Almà 31:1–11

“Ny herin’ny tenin’ Andriamanitra”

Karazan-javatra inona no mety hahatonga anao hahatsapa ho lavitra ny Mpamonjy? Inona no manampy anao hahatsapa ho akaiky kokoa Azy? Rehefa ren’i Almà fa “lavo tao amin’ny fahadisoana lehibe” ny Zôramita (Almà 31:9), dia nanao drafitra hampiasana ny herin’ny tenin’ Andriamanitra mba hanasana azy ireo hiverina amin’i Jesoa Kristy i Almà. Ity lesona ity dia afaka manampy anao hiantehitra amin’ny herin’ny tenin’ Andriamanitra mba hitoerana ho mahatoky amin’i Jesoa Kristy.

Fiviliana lalana

Ny Loholona Dieter F. Uchtdorf ao amin’ny Kôlejin’ny Apôstôly Roambinifolo dia nizara voka-pikarohana momba ny fahasarotan’ny fandehanana amina lalana mahitsy rehefa tsy misy mari-dalana hitantsika. Raha olona maro tao anatin’ilay fikarohana no nieritreritra fa nahomby izy ireo, dia nasehon’ny valiny azo fa “rehefa tsy misy mari-dalana azo ianteherana dia miala amin’ny lalana isika” (Dieter F. Uchtdorf, “Famerenana amin’ny laoniny isan’andro,” Liahona, nôv. 2021, 77). Azonao atao ny mijery ilay horonan-tsary hoe “Famerenana amin’ny laoniny isan’andro” manomboka eo amin’ny mari-potoana 1:40 hatramin’ny 3:25, ao amin’ny ChurchofJesusChrist.org, ka hieritreritra ny mety hifandraisan’izany eo amin’ny lafiny ara-panahy amin’ny fiainantsika.

• Inona no mety hifandraisan’izany amintsika eo amin’ny lafiny ara-panahy?

Ao amin’ny Almà 31–35, ianao dia hianatra momba ny Zôramita izay nino an’i Jesoa Kristy taloha saingy nivily niala tamin’ny finoan’izy ireo. Alohan’ny hanombohanao ny fandalinanao ny Almà 31, dia saintsaino ny fitomboan’ny finoanao an’i Jesoa Kristy.

• Raha hijanona eo amin’ny lalana misy anao amin’izao ianao, moa ve ianao handeha hankany amin’i Kristy sa hanalavitra Azy?

Ny tanjon’i Almà

Ao amin’ny Almà 31:1–11 dia mianatra momba ny Zôramita sy ny ezaka nataon’i Almà hanasana azy ireo hiverina amin’ny Tompo isika. Ity kisary manaraka ity dia afaka manampy anao hahatakatra ny fomba nanandraman’i Almà namerina ny Zôramita amin’ny lalana tokony ho izy.

Adikao ao anatin’ny diary fandalinanao ity manaraka ity.

Vakio ny Almà 31:1–4, 8–11 hitadiavana ny fomba sy ny antony nanombohan’ny Zôramita nivily lalana. Raketo an-tsoratra ao amin’ny fizarana hoe “Olana” ny zavatra hitanao.

1. Valio ireto fanontaniana manaraka ireto:

   • Tamin’ny fomba ahoana avy no nivilian’ny Zôramita lalana? Inona avy ireo olana naterak’izany?

   • Inona avy ireo fihetsika mitovitovy amin’izany izay mety hahatonga ny olona hivily lalana ankehitriny?

   Vakio ny Almà 31:34 hitadiavana ny tanjona sy ny fanantenan’i Almà ho an’ireo Zôramita. Hevero ny hanoratra izany ao amin’ny fizarana hoe “Tanjona”.

   • Rehefa mieritreritra ny tanjon’i Almà sy ny fahatsapany izay novakinao tao amin’ny Almà 31:1–2 ianao, inona no heverinao fa nandrisika an’i Almà? Nahoana no mety hanan-danja izany?

Vakio ny Almà 31:5–7, 11 hanisiana marika ireo teny na andian-teny izay mamaritra ny drafitr’i Almà hanatanterahana ny tanjony. Azonao marihina eo akaikin’ny andininy 5 fa ny teny hoe hery dia avy amin’ny teny latina hoe virtus, izay midika hoe tanjaka na hery (jereo ny Gospel Topics, “Virtue”), ary ny teny hoe hanandramana eto dia midika hoe hitsapana.

2. Valio farafahakeliny ny telo amin’ireto fanontaniana dimy misy teboka manaraka ireto.

   • Inona araka ny eritreritrao no dikan’ny hoe “manandrana ny herin’ny tenin’ Andriamanitra”? Aiza no ahafahanao mahita ny tenin’ Andriamanitra? (Hevero ny hamaky sy hampifandray ny andinin-tsoratra masina ao amin’ny Fotopampianarana sy Fanekempihavanana 18:2–4, 34–36; 68:4.)

   • Inona no fahamarinana iray azontsika ianarana avy amin’ny tanjon’i Almà sy ny drafiny mba hanatanterahana izany?

   Fahamarinana iray mety ho hitanao ny hoe Manana hery hitarihana ny olona ho any amin’i Jesoa Kristy ny tenin’ Andriamanitra.

   • Inona no fantatrao momba an’ Andriamanitra ka mahatonga ny teniny hahery vaika na hatanjaka aminao? Nahoana araka ny eritreritrao no mahery vaika “noho ny sabatra na ny zavatra hafa” izany? (Almà 31:5).

   • Amin’ny fomba ahoana no ahafahan’ny tenin’ Andriamanitra manampy antsika hizara ny filazantsara, hanitsy ny hevi-diso ary hitarika ny hafa ho any amin’i Jesoa Kristy?

   • Inona no fiantraikan’ny tenin’ Andriamanitra teo amin’ny fiainanao?

   Amin’ny alalan’ny fampiasana ny zavatra nianaranao avy tamin’i Almà sy ny hevi-baovao azonao avy tamin’ireo fanontaniana teo aloha, fenoy ilay fizarana hoe “Ahoana no hanatanterahana ilay tanjona”.

Ny tenin’ Andriamanitra eo amin’ny fiainako

Eritrereto ny fifandraisan’ny zavatra ianaranao avy amin’i Almà sy ny Zôramita amin’ny fiainanao.

• Inona avy ireo zavatra sasantsasany izay mahatonga ny zatovo hivily hiala amin’i Jesoa Kristy?

• Ahoana no ahafahan’ny fianteherana amin’ny tenin’ Andriamanitra misoroka ny fialantsika amin’i Jesoa Kristy na manampy antsika hiverina any Aminy?

Diniho ny fifandraisanao amin’i Jesoa Kristy. Misy zavatra hahatonga anao hiala Aminy ve? Te hanana fifandraisana mafy orina kokoa Aminy ve ianao? Mametraha ombam-bavaka tanjona mifanaraka amin’ny zavatra ilainao manokana mba hanampiana anao hanamafy orina ny fifandraisanao Aminy. Io tanjona io dia azo ampifandraisina na ampidirina amin’ireo tanjonao ao amin’ny Ankizy sy Zatovo.

Manaova tahadika iray hafa an’ilay kisary momba ny tanjona ao amin’ny diary fandalinanao.

Soraty ao amin’ny fizarana hoe “Tanjona” ny tanjonao manokana.

Azonao atao ihany koa ny manoratra izay rehetra mety ho sakana amin’ny tanjonao ao amin’ny fizarana hoe “Olana”.

Ao amin’ilay fizarana hoe “Ahoana no hanatanterahana ilay tanjona”, soraty ny fomba ahafahanao miantehitra amin’ny herin’ny tenin’ Andriamanitra. Ampidiro ao anatin’izany ny fomba ahafahan’izany manampy anao hanatanteraka ny tanjonao.

Afaka manampy ireto fanontaniana manaraka ireto.

• Nahoana no zavatra tsapanao fa ilainao atao eo amin’ny fiainanao io tanjona io? Ahoana no mety ho fiantraikan’ny fanatrarana izany eo amin’ny fifandraisanao amin’i Jesoa Kristy?

• Inona no zavatra voafaritra tsara azonao atao mba hanampy anao hiantehitra amin’ny herin’ny tenin’ Andriamanitra? Ahoana no ahafahan’izany manampy anao hanatanteraka ny tanjonao?

• Inona avy ireo soratra masina na teny nambaran’ny mpitarika ao amin’ny Fiangonana afaka mandrisika anao hiasa amin’io tanjona io?

3. Rehefa vitanao izany dia soraty ao amin’ny diary fandalinanao ny hoe “Mametraka tanjona manokana aho”. Hevero ny hirakitra an-tsoratra ny hevi-baovao sy ny antsipiriany rehetra momba ny zavatra niainanao tamin’ny fandalinanao ny Almà 31:1–11 izay tsy zavatra momba ny tenanao manokana loatra.

Tsy voatery atao: Te hianatra misimisy kokoa ve ianao?

Ahoana no ahafahan’ny ezaka tsotra sy tsy tapaka manampy ahy hijanona ho matanjaka ao amin’ny filazantsara?

Ireto horonan-tsary manaraka ireto dia maneho ny maha-zava-dehibe ny fanaovana ireny zavatra kely ireny mba hijanonana ho matanjaka ara-panahy:

Ahoana no hahazoako tombontsoa avy amin’ny fianteherana amin’ny tenin’ Andriamanitra?

Nampianatra izao ny Filoha Ezra Taft Benson (1899–1994):

Misy hery ao anatin’[ny Bokin’i Môrmôna] izay hanomboka hirotsaka eo amin’ny fiainanao raha vao manomboka mandalina tsara ilay boky ianao. Hahita hery lehibe kokoa ianao hanoherana ny fakam-panahy. Hahita hery ianao hialana amin’ny famitahana. Hahita hery ianao hijanonana eo amin’ilay lalana ety sy tery. (Ezra Taft Benson, “The Book of Mormon—Keystone of Our Religion,” Ensign, Nov. 1986, 7)

Nanazava izao ny Loholona Michael John U. Teh ao amin’ny Fitopololahy:

Ny figokana ny soratra masina isan’andro … dia hanampy antsika hanorina tanjaka sy fahalalana ara-panahy, hanala sarona ny fitaky ny devoly, ary hahita ny fandrika napetrany hahavoa antsika. (Michael John U. Teh, “The Power of the Word of God,” Liahona, Mar. 2013, 53)

Ny Filoha Boyd K. Packer (1924–2015) tao amin’ny Kôlejin’ny Apôstôly Roambinifolo dia nampianatra izao:

Ny fotopampianarana marina rehefa takatra dia manova ny toetra sy ny fitondrantena. Hanatsara haingana kokoa ny fitondrantenanao ny fandalinana ny fotopampianaran’ny filazantsara noho ny fandalinana ny momba ny fitondrantena mba hoentina hanatsarana ny fitondrantena. (Boyd K. Packer, “Do Not Fear,” Liahona, May 2004, 79)

Ny Filoha M. Russell Ballard dia nizara tantara iray mahery vaika momba ny herin’ny tenin’ Andriamanitra teo amin’ny fiainan’ny zatovolahy iray izay nanana olana tamin’ny fijoroana ho vavolombelona nananany.