1 Nefia 6–7

Mamantatra “ny zavatr’ Andriamanitra”

I Nefia sy ireo rahalahiny miresaka amin’i Isimaela

Raha tokony hanoratra rakitsoratra hotehirizina ho an’ny taranaka ho avy mba hianarany ianao, dia inona no mety hampidirinao ao? Naneho ny faniriany i Nefia mba hahatonga ny zavatra nosoratany hahafaly an’ Andriamanitra sy handresy lahatra ny hafa hanaraka an’i Jesoa Kristy. Ity lesona ity dia hanampy anao hahatakatra ny fomba ahafahan’ny Bokin’i Môrmôna manampy anao amin’ny fandalinana ataonao sy amin’ny fiainanao.

Inona no antony handalinana ny Bokin’i Môrmôna?

Alaovy sary an-tsaina ny mety hamalianao raha ametrahan’ny olona iray ireto fanontaniana manaraka ireto ianao:

• Be dia be ny boky mombana fivavahana sy ny fahatongavana ho olona tsara kokoa, koa nahoana aho no tokony hamaky ny Bokin’i Môrmôna? Hitondra inona ho ahy izany? Inona no mampiavaka na maha-tsara kokoa azy io noho ny boky hafa?

Nizara ny fikasany na ny tanjony i Nefia tamin’ny alalan’ny firaketana an-tsoratra ny zavatra nataony ao amin’ny Bokin’i Môrmôna i Nefia. Ny fahafantarana ireo tanjona ireo dia afaka manampy antsika hahatakatra ny antony tokony hamakiantsika ilay boky sy ny zavatra azon’izany atao ho antsika.

Vakio ny 1 Nefia 6:3–6 ary hevero ny hanisy marika ireo teny na andian-teny izay mampahafantatra ny tanjon’i Nefia tamin’ny fanaovany ny rakitsorany. Mety hanampy ny mahafantatra fa “ny Andriamanitr’i Abrahama, … i Isaka, ary … i Jakoba” (andininy 4) dia anarana fiantsoana an’i Jesoa Kristy.

sary famantarana, raketo an-tsoratra

1. Valio ity fanontaniana manaraka ity:

   • Ahoana no hanazavanao ny antony niraketan’i Nefia an-tsoratra ny zavatra nataony?

Araka ny nambaran’i Nefia dia natao handresena lahatra antsika hanatona an’i Jesoa Kristy ny asasorany ary tsy ahitana afa-tsy zavatra mahafaly an’ Andriamanitra ihany.

Makà fotoana hieritreretana ny zavatra niainanao mikasika ny famakiana ny Bokin’i Môrmôna hatreto.

• Manampy anao hahafantatra ireo zavatra mahafaly an’ Andriamanitra ve ny Bokin’i Môrmôna? Raha izany no izy dia amin’ny fomba ahoana?

• Tsapanao ve fa ny fandalinana ny Bokin’i Môrmôna dia manampy anao hanakaiky kokoa an’i Jesoa Kristy ary ho voavonjy? Nahoana, na raha tsia dia nahoana?

• Ahoana no mety haha-fitahiana eo amin’ny fiainanao ny fahafantarana ny zavatr’ Andriamanitra sy ny fanakaikezana an’i Jesoa Kristy?

Manatona an’i Jesoa Kristy ary mahafantatra ireo zavatra mahafaly an’ Andriamanitra

Fahaizana mandalina soratra masina tena ilaina ny mitady ireo tanjon’i Nefia rehefa mamaky ny Bokin’i Môrmôna ianao. Hanana fahafahana hampihatra ny fanaovana izany ianao rehefa mandalina ny 1 Nefia 7.

Azo zaraina ho ampahany telo lehibe ny tranga tantarain’i Nefia ao amin’ny 1 Nefia 7. Vakio ireto famintinana ny ampahany tsirairay manaraka ireto: Misafidiana iray ary halalino kokoa izany hitadiavana izay zavatra mahafaly an’ Andriamanitra sy manampy antsika hanatona an’i Kristy.

Tapany 1. 1 Nefia 7:1–5. Niverina tany Jerosalema i Nefia sy ireo rahalahiny mba handresy lahatra ny fianakavian’i Isimaela hiara-handeha amin’izy ireo any amin’ny tany nampanantenaina. Namela an’i Nefia sy ireo rahalahiny hanambady ary hanana fianakaviana izany.

Tapany 2. 1 Nefia 7:6–18. Nofatoran’i Lamàna sy i Lemoela i Nefia ary nokasainy havela ho faty tany an-tany foana izy. Saingy nampihatra finoana lehibe i Nefia ka dia nanafaka azy tamin’ny fomba mahagaga ny Tompo.

Tapany 3. 1 Nefia 7:17–22. Tamin-kitsimpo no namelan’i Nefia ireo rahalahiny tamin’ny fikasana hamono azy, ary niara-niverina tany amin’i Lehia sy i Sarià izy ireo.

sary famantarana, raketo an-tsoratra

2. Raketo an-tsoratra ny andalan-tsoratra masina nosafidinao hohalalinina, ary valio ireto fanontaniana manaraka ireto:

   • Inona no nianaranao avy amin’ny fandalinanao ka heverinao fa hahafaly an’ Andriamanitra sy hanampy anao hanatona an’i Kristy?

• Ahoana no ahafahan’ny zavatra nianaranao manampy anao eo amin’ny fiainanao?

Saintsaino ny zavatra niainanao tamin’ny fianarana nataonao androany rehefa nitady manokana ireo zavatra izay hanampy anao hanatona an’i Jesoa Kristy sy mahafaly an’ Andriamanitra ianao.

sary famantarana, raketo an-tsoratra

3. Valio ity fanontaniana manaraka ity:

   • Ahoana no mety hihatsaran’ny fandalinanao soratra masina raha toy izany hatrany no fomba hanaovanao ny fandalinanao?

Tsy voatery atao: Te hianatra misimisy kokoa ve ianao?

Inona avy ireo fitahiana afaka ny ho tonga avy amin’ny fandalinana amin-kitsimpo ny Bokin’i Môrmôna sy ny firaketana an-tsoratra ireo fahamarinana ao anatin’izany?

Hevero ny hijery ity horonan-tsary manaraka ity izay mampiseho zatovo avy any Eorôpa atsinanana manoritsoritra ny zavatra tsapan’izy ireo tamin’ny famakiana ny Bokin’i Môrmôna sy ny firaketana an-tsoratra ny zavatra nianarany.

Nahoana no manan-danja lehibe tokoa amin’ny Tompo ny fianakaviana? Inona no fanovana azoko entina ao amin’ny fianakaviako amin’izao fotoana izao?

Ny soratra masina dia miresaka mikasika ny filan’ireo zanak’i Lehia nanambady mba hahafahany manan-janaka any amin’ny tany nampanantenaina, ary amin’ny alalan’ny mpaminany maoderina isika dia mianatra fa manan-danja lehibe ao amin’ny drafitry ny Tompo ny fianakaviana mba hanatanteraka ny anjarantsika mandrakizay. Mety hanampy anao hahatakatra lalina kokoa ny maha-zava-dehibe ny fianakaviana sy ny zavatra azon’ny herin’ny fianakaviana entina ireto loharano manaraka ireto.

• “Ny fianakaviana: Fanambarana ho an’izao tontolo izao,” ChurchofJesusChrist.org

Ahoana no ahafahako mamela ny hafa?

Nampianatra izao zavatra manaraka izao ny Loholona Jeffrey R. Holland ao amin’ny Kôlejin’ny Apôstôly Roambinifolo:

Ny Loholona Jeffrey R. Holland

“Aza manameloka, dia tsy hohelohina ianareo” [Lioka 6:37], hoy i Kristy raha nampianatra tamin’ny andron’ny Testamenta Vaovao. Ary amin’izao androntsika izao: “Izaho Tompo dia hamela izay tiako havela heloka, fa takiana aminareo kosa ny hamela ny olon-drehetra” [Fotopampianarana sy Fanekempihavanana 64:10]. Manan-danja kosa anefa ho an’ny sasany aminareo izay miaina ao anatin’ny fahoriambe ny mieritreritra ny zavatra tsy nolazainy. Tsy nilaza Izy hoe: “Tsy mahazo mahatsapa fahoriana lalina na alahelo lalina avy amin’ireo zavatra niainana tena mandratra izay nihatra taminareo noho ny zavatra nataon’ny hafa ianareo.” Tsy nilaza koa Izy hoe: “Mba hamelana heloka tanteraka dia tsy maintsy manohy fifandraisana mandratra fo na miverina miaina toe-javatra feno fanararaotana sy manimba ianareo.” Kanefa na dia eo aza ny fanafintohinana faran’izay mahatsiravina mety hitranga amintsika, dia tsy afaka mandresy ny fahoriantsika isika raha tsy rehefa mametraka ny tongotsika eo amin’ny lalan’ny fahasitranana marina ihany. Ilay lalana dia ilay lalan’ny famelan-keloka izay nandehanan’i Jesoa avy any Nazareta, izay miantso antsika tsirairay avy hoe: “Avia, manaraha Ahy” [Lioka 18:22]. (Jeffrey R. Holland, “Ny fanompoana fampihavanana,” Liahona, nôv. 2018, 78–79)

Fony izy tao amin’ny Fitopololahy dia nizara izao manaraka izao ny Loholona Larry J. Echo Hawk:

Ny Loholona Larry J. Echo Hawk

Rahalahy sy ranabavy, misy olona ve eo amin’ny fiainantsika izay nandratra antsika? Mampiandrona lolom-po sy hatezerana izay heverintsika ho tena rariny ve isika? Avelantsika hihazona antsika tsy hamela heloka sy hanadino ve ny avonavom-pontsika? Manasa antsika rehetra aho hamela heloka tanteraka dia hamela ny fahasitranana hitranga ao anatintsika. Ary na dia tsy ho tonga androany aza ny famelana dia fantaro fa rehefa maniry izany sy miezaka ny manao izany isika dia ho avy izany, tahaka ny nahatongavan’izany tamiko tamin’ny farany taorian’ny nahafatesan’ny rahalahiko. (Larry J. Echo Hawk, “Tahaka ny namelan’i Kristy ny helokareo no aoka mba hamelanareo heloka kosa,” Liahona, mey 2018, 16)