ʻAlamā 32

“Fakatupulekina Hoʻomou Tuí”

ʻE lava ke fakaʻaongaʻi ha ngaahi meʻa kehekehe ke tokoni ke mahino kiate kitautolu ʻa e ongoongolelei ʻo Sīsū Kalaisí. ʻI hono akoʻi ʻe ʻAlamā ʻa e kakai Sōlamí, naʻá ne fakafehoanaki e folofola ʻa e ʻOtuá ki ha tengaʻi ʻakau te tau lava ʻo tō ʻi hotau lotó ʻa ia ʻe iku ʻo hoko “ko ha fuʻu ʻakau ʻoku tupu hake ki he moʻui taʻengatá” (ʻAlamā 32:41). ʻOku fakataumuʻa ʻa e lēsoni ko ʻení ke tokoniʻi koe ke tō ʻa e folofola ʻa e ʻOtuá ʻi ho lotó pea tanumaki hoʻo fakamoʻoni ki aí.

Ngaahi Fakafehoanakí

ʻE lava ke hoko ʻa e fakafehoanakí ko ha founga lelei ki hono akoʻi mo ako ʻa e ongoongolelei ʻo Sīsū Kalaisí. Fakafonu e ngaahi feituʻu ʻatā ko ʻení. Mohu founga pea vakai pe ʻoku ʻi ai ha founga ʻe taha te ke lava ʻo fakakakato ai e ngaahi sētesí.

• ʻOku hangē ʻa e moʻuí ko e koeʻuhí .

• ʻOku hangē ʻa e telefoni toʻotoʻó ko e koeʻuhí .

• ʻOku hangē hono maʻu ha fakamoʻoní ko e koeʻuhí .

Lolotonga e ngāue ʻa ʻAlamā mo ʻAmuleki ʻi he lotolotonga ʻo e kakai Sōlamí, naʻe fakahaaʻi ʻe ha falukunga kakai ʻenau hohaʻa ʻi he ʻikai ke nau lava ʻo hū ki he ʻOtuá koeʻuhí kuo kapusi kinautolu mei honau ngaahi feituʻu faiʻanga lotú koeʻuhí ko ʻenau masivá (vakai, ʻAlamā 32:5). Neongo ʻoku tau ʻiloʻi kuo akoʻi mahino mai ʻe he ʻEikí ʻa e mahuʻinga ʻo e ʻalu ki Hono Siasí ʻi he Sāpaté, ka naʻe tali ia ʻe ʻAlamā ʻaki ʻene akoʻi ʻa kinautolu naʻe ʻikai fakangofua ke nau ʻalu ki he Lotú, ki ha ngaahi moʻoni mahuʻinga fekauʻaki mo e moihuú ʻe lava ke hoko ʻi hotau lotó, ʻo tatau ai pē pe ʻoku tau ʻi fē.

Lau ʻa e sētesi ʻuluaki ʻo e ʻAlamā 32:28, hili iá pea lau ʻa e veesi 41 pea kumi ki ha fakafehoanaki naʻe fakaʻaongaʻi ʻe ʻAlamā ʻe lava ke ʻaonga foki kiate koe.

• Ko e hā ha ngaahi faitatau ʻokú ke vakai ki ai ʻi he tupu ha fuʻu ʻakau fua mei ha tengaʻi ʻakaú pea mo hono fakatupulaki hoʻo fakamoʻoni kia Sīsū Kalaisi mo ʻEne ngaahi akonakí?

ʻE lava ke fakaʻaongaʻi ʻa e fakafehoanaki ʻe ʻAlamā ʻa e folofola ʻa e ʻOtuá ki ha tengaʻi ʻakaú ki hono maʻu ha fakamoʻoni ki ha faʻahinga tafaʻaki pē ʻo e ongoongoleleí. Ka naʻe toki fakamatalaʻi ʻe ʻAlamā kimui ange ko ha fakamoʻoni ia kia Sīsū Kalaisi naʻá ne ʻamanaki ʻe tō ʻe he kakai Sōlami ko iá ʻi honau lotó (vakai, ʻAlamā 33:22–23).

• Ko e hā ʻoku hoko ai ʻa e tui ki he Fakamoʻuí ko ha “tengaʻi ʻakau” mahuʻinga ke tō ʻi ho lotó?

Tuku ha kiʻi taimi ke ke fakakaukau ai ki he mālohi lolotonga ʻo hoʻo fakamoʻoni fakalūkufua kia Sīsū Kalaisi mo ʻEne ngaahi akonakí. ʻIkai ngata aí, fakalaulauloto foki pe ʻoku ʻi ai ha ngaahi tafaʻaki pau ʻo hoʻo fakamoʻoní ʻokú ke loto ke fakamālohia ʻo hangē ko e ʻofa ʻa e Tamai Hēvaní kiate koé pe ko hono moʻoni ʻo e ʻUluaki Mata Meʻa-Hā-Mai ʻa Siosefa Sāmitá. ʻI hoʻo hokohoko atu hoʻo ako he ʻaho ní, kumi ki he ngaahi moʻoni ʻe lava ʻo tokoni ke mahino lelei ange kiate koe ʻa e founga ke maʻu pe fakamālohia ai hoʻo fakamoʻoní.

Ko Hono Tō mo Tauhi e Folofola ʻa e ʻOtuá ʻi Hotau Lotó

Tohi ʻa Molomoná – Tohi Lēsoni ʻa e Faiakó (2024)—“ʻAlamā 32: ‘Fakatupulekina Hoʻomou Tuí’”

Ko hono tō ʻo e tengaʻi ʻakaú

Lau ʻa e ʻAlamā 32:21–23, 26–30, pea fakaʻilongaʻi e ngaahi lea mo e kupuʻi lea ʻoku tokoni ke mahino kiate koe ʻa e founga ke kamata fakatupulaki ai ha fakamoʻoní.

• Ko e hā te ne lava ʻo ʻai ke faingataʻa ki he kakaí hono fakahoko ʻení?

• Fakatatau ki he veesi 28–30, ko e hā ʻe lava ke hoko ʻi he taimi ʻoku tau fakaʻatā ai ha potu ʻi hotau lotó maʻa Sīsū Kalaisi mo ʻEne ngaahi akonakí?

1. Fai e ngaahi meʻa ko ʻení:

   Hiki ha fakamatala fakanounou sētesi ʻe taha ʻo e meʻa naʻá ke ako mei he ngaahi veesi ko ʻení fekauʻaki mo hono tokoniʻi hoʻo fakamoʻoní ʻi hono kamata fakatupulakí.

Ko hono tauhi ʻo e tengaʻi ʻakaú

Naʻe akoʻi ʻe ʻAlamā ko hono tō ʻo e tengaʻi ʻakaú mo ʻiloʻi ʻoku leleí ko e konga ʻuluaki pē ia ʻo hono fakatupulaki ha fakamoʻoní. Lau ʻa e ʻAlamā 32:37–43, ʻo kumi ʻa e ngaahi akonaki ʻoku tokoni ke mahino kiate koe ʻa e founga ke tokoniʻi ai ha fakamoʻoni ke hokohoko atu ʻene tupulakí.

• Ko e hā ha ngaahi sīpinga ʻo e founga ʻe lava ke taʻe-tokanga ai ha taha ki heʻene fakamoʻoni kia Sīsū Kalaisi mo ʻEne ngaahi akonakí?

• Ko e hā ha ngaahi founga te ke lava ai ʻo tanumaki hoʻo fakamoʻoni kia Sīsū Kalaisi mo ʻEne ongoongoleleí ke tokoni ke tupulaki ʻo mālohi angé?

2. Fai e ngaahi meʻa ko ʻení:

   Hiki ha fakamatala fakanounou sētesi ʻe taha ʻo e meʻa naʻá ke ako mei he ngaahi veesi ko ʻení fekauʻaki mo hono fakamālohia ha fakamoʻoni kuo ʻosi tupulaki ʻiate koé.

© 2023 by Intellectual Reserve, Inc. All rights reserved.

Ko hoʻo fakamoʻoní

Ke tokoni ke ke vakai ki he founga ʻoku fekauʻaki ai e fakafehoanaki naʻe fakahoko ʻe ʻAlamaá mo hoʻo fakamoʻoni kia Sīsū Kalaisi mo ʻEne ongoongoleleí, tā ha fakatātā hangē ko ʻení ʻi hoʻo tohinoa akó. Fakavahavaha hoʻo fakatātaá ʻi he pēsí koeʻuhí ke ʻi ai ha feituʻu ke hiki ai ʻi lalo ʻa e tuʻunga tupulaki takitaha.

Fakaʻaongaʻi ha kiʻi taimi ke fakafehoanaki ai hoʻo fakamoʻoni ki he Fakamoʻuí mo ʻEne ngaahi akonakí ki he tupu ʻa ha fuʻu ʻakau fua. Fili ha ngaahi tafaʻaki ʻo e ongoongolelei ʻo Sīsū Kalaisí, pea tohiʻi ʻa e tafaʻaki takitaha ʻi lalo ʻi he ngaahi tuʻunga ʻokú ke ongoʻi ʻokú ne fakafofongaʻi lelei taha hoʻo fakamoʻoni lolotonga ʻi he ngaahi tafaʻaki ko iá.

Hangē ko ʻení, ʻe lava ke tohi ʻe ha taha ʻa e “ʻOku moʻui ʻa Sīsū Kalaisi” ʻi lalo ʻi he fuʻu ʻakaú, mo e “mālohi ʻo e lakanga fakataulaʻeikí” ʻi lalo ʻi he tengaʻi ʻakaú. ʻE lava leva ke hiki ʻe he tokotaha ko iá ha ngaahi tafaʻaki kehe ʻo e ongoongolelei ʻa e Fakamoʻuí, hangē ko e “palōfita moʻui,” “ngāue fakatemipale,” “ko e Tohi ʻa Molomoná,” mo e “lotú,” ʻi he ngaahi tuʻunga tupulaki ʻokú ne fakafofongaʻi ʻene fakamoʻoní ʻi he ngaahi tafaʻaki takitaha ko iá.

Faʻu ha palani ki he founga te ke feinga ai ke fakaʻaongaʻi e ngaahi akonaki ʻa ʻAlamaá ʻi hoʻo moʻuí. ʻE lava ke ke fakakaukau ki he meʻa te ke lava ʻo fai ke “fakaʻatā [ai] ha potu” ʻi ho lotó mo hoʻo moʻuí ki ha tafaʻaki ʻo hoʻo fakamoʻoní ke tupulaki. Te ke lava foki ʻo fakakaukau ki he founga te ke lava ai ʻo “tauhi” ʻa e ngaahi konga ʻo hoʻo fakamoʻoní ʻa ia kuo ʻosi kamata tupulakí. Lekooti hoʻo ngaahi fakakaukaú, ongó mo e taumuʻá ʻi hoʻo tohinoa akó.

Fili Pē: Fie Ako Lahi Ange?

Te u lava fēfē ʻo fakatupulaki ha tui ʻoku lahi ange kia Sīsū Kalaisi mo ʻEne ongoongoleleí?

Naʻe akonaki ʻa ʻEletā Lisiate G. Sikoti (1928–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

He ʻikai lava ke langa ha fakamoʻoni mālohi ʻi ha fakavaʻe vaivai. Ko ia ai, ʻoua naʻá ke pehē ʻokú ke tui ki ha meʻa ka ʻoku ʻikai ke ke fakapapauʻi ia. Feinga ke maʻu ha fakamoʻoni fakapapau. Feinga mālohi ʻi he lotu fakamātoato, moʻui angatonu, pea kole ha fakamahino fakalaumālie. … Tuku ke ʻafioʻi ʻe hoʻo Tamai ʻi Hēvaní ʻa hoʻo ngaahi ongó, fiemaʻú, meʻa ʻokú ke hohaʻa ki aí, ngaahi ʻamanakí mo e fakaʻamú. Fakataufolofola kiate Ia ‘i he loto-falala moʻoni, ʻi he ʻilo te Ne fanongo pea tali mai. Pea laka atu ki muʻa ʻi he faʻa kātaki ʻo fakahoko ʻa e ngaahi meʻa ʻokú ke ʻilo ʻoku totonu ʻi hoʻo moʻuí, ʻo ʻaʻeva ʻi he loto-fakapapau ʻoku tupu mei he tuí mo e māʻoniʻoní, pea tatali ʻi he faʻa kātaki ki he tali ʻe hoko mai ʻi he founga mo e taimi ʻoku finangalo ki ai ʻa e ʻEikí. (Richard G. Scott, “The Power of a Strong Testimony,” Ensign, Nov. 2001, 88)

Naʻe fakamatala ʻa Palesiteni Henelī B. ʻAealingi ʻo e Kau Palesitenisī ʻUluakí:

ʻOku fiemaʻu ke tanumaki e fakamoʻoní ʻi he lotu ʻo e tuí, fiekaia ki he folofola ʻa e ʻOtuá ʻi he tohi folofolá pea mo e talangofua ki he moʻoni kuo tau maʻú. ʻOku fakatuʻutāmaki hono liʻaki ʻo e lotú. ʻOku tuʻu fakatuʻutāmaki ʻetau fakamoʻoní ʻi he kehe pē ke lau mo ako e folofolá. ʻOku fiemaʻu e ngaahi ivi ko iá ki heʻetau fakamoʻoní. (Henry B. Eyring, “Ko Ha Fakamoʻoni Moʻui,” Liahona, Mē 2011, 127)