānau kehe ʻoku nau luelue mo honau fāmilí ki he lotú. Naʻe kau ai ha niʻihi ʻo e fānau naʻe angakovi kia ʻŌsamú.
Naʻe ʻeke tailiili ange ʻe ʻŌsamu, “ʻOku nau ʻalu mo kinautolu ki he lotú?”
Naʻe pehē ange ʻe Lini, “ʻOua te ke hohaʻa koe ki ai. ʻE sai pē meʻa kotoa.” Naʻe fai ʻe Lini ha kiʻi lotu ʻi hono lotó ke angalelei ʻa e toenga ʻo e fānaú ki hono kaungāmeʻa foʻoú.
ʻI heʻena hū atu ki he Palaimelí, naʻe malimali mai ʻa e toenga ʻo e fānaú kia Lini. Ka ʻi heʻenau sio kia ʻŌsamú, naʻe ʻikai toe malimali ha niʻihi ia. Naʻe hangē naʻa nau kiʻi hohaʻa mo tailiilí.
Naʻe lau ʻe Sisitā Moiō ha potufolofola. “Tuku ke ulo pehē hoʻomou māmá ʻi he ʻao ʻo e kakaí, koeʻuhí ke nau mamata ki hoʻomou ngaahi ngāue leleí, pea fakamālōʻia ʻa hoʻomou Tamai ʻa ia ʻoku ʻi he langí.”* Naʻá ne sio hake ki he fānaú. “Te tau lava ʻo vahevahe atu ʻetau māmá ʻaki hono fakahaaʻi ha ʻofa ki he niʻihi kehé. ʻE lava nai ʻe ha taha ʻo vahevahe ʻa e founga naʻá ke tokoniʻi ai ha taha ke ne ongoʻi ʻoku ʻofaʻi iá?”
Naʻe ʻikai ke lea ha taha. Naʻe tātā ʻe ha fānau ʻe niʻihi honau vaʻé ʻi honau lalo seá.
Ka naʻe faifai pea pehē mai ʻe ha taha ʻo e tamaiki tangatá, “ʻE, ʻŌsamu, naʻe ʻikai ke mau fuʻu angalelei kiate koe. ʻOku mau kole fakamolemole atu ʻi heʻemau ʻai koe ke ke tangí. Te ke lava ʻo fakamolemoleʻi kimautolu?”
Naʻe sio ʻa Lini kia ʻŌsamu. Ko e hā nai haʻane lea ʻe fai?
Naʻe kamokamo māmālie pē ʻa ʻŌsamu. Naʻá ne pehē ange, “ʻIo. ʻOku ou fakamolemoleʻi kimoutolu.”
Naʻe malimali ʻa Sisitā Moiō. “Ko ha meʻa loto-toʻa mo angaʻofa ia meiate kimoua lōua. ʻOku ou ʻiloʻi kuó mo ʻai ke fiefia moʻoni ʻa e Fakamoʻuí.”
ʻI he ʻaho hono hokó, naʻe tangutu ʻa Lini mo ʻŌsamu ʻi he lalo ʻakaú ʻo hivaʻi ha ngaahi hiva naʻá na ako ʻi he Palaimelí. Naʻe fanongo mai ʻa e toenga ʻo e fānaú ki heʻena hivá pea nau kau fakataha mo kinaua. Naʻa nau hiva leʻolahi hono kotoa.
Naʻe fuʻu ongoʻi fiefia ʻaupito ʻa Lini. Naʻá ne houngaʻia ʻi heʻene vahevahe ʻa e ʻofa ʻa Sīsū Kalaisí mo hono kaungāmeʻá.
ʻŪ tā fakatātā ʻa Katie Rewse