2 Nephi 26

Pagtan-aw, Paghigugma, ug Pagtratar sa Uban Sama sa Gibuhat sa Dios

Kada adlaw nag-atubang kita og mga mensahe ug impormasyon nga gituyo aron maimpluwensiyahan ang atong mga pagbati ug mga panglantaw. Sa 2 Nephi 26, si Nephi mitudlo sa panglantaw sa Dios. Kini nga leksiyon gituyo aron sa pagtabang kanimo sa pagtan-aw, paghigugma, ug pagtratar sa uban sama sa gibuhat sa Dios.

Atong panglantaw

Susiha ang mosunod nga mga hulagway ug hunahunaa kon sa unsang paagi ang lain-laing mga antepara makaapekto sa atong panan-aw.

• Sa unsang paagi kining lain-laing mga antepara makaapekto sa panglantaw sa usa ka tawo?

• Unsa ang pipila ka mga butang nga makaapekto kon sa unsang paagi kita motan-aw ug motratar sa uban?

Paggahin og panahon sa pagpamalandong sa imong pagtan-aw sa uban. Hunahunaa kon unsa kaha tingale ang nagporma sa imong panglantaw ug sa unsang paagi kini makaimpluwensiya sa imong pagbati ug pagtratar sa uban. Samtang magtuon ka, pagtinguha og inspirasyon aron makahibalo kon unsay imong mahimo aron makita ug matratar ang uban sama sa gibuhat sa Manluluwas.

Kini nga leksiyon gituyo aron sa pagtabang kanimo sa pagtan-aw, paghigugma, ug pagtratar sa uban sama sa gibuhat sa Dios.

Ang kinaiya sa Dios

Sa 2 Nephi 26, nakita ni Nephi ang pangalagad sa Manluluwas taliwala sa mga Nephite, ingon man usab ang pagkadautan ug ang kataposan nga kalaglagan sa iyang mga katawhan. Nakita usab niya ang pagkadautan sa mga Hentil sa kataposang mga adlaw. Sa kasukwahi, iyang gihatagan og gibug-aton ang pag-amuma sa Dios sa tanan Niyang mga anak.

Ikonsiderar ang mosunod nga tulo ka mga pangutana sa imong pagbasa sa 2 Nephi 26:12–13, 23–33:

• Unsa ang pagtan-aw ug pagbati sa Dios mahitungod sa Iyang mga anak?

• Giunsa Niya kini pagpakita?

• Sa unsa nga paagi Siya gusto nga kita magtan-aw ug motratar sa uban?

1. Tubaga ang mosunod nga mga pangutana:

   • Unsa nga mga pulong, hugpong sa mga pulong, o kamatuoran ang imong gimarkahan nga makatubag sa mga pangutana? Ngano man?

   • Unsa ang imong nakat-onan o gibati mahitungod sa kinaiya sa Dios?

   • Sa unsang paagi kaha nga ang paghinumdom niini nga mga kamatuoran mahitungod sa Dios makaimpluwensiya sa imong relasyon ngadto Kaniya? Sa unsang paagi kaha kini makaimpluwensiya kon unsaon nimo pagtratar ang uban?

Matikdi nga sa 2 Nephi 26:33, si Nephi mipatugbaw [highlight] sa daghang lain-laing mga matang sa mga indibidwal pinaagi sa pagpares kanila sa magkasukwahi nga mga grupo. Ang mosunod nga mga kahulugan mahimong makatabang kanimo nga mas masabtan kini. Mahimo nimong ikonsiderar ang pagsulat niini nga mga kahulugan diha sa imong mga kasulatan tapad niini nga bersikulo.

• Ulipon: Usa ka ulipon.

• Luog: Usa ka tawo nga dili motuo sa Dios.

• Judeo ug Hentil: Usa ka hugpong sa mga pulong nga nagpasabot sa tanan nga sakop sa balay ni Israel ug niadtong wala.

Ang2 Nephi 26:33 usa ka tudling sa doktrinal nga kahanas. Ikonsiderar ang pagmarka sa mga tudling sa doktrinal nga kahanas sa lahi nga paagi aron mas dali ra nimo kining makit-an. Mahatagan ka og kahigayonan sa sunod nga leksiyon sa pagpraktis sa paggamit sa doktrina nga gitudlo niini nga tudling ngadto sa usa ka pangutana o sitwasyon.

• Unsa ang kalainan nga mahimo niini kon ang kalibotan modawat ug mogamit sa mga pagtulun-an sa bersikulo 33?

Paggahin og kadiyot sa pagpamalandong sa imong panglantaw, lakip sa paagi sa imong pagbati ug pagtratar sa uban, kon itandi sa panglantaw sa Dios ug sa paagi sa Iyang pagbati ug pagtratar sa uban.

ChurchofJesusChrist.org

We Don’t Need to Be the Same to Be One

2. Tubaga ang mosunod nga mga pangutana:

   • Sa unsang paagi makaapekto kanimo ang paghinumdom sa panglantaw ug pagbati sa Dios ngadto sa tanang tawo?

   • Sa unsang mga paagi nga maayo ang imong gibuhat sa pagtan-aw ug pagtratar sa uban sama sa pagtratar sa Langitnong Amahan ug ni Jesus kanila?

   • Sa unsang paagi nga ang paghinumdom sa mga pagtulun-an mahitungod sa Ginoo diha sa 2 Nephi 26:33 makatabang kanimo sa pagtan-aw, paghigugma, ug pagtratar sa uban sama sa gibuhat sa Dios?

Sa mosunod nga pipila ka mga adlaw, sulayi sa pagmatikod ang imong pagtan-aw, pagbati, ug pagtratar sa uban. Paminaw sa mga pag-aghat gikan sa Espiritu Santo ug pagtinguha sa tabang sa Ginoo sa paghimo og bisan unsang gikinahanglan nga mga kausaban sa paghigugma ug pagtratar sa uban nga mas sama sa gibuhat sa Dios.

Opsiyonal: Gustong Makakat-on Pa og Dugang?

Unsaon nako nga mas mahisama sa Dios sa pagtan-aw ug paghigugma sa uban?

Si Presidente Russell M. Nelson mitudlo kon sa unsang paagi si Jesukristo makatabang nato sa atong mga paningkamot nga molambo:

Wala pa nato makab-ot ang panag-uyon ug pagtahod sa usag usa nga magtugot sa matag lalaki ug babaye ug matag batang lalaki ug batang babaye nga mahimong labing maayo nga bersiyon sa ilang kaugalingon.

Ang tambal sa atong sakit gireseta sa Gamhanang Mananambal, si Jesukristo. Sa dihang ang usa ka mabiaybiayon nga Pariseo mihagit Kaniya sa pag-ila sa labing dako nga sugo sa balaod, ang tubag sa Manluluwas labing halandumon ug mubo. Kini napuno sa kamatuoran nga motultol sa usa ka malipayong kinabuhi. Ang Iyang instruksiyon mao ang una sa paghigugma sa Dios sa tibuok natong kasingkasing ug, unya, sa paghigugma sa atong mga silingan sama sa atong kaugalingon (tan-awa sa Mateo 22:35–39). …

Kitang tanan konektado, ug kita adunay hinatag-sa-Dios nga responsibilidad sa pagtabang sa paghimo sa kinabuhi nga mas maayo alang niadtong nagpalibot kanato. Dili kinahanglan nga kita managsama o masusama ang hitsura aron adunay gugma sa usag usa. Dili man gani kita kinahanglan nga magkasinabot sa usag usa aron maghigugmaay. Kon aduna kitay paglaom nga makab-ot ang panagdait ug pagbati sa katawhan nga atong gipangandoy, kinahanglang magsugod kini sa matag usa kanato, usa ka tawo matag higayon. (Russell M. Nelson, “NAACP Convention Remarks” [pakigpulong nga gihatag sa tinuig nga kombensiyon sa National Association for the Advancement of Colored People sa Detroit, Michigan, Hulyo 21, 2019], newsroom.ChurchofJesusChrist.org)

Si Elder Dale G. Renlund sa Korum sa Napulog Duha ka Apostoles mipaambit sa mosunod:

Ang Kalinaw ni Kristo Makawagtang sa Pagdumot

Ang panaghiusa nagkinahanglan og paningkamot. Molambo kini kon kita mougmad sa gugma sa Dios diha sa atong mga kasingkasing ug kita motutok sa atong mahangtorong padulngan. Kita nahiusa pinaagi sa atong komon, nag-una nga kailhanan isip mga anak sa Dios ug sa atong pasalig ngadto sa mga kamatuoran sa gipahiuli nga ebanghelyo. Isip resulta, ang atong gugma sa Dios ug ang atong pagkadisipulo ni Jesukristo nagmugna og tinud-anay nga pagpakabana alang sa uban. Hatagan nato og bili ang nagkalainlaing matang sa mga kinaiya, mga panglantaw, ug mga talento sa uban. Kon dili kita makapatigbabaw sa atong pagkadisipulo ni Jesukristo labaw pa kay sa atong personal nga mga interes ug mga panglantaw, kinahanglan kitang moeksamin og balik sa atong mga prayoridad ug mag-usab. (Dale G. Renlund, “Ang Kalinaw ni Kristo Makawagtang sa Pagdumot,” Liahona, Nob. 2021, 84)

Si Sister Michelle D. Craig, Unang Magtatambag sa Kinatibuk-ang Kapangulohan sa Young Women, mitudlo sa mosunod:

Pray for Eyes to See as He Sees

Sa unsang paagi ang mga pagtulon-an sa 2 Nephi 26:33 makatabang sa mga tawo sa pagduol ngadto sa Manluluwas?

Gisusi ni Calyann ang Simbahan apan aduna siyay mga kabalaka. Tan-awa ang bidyo sa ubos aron makita kon giunsa sa 2 Nephi 26:33 pagtabang kaniya.

Jesus is Real: Calyann's Experience with the Book of Mormon

• Timan-i nga ang nakalabay nga bidyo gisugyot usab isip praktis nga bidyo sa sunod nga leksiyon.

Ang panaghiusa ba diha kang Kristo nagpasabot nga kitang tanan kinahanglang managsama?

Sila si Elder Quentin L. Cook ug Jeffrey R. Holland sa Korum sa Napulog Duha ka Apostoles mitudlo kon sa unsang paagi ang kultura ni Kristo nagtugot sa indibidwal nga mga kalahian:

Sa atong panahon, … alang sa daghang mga tawo ang gipahimug-atan mao ang kinaiya sa tribo o grupo, nga sa kasagaran gibase sa kahimtang, gender, kaliwat, ug bahandi. Sa daghang mga nasod, kon dili kadaghanan, ang mga tawo grabe nga nagkabahin-bahin unsaon sa pagpuyo. Sa Simbahan sa Ginoo, ang bugtong kultura nga atong sundon ug itudlo mao ang kultura sa ebanghelyo ni Jesukristo. Ang panaghiusa nga atong gitinguha mao ang panaghiusa uban sa Manluluwas ug sa Iyang mga pagtulun-an. …

Ang pagtuman sa balaang gitudlo nga mga responsibilidad, base sa pagkamatarong, panaghiusa, ug panag-angay sa atubangan sa Ginoo, naghatag og personal nga kalipay ug kalinaw niini nga kalibotan ug nag-andam nato alang sa kinabuhing dayon sa kalibotan nga moabot. (Quentin L. Cook, “Pagpangandam sa Pagsugat sa Dios,” Liahona, Mayo 2018, 116-117)

Adunay luna alang niadtong lahi og mga pinulongan, nagmaya sa nagkadaiyang kultura, ug nagpuyo sa nagkalainlaing dapit. Adunay luna alang sa mga single, minyo, sa dagkong pamilya, ug walay mga anak. Adunay luna alang niadtong sa una may pagduha-duha mahitungod sa ilang pagtuo ug niadtong hangtud karon nagduha-duha pa gihapon. Adunay luna alang niadtong may panaglahing sekswal nga atraksyon. Sa laktod, adunay luna ang tanang mohigugma sa Dios ug mopasidungog sa Iyang mga sugo isip dili mabaliwala nga sumbanan alang sa personal nga kinaiya. (Jeffrey R. Holland, “Mga Awit nga Naawit ug Wala Maawit,” Liahona, Mayo 2017, 51)

Tan-awa ang mosunod nga bidyo, diin si Elder Holland mihatag og tambag niadtong kinsa mibati nga nawad-an og kadasig o wala naapil sa gingharian sa Ginoo tungod kay sila nagtuo nga sila lahi kaayo kay sa uban.

“Songs Sung and Unsung”

Mga Awit nga Naawit ug Wala Maawit