Môzià 27:1–24

“Efa nivavaka tamim-pinoana be momba anao izy”

anjely iray nanakana an’i Almà zanany

Fantatrao ve hoe manao ahoana izany mahita ny olona akaiky anao mandà ny fahamarinana izany? I Almà sy i Môzià Mpanjaka dia samy niaina ratram-po tamin’ny fahitana olona ao amin’ny fianakaviana mikomy amin’ny Mpamonjy sy ny Fiangonany. Tamin’ny alalan’ny famindram-pon’i Kristy, izy ireo dia voatahy hahatsapa ny fifaliana avy amin’ny fahitana ireny olona akaiky ireny nibebaka tamin’ny farany. Ity lesona ity dia afaka manampy anao hahita fomba hanampiana ireo izay mandà ireo fampianaran’i Jesoa Kristy mba hiverina Aminy.

Misy fanantenana amin’ny alalan’i Kristy

Misy olona mampanahy anao ve ny momba azy satria miady ara-panahy izy ireo na mikomy amin’ Andriamanitra mihitsy aza? Raha izay no izy dia erirereto foana izany olona izany rehefa mandalina ianao anio. Tahaka izany ihany, raha manana ady ara-panahy ianao, dia azonao eritreretina foana mandritra ny lesona ny toe-javatra misy anao.

Saintsaino hoe hatraiza ny fahamarinan’ireto teny nambara manaraka ireto raha hamaritana anao:

1. Mino aho fa tsy mbola tara ny hanasitranan’i Jesoa Kristy ireo izay manana ady na mikomy ara-panahy.

2. Izaho dia nahita ohatra tao amin’ny soratra masina sy tamin’ny olona manodidina ahy izay manome fanantenana ahy ny amin’ireo olona izay miady na mikomy ara-panahy.

3. Fantatro ny zavatra azoko atao mba hanampina ny olona izay manana ady ara-panahy na mikomy.

Rehefa mandalina ny Môzià 27 ianao anio, dia tadiavo ireo antony hananana fanantenana sy ny zavatra azonao atao mba hanampiana ireo izay manana ady na mikomy ara-panahy.

Manampy ireo very ara-panahy

Vakio ny Môzià 27:1, 8–10 mba hahitana hoe iza no olona nananan’i Almà mpaminany sy i Môzià Mpanjaka fanahiana ny momba azy.

• Inona araka ny eritreritrao no mety ho fiantraikan’ny safidin’ireny zatovolahy ireny tamin’ny ray aman-drenin’izy ireo, ny iray tam-po amin’izy ireo ary ny naman’izy ireo?

Vakio ny Môzià 27:11–16, 19 mba hahitana ny zavatra nataon’ny Tompo hanampiana an’i Almà zanany hanova ny fiainany sy ny anton’izany. Azonao atao ihany koa ny mijery ilay horonantsary hoe “Alma le jeune est converti au Seigneur” manomboka eo amin’ny fe-potoana 3:06 hatramin’ny 6:59.

• Andian-teny inona tamin’ny hafatr’ilay anjely no heverinao fa mety ho nisy fiantraikany indrindra tamin’ireny zatovolahy ireny?

• Ahoana no ahafahan’io zavatra niainana io maneho ny fitiavana sy ny fanirian’ Andriamanitra hamonjy ireny zatovolahy ireny (eo ihany koa ireo hafa izay very ara-panahy)?

• Araka ny voalazan’ny Môzià 27:14, dia inona no antony nolazain’ilay anjely fa nahatongavany tany amin’i Almà zanany sy ireo zanakalahin’i Môzià? (Hevero ny hanisy marika ny valin’io fanontaniana io ao amin’ny soratra masinao.)

Makà fotoana hisaintsainana hoe inona avy no fitsipika azonao ianarana avy amin’ireo andininy ireo.

Fitsipika iray azontsika ianarana ny hoe ny fivavahana amim-pinoana lehibe ho an’ireo izay manana ady na mikomy ara-panahy dia manasa ny Tompo hanampy azy ireo ho tonga amin’ny fahalalana ny fahamarinana.

Tsarovy fa ny Tompo dia tsy hifehy ny fahafaha-misafidy ara-pitondrantenan’ireo izay entintsika am-bavaka. Na dia efa notsidihin’ny anjely iray aza i Almà sy ireo zanakalahin’i Môzià, dia mbola afaka nampiasa ny fahafahan’izy ireo misafidy ny tsy hibebaka izy ireo. Na dia mety tsy handefa anjely amin’ireo olona akaiky antsika aza ny Tompo, dia hamaly ny vavaka ataontsika amin’ny fombany sy ny fotoanany Izy. Afaka matoky Azy hanampy isika. Hianatra misimisy kokoa momba ny anjara asan’ny Tompo tamin’ny fanovana an’i Almà ianao ao amin’ny lesona manaraka.

• Mety ho toy ny ahoana raha alainao sary an-tsaina ny vavaka nataon’i Almà rainy? Inona araka ny eritreritrao no dikan’ny hoe mivavaka “tamim-pinoana be” (Môzia 27:14)?

• Nahoana araka ny hevitrao no tian’ny Tompo hivavaka ho an’ireo izay manana ady na mikomy ara-panahy isika?

• Oviana no nahatsapanao fa nanova zavatra teo amin’ny fiainan’ny olona iray hafa ny vavaka nataonao? Oviana araka ny eritreritrao no nanampy anao ny vavaka nataon’ny olona iray hafa?

Mieritrereta zavatra manokana azonao entina am-bavaka rehefa mangataka ny Ray any An-danitra hanampy olona iray izay manana ady ara-panahy ianao. Azonao atao mihitsy aza ny mampiato kely ny fandalinanao mba hivavaka ho azy ireny amin’izao fotoana izao.

Inona koa no mbola azoko atao?

Vakio ireto andinin-tsoratra masina manaraka ireto, ka tadiavo ny zavatra nataon’i Almà sy ny hafa, ankoatra ny hoe nivavaka, mba hanampiana ny zanany lahy hiverina amin’ny Tompo.

Môzià 27:20–24

Almà 36:17–19 (Famaritana nataon’i Almà zanany taty aoriana momba ny zavatra nampianarin’ny rainy sy ny fomba nanampian’izany azy)

• Inona no nataon’i Almà, ankoatra ny hoe nivavaka, mba hanampiana ny zanany lahy?

Halalino ny iray amin’ireto zavatra nataon’i Almà manaraka ireto ary raketo an-tsoratra ny eritreritrao. Rehefa mandalina ianao, dia azonao atao ny mieritreritra olona iray akaiky anao izay manana ady ara-panahy na mikomy mihitsy aza:

1. Fifadian-kanina—Mianara bebe kokoa momba ny fifadian-kanina amin’ny alalan’ny fanaovana fikarohana ao amin’ny ChurchofJesusChrist.org, ny application Médiathèque de l’Évangile, ny Torolalana ho an’ny Soratra Masina, na andalan-tsoratra masina hafa toy ny Marka 9:17–18, 25–29. Ahoana no ahafahan’ny fifadian-kanina manampy anao na ny olona akaiky anao? Misy olon-kafa azonao asaina hiaraka hifady hanina aminao ve?

2. Fijoroana ho vavolombelona—Ampitahao ny zavatra niainan’i Almà voalaza ao amin’ny Almà 36:17–19 sy ny zavatra niainan’i Enosa ao amin’ny Enôsa 1:1–5. Saintsaino ny fahaizan’ny Fanahy Masina mampahatsiahy ny olona ny zavatra efa henon’izy ireo rehefa ilain’izy ireo izany (jereo ny Jaona 14:26). Izany dia afaka manome antsika risi-po hizara ny fijoroantsika ho vavolombelona momba an’i Kristy eny fa na dia amin’ireo izay toa tsy mandray aza. Afaka manampy antsika hahatsiaro ny zavatra fantatsika sy inoantsika momba ny Mpamonjy amin’ny fotoana mety ho tena ilantsika azy ihany koa izany. Ahoana no mety hahafahanao mizara ny fijoroana ho vavolombelona anananao momba ny Mpamonjy?

1. Valio ny telo amin’ireto fanontaniana manaraka ireto farafahakeliny:

   • Inona no zavatra nianaranao tamin’io tantara io momba ny fomba anampiana ireo izay manana ady ara-panahy?

   • Inona no torohevitra hozarainao amin’ny olona iray izay tsy miova haingana ny olona akaiky azy?

   • Inona no anjara asan’ny Mpamonjy amin’ny fanampiana ireo olona akaiky antsika? Nahoana ianao no afaka matoky Azy hanampy azy ireo?

   • Inona no zavatra manokana tsapanao fa aneren’ny Fanahy anao mba hatao na holazaina mba hanampiana ny olona iray hiverina amin’ny Mpamonjy?

Tsy voatery atao: Te hianatra misimisy kokoa ve ianao?

Inona no tsapan’ny Ray any An-danitra momba ireo izay very na mikomy?

Nampianatra toy izao ny Loholona Jeffrey R. Holland ao amin’ny Kôlejin’ny Apôstôly Roambinifolo:

Loholona Jeffrey R. Holland

Ilay endrika be fitiavana isehoan’ilay rain’[ilay zanaka adala] izay nitaintaina sy nahatoky, nihazakazaka mba hitsena azy sy nameno azy tamin’ ny oroka dia iray amin’ireo trangan-javatra mampihetsi-po sy feno fangorahana ao amin’ny soratra masina rehetra. Izany dia milaza amin’ny zanak’ Andriamanitra tsirairay, na mpikomy na tsia, ny habetsahan’ny fanirian’ Andriamanitra antsika hiverina eo ambanin’ny fiarovan’ny sandriny. (Jeffrey R. Holland, “The Other Prodigal,” Ensign, May 2002, 62)

Nahoana no maharitra ela be ny fiovana eo amin’ny olona akaiky ahy (na ny tenako) raha ampitahaina amin’ny zavatra niainan’i Almà zanany?

Nanazava toy izao ny Filoha Ezra Taft Benson (1899–1994):

Ny Filoha Ezra Taft Benson

Ny soratra masina dia mirakitra tantara miavaka momba ireo olona izay niova be ny fiainany, tao anatin’ny indray mipi-maso, toy ny tamin’i: Almà Zanany, Paoly teny an-dalana ho any Damaskosy, Enôsa nivavaka hatramin’ny alina, Lamônia Mpanjaka. Ny ohatra mahatalanjona toy izany mikasika ny hery ahafahana manova, eny fa na hatramin’ireo izay nilona tao anatin’ny fahotana aza, dia manome toky fa ny Sorompanavotana dia afaka ny ho tody, eny fa na dia any amin’ireo izay ao anatin’ny fahadisoam-panantenana lalina aza.

Saingy tsy maintsy mitandrina isika rehefa miresaka mikasika ireo ohatra mahatalanjona ireo. Na dia tena nisy sy mahery vaika azy izy ireo dia tranga maningana ireny fa tsy ireny no tena tokony ho fandehany. Isaky ny misy Paoly iray, isaky ny misy Enôsa iray, isaky ny misy Lamônia Mpanjaka iray, dia misy olona an-jatony sy an’arivony izay mahita fa ny fizotran’ny fibebahana dia tsotra lavitra kokoa, tsy mora tsikaritra lavitra kokoa. Isan’andro izy ireo dia manatona kokoa an’ny Tompo, tsy dia mahatsikaritra fa eo am-panorenana fiainana mitovy amin’Andrimanitra izy ireo. Miaina fiainana tsotra izy ireo, feno hatsarana sy asa fanompoana ary fanolorantena. (Ezra Taft Benson, “A Mighty Change of Heart,” Ensign, Oct. 1989, 5)

Inona avy no fitahiana tonga avy amin’ny fifadian-kanina?

Nampianatra toy izao ny Loholona Shayne M. Bowen ao amin’ny Fitopololahy:

Loholona Shayne M. Bowen

Dia ahoana raha misy fomba ahafahantsika mandresy ny fahazarantsika, ny fiankinan-dohantsika ary ny enta-mavesatsika? Dia ahoana raha misy fomba ahazoana fahatokiana ampy ny Tompo ka ahafahanao miantso ireo herin’ny lanitra hidina ety? Dia ahoana raha misy fitsipika azonao ampianarina ireo olona akaiky anao ka raha ampiharina dia hamela azy ireo handresy ireo fahalemena manokana sy hanatona akaiky kokoa an’ Andriamanitra?

Rehefa mahatakatra araka ny tokony ho izy sy miaina ny lalànan’ny fifadian-kanina isika, dia afaka ny ho antsika ireny fitahiana irina ireny. (Shayne M. Bowen, “Fasting with Power,” Ensign, apr. 2009, 64)