1 Նեփի 8.19–38

Ամուր բռնեք Աստծո խոսքից

Աշխարհում շատ մարդիկ ցանկանում են սեր և ուրախություն զգալ, բայց չգիտեն որտեղ գտնել դրանք: Կենաց ծառի իր տեսիլքով Լեքին իմացավ այն ճանապարհը, որ պետք է անցնենք, ու, թե ինչպես մնալ այդ ճանապարհին՝ Աստծո օրհնությունները վայելելու համար: Այս դասը կօգնի ձեզ հետևել Աստծո խոսքին, որը կուղղորդի ձեզ դեպի Նրա մեծագույն օրհնությունները:

Լեքիի տեսիլքը

Մի պահ նայեք Լեքիի տեսիլքը պատկերող այս նկարին: Նրանում պատկերված է ծառը, որը խորհրդանշում է Աստծո սերը և դրա պտուղը, որը խորհրդանշում է Հիսուս Քրիստոսի Քավության միջոցով եկող օրհնությունները (տես Դեյվիդ Ա. Բեդնար, «Լեքիի երազը. ամուր բռնվեք ձողից», Ensign, հոկտեմբեր 2011, 32–37): Այն նաև որոշ լրացուցիչ տարրեր է պարունակում:

• Ի՞նչն ամենաշատը տպավորեց ձեզ այս նկարում:

• Ի՞նչ կարող եք սովորել՝ նայելով նկարին:

Տասներկու Առաքյալների Քվորումի նախագահ Բոյդ Ք. Փաքերը (1924–2015) բացատրել է.

Դուք գուցե կարծեք, որ Լեքիի երազը կամ տեսիլքը ձեզ համար առանձնահատուկ նշանակություն չունի, բայց այդպես չէ: Դուք կաք այնտեղ․ մենք բոլորս ենք այնտեղ: (Բոյդ Ք. Փաքեր, «Գտնենք ինքներս մեզ Լեքիի երազում», Լիահոնա, օգոստոս 2010թ., 22)

Այս դասն ուսումնասիրելիս փնտրեք Երկնային Հոր ուղղորդումը, որպեսզի հասկանաք, թե Լեքիի տեսիլքն ինչ կապ կարող է ունենալ ձեր կյանքի հետ: Փնտրեք ճշմարտություններ, որոնք կարող են օգնել ձեզ Փրկչի միջոցով ստանալ խոստացված ուրախությունը, ինչպես նաև իմանալ, թե ինչ խոչընդոտներից կարիք կլինի խուսափել կամ որոնք հաղթահարել:

Շատ մարդիկ առաջ են ընթանում

Իր երազում Լեքին «մարդկանց անհամար բազմություններ» տեսավ (1 Նեփի 8.21), որոնք փորձում էին ճանապարհ գտնել դեպի կենաց ծառը: Նրանք մի քանի տարրերի հանդիպեցին, որոնք թույլ չէին տալիս նրանց մոտենալ ծառին. խավարի մշուշները, երկաթե ձողը և մարդիկ մեծ ու ընդարձակ շենքում: Այս երեք տարրերը կարող եք տեսնել վերևի նկարում:

1 Նեփի 8.22–34 հատվածները կարդալիս փնտրեք այդ տարրերը և մտածեք, թե դրանք ինչ կարող են խորհրդանշել: Կարող եք դիտել նաև «Լեքին տեսնում է երկաթե ձող և նրանց, ովքեր հեռանում են» տեսանյութը (3:30), որը հասանելի է ChurchofJesusChrist.org կայքում:

Lehi Sees an Iron Rod and Those Who Fall Away | 1 Nephi 8:19–28

1 Nephi 8:19–28 | Lehi sees a rod of iron and a parallel path in his vision that lead to the tree of life. Concourses of people try to make their way to the tree, and many are lost.

1. Ձեր օրագրում պարզ ձևով նկարեք խավարի մշուշները և մեծ ու ընդարձակ շենքը:

   • Ձեր կարծիքով, ի՞նչ են խորհրդանշում Լեքիի տեսիլքի այս տարրերը:

   Ավելի ուշ Նեփին տեսիլքում տեսավ, թե իր հայրն ինչ էր տեսել և մեկնաբանեց այդ խորհրդանիշները: Կարդացեք 1 Նեփի 12.17–18 հատվածները և գտեք, թե ինչ էր ուսուցանում Նեփին: Գրի առեք ձեր սովորածը:

   • Մեր օրերում ինչպե՞ս են արտահայտվում մեծ ու ընդարձակ շենքը և խավարի մշուշները:

   • Այդ խոչընդոտներն այսօր ինչպե՞ս են նպաստում նրան, որ մարդիկ շեղվեն իրենց ուղուց:

   • Ի՞նչ կարևոր բան իմացաք ձեր կյանքի ուղին հասկանալու համար:

Մտածեք ձեզ հանդիպող գայթակղությունների մասին, և ինչ ազդեցություն կարող է ունենալ հպարտությունը ձեզ վրա: Խորհեք, թե այդ գայթակղությունները ինչպես կարող են շեղել կամ խանգարել ձեզ մոտենալ Քրիստոսին և զգալ Աստծո սերը:

Ի՞նչ օգնություն է առաջարկում մեզ Աստված

Լեքիի տեսիլքում Աստված նաև ճանապարհներ էր պատրաստել, որոնցով օգնում էր իր զավակներին մոտենալ ծառին: Դեպի ծառը տանող «մի նեղ ու անձուկ արահետ» կար (1 Նեփի 8.20): Արահետից բացի Նա մի «երկաթե ձող» տվեց, որն ուղղորդում էր մարդկանց (1 Նեփի 8.19, 24, 30):

• Ըստ ձեզ՝ ի՞նչն էր էական ձողի երկաթե լինելու մեջ:

Կարդացեք 1 Նեփի 15.23–25 հատվածները և բացահայտեք, թե ինչ էր ուսուցանում Նեփին ձողի նշանակության և դրա վերաբերյալ իր խոստումների մասին:

• Ի՞նչն ամենաշատը տպավորեց ձեզ այս հատվածներում:

2. Ձեր օրագրում պատկերեք երկաթե ձող և գրեք, թե ինչ է այն խորհրդանշում:

Կարող ենք սովորել հետևյալ ճշմարտությունը, որ եթե ականջալուր լինենք և ամուր բռնենք Տիրոջ խոսքից, հակառակորդի գայթակղությունները չեն հաղթի մեզ:

• Սուրբ գրություններում գրված և մարգարեների շուրթերից հնչող Տիրոջ խոսքը ինչպե՞ս կարող է անվտանգություն և ուժ տալ գայթակղության ժամին:

• Ի՞նչ օրինակներ կան այն բանի համար, որ Աստծո խոսքը կարող է առաջնորդել մեզ՝ ստանալու այն օրհնություններն ու ուրախությունը, որ գալիս են Փրկչի Քավության միջոցով:

• Այս ճշմարտությունն ի՞նչ է ուսուցանում ձեզ Տիրոջ մասին:

Այս դասն ավարտելու համար խորհեք, թե որտեղ եք դուք այդ տեսիլքում: Ինչպե՞ս եք եկել դեպի Փրկիչը և ինչպես եք շարունակում ձգտել դեպի Նա: Ի՞նչ շեղումների և գայթակղությունների եք հանդիպում: Ինչպե՞ս է Տերն օգնում ձեզ Իր խոսքի միջոցով:

Կարող եք գնահատել սուրբ գրությունների ուսումնասիրության ձեր նպատակը, և ինչպես է այն օգնում ձեզ, ինչպես նաև նշել ցանկացած բարելավում կամ փոփոխություն, որ կցանկանայիք կատարել: Եթե ուսումնասիրության նպատակ չունեք, կարող եք մի քանի րոպե մտածել այդ ուղղությամբ:

Ընտրովի. Ցանկանո՞ւմ եք ավելին իմանալ

Ինչպե՞ս ամուր բռնեմ երկաթե ձողը

Տասներկու Առաքյալների Քվորումից երեց Դեյվիդ Ա. Բեդնարը բացատրել է.

Թույլ տվեք առաջարկել, որ երկաթե ձողից ամուր բռնելը, լայն իմաստով, նշանակում է սուրբ գրությունների հետևողական, ջանասիրաբար և աղոթքով կիրառում՝ որպես հայտնված ճշմարտության վստահելի աղբյուր և հուսալի ուղեցույց՝ շարժվելու նեղ ու անձուկ արահետով դեպի կենաց ծառը, այսինքն՝ Տեր Հիսուս Քրիստոսը (Դեյվիդ Ա. Բեդնար, «Լեքիի երազը. ամուր բռնվեք ձողից», Ensign, հոկտեմբեր 2011թ., 36):

Ինչպե՞ս խուսափեմ խավարի մշուշների կուրացումից

Տասներկու Առաքյալների Քվորումից երեց Ջեֆրի Ռ. Հոլլանդն ուսուցանել է.

Հարկ է նշել, որ խավարի այդ մշուշները բոլոր ճամփորդներին են համակում, ինչպես հավատացյալ և վճռական (ընտրյալներին, եթե կարող ենք այդպես ասել), այնպես էլ թույլ ու չկողմնորոշված ճամփորդներին: Այս պատմության առանցքային կետն այն է, որ հաջողակ ճամփորդները դիմակայում են բոլոր շեղումներին, այդ թվում՝ արգելված ճանապարհների գայթակղությանը, ինչպես նաև նրանց ծաղրանքին, ովքեր ընտրել են փառասիրության ու հպարտության ճանապարհը։ (Ջեֆրի Ռ. Հոլլանդ, «Անվտանգություն Հոգու համար», նոյեմբեր 2009, Լիահոնա, 88)

Յոթանասունից երեց Քեվին Վ. Փիրսոնն ասել է․

Եթե մենք «անընդհատ ամուր չբռնենք» [1 Նեփի 8.30] Աստծո խոսքից և չապրենք դրա համաձայն, մենք կդառնանք ավելի շուտ հոգևորապես կուրացած, քան հոգևոր մտածողությամբ: Քննեք Մորմոնի գիրքը և կենդանի մարգարեների խոսքերը յուրաքանչյո՛ւր օր, յուրաքանչյո՛ւր օր, յուրաքանչյո՛ւր օր: Դա հոգևոր կենդանության և խաբեությունից խուսափելու բանալին է: Առանց դրա մենք հոգեպես մոլորված ենք (Քեվին Վ. Փիրսոն, «Մնալ կենաց ծառի մոտ», Լիահոնա, մայիս 2015թ., 115):

Ուրիշ ի՞նչ նյութեր կարող են օգնել ինձ պատկերացնել և հասկանալ կենաց ծառի մասին Լեքիի տեսիլքը:

Ստորև ներկայացվող տեսանյութերը, որոնք հասանելի են ChurchofJesusChrist.org կայքում, կարող են օգնել պատկերացնել Լեքիի տեսիլքի առանձին հատվածները. «Լեքին հրավիրում է իր ընտանիքին ճաշակել ծառի պտուղը» (3:23) և «Հավատքով ճաշակել ծառի պտուղը» (3:28):

Lehi Invites His Family to Partake of the Fruit of the Tree 1 Nephi–8:12–18

1 Nephi 8:12–18 | Lehi partakes of the fruit of the tree of life. He desires to share it with his family. Sariah, Sam, and Nephi come and partake, but Laman and Lemuel refuse.

The Faithful Partake of the Fruit of the Tree | 1 Nephi 8:29–30

1 Nephi 8:29–30 | Multitudes of people reach the tree of life and partake of the fruit by faithfully holding on to the rod of iron.