“Ko e Fehuʻi ki he Lotú,” Kaumeʻá, ʻEpeleli 2024, 36–37.
Ko e Fehuʻi ki he Lotú
Naʻe fanongo moʻoni nai ʻa e ʻOtuá ʻi he taimi naʻe lotu ai ʻa Sositalá?
Naʻe hoko ʻa e talanoa ko ʻení ʻi he ʻIunaiteti Siteiti ʻo ʻAmeliká.
Naʻe tokoto ʻa Sositala ʻi hono mohenga fungavaká, ʻo sio hake ki he mohenga ʻi ʻolunga ʻiate iá. Naʻe toki fai pē ʻa ʻenau lotu fakafāmilí, pea kuo taimi ke mohe. Naʻe teʻeki ai ke fai ʻene lotu kimuʻa peá ne toki mohé.
Ko e hā ʻoku fiemaʻu ai ke tau lotú? ko ʻene fifilí ia. ʻOku lea ʻaki maʻu pē ʻe hono fāmilí ʻa e meʻa tatau, hangē ko e fakamālō ki he ʻOtuá mo kole kiate Ia ha ngaahi misi ʻoku leleí. Naʻe tali moʻoni nai ʻenau lotú? He ko e taimi ʻe niʻihi ʻoku ʻikai ke faʻa lelei ʻene ngaahi misí.
Ko e hā ha meʻa ʻe hoko kapau he ʻikai ke ne toe lotu? Naʻá ne mateuteu ke tesiʻi ʻene foʻi fakakaukau foʻoú, naʻá ne mafuli leva ki he tafaʻakí ʻo mohe.
ʻI he ngaahi ʻaho hono hokó, naʻe ʻikai ke toe lotu ʻa Sositala ia. Naʻe ʻosi atu ha ngaahi ʻaho pea aʻu ʻo lau uike. Naʻe ʻikai ke loko ʻi ai ha meʻa ia ʻe liliu. Naʻe ʻikai ke ne ongoʻi ʻe ia ha faikehekehe.
Naʻá ne ʻosiki ʻa e toenga ʻo e taʻu fakaakó, pea naʻe ʻikai fuoloa kuo hokosia ʻa e taimi tutuku ʻa e akó ki he faʻahitaʻu māfaná. Naʻe fiefia ʻa Sositala he ʻalu ki he kalasi ako kakaú mo e vaʻinga mo ʻene fanga kulií. Naʻá ne feʻiloaki mo hono ngaahi kāsiní ʻi ha fakataha fakafāmili tokolahi.
Naʻá ne kau fakataha mo hono fāmilí ʻi he pō kotoa pē ke lotu. Ka naʻe ʻikai pē ke toe fai ʻene lotu fakatāutahá.
Naʻe vave pē ʻa e ʻosi ʻa e faʻahitaʻu māfaná, pea kamata leva e teuteu ʻa Sositala ke foki ki he akó. Ka naʻe ʻikai ke ne teitei ongoʻi fiefia. ʻI ha ngaahi ʻaho siʻi kimuʻa pea fokotuʻu ʻa e akó, naʻá ne feʻiloaki mo ʻene faiako foʻoú, maʻu ʻene loká, pea maʻu mo ha kato naunau foʻou. Ko e taimi kotoa pē naʻá ne fakakaukau ai ki he ʻalu ki he akó, naʻá ne ongoʻi puke. Naʻe fakaʻau ke toe kovi ange ʻa e ongo ko iá ʻi he ʻaho kotoa pē.
ʻI ha pō ʻe taha naʻá ne ʻāʻā pē ʻi hono mohengá ʻo fakakaukau ki he akó. ʻOku ʻikai ke u fie foki au ki he akó. Naʻá ne fakakaukau, ʻoku fakailifia ia. Naʻá ne manatuʻi leva ʻa e meʻa naʻe akoʻi ange ʻe heʻene ongomātuʻá fekauʻaki mo e lotú. Naʻá na talaange te ne lava ʻo lotu ʻi ha feituʻu pē pea te ne lava ʻo lotua ha tokoni mo ha fakafiemālie.
Naʻe tūʻulutui ʻa Sositala ʻi hono veʻe mohengá ʻo mihiʻi lōloa ʻene mānavá. Ko e fuofua taimi ia hili ha ngaahi māhina lahi ke ne fai ai haʻane lotu pē ʻaʻana. Naʻá ne lotu ki he Tamai Hēvaní. Naʻá ne fakamālō kiate Ia mo kole kiate Ia ha ngaahi misi lelei ʻo hangē ko ia naʻa nau fai ʻi he ngaahi lotu fakafāmilí. ʻI he ʻosi ʻene lotú, naʻe ʻikai ke ne ongoʻi ʻe ia ha meʻa makehe.
ʻI he pō hono hokó, naʻá ne toe fai pē ha lotu. Pea toe lotu. Naʻá ne kole ki he Tamai Hēvaní ke tāpuakiʻi ʻa e palōfitá mo hono fāmilí. Naʻe ‘ikai fuoloa kuó ne talaange kiate Ia ʻa e ngaahi ongo naʻá ne maʻú mo e meʻa naʻá ne ʻamanaki ki ai ʻi heʻene ʻapiako foʻoú.
ʻI ha pō ʻe taha naʻá ne lotu ai ʻo pehē, “Tamai Hēvani, ʻoku ou manavasiʻi ʻaupito ke ʻalu ki he akó. ʻOku ʻikai ke u lava ʻo mohe. Te ke lava ʻo tokoniʻi au ke ʻoua te u toe ongoʻi manavasiʻi?” Naʻá ne ongoʻi ha fiemālie lahi ʻokú ne takatakaiʻi ia, ʻo meimei hangē ha sipi kafu māfaná. Naʻá ne ʻiloʻi leva ʻi he taimi pē ko iá, ko e Laumālie Māʻoniʻoní ia.
Naʻá ne fakakaukau, tā ko e ʻuhinga ʻeni ʻoku tau lotu aí. Ke ongoʻi ʻa e ʻofa ʻa e Tamai Hēvaní. Ko ha ongo fakaofo ia. ʻI he ngaahi māhina kotoa ko ia naʻe ʻikai ke ne lotu aí, naʻe ʻikai ke ne maʻu ʻa e ongo ko ʻení.
Naʻe malimali ʻa Sositala. Naʻá ne kei manavasiʻi pē ki he fokotuʻu ʻa e akó, ka naʻá ne ongoʻi loto-toʻa ange ʻi heʻene ʻiloʻi ʻe lava ke fakafiemālieʻi ia ʻe he ʻOtuá. ʻOku lava moʻoni ke ne lotua ha fakafiemālie ʻi ha faʻahinga taimi pē, ʻi ha feituʻu pē, koeʻuhí he ʻoku fanongo moʻoni mai ʻa e ʻOtuá.
ʻŪ tā fakatātā ʻa Kevin Fales