Mosia 21–24, Pjesa 1

Gjetja e Qëllimeve të Zotit prapa Sprovave dhe Pikëllimeve Tona

Si do t’ia shpjegoje dikujt përse Zoti na lejon të përjetojmë sprova dhe pikëllime? Mosia 21–24 përshkruan përvojat e popullit të Limhit dhe popullit të Almës, të cilët u përballën që të dy me sfida të vështira. Ky mësim ka për qëllim të të ndihmojë të ndiesh mirëbesim më të madh tek Ati Qiellor dhe Jezu Krishti kur përjeton sprova dhe pikëllime në jetën tënde.

Mbajtja e barrëve

Përfytyro sikur sprovat, barrët dhe pikëllimet e tua përfaqësohen nga gurët që duhet t’i mbash fizikisht në një çantë ose çantë shpine.

• Cilat janë disa nga sprovat ose barrët që adoleshentët mund të përjetojnë që mund të duken si gurët e rëndë në një çantë shpine?

• Çfarë pyetjesh mund të kenë njerëzit rreth barrëve që ata bartin?

Gjej një çast për të menduar rreth disa prej sprovave dhe barrëve me të cilat po përballesh aktualisht ose je përballur në jetën tënde. Merre parasysh t’i renditësh këto në ditarin tënd të studimit. Nëse dëshiron, mund të përfshish pyetje, shqetësime ose dëshira që i ke lidhur me sprovat dhe barrët e tua.

Ndërsa studion sot, kërko të vërteta që mund të të ndihmojnë ta kuptosh më mirë arsyen përse Zoti mund të lejojë që t’i përjetosh këto sprova.

Populli i Limhit dhe populli i Almës

Te Mosia 21–24, ne mësojmë rreth dy grupeve të njerëzve që përjetuan sprova dhe pikëllime të mëdha. Grupi i parë jetonte në tokën e Nefit dhe udhëhiqej nga Limhi, djali i mbretit Noe. Grupi i dytë jetonte në tokën e Helamit dhe udhëhiqej nga Alma.

Ajo që vijon është një përmbledhje e shkurtër e ngjarjeve që lidhen me robërimin e secilit grup:

Populli i Limhit

Pasi i refuzuan mësimet dhe paralajmërimet e Abinadit, nefitët, të cilët tashmë udhëhiqeshin nga mbreti Limhi, u zunë robër nga lamanitët në tokën e Nefit dhe iu kërkua të paguanin taksa të rënda (shih te Mosia 19:15). Sikurse u profetizua nga profeti Abinad (shih te Mosia 12:5), lamanitët e detyruan popullin e Limhit t’u shërbente atyre dhe të mbarte barrë të rënda (shih te Mosia 21:3).

Populli i Almës

Pas vdekjes së Abinadit, Alma dhe ndjekësit e tij ia mbathën në Ujërat e Mormonit, ku u pagëzuan (shih te Mosia 17:1–4; 18:1–14). Më pas, ata ia mbathën për sigurinë e tyre dhe ndërtuan një vendbanim të drejtë në tokën e Helamit (shih te Mosia 18:32–34; 23:1–4, 19–20). Populli i Almës përfundimisht u zbulua dhe u zu rob nga lamanitët (shih te Mosia 23:25–29, 36–37). Amulonit, që kishte qenë njëri nga priftërinjtë e ligj të Noeut, iu dha autoritet mbi ta dhe filloi ta përndiqte Almën dhe popullin e tij (shih te Mosia 24:8–9).

Përse Zoti i lejon sprovat

Lexoji fragmentet vijuese të shkrimit të shenjtë, duke kërkuar mësimet që mund të të ndihmojnë të kuptosh se përse Zoti na lejon të përjetojmë sprova dhe pikëllime. Nëse dëshiron, mund t’i shenjosh fjalët dhe frazat që të bëjnë përshtypje.

• Populli i Limhit: Mosia 21:5–16

• Populli i Almës: Mosia 23:21–24; 24:8–14

1. Përgjigju për pyetjet vijuese:

   • Çfarë ngjashmërish dhe dallimesh pe ndërmjet dy grupeve të njerëzve dhe asaj që ata përjetuan?

   • Çfarë provash pe te këto tregime për dashurinë dhe interesimin e Zotit për njerëzit?

   • Çfarë mësove rreth arsyes përse Zoti i lejon njerëzit të vuajnë sprova dhe pikëllime?

Këto tregime zbulojnë disa të vërteta rreth arsyes përse Zoti i lejon njerëzit të përjetojnë sprova. Ndër të tjera, mund të kesh vënë re sa vijon:

• Zoti na lejon të përjetojmë sprova për të na ndihmuar të bëhemi të përulur dhe të mbështetemi më shumë tek Ai (shih te Mosia 21:5–14).

• Disa sprova dhe pikëllime vijnë si rezultat i mosbindjes (shih te Mosia 21:15).

• Sprovat tona mund të na japin mundësi ta kërkojmë dhe ndiejmë fuqinë e Zotit në jetën tonë (shih te Mosia 21:15–16; 24:14).

• Zoti e qorton popullin e Tij dhe e vë në provë durimin dhe besimin e tyre (shih te Mosia 23:21).

Shumë njerëz mendojnë se të qortohesh (shih te Mosia 23:21) ka të njëjtën kuptim si të ndëshkohesh. Plaku Lin G. Robins, i Të Shtatëdhjetëve, shpjegoi: “Fjala qortoj rrjedh nga fjala latine castus, që do të thotë ‘i dëlirë ose i pastër’ dhe qortoj do të thotë ‘të pastrosh’ [shih te Merriam-Webster’s Collegiate Dictionary, bot. i 11‑të (2003), “chasten”]” (“Gjykatësi i Drejtë”, Liahona, nëntor 2016, f. 97). Përsiat për një çast se si Zoti mund të jetë duke të të pastruar nëpërmjet sprovave dhe pikëllimeve të tua.

2. Përgjigju për të paktën dy prej pyetjeve vijuese:

   • Si mund të ndikojë kuptueshmëria për këto të vërteta në mënyrën se si ti reagon ndaj sprovave të tua?

   • Cilat përvoja të kanë ndihmuar t’i kuptosh qëllimet pse Zoti të lejon të përjetosh sprova?

   • Çfarë ke mësuar sot që mund të të ndihmojë t’i kuptosh më mirë sprovat që përjeton?

Fakultative: Dëshiron të Mësosh më Shumë?

Çfarë mund të bëj nëse më duket sikur sprovat e mia janë të padrejta?

Shih materialin filmik “Vullneti i Perëndisë” (03:02). Përsiat se si mund ta zbatosh përvojën e Plakut Braun në atë që mund të jetë duke ndodhur në jetën tënde.

A mund të rritem nga çdo sprovë me të cilën përballem?

Plaku Orson F. Uitni (1855–1931), i Kuorumit të Dymbëdhjetë Apostujve, vërejti një herë:

“Asnjë dhembje që ne vuajmë, asnjë sprovë që përjetojmë nuk shkon kot. Ajo i shërben edukimit tonë, zhvillimit të cilësive të tilla si durimi, besimi, qëndresa dhe përulësia. Gjithçka që vuajmë dhe gjithçka që durojmë, veçanërisht kur e përballojmë atë me durim, e forcon karakterin tonë, na pastron zemrën, na e zgjeron shpirtin dhe na bën më të butë dhe të dashur, më të denjë që të quhemi fëmijët e Perëndisë … dhe është përmes dhembjes dhe vuajtjes, rraskapitjes dhe fatkeqësisë, që ne fitojmë edukimin të cilin erdhëm që ta marrim këtu dhe i cili do të na bëjë më shumë si Ati ynë dhe Nëna jonë në qiell.” (Orson F. Whitney, siç është cituar në Spencer W. Kimball, Faith Precedes the Miracle [1972], f. 98)

Çfarë mund të bëj për t’i kthyer barrët e mia në bekime?

Shih materialin filmik “Bearing Our Burdens with Hope” [“Mbajtja e Barrëve Tona me Shpresë”] (08:46). Mendoni se si barrët që mbartim në jetë mund të jenë për të mirën tonë shpirtërore dhe materiale.

Presidenti Henri B. Ajring, i Presidencës së Parë, dha këshilla që mund të na ndihmojnë teksa përjetojmë sprova:

“Me arsye mund të pyesni veten përse një Perëndi i dashur dhe i gjithëfuqishëm lejon që provat tona në vdekshmëri të jenë kaq të vështira. Është ngaqë Ai e di se ne duhet të rritemi në pastërtinë dhe shtatin shpirtëror që të jemi të aftë të jetojmë në praninë e Tij në familje përgjithmonë. Për ta bërë të mundur atë, Ati Qiellor na dha një Shpëtimtar dhe fuqinë për të zgjedhur për veten tonë me anë të besimit që t’i zbatojmë urdhërimet e Tij, të pendohemi dhe kështu të vijmë tek Ai. …

Kur e pyesni veten se sa shumë dhembje mund të duroni ashtu siç duhet, kujtojeni Atë. Ai e vuajti atë që po vuani, në mënyrë që Ai të mund të dinte se si t’ju lartësonte moralisht. Ai mund të mos e heqë barrën, por Ai do t’ju japë forcë, ngushëllim e shpresë. Ai e di udhën. Ai e piu kupën e hidhur. Ai e duroi vuajtjen e të gjithëve.” (Henri B. Ajring, “Të Vënë në Provë, të Provuar dhe të Lëmuar”, Liahona, nëntor 2020, f. 97)