2 Nefia 21–24

Ny Arivotaona

Alaivo sary an-tsaina hoe hanao ahoana ny fiainana raha tsy nisy ratsy teto amin’izao tontolo izao. Indray andro any dia ho toy izany izao tontolo izao. Hitranga mandritra ny fanjakan’i Jesoa Kristy mandritra ny arivo taona izany. Mpaminany maro, anisan’izany i Nefia sy i Isaia, no naminany momba ny 1000 taona feno fiadanana antsoina hoe Arivotaona. Afaka manampy anao hahatakatra sy hiomana amin’ny fanjakana arivo taonan’i Jesoa Kristy ity lesona ity.

Ny hoavy

• Inona ireo zavatra manan-danja sasantsasany izay hitranga amin’ny ho avy andrandrainao? Nahoana?

• Inona no zavatra tsapanao rehefa mieritreritra momba ireo zavatra hitranga ireo ianao?

• Inona no ataonao mba hiomanana?

Ny Arivotaona

Zavatra hitranga iray manan-danja amin’ny ho avy ny Arivotaona.

• Inona no zavatra fantatrao momba ny Arivotaona? Inona avy no fanontaniana anananao momba izany?

Azonao atao ny manoratra ireo fanontaniana anananao sy mamela toerana malalaka hasiana fanamarihana. Rehefa mandalina ianao anio, dia tadiavo ny valin’ireo fanontaniana anananao.

I Nefia mpaminany dia nanoratra momba ny andro farany ary nampiditra ny maro tamin’ireo faminanian’i Isaia momba ny andro farany. I Isaia dia naminany momba ny fandravana an’i Asyria sy i Babylona ho toy ny karazana fandravana amin’ny Fiaviana Fanindroany (jereo ny 2 Nefia 20; 23). Naminany momba ny Famerenana ny filazantsara amin’ny laoniny izay hialoha lalana ny fanjakana arivo taonan’i Jesoa Kristy ihany koa izy. Ireo faminaniany dia feno tandindona sy fanoharana izay manampy lalindalina kokoa ny fahatakarantsika ny Arivotaona.

Vakio ireto faminaniana avy amin’i Nefia sy i Isaia manaraka ireto ary mitadiava famaritana ny Arivotaona.

Azonao atao ny manao ny sarin’ny sasany amin’ireo famaritana.

• 1 Nefia 22:24–26

• 2 Nefia 21:6–9

• 2 Nefia 22:1–6

• 2 Nefia 24:3, 7

1. Valio ireto fanontaniana manaraka ireto:

   • Raha avy amin’ireo famaritana ireo dia ahoana araka ny hevitrao no haha-hafa ny fiainanao amin’ny Arivotaona?

   • Inona avy no famaritana momba ny Mpamonjy hitanao? Inona no ampianarin’izany anao momba Azy?

Iray amin’ireo fahamarinana ianarantsika avy amin’ireo soratra masina ireo ny hoe i Jesoa Kristy dia hanjaka eto an-tany ao anatin’ny fahamarinana sy fiadanana mandritra ny Arivotaona.

Alaivo sary ao an-tsainao hoe hanao ahoana izany hiaina mandritra ny Arivotaona izany, rehefa manjaka ao anatin’ny fahamarinana sy fiadanana ny Mpamonjy. Diniho ny fomba ahafahan’ny fiadanan’ny Mpamonjy mitahy ny fiainanao.

Ny Filoha Dallin H. Oaks ao amin’ny Fiadidiana Voalohany dia namaritra fitahiana iray hafan’ny Arivotaona:

Manakantsakana ny zavatra tsara tokony hitranga sy manemotra ny fahatanterahan’ireo fitahiana nampanantenaina ny maha-tokan-tena, ny tsy fananan-janaka, ny fahafatesana, ary ny fisaraham-panambadiana. … Ny Tompo dia nampanantena fa any amin’ny mandrakizay dia tsy hisy fitahiana tsy homena ireo zanakalahy sy zanakavavy izay nitandrina ny didy, izay tsy nivadika tamin’ny fanekempihavanany, ary naniry ny hanao ny marina.

Maro amin’ireo zavatra tena manan-danja tsy afaka notanterahina teto amin’ny fiainana an-tany no hamboarina amin’ny Arivotaona, izay fotoan’ny fahatontosan’ny zava-drehetra tsy tò tao amin’ny drafitra lehiben’ny fahasambarana ho an’ny zanaky ny Ray any an-danitra mendrika rehetra. Fantatsika fa marina izany raha ireo ôrdônansin’ny tempoly no lazaina. Inoako ihany koa fa ho marina izany eo amin’ny fifandraisan’ny fianakaviana sy ireo zavatra iainan’ny fianakaviana. (Filoha Dallin H. Oaks, “The Great Plan of Happiness,” Ensign, Nov. 1993, 75)

2. Valio ny roa na maromaro amin’ireto fanontaniana manaraka ireto:

   • Inona no ampianarin’io teny nambara io anao momba ny Ray any An-danitra sy i Jesoa Kristy?

   • Inona amin’ireo fitahian’ny Arivotaona no tena irinao indrindra? Nahoana?

   • Inona no valiny hitanao tamin’ireo fanontanianao momba ny Arivotaona nandritra ny lesona?

Mba hahazoana fanampiana misimisy kokoa amin’ny famaliana ireo fanontanianao, dia jereo ny “Arivotaona” ao amin’ny Torolalana ho an’ny Soratra Masina.

Fiomanana ho amin’ny Arivotaona

Tamin’ny 2020 dia nanomboka ny fanavaozana ny Tempolin’i Salt Lake. Niresaka momba ireo fanavaozana ireo ny Loholona Gary E. Stevenson ao amin’ny Kôlejin’ny Apôstôly Roambinifolo. Tadiavo ny fomba nampitahany izany tamin’ny fiainantsika. Jereo ny horonan-tsary hoe “Fanorenana tsara hanoherana ny fotoana ho avy,” hita ao amin’ny ChurchofJesusChrist.org, manomboka amin’ny kaodim-potoana 14:51 hatramin’ny 15:26, na vakio ny fanambarana eo ambany.

Tena fanantenan’ireo mpitarika ato amin’ny Fiangonana ny hoe ireo fanavaozana lehibe hatao amin’ny Tempolin’i Salt Lake dia hanatanteraka ilay fanirian’i Brigham Young “hahita ny tempoly hatsangana amin’ny fomba izay haharetany hatramin’ny arivotaona.” Mandritra ireo taona ho avy dia enga anie ka handrisika sy hanentana antsika, isam-batan’olona na fianakaviana, ireo fanatsarana hatao amin’ny Tempolin’i Salt Lake, ka hahatonga antsika ihany koa, raha atao an’ohatra, “hatsangana amin’ny fomba izay haharitra hatramin’ny arivotaona.” (Gary E. Stevenson, “Fanorenana tsara hanoherana ny fotoana ho avy,” Liahona, mey 2020, 51–52)

• Inona araka ny eritreritrao no dikan’ny hoe “hatsangana amin’ny fomba izay haharitra hatramin’ny arivotaona”?

3. Valio ireto fanontaniana manaraka ireto:

   • Rehefa mieritreritra momba ny fanjakana arivo taonan’ny Mpamonjy ianao dia inona no tsapanao?

   • Inona no azonao atao izao mba hiomanana amin’ny Arivotaona?

   • Inona no olana mety hatrehinao rehefa manao ireo fiomanana ireo ianao?

Tsy voatery atao: Te hianatra bebe kokoa ve ianao?

Ny mpikamban’ny Fiangonan’i Jesoa Kristy ho an’ny Olomasin’ny Andro Farany ihany ve no ho eto an-tany mandritra ny Arivotaona?

Nampianatra ny Filoha Joseph Fielding Smith (1878–1972) hoe:

Ny sasany amin’ny mpikamban’ny Fiangonana dia manana hevi-diso hoe rehefa tonga ny arivotaona dia ho voafafa hiala amin’ny tany ny olona rehetra afa-tsy ireo mpikambana marin-toetra ao amin’ny Fiangonana ihany. Tsy toy izany ilay izy. Hisy olona an-tapitrisany … avy amin’ny saranga rehetra, sy ny finoana rehetra, mbola havela hijanona eto ambonin’ny tany, fa izy ireo dia ireo izay niaina fiainana madio, ireo izay afaka tamin’ny faharatsiana sy fahalovana. …

Amin’ny farany, na izany aza, ny fahalalana ny Tompo dia handrakotra ny tany toy ny ataon’ny rano amin’ny ranomasina. Saingy hilaina ny fitoriana ny filazantsara, aorian’ny fahatafidiran’ny arivotaona, mandra-pahatongan’ny olona rehetra hiova fo na ho faty. (Joseph Fielding Smith, Doctrines of Salvation, 1:86–87)

Hanao ahoana ny fiainana amin’ny Arivotaona?

Nampianatra ny Filoha Brigham Young (1801–1877) hoe:

Toy izao ny Arivotaona: ny olona rehetra ao amin’ny Fiangonana sy ny Fanjakan’ Andriamanitra dia hitambatra ho iray; ilay Fanjakana hiroborobo mba handresena ny zava-drehetra manohitra ny drafitr’ Andriamanitra, ary i Satana dia hafatotra sy hasiana tombokase eo aminy. Ny zavatra hafa rehetra dia ho tahaka azy ireo amin’izao fotoana izao, hihinana isika, hisotro, ary hanao akanjo. …

Mandritra ny arivotaona rehefa tafaorina eto amin-kery sy amim-boninahitra ary ao anatin’ny fahalavorariana ny fanjakan’ Andriamanitra, ary rehefa tapitra ilay fanjakan’ny ratsy izay nanjaka nandritra ny fotoana ela, dia hanana fahafahana hanorina ny tempoliny ireo Olomasin’ Andriamanitra ary hiditra ao anatin’izany ka ho lasa ho toy ny andry eo amin’ny tempolin’ Andriamanitra [jereo ny Apokalypsy 3:12], ary hanatanteraka ny andraikiny amin’ireo havan-tiany efa maty izy ireo. Dia ho hitantsika hanatona ireo namantsika ary, angamba, ireo olon-kafa izay fantatsika tety. … Ary hahazo fanambarana hahafantarana ny razambentsika nanomboka tany amin’ny ray sy renintsika Adama sy Eva isika ka hiditra ny tempolin’ Andriamanitra ary hanatanteraka ny andraikitsika amin’izy ireo. Dia hofehezina amin’ny [zanaka] ny [ray aman-dreny] mandra-pahatonga ny fahalavorarian’ny fitohitohizan’izany hatrany amin’i Adama, mba hisian’ny fitohizan’ny Fisoronana izay lavorary manomboka hatrany amin’i Adama ka hatrany amin’ny fiafaran’izao tontolo izao.

Izany no ho asan’ny Olomasin’ny Andro Farany amin’ny Arivotaona. (Teachings of the Presidents of the Church: Brigham Young [2007], 333–4)

Hisy ve ny Fiangonan’i Jesoa Kristy ho an’ny Olomasin’ny Andro Farany mandritra ny Arivotaona?

Nanambara ny Filoha Russell M. Nelson hoe:

Ity Fiangonana ity dia tsy hoesorina amin’ny toerany, na dia mandritra ny Arivotaona aza. (Russell M. Nelson, “How Firm Our Foundation,” Liahona, May 2002, 76)

1 Nefia 22:26. Ahoana no ahafahan’i Satana ho tsy manana hery?

Nampianatra ny Filoha Spencer W. Kimball (1895–1985) hoe:

Rehefa voafatotra ao amina trano tokana i Satana, rehefa voafatotra ao amina fiainana tokana i Satana, dia efa nanomboka ao amin’izany trano izany, ao amin’izany fiainana izany ny Arivotaona . (Teachings of Spencer W. Kimball, ed. Edward L. Kimball [1982], 172)