“Almà 8: Mihaino sy mankatò ny Ray any An-danitra,” Boky torolalana ho an’ny mpampianatra ny Bokin’i Môrmôna (2024)
“Almà 8,” Boky torolalana ho an’ny mpampianatra ny Bokin’i Môrmôna
Almà 8
Mihaino sy mankatò ny Ray any An-danitra
Mety ho sarotra ny mankatò ny Ray any An-danitra, saingy mitondra mankany amin’ilay fahasambarana lehibe indrindra izany. Rehefa nampihatra finoana i Almà sy i Amioleka ary nanaraka ny toromarik’ Andriamanitra, dia nitahy azy ireo sy ireo nanodidina azy ireo Andriamanitra. Ity lesona ity dia afaka manampy anao handre sy hankatò ny Ray any An-danitra eo amin’ny fiainanao.
Manaraka ny Ray any An-danitra
Eritrereto ny mety ho fahatsapana anananao raha angatahin’ny Ray any An-danitra hanao ity manaraka ity ianao sy ny antony mety hahatsapanao toy izany:
-
Mizara ny filazantsara amin’ny olona iray izay efa nandà ny fanasanao tany aloha.
-
Maka namana sy manampy olona iray ao amin’ny sekoly misy anao izay tsy tian’ny olona na ailikilika.
-
Inona avy no didy hafa na bitsika mety homen’ny Ray any An-danitra antsika ka mety ho sarotra ekena sy ankatoavina? Nahoana no mety ho tena sarotra ireny toe-java-misy ireny?
Ao amin’ny toko hohalalininao anio Andriamanitra dia nanome toromarika an’i Almà hiatrika toe-javatra mitovitovy amin’ilay rafi-tantara voalohany eo ambony, ary i Amioleka dia niatrika toe-javatra mitovitovy amin’ilay faharoa. Makà fotoana hisaintsainana raha misy didy na bitsika avy amin’ Andriamanitra ka sarotra aminao ny mankatò azy. Rehefa mandalina ianao, dia tadiavo ny fomba nandresen’i Almà sy i Amioleka ny fanamby natrehin’izy ireo sy nanarahan’izy ireo ny didin’ Andriamanitra. Mikatsaha fanampian’ny Ray any An-danitra mba hahalalana ny fomba ahafahanao mihaino sy manaraka Azy tsara kokoa.
Ny zavatra niainan’i Almà
Vakio ny Almà 8:8–18, hitadiavana ny zavatra nangatahin’ Andriamanitra hataon’i Almà sy ny antony mety ho nahasarotra izany taminy. Miezaha maka sary an-tsaina ilay zava-nitranga rehefa mamaky azy ireo ianao. Azonao atao ny mijery ilay horonan-tsary hoe “Nafahana tamin’ny alalan’ny herin’ Andriamanitra i Almà sy Amioleka” manomboka eo amin’ny mari-potoana 0:36 hatramin’ny 2:22, hita ao amin’ny ChurchofJesusChrist.org, ary araho ao amin’ny soratra masinao izany.
-
Inona avy no andian-teny ao amin’ny andininy 14 manondro ny fahatsapan’i Almà rehefa nandray io didy io izy?
-
Inona no andian-teny ao amin’ny andininy 18 milazalaza ny fotoana lanin’i Almà nankatoavana izany?
-
Nahoana araka ny eritreritrao no nankatò haingana be i Almà na dia teo am-pahatsapana alahelo aza?
Ny zavatra niainan’i Amioleka
Vakio ny Almà 8:19–21; 10:4–11 mba hahitana ny zavatra nitranga manaraka. (Mety hanampy raha fantatra fa i Amioleka dia nitantara ny zavatra niainany ao amin’ny Almà 10:4–11.) Miezaha maka sary an-tsaina ilay zava-nitranga rehefa mamaky azy ireo ianao. Azonao atao ny manohy mijery ilay horonantsary hoe “Nafahana tamin’ny alalan’ny herin’ Andriamanitra i Almà sy Amioleka” manomboka eo amin’ny mari-potoana 2:22 hatramin’ny 4:03, hita ao amin’ny ChurchofJesusChrist.org.
-
Inona no ianarantsika momba an’i Amioleka ao amin’ny Almà 10:4–6? Nahoana no mety ho nahasarotra taminy ny fankatoavana an’ Andriamanitra ireny antony ireny?
-
Nahoana araka ny eritreritrao no nanohy nanatona an’i Amioleka ny Ray any An-danitra na dia tsy nankatò aza izy tany amin’ny lasa?
Vakio ny Almà 8:26–32 mba hahitana ny fomba nitahiana an’i Almà sy i Amioleka noho ny zavatra nataon’izy ireo.
-
Inona avy no fitsipika nianaranao avy amin’ny tantaran’i Almà sy i Amioleka?
Iray amin’ireo fitsipika mety ho hitanao ny hoe rehefa mihaino sy mankatò ny Ray any An-danitra isika, dia mitahy antsika sy ny hafa Izy. Misy fomba isan-karazany ahafahantsika mandre ny tenin’ Andriamanitra. Ohatra, i Almà sy i Amioleka dia samy nandre ny tenin’ Andriamanitra avy tamin’ny anjely iray.
-
Milazà fomba maro araka izay azonao atao iresahan’ny Ray any An-danitra amintsika amin’izao androntsika izao. Raha mila fanampiana ianao, dia hevero ny hamerina mijery ny hoe “Fanambarana,” ao amin’ny Torolalana ho an’ny Soratra Masina.
Mihaino Azy
Hoy i Amioleka: “Nantsoina imbetsaka aho ary tsy te hihaino” (Almà 10:6). Efa nisy fotoana tsy nihainoan’i Almà an’ Andriamanitra ihany koa tany aloha teo amin’ny fiainany (jereo ny Môzià 27:8).
-
Soraty ny valin-teninao amin’ity sahanasa manaraka ity.
Alaivo sary an-tsaina hoe misy olona iray fantatrao manana olana amin’ny fihainoana sy fankatoavana an’ Andriamanitra. Makà minitra vitsy hiaraha-mandinika ny zavatra mety ho afaka mandrisika izany olona izany hatoky ny Tompo. Ireto manaraka ireto no mety ho hita ao anatin’izany:
-
Ny ohatra momba ny fankatoavana nasehon’i Almà sy Amioleka
-
Ohatra momba ny fankatoavan’ny Mpamonjy ny Ray
-
Tantara hafa ao amin’ny soratra masina izay nihainoan’ny olona iray sy nankatoavany an’ Andriamanitra
-
Fitahiana niainanao rehefa niezaka nankatò an’ Andriamanitra ianao
-
Hevero ny hijery ilay horonan-tsary hoe “Ny Finoana dia tsy avy amin’ny kisendrasendra fa avy amin’ny safidy” manomboka amin’ny mari-potoana 1:40 hatramin’ny 4:25, hita ao amin’ny ChurchofJesusChrist.org. Ao amin’io horonan-tsary io, ny Loholona Neil L. Andersen ao amin’ny Kôlejin’ny Apôstôly Roambinifolo dia milazalaza mombana zatovolahy iray izay nanao zavatra tamim-pahatokiana sy tamim-pankatoavana tamina bitsika iray azony nandritra ny fotoana nampiahiahy azy.
Makà fotoana hiraketana izay rehetra fahatsapana mety ho azonao tamin’ny Ray any An-danitra. Eritrereto ny zavatra azonao atao mba hanaovana zavatra araka ireo fahatsapana ireo. Mety ho hita ao anatin’izany ny fanoloran-tena hankatò didy manokana na bitsika sy ny dingana rehetra tokony hataonao. Raha sarotra ny mankatò ireo didy ireo, dia hevero ny hivavaka mba hanampian’ny Ray any An-danitra anao.