Mosia 18

Besëlidhja e Pagëzimit

Disa vendime janë aq të rëndësishme, saqë mund të ndikojnë në gjithçka tjetër në jetën tonë. Bërja e një besëlidhjeje me Perëndinë nëpërmjet ordinancës së pagëzimit është njëri prej atyre vendimeve. Alma i dha mësim popullit të tij pranë Ujërave të Mormonit për besëlidhjen që bëjmë me Perëndinë kur pagëzohemi. Ky mësim mund të të ndihmojë ta kuptosh më mirë besëlidhjen e pagëzimit dhe se si ajo mund të ndikojë në marrëdhënien tënde me Perëndinë dhe të tjerët.

Pagëzimi yt

Për ta filluar studimin tënd sot, mendo rreth pagëzimit tënd dhe përpiqu të kujtosh hollësi nga ajo ditë. Nëse nuk je pagëzuar ende, reflekto mbi atë që di rreth pagëzimit ose asaj që mban mend nga marrja pjesë në një pagëzim.

• Cilat janë kujtimet e tua të parapëlqyera nga ajo ditë? Si u ndjeve?

• Si ka ndikuar vendimi yt për t’u pagëzuar në marrëdhënien tënde me Perëndinë dhe njerëzit e tjerë?

Alma jep mësim fjalët e Abinadit

Mosia 18 përmban rrëfimin e Almës, i cili dikur ishte një nga priftërinjtë e mbretit Noe, duke u dhënë mësim të tjerëve fjalët e Abinadit. Alma u detyrua të jepte mësim në fshehtësi për shkak se mbreti Noe donte ta vriste ngaqë ai e besoi dëshminë e Abinadit për Jezu Krishtin.

Lexo te Mosia 18:1–7, duke kërkuar atë që Alma i dha mësim popullit.

• Çfarë mësimi dha Alma rreth Shpëtimtarit pasi e dëgjoi dëshminë e Abinadit?

• Si mendon, përse Alma zgjodhi të jepte mësim atë që bëri në këto vargje?

Besëlidhja e pagëzimit

Pasi i dha mësim popullit rreth shëlbimit nëpërmjet Jezu Krishtit, Alma dha mësim rreth rëndësisë së pagëzimit. Nga mësimet e tij mund të mësojmë se kur pagëzohemi, ne hyjmë në një besëlidhje me Perëndinë. Teksa vazhdon t’i studiosh mësimet e Almës, përsiat mbi atë që di rreth besëlidhjes që bëjmë gjatë pagëzimit dhe e ripërtërijmë sa herë që marrim sakramentin, si edhe për çfarëdo pyetjeje që mund të kesh. Kërko me lutje ta kuptosh më mirë se si kjo besëlidhje mund të ndikojë në marrëdhënien tënde me Perëndinë dhe të tjerët.

Plaku D. Tod Kristoferson, i Kuorumit të Dymbëdhjetë Apostujve, shpjegoi se çfarë është një besëlidhje:

“Një besëlidhje është një marrëveshje ndërmjet Perëndisë dhe njeriut, një kontratë kushtet e së cilës përcaktohen nga Perëndia (shih Bible Dictionary, “Covenant”, f. 651). Në këto marrëveshje hyjnore, Perëndia e lidh Veten të na mbështetë, shenjtërojë dhe lartësojë në shpërblim të zotimit tonë për t’i shërbyer Atij dhe për t’i zbatuar urdhërimet e Tij.” (D. Tod Kristoferson, “Fuqia e Besëlidhjeve”, Liahona, maj 2009, f. 20)

Te Mosia 18:8–10, Alma përshkroi besëlidhjen e pagëzimit. Lexo te Mosia 18:8–10 dhe merre parasysh ta shenjosh atë që zotohemi të bëjmë kur pagëzohemi dhe, me një ngjyrë ose stil tjetër, t’i shenjosh bekimet që Ati Qiellor na ofron.

Mosia 18:8–10 është një fragment i zotërimit doktrinor. Merre parasysh t’i shenjosh fragmentet e zotërimit doktrinor në mënyrë të dallueshme që të mund t’i gjesh me lehtësi. Do të kesh mundësinë në mësimin e ardhshëm të ushtrosh zbatimin e doktrinës që jepet mësim në këtë fragment për një pyetje ose situatë.

• Çfarë mendon se do të thotë “vajtoni me ata që vajtojnë” dhe “ngushëlloni ata që kanë nevojë të ngushëllohen”? (Vargu 9.)

• Cilat janë disa mënyra se si ne mund të “qëndro[jmë] si dëshmitarë të Perëndisë në të gjitha kohërat dhe në të gjitha gjërat dhe në të gjitha vendet”? (Vargu 9.) Kë njeh ti që është një shembull i mirë për bërjen e kësaj?

• Si e ke parë Perëndinë të të bekojë ty ose të tjerët me premtimet që Ai bën me ne nëpërmjet pagëzimit?

Mbajtja e besëlidhjes sate të pagëzimit

Për të të ndihmuar ta kuptosh se si mund ta mbash më mirë besëlidhjen tënde të pagëzimit, nëse dëshiron, mund të shohësh materialin filmik vijues, duke kërkuar shembuj të mbajtjes së premtimeve që Alma i përshkroi te Mosia 18:8–10. Materiali filmik është në dispozicion në ChurchofJesusChrist.org.

• No Cussing Club

  One boy’s crusade to encourage clean language has far-reaching effects.

• “Sy për të Parë” (nga kodi kohor 04:55 deri në 06:53)

  Sy për të Parë

  Motra Krejg jep mësim se me ndihmën e Frymës së Shenjtë ne mund të mësojmë t’i shohim të tjerët dhe ta shohim veten ashtu si na sheh Shpëtimtari.

• Dayton's Legs

  A 13-year-old boy in Arizona fulfilled his Duty to God by pushing himself to the limit so that his friend, who has cerebral palsy, could participate with him in a triathlon.

• Cilat fjalë dhe fraza nga vargjet 8–10 pe të demonstroheshin?

Zgjidh të paktën njërin nga premtimet që bëjmë gjatë pagëzimit që Alma e dha te Mosia 18:8–10. Për shembull, ti mund të zgjedhësh frazën “mbani barrat e njëri-tjetrit” (vargu 8) ose “zbatoni urdhërimet e tij” (vargu 10).

1. Mbaj shënim se te cili/at premtim/e zgjodhe të përqendroheshe dhe përgjigju për të paktën tri prej pyetjeve vijuese:

   • Cilat janë disa mënyra se si një adoleshent/e mund ta mbajë atë premtim?

   • Përse mendon se Ati Qiellor e përfshiu atë si pjesë të besëlidhjes sonë të pagëzimit?

   • Si e ka treguar Shpëtimtari me anë të shembullit se si ta mbajmë atë premtim?

   • Kur e ke mbajtur ti ose dikush që e njeh atë premtim? Çfarë ke mësuar nga ato përvoja?

Gjej ca kohë për të mbajtur shënim në ditarin tënd se si ndien se po ia del me mbajtjen e premtimeve të pagëzimit që Alma i dha te Mosia 18:8–10. Si i ke mbajtur me sukses disa prej këtyre premtimeve? Në cilat situata mund ta mbash në mënyrë më të qëllimshme njërin prej tyre? Si mendon, si do të ndikojë kjo në marrëdhënien tënde me Zotin dhe me njerëzit e tjerë nëse e bën këtë?

Fakultative: Dëshiron të Mësosh më Shumë?

Përse është e rëndësishme që ta kuptoj besëlidhjen time të pagëzimit?

Plaku Xhozef B. Uirthlin (1917–2008), i Kuorumit të Dymbëdhjetë Apostujve, dha mësim:

“Gjatë jetës sime kam vënë re se, kur njerëzit arrijnë t’i kuptojnë plotësisht bekimet dhe fuqinë e besëlidhjes së tyre të pagëzimit, qoftë si të sapokthyer në besim apo anëtarë të lindur në Kishë, gëzim i madh vjen në jetën e tyre dhe ata u qasen detyrave të tyre në mbretëri me entuziazëm ngjitës.” (“Alma the Elder: A Role Model for Today”, te Heroes from the Book of Mormon [1995], f. 84)

Mosia 18:14. A e pagëzoi Alma veten?

Presidenti Jozef Filding Smith (1876–1972), shpjegoi:

“Ne mund të arrijmë në përfundimin se Alma e mbajti priftërinë përpara se ai me të tjerët, të shqetësoheshin nga mbreti Noe. Pavarësisht nëse kjo është kështu ose jo, nuk përbën asnjë ndryshim sepse në librin e Mosias është shpallur në mënyrë të qartë që ai kishte autoritet [shih te Mosia 18:13]. Nëse ai kishte autoritet të pagëzonte, kjo është prova që ai qe pagëzuar.

Prandaj, kur Alma e pagëzoi veten me Helamin, ky nuk ishte një rast ku Alma pagëzoi veten, por thjesht një shenjë para Zotit për përulësinë dhe pendimin e tij të plotë.” (Answers to Gospel Questions, përmb. Joseph Fielding Smith Jr., 5 vëll. [1957–1966], 3:203)

Si mund ta mbaj besëlidhjen time për t’u kujdesur për të tjerët?

Motra Sheron Iubank, e Presidencës së Përgjithshme të Shoqatës së Ndihmës, tha:

“Si anëtarë të pagëzuar të Kishës, ne jemi nën besëlidhje për t’u kujdesur për njerëzit nevojtarë. Përpjekjet tona individuale nuk kërkojnë medoemos para ose vendndodhje të largëta; ato vërtet kërkojnë udhërrëfimin e Shpirtit të Shenjtë dhe një zemër të gatshme për t’i thënë Zotit: ‘Ja ku jam, dërgomë mua’.” (Sheron Iubank, “Lutem që Ai do të na Përdorë”, Liahona, nëntor 2021, f. 55)