ʻAlamā 33

Ko Hono Akoʻi e Ongoongolelei ʻa e Fakamoʻuí

Kuó ke ongoʻi nai ha loto-holi ke muimui ofi ange ki he ʻEikí ka naʻe ʻikai ke ke ʻilo e meʻa ke faí? Naʻe fehuʻi ʻe he kakai masiva ʻi he lotolotonga ʻo e kakai Sōlamí ki he palōfita ko ʻAlamaá ʻa e founga “ʻoku totonu ke nau kamata ke ngāue ʻaki ai ʻenau tuí” (ʻAlamā 33:1). ʻOku mahuʻinga ke mahino e tali ʻa ʻAlamaá ki he kau ākonga kotoa pē ʻo Sīsū Kalaisí. ʻE lava ke fakaloloto ʻe he lēsoni ko ʻení hoʻo mahino ki he ngaahi sitepu te ke lava ʻo fakahoko ke ngāue ʻaki ai ha tui lahi ange kia Sīsū Kalaisí.

Ngaahi fehuʻi ʻo e ongoongoleleí

• Kapau naʻá ke maʻu ha faingamālie ke ʻeke ha fehuʻi ʻe taha pe ua ki he palōfita ʻa e ʻOtuá, ko e hā e meʻa te ke fie ʻilo ki aí? Ko e hā hono ʻuhingá?

ʻI he ʻAlamā vahe 32, naʻe fakaafeʻi ai ʻe he palōfita ko ʻAlamaá ʻa e kakai Sōlamí ke fakamālohia ʻenau ngaahi fakamoʻoní ʻaki hono tanumaki e folofola ʻa e ʻOtuá ʻi honau lotó. Naʻa nau tali ia ʻaki ʻenau ʻeke ange ha ngaahi fehuʻi mahuʻinga.

Lau ʻa e ʻAlamā 33:1, ʻo kumi e ngaahi fehuʻi naʻa nau ʻeke ki he palōfitá.

• ʻOkú ke pehē ʻe toe fakalea fēfē ʻe ha tokotaha taʻu hongofulu tupu he ʻahó ni ʻa e fehuʻi “ko e founga fē ʻoku totonu ke nau kamata ke ngāue ʻaki ai ʻenau tuí”?

• Te ke tali fēfē ʻa e fehuʻi ko iá ʻo makatuʻunga ʻi he meʻa ʻokú ke ʻilo fekauʻaki mo e ongoongolelei ʻo Sīsū Kalaisí?

ʻOku mahulu hake ʻa hono ngāue ʻaki ʻo e tuí ʻi he tui pē kia Sīsū Kalaisí. ʻOku tau ngāue ʻaki ʻa e tuí ʻi he taimi ʻoku tau fakahoko ai ʻa e meʻa ʻoku kole mai ʻe he Fakamoʻuí pea feinga ʻi he loto-moʻoni ke muimui kiate Iá. Naʻe tali ʻe ʻAlamā ʻa e fehuʻi ʻa e kakai Sōlamí ʻaki ʻene akoʻi kiate kinautolu ha ngaahi founga lahi te tau lava ai ʻo ngāue ʻaki ʻetau tui kia Sīsū Kalaisí.

Fili ha taha ʻo e ngaahi meʻa ko ʻeni ʻe tolu ke fili mei ai ʻi he tali ʻa ʻAlamaá ʻokú ke loto ke mahino lelei angé. Teuteu ʻo hangē pē te ke akoʻi ha lēsoni miniti ʻe nima ki he fitu fekauʻaki mo e meʻa ʻokú ke filí. ʻE lava ke ke fakakaukau ki ha taha ʻokú ke ʻiloʻi pea teuteu ʻo hangē pē te ke vahevahe ʻa e lēsoní mo e tokotaha ko iá. Mahalo te ke fie fakaʻaongaʻi ha niʻihi ʻo e ngaahi fakakaukau ʻoku hiki atu ʻi he “Ngaahi Fakakaukau ki hono Teuteuʻi ʻo e Lēsoní” ʻamui ange ʻi he lēsoní ke tokoni ki hoʻo teuteú.

ʻOku ʻi ai foki ha ngaahi maʻuʻanga tokoni ʻe niʻihi ʻoku maʻu ʻi he konga “Fili Pē: Fie Ako Lahi Ange?” ʻi he fakaʻosinga ʻo e lēsoní ʻa ia ʻe ala tokoni atu kiate koe.

Fili 1: Te tau lava ʻo fakaʻaongaʻi ʻetau tui ki he ʻOtuá ʻaki ʻetau moihū kiate Ia ʻi he lotu. ʻAlamā 33:3–11

Ngaahi potufolofola kehe ke fakakaukau ki aí: ʻAlamā 34:17–27

Fili 2: Te tau lava ʻo ngāue ʻaki ʻa e tuí ʻi heʻetau tui ki he ʻAlo ʻo e ʻOtuá. ʻAlamā 33:12–18

Ngaahi potufolofola kehe ke fakakaukau ki aí: Sione 3:16; 2 Nīfai 2:6–8

Fili 3: Te tau lava ʻo ngāue ʻaki ʻa e tuí ʻi heʻetau fekumi kia Sīsū Kalaisi ke maʻu ha fakamoʻuí. ʻAlamā 33:18–23

Ngaahi potufolofola kehe ke fakakaukau ki aí: Nōmipa 21:4–9; Hilamani 8:14–15

Ngaahi Fakakaukau ki Hono Teuteu ʻo e Lēsoní

Tohi ʻa Molomoná – Tohi Lēsoni ʻa e Faiakó (2024)—“ʻAlamā 33: Ko Hono Akoʻi e Ongoongolelei ʻa e Fakamoʻuí”

Ko e meʻa fē naʻá ke fili ke tokanga taha ki aí?

ʻE lava ke ke fakaʻaongaʻi ha niʻihi ʻo e ngaahi fakakaukau ko ʻení ke tokoni atu ki hono teuteuʻi hoʻo fokotuʻutuʻu lēsoní.

Ko e ngaahi kupuʻi lea mahuʻinga mei he ngaahi veesi te ke lava ʻo fokotuʻu kiate kinautolu ʻokú ke akoʻí ke nau fakaʻilongaʻí:

Ko e meʻa ʻe lava ke tokoniʻi ʻe he ngaahi veesi ko ʻení ke mahino pe ongoʻi ʻe he niʻihi ʻokú ke akoʻí fekauʻaki mo e Tamai Hēvaní mo Sīsū Kalaisí:

Founga ʻe lava ke liliu ai ʻe he moʻoni ko ʻení ʻa e moʻui ʻo kinautolu ʻokú ke akoʻí:

Ngaahi lēsoni fakatātā, pe ngaahi sīpinga lelei ʻo e kakai ʻoku nau moʻui ʻaki e foʻi moʻoni ko ʻení:

Ngaahi fehuʻi te ke ala ʻeke ke tokoniʻi ʻa kinautolu ʻokú ke akoʻí ke nau fakalaulauloto ki he meʻa naʻe akoʻi ʻe ʻAlamaá:

Ngaahi aʻusia kuó ke maʻu ʻi he meʻa naʻe akoʻi ʻe ʻAlamaá:

Ngaahi potufolofola pe fakamatala kehe mei he kau taki ʻo e Siasí:

Ko e meʻa te ke ala fakaafeʻi ʻa kinautolu ʻokú ke akoʻí ke nau fai koeʻuhí ko e meʻa ne nau akó:

© 2023 by Intellectual Reserve, Inc. All rights reserved.

Fakakaukauʻi ʻi he faʻa lotu ʻa e founga te ke lava ai ʻo vahevahe ʻa e meʻa naʻá ke akó mo e tokotaha naʻá ke fakakaukau ki ai ʻi he taimi naʻá ke teuteu ai ʻa e lēsoni ko ʻení.

1. Hiki ha fokotuʻutuʻu ʻo e meʻa te ke akoʻí, kau ai ʻa e fakaikiiki ʻo e founga te ke akoʻi ʻaki iá. Hili iá pea tali leva e ongo fehuʻi ko ʻení:

   • Ko e hā ha ngaahi fakakaukau naʻá ke maʻu fekauʻaki mo hono ngāue ʻaki ʻa e tui kia Sīsū Kalaisí he ʻaho ní?

   • Naʻe tokoni fēfē hono teuteuʻi ha lēsoni fekauʻaki mo iá ke ke maʻu ai e ngaahi fakakaukau ko iá?

Fili Pē: Fie Ako Lahi Ange?

Ko e hā ha meʻa ʻe lava ʻo tokoni ke mahino lelei ange kiate au ʻa e meʻaʻofa ʻo e lotú?

Naʻe akoʻi ʻe Sisitā Sitenī S. Leinolo ʻo e Kau Palesitenisī Lahi mālōlō ʻo e Palaimelí ʻo pehē:

Kuó u lotu ʻi ha ngaahi feituʻu kehekehe. Kuó u lotu ʻi matātahí, ʻi he ʻotu moʻungá, ʻi he lotú, ʻi he malaʻe vaʻingá. Kuó u lotu ʻi hoku falé, ʻi ha vakapuna, pea ʻi he falemahakí. ʻOku ou ʻilo te u lava ʻo lotu ki he Tamai Hēvaní ʻi ha faʻahinga taimi, ʻi ha feituʻu pē. ʻOku ou ʻilo ʻokú Ne fanongo mai kiate au. (Sydney S. Reynolds, “I Can Pray to Heavenly Father Anytime, Anywhere,” Liahona, May 2003, 113)

Naʻe vahevahe ʻe ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá:

ʻOku ʻafioʻi kitautolu ʻe he Tamai Hēvaní, pea te Ne ʻafioʻi kitautolu ʻi ha feituʻu pē ʻoku tau ʻi ai. ʻOku fakafiemālie ke ʻiloʻi, ko e fē pē ha feituʻu te tau ʻi ai, te Ne folofola mai kiate kitautolu ʻo kapau te tau fekumi kiate Ia ʻi he lotú. (D. Todd Christofferson, “Friend to Friend: Seeking Him in Prayer,” Friend, Feb. 2006, 9)

ʻOku ʻi he fakalea ʻo e Himi “Fai Haʻo Lotú” (Ngaahi Himí, fika 70) ha ngaahi tāpuaki lahi ʻoku foaki mai ʻe he ʻOtuá ʻo fakafou ʻi he meʻaʻofa ʻo e lotú.

Ko e hā ha meʻa ʻe lava ʻo tokoni ke mahino lelei ange kiate au ʻa e meʻaʻofa ʻo e ʻAlo ʻo e ʻOtuá?

Naʻe fakamatala ʻa Palesiteni Henelī B. ʻAealingi ʻo e Kau Palesitenisī ʻUluakí ʻo pehē:

A Priceless Heritage of Hope

Henry B. Eyring encourages us to leave an inheritance of hope for those who will follow our example.

Naʻe foaki mai heʻetau Tamai Hēvani ʻofá kiate kitautolu ʻa e meʻaʻofa ʻo Hono ʻAlo ʻOfaʻanga ko Sīsū Kalaisí, ko hotau Fakamoʻui. ʻOku ʻomai ʻe he meʻaʻofa maʻongoʻonga ko iá mo e tāpuaki ʻo e Fakalelei ʻa Sīsū Kalaisí ha tukufakaholo fakalūkufua: ko e talaʻofa ʻo e Toetuʻú mo e malava ke maʻu ʻa e moʻui taʻengatá ʻe kinautolu kotoa kuo fāʻeleʻí. (Henry B. Eyring, “Ko Ha Tukufakaholo Mahuʻinga ʻo e ʻAmanaki Leleí,” Liahona, Mē 2014, 24)

Ko e hā ha meʻa ʻe lava ʻo tokoni mai ke mahino lelei ange kiate au ʻa e fakataipe ʻo e ngata palasá?

Fakafehoanaki e ongo laʻiʻata ko ʻení ʻi hoʻo lau ʻa e ngaahi maʻuʻanga tokoni ko ʻení:

Naʻe pehē ʻe ʻEletā Keleni O. Senisoni ʻo e Kau Fitungofulú:

Hangē ko ʻIsileli ʻi he kuonga muʻá ʻi he toafá, ʻoku tau maʻu ha ngaahi aʻusia lolotonga ʻetau moʻui fakamatelié ʻokú ne tataki kitautolu ki he ʻEikí … ki ha fakaakeake mo ha fakamoʻui. Ko e taimi ʻe niʻihi ʻokú Ne tauteaʻi kitautolu (vakai, 1 Nīfai 17:41), ʻi he ʻamanaki ke fakamolū hotau lotó. Ka ʻi he tūkunga faingataʻa takitaha, ʻokú Ne tuʻu mateuteu ʻi he ʻaloʻofa ke fakamoʻui kitautolu kapau te tau tui kiate Ia. …

ʻOku tau fakahaaʻi ʻetau loto-holi ke fakamoʻui kitautolú ʻaki ʻetau manatu maʻu ai pē kiate Ia mo talangofua ki Heʻene ngaahi fekaú. Naʻe ʻikai ko e ngata palasá naʻá ne ʻomi ʻa e fakamoʻuí; ko e tui kia Sihova mo e talangofua ki Heʻene folofolá. (Glen O. Jenson, “Look and Live,” Ensign, Mar. 2002, 34)

Vakai, “Ngata Palasá” ʻi he Fakahinohino ki he Ngaahi Folofolá.

Lau ʻa e Sione 3:14–15; 1 Nīfai 17:40–41; 3 Nīfai 27:13–16.