2 Nefi 25

Shpëtuar nga Jezu Krishti

A të ka lehtësuar ose shpëtuar dikush nga një situatë e vështirë? Çfarë ndien për atë person pas ndihmës së tij ose të saj? Pasi theksoi rëndësinë e mësimeve profetike, Nefi dëshmoi se vetëm Jezu Krishti e ka fuqinë për t’i shpëtuar të gjithë njerëzit. Ky mësim do të të ndihmojë të kuptosh se si shpëtohesh me anë të hirit të Jezu Krishtit.

E vetmja mënyrë në të cilën mund të shpëtohemi

• A mund të mendosh për një rast kur ti ose dikush që e njeh, u çlirua ose shpëtua? Çfarë ndodhi? Si u ndjeve?

Te 2 Nefi 25, Nefi i kujtoi popullit të tij që profetët dëshmuan se Jezu Krishti është Mesia, që do të thotë I Vajosuri ose Çlirimtari i të gjithë njerëzve (shih tek Udhëzuesi për Shkrimet e Shenjta, “Mesia”, scriptures.ChurchofJesusChrist.org). Nefi shënoi se ndonëse judenjtë do të shpërndaheshin për shkak të mosbesimit të tyre, po të besonin te Jezu Krishti, Zoti do t’i mblidhte dhe do t’i “rivendos[te ata] nga gjendja e tyre e humbur dhe e rënë” (2 Nefi 25:15–17).

Lexo te 2 Nefi 25:18–20, duke kërkuar atë që dha mësim Nefi rreth mënyrës se si judenjtë (dhe të gjithë fëmijët e Perëndisë) do të shpëtohen. Mund të të vijë në ndihmë ta dish se në shkrimet e shenjta, fjala emri mund të përdoret për të përfaqësuar fuqinë ose autoritetin e një personi. Kjo është veçanërisht e vërtetë kur i referohet Shpëtimtarit.

• Nga se na shpëton Jezu Krishti?

• Si do të ishte po të mos e kishim një Shpëtimtar?

Shpëtuar nëpërmjet hirit

Lexo te 2 Nefi 25:23, duke kërkuar se në ç’mënyrë na shpëton Jezu Krishti.

• Cilat janë disa pyetje që mund të bësh për të fituar një kuptueshmëri më të thellë për mësimet e Nefit te vargu 23?

Materiali vijues mund të ndihmojë për t’u dhënë përgjigje pyetjeve që mund të kesh rreth vargut 23.

“Hiri është ndihma ose forca hyjnore që na jepet nëpërmjet Shlyerjes së Zotit Jezu Krisht. …

Hiri është një dhuratë nga Ati Qiellor dhënë nëpërmjet Birit të Tij, Jezu Krishtit. Fjala hir, siç përdoret në shkrimet e shenjta, i referohet së pari fuqisë aftësuese dhe shërimit shpirtëror të ofruar nëpërmjet mëshirës dhe dashurisë së Jezu Krishtit.” (Gospel Topics, “Grace”, topics.ChurchofJesusChrist.org)

Presidenti Diter F. Uhtdorf, asokohe i Presidencës së Parë, shpjegoi:

“Pyes veten nëse ngandonjëherë ne e keqinterpretojmë frazën ‘pas gjithçkaje që ne mund të bëjmë’. Duhet të kuptojmë se fjala ‘pas’ nuk është e barabartë me togfjalëshin ‘për shkak të’.

Ne nuk shpëtohemi ‘për shkak të’ gjithçkaje që ne mund të bëjmë. A e ka bërë ndonjëri prej nesh gjithçka që ne mund të bëjmë? A pret Perëndia derisa ne ta kemi bërë çdo përpjekje, përpara se Ai të ndërhyjë në jetën tonë me hirin e Tij shpëtues?

Shumë njerëz ndihen të shkurajuar ngaqë vazhdimisht nuk ia dalin të bëjnë gjithçka që iu kërkohet. Ata e dinë nga përvoja e tyre se ‘fryma është gati, por mishi është i dobët’ [Mateu 26:41]. Ata e ngrenë zërin e tyre me Nefin duke shpallur: ‘Shpirti im pikëllohet për shkak të paudhësive të mia’ [2 Nefi 4:17].

Jam i sigurt që Nefi e dinte se hiri i Shpëtimtarit na lejon dhe aftëson ta mposhtim mëkatin [shih tek Alma 34:31]. Kjo është arsyeja përse Nefi punoi me kaq zell për t’i bindur fëmijët dhe vëllezërit e tij që ‘të beso[nin] në Krisht[in] dhe të pajtohe[shin] me Perëndinë’ [2 Nefi 25:23].

Pas gjithçkaje, ajo është gjëja që ne mund të bëjmë! Dhe ajo është detyra jonë në vdekshmëri! …

Sot dhe përgjithmonë hiri i Perëndisë është [në dispozicion] për të gjithë ata, zemrat e të cilëve janë të thyera dhe shpirtrat e të cilëve janë të penduar [shih tek 3 Nefi 9:19–20].” (Diter F. Uhtdorf, “Dhurata e Hirit”, Ensign ose Liahona, maj 2015, f. 110)

1. Përgjigju për pyetjet vijuese:

   • Si do t’i përshkruaje ndjenjat e tua për Shpëtimtarin, duke e ditur që hiri i Tij është në dispozicion për ty personalisht?

   • Cilat janë disa nga mënyrat se si mund të kesh qasje te hiri i Shpëtimtarit?

   • Cilat aspekte të jetës sate mund të jenë të ndryshme po ta ndiesh më shumë hirin e Shpëtimtarit? Në çfarë mënyrash?

Reflekto për një çast për atë që ke mësuar rreth faktit që Jezu Krishti është e vetmja mënyrë se si mund të shpëtohesh. Cili mesazh ose e vërtetë ishte më domethënëse për ty ose të bëri të dëshiroje ta përlëvdoje Jezu Krishtin? Çfarë ndihesh i nxitur të bësh për shkak të asaj që mësove dhe ndjeve? Nëse dëshiron, mund t’i shënosh mendimet e tua në ditarin tënd të studimit.

Gëzohuni në Krishtin

Për shkak se Nefi qe në dijeni të hirit dhe fuqisë së Shpëtimtarit për të shpëtuar, ai shkroi për t’i ndihmuar të tjerët të besojnë te Krishti. Lexo te 2 Nefi 25:26 duke kërkuar atë që mund të bëjmë për t’i ndihmuar të tjerët të besojnë te Jezu Krishti. Nëse dëshiron, mund t’i shenjosh fjalët e ndryshme vepruese që përdoren në këtë varg.

• Cilat fjalë në këtë varg të bënë më shumë përshtypje?

• Çfarë ndikimi ka pasur në jetën tënde ajo që dikush tjetër ka treguar rreth Jezu Krishtit?

• Si mund të forcohet marrëdhënia jote me Jezu Krishtin duke iu treguar të tjerëve ndjenjat personale rreth Tij?

2. Plotësoje sa vijon dhe, pa e thënë emrin e personit, shëno një pjesë të asaj që do t’i tregoje personit që të vjen në mendje.

   Mendo për dikë në jetën tënde që mund të përfitonte po ta kujtoje për dashurinë dhe hirin e Shpëtimtarit. Bëj një mesazh (të tillë si një mesazh në celular, një afishim në mediat shoqërore ose një letër personale) që mund t’ia tregosh atij ose asaj.

Fakultative: Dëshiron të Mësosh më Shumë?

2 Nefi 25:23. Si kualifikohem për ta marrë hirin e Zotit?

Plaku D. Tod Kristoferson, i Kuorumit të Dymbëdhjetë Apostujve, na kujtoi:

“Nuk kemi nevojë të arrijmë njëfarë niveli minimal të aftësisë ose mirësisë përpara se Perëndia të na ndihmojë – ndihma hyjnore mund të jetë e jona në çdo orë të çdo dite, pavarësisht se ku jemi në shtegun e bindjes. Por e di se, përtej të dëshiruarit të ndihmës së Tij, ne duhet ta vëmë në veprim veten tonë, të pendohemi dhe të zgjedhim Perëndinë, që Ai të jetë në gjendje për të vepruar në jetën tonë në përputhje me drejtësinë dhe lirinë e zgjedhjes morale. Lutja ime është thjesht të mbajmë përgjegjësi dhe të shkojmë në punë, me qëllim që të ketë diçka për Perëndinë me të cilën të na ndihmojë.” (D. Tod Kristoferson, “Të Lirë Përgjithmonë, që të Veprojnë për Veten e Tyre”, Ensign ose Liahona, nëntor 2014, f. 19)

Çfarë bekimesh mund të marr duke kërkuar hirin e Shpëtimtarit?

Nëse dëshiron, mund të shikosh materialin filmik “Come unto Christ: 2014 Theme Song” [“Ejani te Krishti: Kënga Motiv për 2014-ën”] (04:48). Përsiat se si ka ndikuar hiri i Shpëtimtarit tek ti në kohë nevoje.

2 Nefi 25:24–25. Çfarë është ligji i Moisiut dhe pse Nefi tha se ai ka vdekur?

Perëndia dha ligje nëpërmjet Moisiut kur fëmijët e Izraelit nuk arritën t’i bindeshin ligjit më të lartë që iu ishte dhënë (shih tek Eksodi 32; 34; Përkthimi prej Joseph Smith‑it, Eksodi 34:1–2 [tek Udhëzuesi për Shkrimet e Shenjta]). Këto ligje u njohën si ligji i Moisiut. Ai përbëhej nga shumë rregulla, ceremoni dhe sakrifica që kishin për qëllim t’u kujtonin atyre Perëndinë dhe detyrën e tyre kundrejt Tij (shih te Mosia 13:30). Një pjesë e madhe e ligjit ceremonial u përmbush me vdekjen dhe Ringjalljen e Jezu Krishtit (shih tek Alma 34:13–14). Një arsye pse ligji konsiderohej i vdekur ishte sepse ai nuk mund t’u sillte shpëtim fëmijëve të Perëndisë. Vetëm Jezu Krishti mund ta bënte këtë. (Shih tek Udhëzuesi për Shkrimet e Shenjta, “Ligj i Moisiut”, scriptures.ChurchofJesusChrist.org.)