1 Նեփի 10, 11.1–6

«Որն է այն բանը, որ ես կարող եմ տեսնել, լսել և իմանալ»

Ե՞րբ է ձեզ մոտ հետաքրքրություն առաջացել պարզելու, թե արդյոք ձեր լսածը ճշմարիտ է: Ի՞նչ ջանքեր եք գործադրել, և ո՞վ է օգնել ձեզ: Կենաց ծառի մասին իր հոր՝ Լեքիի ուսմունքը և Հիսուս Քրիստոսի Գալուստի մասին մարգարեությունը լսելուց հետո Նեփին ցանկացավ իր համար իմանալ հոր խոսքերի ճշմարտացիությունը: Այս դասը կարող է օգնել ձեզ Տիրոջից ջանասիրաբար գիտելիք փնտրելու ձեր ջանքերում:

Երբ խոսում են մարգարեները

Պատկերացրեք, որ երիտասարդության համաշխարհային հոգևոր հավաքի ժամանակ մարգարեն երիտասարդությանը հավատքով գործելու մի քանի կոչ է արել:

• Ի՞նչ տարբեր արձագանքներ կարող են ունենալ երիտասարդները:

• Ըստ ձեզ՝ ինչո՞ւ են այս տարբեր արձագանքները առաջ գալիս:

• Այս արձագանքներն ինչպե՞ս կարող են ազդել նրանց կյանքի վրա այժմ կամ ապագայում:

Մտածեք, թե դուք ինչպես եք արձագանքել մարգարեի ուսմունքներին և ինչո՞ւ: Ձեր արձագանքներն ի՞նչ ազդեցություն են ունեցել ձեզ վրա: Այս դասն ուսումնասիրելիս փորձեք սովորել սուրբ գրությունների մարգարեական ուսմունքների տարբեր արձագանքներից և մտածեք, թե դրանք որքանո՞վ են կիրառելի ձեզ համար:

Իմանալու ցանկություն

Երբ Լեքին կենաց ծառի մասին իր տեսիլքը պատմեց իր ընտանիքին (տես 1 Նեփի 8), նա վկայեց, որ Հիսուս Քրիստոսն իրագործելու է Իր Քավությունը (տես 1 Նեփի 10.1–16): Լեքիի որդիները տարբեր արձագանքներ ունեցան նրա ոգևորված ուսմունքներին:

Կարդացեք 1 Նեփի 10.17–19 և 15.1–3, 8–9 հատվածները՝ համեմատելով Նեփիի, Լամանի և Լեմուելի արձագանքն իրենց հոր խոսքերին: Կարող եք գրի առնել այն խոսքերն ու արտահայտությունները, որոնք տպավորիչ էին ձեզ համար:

• Ի՞նչ նկատեցիք, ինչո՞վ էին տարբերվում Նեփիի և նրա եղբայրների արձագանքները նույն ուղերձին:

• Ինչո՞ւմ էր համոզված Նեփին Աստծո վերաբերյալ: Ինչո՞ւմ էին համոզված Լամանը և Լեմուելը (տես 1 Նեփի 10.17–18, 15.9):

• Ըստ ձեզ՝ նրանց տարբեր համոզմունքներն ու արձագանքները ի՞նչ ազդեցություն ունեցան նրանց վրա:

Նեփիի հասկացած ճշմարտություններից մեկն այն էր, որ Աստված բացահայտում է մեզ ճշմարտությունը Սուրբ Հոգու միջոցով, երբ մենք ջանասիրաբար խնդրում ենք Նրան:

• Նեփին ի՞նչ փորձառություններ էր ունեցել, որոնք օգնել էին նրան հանգել Աստծո մասին այս իմացությանը:

Նեփիի փորձառությունների մասին մտածելիս կարող եք մտաբերել ձեր անցյալ փորձառությունները, որ ունեցել եք, երբ Երկնային Հայրը բացահայտել է ձեզ ճշմարտությունը: Ձեր օրագրում կարող եք նշել, թե ինչպես է Նա օրհնել ձեզ:

Ճշմարտության որոնում Աստծուց

Նեփին իմացավ, որ Երկնային Հայրն օրհնում է մեզ Սուրբ Հոգով, երբ մենք Նրանից ճշմարտություն եք փնտրում: Այս ճշմարտությունն առավել խորն ուսումնասիրելու համար ձեր օրագրի որևէ էջում երկու սյունակ գծեք: Մի սյունակն անվանեք «Աստծուց ջանասիրաբար ճշմարտություն որոնելու ձևեր», իսկ մյուսը՝ «Ուղիներ, որոնցով Աստված բացահայտում է ճշմարտությունը Սուրբ Հոգու միջոցով»: Յուրաքանչյուր սյունակում գրեք ձեր մտքին եկած մի քանի գաղափար: Կարող եք ներառել գաղափարներ, որոնք իմացել եք 1 Նեփի 10.17–19 հատվածներից:

Կարդացեք 1 Նեփի 11.1–6 հատվածները և գտեք, թե ինչ արեց Նեփին ճշմարտություն որոնելու համար, և ինչպես Հոգին օգնեց նրան: Դուրս գրեք առանձին բառեր և արտահայտություններ, որոնք առանձնանում են ձեզ համար: Կարող եք ձեր օրագրում լրացումներ կատարել սյունակներում:

Որպեսզի տեսնեք, թե ինչպես էր մերօրյա առաքյալը պատանի հասակում Տիրոջից պատասխաններ փնտրում, դիտեք «Ինչպես եմ ես #ԼսումՆրան. Երեց Ռոնալդ Ա. Ռասբանդ» տեսանյութը (2:55), որը կգտնեք ChurchofJesusChrist.org կայքում: Մտածեք, թե երեց Ռասբանդը ինչպես հետևեց ճշմարտությունը փնտրելու նմանատիպ օրինակին և օրհնվեց Տիրոջ կողմից: Ձեր օրագրի սյունակներում նոր գաղափարներ ավելացրեք:

How I #HearHim: Elder Ronald A. Rasband

How do you #HearHim? Elder Ronald A. Rasband says that we can #HearHim through promptings that we receive while reading the Holy Scriptures.

Նայեք ձեր գրառումներին և գտեք, թե ինչպես է Աստված բացահայտում ճշմարտությունը Սուրբ Հոգու միջոցով, երբ մենք ջանասիրաբար խնդրում ենք Նրան: Մտածեք, թե ինչպես եք տեսել, որ դրանցից մի քանիսը ճշմարիտ են ձեր կյանքում: Ինչ ճանապարհներով է ձեր կապն ամրապնդվել Երկնային Հոր հետ, երբ անկեղծորեն փնտրել եք Նրան:

Անձնական հայտնությունը կարևոր է

Քանի որ Նեփին ցանկանում էր ինքնուրույն սովորել և պատասխանների համար դիմեց Տիրոջը, նա տեսավ այն, ինչ տեսել էր նրա հայրը՝ Լեքին, և նրան ապագայում երկրի վրա տեղի ունեցող բազմաթիվ իրադարձություններ երևացին: (Նեփիի տեսիլքի մասին ավելին իմանալու համար տես 1 Նեփի 11–14:) Նեղ ու անձուկ արահետի մասին Նեփիի տեսիլքը փոխեց նրա կյանքը: Ավելի ուշ բոլորի համար նա գրի առավ իր քաջալերումը, որպեսզի բոլորը հետևեն այդ նույն ուղուն (տես 2 Նեփի 31.18–21):

1. Ձեր օրագրերում առնվազն երեք նախադասությամբ գրեք այն, ինչ սովորեցիք այս դասից:

   Ձեր մտքերը շարադրելու համար կարող եք պատասխանել հետևյալ հարցերից մեկին կամ մի քանիսին.

   • Ի՞նչ սովորեցիք այն մասին, թե ինչու են կարևոր ձեր արձագանքները ոգեշնչված ուսմունքներին:

   • Ինչպե՞ս կարող եք կիրառել այն, ինչ իմացաք ճշմարտությունը ջանասիրաբար որոնելու մասին:

   • Ի՞նչ սովորեցիք Երկնային Հոր և Հիսուս Քրիստոսի մասին, որը ոգեշնչում է ձեզ ավելի մոտենալ Նրանց:

Ընտրովի. Ցանկանո՞ւմ եք ավելին իմանալ

Որո՞նք են այն մի քանի պատճառները, որ մենք երբեմն մեր հարցերով չենք դիմում Երկնային Հորը:

Երեխաների միության գերագույն նախագահության նախագահ Քամիլ Ն․ Ջոնսոնը նկատել է.

Գուցե այն պատճառով, որ մենք հավատք չունենք ընդունելու այն պատասխանը, որը կարող ենք ստանալ: Գուցե պատճառն այն է, որ մեր մեջ եղած բնական տղամարդը կամ կինը դիմադրում են այն բանին, որ կյանքի գործերն ամբողջությամբ շրջեն դեպի Տերը և անմնացորդ վստահեն Նրան։ (Քամիլ Ն. Ջոնսոն, «Դարձրեք Քրիստոսին ձեր կյանքի պատմության հեղինակ», Լիահոնա, նոյեմբեր 2021թ., 80–81):

Ինչպե՞ս եմ ես խորհում

Նախքան Յոթանասունին կոչով դիմելը՝ երեց Ջերալդ Ն. Լանդը նկատել է.

Ժամանակ տրամադրեք խորհելու և մտածելու համար: Հեռացեք կյանքի եռուզեռից: Գտեք հանգիստ մի վայր և ժամանակ տրամադրեք պարզապես նստելու և մտածելու, ձեր մտքերին ու զգացմունքներին ուշադրություն դարձնելու, Հոգու հուշումներն ընդունելու համար: …

Երբեմն մենք պետք է միտումնավոր մի կողմ դնենք աշխարհի հոգսերը, մի կողմ դնենք մեր առօրյա կյանքի շտապողականությունը և գտնենք մի խաղաղ վայր ու խաղաղ պահ, որ նստենք ու խորհենք, խորհրդածենք և լսենք այդ մեղմ ձայնը, որը շշնջում է: (Ջերալդ Ն. Լանդ, «Տիրոջ ձայնը» [Բրիգամ Յանգ համալսարանի հոգևոր հավաք, 2-ը դեկտեմբերի, 1997թ.], 9–10, speeches.byu.edu)