Sukda ang Imong Nakat-onan 2

1 Nephi 16–2 Nephi 25

Kini nga leksiyon gituyo aron sa pagtabang kanimo sa pagtimbang-timbang sa paglambo nga imong nasinati sa panahon sa imong pagtuon sa Basahon ni Mormon.

Paghunahuna sa nakat-onan sa ebanghelyo

Pagpagawas og usa ka samin o uban pang butang nga makapabanaag ug paggahin og panahon sa pagtan-aw sa imong kaugalingon. Itakilid og gamay ang samin sa tuo ug sa wala ug timan-i ang mga butang nga dili nimo makita kon wala ang samin.

• Unsa ang mga benepisyo sa pagbaton ug samin?

• Sa unsang paagi nga ang pagtan-aw sa atong mga kaugalingon sa samin susama sa paghunahuna ug pagsukod sa atong pagkat-on sa ebanghelyo?

Sama sa pagkakita sa imong panggawas nga panagway, ang paggahin og panahon sa pagtan-aw ug paghunahuna sa imong mga kasinatian sa pagkat-on sa ebanghelyo makatabang kanimo sa daghang paagi. Samtang naghunahuna ka sa unsay imong nakat-onan gikan sa imong pagtuon sa Basahon ni Mormon, ang Espiritu Santo makatabang nimo sa pag-ila sa imong pag-uswag ug mopahibalo sa mga bahin nga angayng palamboon. Kini nga leksiyon makatabang nimo sa paghunahuna sa imong personal nga paglambo ug mga kasinatian gikan sa pagtuon sa Basahon ni Mormon.

Pagpamalandong sa espirituwal nga pag-uswag

Pamalandong sa mga pag-aghat ug mga pagbati gikan sa Espiritu Santo nga tingali imong nadawat sa pagtuon sa Basahon ni Mormon. Adunay daghang mga paagi nga ang Espiritu Santo mahimong nakig-istorya kanimo. Sama pananglit, ang piho nga mga bersikulo tingali nakakuha sa imong atensiyon ug gibati nimo ang tinguha nga markahan kini. Tingali aduna kay mga pagbati sa kalinaw o gugma. Tingali nakabasa ka ug nadasig sa paglihok sa piho nga paagi o nakit-an ang tubag sa usa ka pangutana nga naa nimo.

1. Tubaga ang bisan tulo lang sa mosunod nga mga pangutana. Mahimong makatabang ang pagrebyo sa imong journal sa pagtuon aron matabangan ka sa pagtubag sa mga pangutana.

   • Unsa nga mga asoy o mga tudling gikan sa Basahon ni Mormon ang nakatabang nimo nga makita kon sa unsang paagi ang Langitnong Amahan nakig-istorya sa Iyang mga anak?

   • Unsa nga mga hunahuna o mga pagbati ang imong nasinati sa seminary o sa imong personal nga pagtuon karong tuiga?

   • Unsa ang imong nahimo sa pagpangita og pagpadayag gikan sa Langitnong Amahan?

   • Unsa ang imong mahimo sa pagpangita og pagpadayag ug pag-andam sa pag-ila sa pagpadayag kon kini moabot?

   • Giunsa nimo paglihok ang mga impresiyon nga imong nadawat?

Ipasabot ang Pagkapukan ni Adan ug ni Eva ug ang Pag-ula ni Jesukristo

Ang matag tawo naapektohan sa Pagkapukan ni Adan ug Eva. Ang Basahon ni Mormon nagtudlo mahitungod niini nga mga epekto ug giunsa kita pagtubos sa Manluluwas gikan sa Pagkapukan. Ang mosunod nga buluhaton makatabang kanimo sa pagpraktis sa pagpasabot sa Pagkapukan ni Adan ug Eva ug sa Pag-ula ni Jesukristo.

Hunahunaa nga ikaw usa ka misyonaryo ug ikaw ug ang imong kompanyon nangandam sa pagtudlo sa usa ka tawo mahitungod sa Pagkapukan. Nakahukom ka nga ang usa kaninyo kinahanglang magtudlo mahitungod sa ang Pagkapukan ug ang mga epekto niini sa katawhan ug laing usa kinahanglang magtudlo mahitungod sa kon sa unsang paagi ang Manluluwas nagtabang kanato sa pagbuntog sa mga epekto sa Pagkapukan.

Pagpili og usa sa duha ka mga hilisgotanan nga giplanohan nimo ug sa imong kompanyon nga itudlo.

Gamita ang mga kasulatan sa pagtabang kanimo sa pagpasabot sa hilisgotanan nga imong napili. Mahimong makatabang ang pagrebyo sa 2 Nephi 2:17–27; 9:6–12; 10:23–25, mubo nga mga sulat sa imong journal sa pagtuon,topics.ChurchofJesusChrist.org aron matabangan ka ngamaandam sa pagpaambit.

Inig mahuman na ka, ikonsiderar ang pagpaambit sa imong pagpasabot ngadto sa laing tawo. Pananglitan, usa ka sakop sa pamilya, higala, o lider sa Simbahan.

2. Irekord ang imong pagpasabot sa hilisgotanan nga imong gipili.

Ang akong mga pagbati mahitungod kang Jesukristo

Ang Basahon ni Mormon nagpamatuod ni Jesukristo. Pamalandongi ang imong nakat-onan o natun-an mahitungod sa Manluluwas. Rebyoha ang mga kapitulo nga imong gitun-an, sama sa 1 Nephi 19, 2 Nephi 9, ug 2 Nephi 25. Mahimo usab nimong pangitaon ang mga tudling nga imong gimarkahan. Tingali makatabang ang pagrebyo sa unsay imong gisulat diha sa imong journal sa pagtuon, hilabi na sa mga entry nga naglangkob sa imong mga pagbati mahitungod Kaniya.

3. Kompletoha ang mosunod. Ilakip ang imong gibuhat o mubo nga pagpasabot niini.

   • Pagsulat og usa ka balak o usa ka sulat ngadto sa Manluluwas nga nagpahayag sa imong mga pagbati ngadto Kaniya. Ikonsiderar ang paggamit sa mga pulong o hugpong sa mga pulong gikan sa mga kasulatan o paghisgot og mga tudling sa kasulatan.

   • Paghimo og lista sa mga pulong nga naghulagway sa imong mga pagbati mahitungod sa Manluluwas. Ilakip ang pipila ka mga paghulagway gikan sa mga kasulatan. Paghimo og word cloud, o isulat ang mga pulong sa tagsa-tagsa ka mga piraso sa papel ug ikonsiderar ang pagbitay niini sa imong kwarto o sa laing dapit diin kanunay nimo kining makita.

   • Pagdrowing og usa ka butang nga makatabang kanimo sa pagpahayag sa imong mga pagbati mahitungod sa Manluluwas.