Алма 30:1–29

Корихорын сургаал олон хүнийг Аврагчаас холдуулав

Корихор гэгч нэгэн ёс бус хүн нифайчууд дунд орж иржээ. Тэрээр Есүс Христийн тухай бошиглолын эсрэг номлож, олон хүний зүрх сэтгэлийг Бурханаас холдуулав. Өнөө үед биднийг Есүс Христээс холдуулахыг эрмэлздэг олон дуу хоолой байна. Энэ хичээл танд Есүс Христээс холдуулж болох сургаалыг таньж, эсэргүүцэхэд тань тусалж чадна.

Сатаны хууран мэхлэлт

мaкa-фeкe нь наймаалжийн урхи юм. Наймаалжийн урхи нь жинхэнэ идэштэй маш төстэй харагдахаар хийгддэг тул хууртсан наймаалж нэгэнтээ барьж авсан л бол тавьдаггүй. Ийм тохиолдолд загасчин наймаалжийг завин дээрээ амархан гаргаж ирж чадна.

Ерөнхийлөгч Томас С.Монсон (1927–2018) Сатан хэрхэн ажилладгийг заахын тулд мaкa-фeкeгийн жишээг ашигласан.

Өнөөдөр биднийг уруу татаж, улмаар урхинд оруулахыг оролддог, өмнө минь санжганах хилэнцэт мaкa-фeкeнүүд бидний эргэн тойронд олон байна. Ийм мaкa-фeкeнүүдийг нэгэнт барьсан бол тавихад маш хэцүү, заримдаа бараг боломжгүй байдаг. Аюулгүй байхын тулд бид тэднийг юу болохыг нь таньж мэдэж, дараа нь тэднээс зайлсхийхдээ гуйвшгүй шийдэмгий байх ёстой. (Thomas S. Monson, “True to the Faith,” Liahona, May 2006, 18)

• Таныг “уруу татаж”, “урхинд оруулах” Сатаны хуурамч сургаалыг таних чадвартаа та хэр итгэлтэй байна вэ?

Биднийг Аврагчаас холдуулах зүйлсээс зайлсхийх нь

Нифайчууд, леменчүүдийн хоорондох агуу тулааны дараа нутаг даяар амар амгалан тогтжээ. Хоёр жилийн дараа Корихор гэгч хүн Зарахемлагийн хүмүүсийн дунд номлож эхлэв. Сатан Корихорт юу гэж хэлэхийг нь заав (Алма 30:53-ыг үзнэ үү). Өнөөдөр судлах явцдаа Корихор үгээ мөн хуурамч сургаалыг хэрхэн мaкa-фeкe болгон ашиглаж, хүмүүсийг урхинд оруулсныг анзаар.

Алма 30:6, 12-ыг уншаад, Корихорын захиасыг болон номлолыг дүрсэлсэн үг, хэллэгийг олж мэд.

• Тэр “Христийг эсэргүүцэгч” байсан гэсэн нь юу гэсэн утгатай гэж та бодож байна вэ? (Алма 30:6).

Христийг эсэргүүцэгч гэдэг үг нь “үнэн сайн мэдээний авралын төлөвлөгөөг хуурамчаар дуурайдаг, түүнчлэн Христтэй ил буюу далд сөргөлддөг ямар нэг юм буюу хүн” юм (Судруудын удирдамж, “Христийг эсэргүүцэгч,” scriptures.ChurchofJesusChrist.org). Корихорын түүхээс бид Сатан биднийг Есүс Христээс холдуулахын тулд хуурамч сургаал ашигладаг гэсэн нэг үнэнийг сурч мэдэж болно.

Корихорын Христийн эсрэг сургаал

Алма 30:12–18-ыг уншаад, Корихорын хуурамч сургаалыг олж мэд. Корихорын сургаалыг ялгахын тулд (жишээлбэл: содон өнгө, бэлгэ тэмдгээр) тэмдэглэ эсвэл судлах тэмдэглэлдээ бич.

• Корихорын зарим хуурамч сургаал юу байсан бэ?

1. Дараах асуултуудад хариул.

Эхний хоёр асуултад хариулахдаа ашиглах Корихорын хоёр эсвэл гурван тодорхой сургаалыг сонго. Тухайлбал:

• Та Корихорын сургаалыг хэрхэн өнөө үеийн хэллэгээр дахин хэлж болох вэ?

• 1-ээс 10 хүртэлх оноог (10 нь хамгийн хүчтэй) ашиглан, одоо үед Корихорын сургаалыг хэр хүчтэй сурталчилж байна гэж та харж байна вэ?

• Эдгээр сургаалын юу нь хүмүүсийг Есүс Христээс холдуулдаг вэ? Эдгээр санаа яагаад аюултай вэ?

Сүнсний удирдамжийг эрэлхийлж, Корихорын сургаал таны амьдралд хэрхэн нөлөөлсөн талаар эргэцүүлэн бод. Эдгээр хуурамч сургаалын аль нэг нь хувь хүний тань хувьд танд нөлөөлж болох арга замуудыг бод.

Арван хоёр төлөөлөгчийн чуулгын ахлагч Д.Тодд Кристоффэрсон Корихорын тухай мөн түүний сургаалын талаар ийн ярьсан. Та ChurchofJesusChrist.org дээрх “Наманчлалын бурханлаг бэлэг” видеог цагийн код 2:08-аас 2:40 хүртэл үзэж болох юм.

Корихор [гэх мэт хүмүүс] … Христ амьд гэдгийг болон нүгэл үнэхээр байдаг гэдгийг үгүйсгэдэг. Аливаа зүйлийн үнэ цэн, хэм хэмжээ, үнэн чанар хүртэл тэдний хувьд харьцангуй байдаг. Тиймээс ч нэгнийхээ үнэн гэж үзсэн зүйлийг бусад нь буруушаан шүүмжилж чадахгүй.

Иймэрхүү хуурамч сургаалын гадаад байдал нь биднийг аливаа зүйлсийн үр дагаврыг харгалзаж үзэлгүйгээр сонголт хийхэд хөтөлдөг. (Д.Toдд Кристоффэрсон, “Наманчлалын бурханлаг бэлэг,” 2011 оны 10-р сарын Ерөнхий чуулган, 45)

• Эдгээр сургаал хүмүүсийг хэрхэн нүгэл үйлдэхэд хүргэнэ гэж та бодож байна вэ? (18-р шүлэг-ийг үзнэ үү.)

Алма 30:19–21-ийг уншаад, Жершон ба Гидеоны хүмүүс Корихорын сургаалд ямар хариу үйлдэл гаргасныг олж мэд.

2. Дараах асуултуудад хариул.

Тэдний хариу үйлдэл Зарахемлагийн хүмүүсийнхээс яагаад “илүү цэцэн” (Алма 30:20) байсан гэж та бодож байна вэ? (Алма 30:18-ыг үзнэ үү).

• Бид хэрхэн “илүү цэцэн” байж, Христийн эсрэг захиасыг эсэргүүцэж чадах вэ?

• Аврагчийн талаарх таны мэдлэг мөн Түүнтэй харилцах харилцаа Христийн эсрэг эдгээр сургаалын танд үзүүлэх нөлөөнд хэрхэн нөлөөлж чадах вэ?

Судалснаасаа сурч мэдсэн мөн мэдэрсэн зүйлээ эргэцүүлэн бод. Есүс Христэд анхаарлаа төвлөрүүлэхэд тань туслах Ариун Сүнсний удирдамжийг эрэлхийлж, таныг Түүнээс холдуулах сургаалыг эсэргүүц.

Нэмэлт: Илүү ихийг судлахыг хүсэж байна уу?

Орчин үеийн бошиглогч, төлөөлөгчдийн зөвлөгөөг хүлээн зөвшөөрөх нь яагаад чухал вэ?

Ерөнхийлөгч Хэнри Б.Айринг ийн хэлсэн.

Корихор Бурханы үйлчлэгчдийн зөвлөгөөг дагана гэдэг нь Бурханаас соёрхсон бие даасан байдлын эрхүүдээсээ татгалзана гэсэн хэрэг хэмээн цаг хугацааны эхлэлээс буруу маргаан дэгдээсээр ирсэн эрэгтэй, эмэгтэйчүүдийн адил байсан. Гэвч уг маргаан бодит байдлыг мушгин гуйвуулдаг учраас худал юм. Бид Бурханаас ирдэг зөвлөгөөг эсэргүүцсэнээрээ гаднын нөлөөнөөс ангид байхыг сонгодоггүй. Харин бид өөр нөлөөллийг сонгодог. Бид бүхнийг чадагч, бүхнийг мэдэгч, биднийг төгс хайрлагч Тэнгэр дэх Эцэгийнхээ хамгаалалтаас татгалздаг. Түүний туйлын зорилго бол Өөрийн хайрт Хүүгийнхтэйгээ яг адил мөнх амьдралыг мөн Өөртөө байгаа бүхнийг бидэнд өгч, биднийг гэр бүлээр нь гэртээ буцаан аваачиж, хайрынхаа мутарт тэврэх явдал юм. Бид Түүний зөвлөгөөг эсэргүүцсэнээр өөр хүчний нөлөөг сонгодог ба үүний зорилго биднийг золгүй байдалд хүргэх бөгөөд хөдөлгөгч хүч нь үзэн ядалт юм. (Henry B. Eyring, “Finding Safety in Counsel,” Ensign, May 1997, 25)

Бидний амьдралд хуурамч сургаал хэрхэн нөлөөлж болох вэ?

Ерөнхийлөгч Рассэлл М.Нэлсон ийн хэлсэн.

Бид эхлээд Аврагч дээр, дараа нь баяр баясгалантай байхад анхаарлаа төвлөрүүлэх Түүний загварыг дагахдаа баярлаж баясахад маань саад болох хүчин зүйлүүдээс зайлсхийж байвал зохино. Христийн эсрэг тэмцдэг Корихорыг сана. Тэр дээд пристийн өмнө хүргэгдэж, “Та яагаад Их Эзэний замуудыг гажуудуулан явдаг билээ? Та яагаад энэ хүмүүст, тэдний баяслыг сарниулахаар Христ гэж үгүй хэмээн заадаг билээ? гэж асуугдах хүртлээ энэ тэрүүгээр хэсүүчлэн, Аврагчийн тухай худал хуурмаг мэдээлэл тарааж явсан. [Алма 30:22].

Христийн мөн Түүний сургаалын эсрэг байдаг бүх зүйл бидний баяр баясалд саад болдог. Үүнд онлайнаар болон блогоор дүүрэн буй хүмүүний сургаал орох бөгөөд энэ нь Корихорын хийж байсантай яг адил зүйлийг хийдэг.

Бид дэлхийнхнийг харж, тэдний аз жаргалын томьёоллыг дагавал хэзээ ч баяр баясгаланг мэдрэхгүй. (Рассэлл М.Нэлсон, “Баяр баясгалантай байж, сүнслэг байдлын хувьд тэсэж үлдэх нь,” 2016 оны 10-р сарын Ерөнхий чуулган, 71–74)

Бид хэрхэн үнэнийг мэдэж, Аврагчийг дагах вэ?

Ерөнхийлөгч Рассэлл М.Нэлсон ийн заасан.

Дэлхийн нөлөө, дарамт шахалт тоймгүй ихээс гадна сэтгэл татам байдаг ч дэндүү олон янзын нөлөө нь биднийг төөрөлдүүлж, толгойг маань эргүүлэн, гэрээний замаас биднийг холдуулж чадна. Үүнээс болж зайлшгүй ирэх цөхрөл гунигаас зайлсхийхийн тулд би өнөөдөр та бүхнээс амьдралдаа өдөр бүр Их Эзэнд зориулан цаг гаргаж, дэлхийн уруу таталтыг сөрөн зогсохыг хүсэж байна. (Рассэлл М.Нэлсон, “Их Эзэнд зориулан цаг гарга,” Лиахона, 2021 оны 11-р сар, 120)

Ирэх өдрүүдэд Ариун Сүнсний заан чиглүүлж, удирдаж, тайтгаруулж, байнга хамт байх нөлөөгүйгээр сүнслэгээр оршин тогтнох боломжгүй байх болно. (Рассэлл М.Нэлсон, “Сүмд болон бидний амьдралд зориулсан илчлэлт,” 2018 оны 4-р сарын Ерөнхий чуулган, 115)

Өнөө үед Христийн эсрэг ямар захиасыг зааж байна вэ?

Халамжийн нийгэмлэгийн ерөнхий ерөнхийлөгч асан Жюли Б.Бэк эгч ийн заасан.

Корихор Христийг эсэргүүцэгч байсан. Христийг эсэргүүцэгч нь гэр бүлийг эсэргүүцэгч юм. Манай өсвөр үеийнхний дэлхийгээс сонсдог аливаа сургаал, зарчим нь гэр бүлийг эсэргүүцэгч байвал мөн Христийг эсэргүүцэгч гэсэн үг. Ийм л ойлгомжтой. Хэрэв манай өсвөр үеийнхэн эцэг өвгөдийнхөө зөв шударгад итгэхээ болих юм бол …, хэрэв манай өсвөр үеийнхэн төлөвлөгөөн дэх өөрсдийнхөө оролцоог ойлгохгүй бол тэд холдох болно. (Julie B. Beck, “Teaching the Doctrine of the Family,” Ensign, Mar. 2011, 15)