« ចំណេះចំណានខាងគោលលទ្ធិ ៖ អាលម៉ា ៧:១១–១៣—‹ ហើយទ្រង់នឹងយាងទៅដោយរងការឈឺចាប់ និងទុក្ខវេទនា និងការល្បួងគ្រប់បែបយ៉ាង › ព្រះគម្ពីមរមន សៀវភៅសិក្សាសម្រាប់គ្រូបង្រៀន ( ឆ្នាំ ២០២៤ )
« ចំណេះចំណានខាងគោលលទ្ធិ ៖ អាលម៉ា ៧:១១–១៣ » ព្រះគម្ពីមរមន សៀវភៅសិក្សាសម្រាប់គ្រូបង្រៀន
ចំណេះចំណានខាងគោលលទ្ធិ ៖ អាលម៉ា ៧:១១–១៣
« ហើយទ្រង់នឹងយាងទៅដោយរងការឈឺចាប់ និងទុក្ខវេទនា និងការល្បួងគ្រប់បែបយ៉ាង »
នៅក្នុងការសិក្សារបស់អ្នកអំពី អាលម៉ា ៧:១–១៣ អ្នកបានរៀនខ្លះៗអំពីអ្វីដែលព្រះអង្គសង្គ្រោះបានរងទុក្ខ ដែលជាផ្នែកនៃដង្វាយធួនរបស់ទ្រង់ដើម្បី « ទ្រង់អាចដឹងស្របតាមសាច់ឈាមថា តើត្រូវជួយរាស្ត្រទ្រង់បែបណា » ( អាលម៉ា ៧:១២ ) ។ មេរៀននេះអាចជួយអ្នកឲ្យទន្ទេញសេចក្តីយោងនៃចំណេះចំណានខាងគោលលទ្ធិ និងឃ្លាបទគម្ពីរគន្លឹះសម្រាប់ អាលម៉ា ៧:១១–១៣ ពន្យល់ពីគោលលទ្ធិដែលបានបង្រៀននៅក្នុងវគ្គបទគម្ពីរនេះ ហើយអនុវត្តគោលការណ៍នៃការទទួលបានចំណេះដឹងខាងវិញ្ញាណទៅនឹងស្ថានភាពជីវិតជាក់ស្តែង ។
ទន្ទេញ និងពន្យល់
ឃ្លាបទគម្ពីរគន្លឹះសម្រាប់ អាលម៉ា ៧:១១–១៣ គឺ « ហើយទ្រង់នឹងយាងទៅដោយរងការឈឺចាប់ និងទុក្ខវេទនា និងការល្បួងគ្រប់បែបយ៉ាង » ។ សូមពិចារណាគូសចំណាំឃ្លានេះនៅក្នុងព្រះគម្ពីររបស់អ្នក បើអ្នកមិនទាន់បានធ្វើដូច្នេះទេ ។
សកម្មភាពខាងក្រោមអាចជួយអ្នកឲ្យទន្ទេញនូវសេចក្តីយោង និងឃ្លាបទគម្ពីរគន្លឹះ ។ សូមសរសេរសេចក្ដីយោង និងឃ្លាបទគម្ពីរគន្លឹះឲ្យបានច្រើនអស់ពីលទ្ធភាពចេញពីការចងចាំ ។ បើអ្នកមិនអាចសរសេរបានច្រើននៅពេលលើកដំបូងទេ សូមអានឯកសារយោង និងឃ្លានោះឡើងវិញ ហើយបន្ទាប់មកព្យាយាមសរសេរវា ។ សូមអាន និងសរសេរឡើងវិញរហូតដល់អ្នកអាចសរសេរសេចក្តីទាំងមូលចេញពីការចងចាំបាន ។
នៅក្នុងមេរៀនមុន អ្នកបានរៀនពី អាលម៉ា ៧:១១–១៣ ថា ព្រះយេស៊ូវគ្រីស្ទបានរងទុក្ខ ដើម្បីជួយសង្រ្គោះអ្នកពីអំពើបាប និងសេចក្តីស្លាប់ និងដើម្បីជួយអ្នកឲ្យឆ្លងកាត់ឧបសគ្គនៃជីវិតរមែងស្លាប់ ។
ឧបមាថា មិត្តម្នាក់បានផ្ញើសារមកអ្នកអំពីអ្វីមួយពិបាកដែលពួកគេកំពុងឆ្លងកាត់ ។ អ្នកគិតថា សារលិខិតនៅក្នុង អាលម៉ា ៧:១១–១៣ នឹងមានប្រយោជន៍សម្រាប់មិត្តភក្តិរបស់អ្នក ប៉ុន្តែបារម្ភថា ពួកគេនឹងមិនអានវាទេ បើអ្នកគ្រាន់តែផ្ញើសេចក្តីយោងបទគម្ពីរនោះ ។
-
សូមឆ្លើយសំណួរខាងក្រោមនេះ ៖
-
តើអ្នកនឹងសង្ខេប អាលម៉ា ៧:១១–១៣ តាមរបៀបដែលអាចជួយមិត្តរបស់អ្នកឆ្លងកាត់ការលំបាករបស់ពួកគេដោយរបៀបណា ?
-
រៀនអនុវត្ត
សូមស្វែងរកគោលការណ៍នៃការទទួលបានចំណេះដឹងខាងវិញ្ញាណនៅក្នុងផ្នែក « ការទទួលបានចំណេះដឹងខាងវិញ្ញាណ » ឯកសារគោលនៃចំណេះចំណានខាងគោលលទ្ធិ ( ឆ្នាំ ២០២២ ) ។ សូមសរសេរគោលការណ៍ទាំងនេះជាចំណងជើង នៅក្នុងសៀវភៅកំណត់ហេតុការសិក្សារបស់អ្នក ដោយទុកចន្លោះរវាងចំណងជើង ដើម្បីអ្នកអាចឆ្លើយសំណួរអំពីវានៅពេលក្រោយនៅក្នុងមេរៀន ។
សូមពិចារណាអំពីរបៀបដែលគោលការណ៍នៃការទទួលបានចំណេះដឹងខាងវិញ្ញាណ និងគោលលទ្ធិដែលបានបង្រៀននៅក្នុង អាលម៉ា ៧:១១–១៣ អាចជួយក្នុងស្ថានភាពប្រឌិដ្ឋខាងក្រោម ។
ចាប់តាំងពីឪពុកម្តាយរបស់ភីធើរបានលែងលះគ្នាកាលពីប៉ុន្មានឆ្នាំមុន គាត់មានអារម្មណ៍ថា ជីវិតរបស់គាត់កាន់តែលំបាកទៅៗ ។ គាត់បានជួបការលំបាកនៅសាលារៀន ហើយមិត្តភក្តិរបស់គាត់មួយចំនួនហាក់ដូចជាមិនរាប់រកគាត់ច្រើនដូចដែលពួកគេធ្លាប់ធ្វើនោះទេ ។ ភាគច្រើន ភីធើរ ក៏ឈប់ទៅព្រះវិហារ ឈប់អានព្រះគម្ពីរ និងឈប់អធិស្ឋានទៅព្រះដែរ ។ ថ្ងៃមួយ ភីធើរ បានប្រាប់មិត្តភក្តិម្នាក់អំពីទុក្ខលំបាករបស់គាត់ ។ គាត់បាននិយាយថា « ខ្ញុំចង់ឲ្យអ្វីៗប្រសើរឡើង ប៉ុន្តែខ្ញុំមិនដឹងថា ត្រូវងាកទៅណាទេ ។ ខ្ញុំមានអារម្មណ៍ឯកោ ហើយជាប់គាំងក្នុងស្ថានភាពរបស់ខ្ញុំ » ។
សូមស្រមៃថា អ្នកគឺជាមិត្តភក្តិដែលភីធើរ កំពុងនិយាយជាមួយ ហើយគាត់ក៏បានសុំដំបូន្មានពីអ្នក អំពីរបៀបយកឈ្នះលើស្ថានភាពលំបាករបស់គាត់ដែរ ។ សូមប្រើការបង្រៀននៅក្នុង អាលម៉ា ៧:១១–១៣ និងគោលការណ៍នៃការទទួលបានចំណេះដឹងខាងវិញ្ញាណ ដើម្បីជួយភីធើរដោះស្រាយបញ្ហាប្រឈមរបស់គាត់ ។
ធ្វើសកម្មភាពដោយសេចក្ដីជំនឿ
សូមអាន កថាខណ្ឌទី ៥–៧ នៃផ្នែក « ការទទួលបានចំណេះដឹងខាងវិញ្ញាណ » ឯកសារគោលនៃចំណេះចំណានខាងគោលលទ្ធិ ។ សូមពិចារណាគូសចំណាំអ្វីដែលអ្នកយល់ឃើញថាមានប្រយោជន៍ ។
-
សូមឆ្លើយសំណួរខាងក្រោមនេះយ៉ាងហោចណាស់មួយ ៖
-
តើអ្នកអាចបង្រៀនភីធើរអ្វីខ្លះ អំពីព្រះយេស៊ូវគ្រីស្ទ និងដង្វាយធួនរបស់ទ្រង់ដែលអាចជួយភីធើរធ្វើសកម្មភាពដោយសេចក្តីជំនឿ ?
-
តើភីធើរអាចធ្វើអ្វីខ្លះដើម្បីទទួលបានជំនួយដែលព្រះយេស៊ូវគ្រីស្ទអាចប្រទានបាន ?
-
ពិនិត្យមើលគោលគំនិត ឬសំណួរទាំងឡាយដោយទស្សនវិស័យដ៏នៅអស់កល្បជានិច្ច
សូមអាន កថាខណ្ឌទី ៨ នៅក្នុងផ្នែក « ការទទួលបានចំណេះដឹងខាងវិញ្ញាណ » នៅក្នុងឯកសារគោលនៃចំណេះចំណានខាងគោលលទ្ធិ ។ ពិចារណាគូសចំណាំអ្វីដែលអ្នកយល់ឃើញថាមានប្រយោជន៍
-
សូមឆ្លើយសំណួរខាងក្រោមនេះយ៉ាងហោចណាស់មួយ ៖
-
តើអ្នកគិតថាព្រះវរបិតាសួគ៌សព្វព្រះទ័យឲ្យភីធើរ គិតអំពីស្ថានភាពរបស់គាត់ដោយរបៀបណា ?
-
ហេតុអ្វីអ្នកគិតថា វានឹងមានប្រយោជន៍សម្រាប់ភីធើរក្នុងការមើលឃើញស្ថានភាពរបស់គាត់ជាមួយនឹងទស្សនវិស័យដ៏នៅអស់កល្បជានិច្ច ?
-
ស្វែងរកការយល់ដឹងបន្ថែមតាមរយៈប្រភពដែលបានតែងតាំងដ៏ទេវភាព
សូមអាន កថាខណ្ឌទី ១១–១២ នៃផ្នែក « ការទទួលបានចំណេះដឹងខាងវិញ្ញាណ » នៃ ឯកសារគោលនៃចំណេះដឹងខាងគោលលទ្ធិ ដោយរកមើលការបង្រៀនដែលអាចជួយដល់ភីធើរ ។
-
សូមឆ្លើយសំណួរយ៉ាងហោចណាស់ឲ្យបានពីរក្នុងផ្នែកនេះ ៖
-
តើប្រភពដែលត្រូវបានតែងតាំងដោយទេវភាពប្រភេទណាខ្លះ ដែលអ្នកអាចដឹកនាំភីធើរទៅរក ដែលអាចផ្តល់ឲ្យគាត់នូវជំនួយដែលគាត់ត្រូវការ ?
ប្រភពដ៏សំខាន់មួយដែលត្រូវបានតែងតាំងដោយទេវភាពដែលអាចជួយក្នុងស្ថានភាពនេះគឺ អាលម៉ា ៧:១១–១៣ ។ សូមអានខគម្ពីរទាំងនេះឡើងវិញដោយរកមើលការបង្រៀនដែលអាចមានប្រយោជន៍សម្រាប់ភីធើរ ។
-
តើអ្នកចង់ឲ្យភីធើរ យល់ និងទទួលអារម្មណ៍យ៉ាងណាពីខគម្ពីរទាំងនេះ ?
-
តើអ្នកអាចគិតអំពីវគ្គបទគម្ពីរផ្សេងទៀតដែលបង្រៀនពីអ្វីដែលព្រះវរបិតាសួគ៌អាចនឹងសព្វព្រះទ័យឲ្យ ភីធើរ ដឹងដែរឬទេ ?
-