ʻAlamā 34:1–17

Ko e Fakalelei Taʻe-fakangatangata mo Taʻengata ʻa Sīsū Kalaisí

Kuó ke fakakaukau nai pe naʻe mei fēfē hoʻo moʻuí ka ne taʻeʻoua ʻa Sīsū Kalaisi mo ʻEne Fakaleleí? Naʻe akoʻi ʻe ʻAmuleki ki he kakai Sōlamí ko e kakai kotoa pē ʻoku loto-fefeka, hinga, pea hē ʻi he ʻikai ke nau maʻu ʻa e feilaulau taʻe-fakangatangata mo taʻengata ʻa e ʻAlo ʻo e ʻOtuá. ʻOku fakataumuʻa ʻa e lēsoni ko ʻení ke tokoni ke mahino kiate koe ʻa e founga ʻe lava ke tāpuekina ai koe ʻe Sīsū Kalaisi ʻi Heʻene feilaulau fakalelei taʻe-fakangatangata mo taʻengatá.

Naʻe mei kehe fēfē nai ʻa e moʻuí?

Naʻe mei kehe fēfē nai ʻa e moʻuí kapau naʻe taʻeʻoua …?

Fakakaukau ki ha ngaahi founga ʻe niʻihi te ke lava ai ʻo tali e fehuʻi ko ʻení ʻaki ʻa e kakai pe ngaahi meʻa ʻokú ke falala ki aí. Hangē ko ʻení, te ke lava ʻo fakakaukau ki he founga naʻe mei kehe ai hoʻo moʻuí ka ne taʻeʻoua ha tokotaha pau, ko ha niʻihi ʻo e tekinolosia pe meʻangāue ʻokú ke faʻa fakaʻaongaʻí, pe ko ha ʻekitivitī ʻokú ke saiʻia ai.

Tuku ha kiʻi taimi ke faʻu ai ha lisi ʻi hoʻo tohinoa akó fekauʻaki mo ha niʻihi ʻo e ngaahi founga naʻe mei kehe ai hoʻo moʻuí ka ne taʻeʻoua ʻa Sīsū Kalaisi mo ʻEne Fakaleleí. ʻI hoʻo ako he ʻaho ní, te ke ako ha ngaahi moʻoni ʻe lava ʻo tokoni ke mahino lelei ange kiate koe hoʻo fiemaʻu ʻa Sīsū Kalaisí.

ʻOku fakamoʻoni ʻa ʻAmuleki ki he kakai Sōlamí fekauʻaki mo Sīsū Kalaisi

Mahalo te ke manatuʻi naʻe malanga ʻa ʻAlamā mo ʻAmuleki ʻi he lotolotonga ʻo e kau Sōlamí, ʻa ia naʻa nau tui ʻe “ʻikai ke ʻi ai ha Kalaisí” (ʻAlamā 31:16). Hili hono fakaʻosi ʻe ʻAlamā ʻene ngaahi pōpoaki ʻoku lekooti ʻi he ʻAlamā 32–33, naʻe vahevahe ʻe ʻAmuleki ʻene fakamoʻoni ki he Fakamoʻuí.

Lau ʻa e ʻAlamā 34:1–10, ʻo kumi ʻa e meʻa naʻe vahevahe ʻe ʻAmuleki fekauʻaki mo Sīsū Kalaisi mo ʻEne Fakaleleí.

Ko e ʻAlamā 34:9–10 ko ha potufolofola fakataukei fakatokāteline ia. Fakakaukau ke fakaʻilongaʻi e ngaahi potufolofola fakataukei fakatokāteliné ʻi ha founga makehe koeʻuhí ke faingofua ange hoʻo maʻu kinautolú. Te ke maʻu ha faingamālie ʻi he lēsoni hokó ke akoako fakaʻaongaʻi ʻa e tokāteline ʻoku akoʻi ʻi he potufolofola ko ʻení ki ha fehuʻi pe tūkunga.

• Ko e ngaahi lea pe kupuʻi lea fē fekauʻaki mo Sīsū Kalaisi mo ʻEne Fakaleleí naʻe mahuʻingamālie taha kiate koé? Ko e hā hono ʻuhingá?

• Ko e hā naʻá ke ako mei he ngaahi veesi ko ʻení fekauʻaki mo e ʻuhinga ʻoku tau fiemaʻu ai ʻa Sīsū Kalaisi ke fakalelei maʻatautolú?

• Te ke fakamatalaʻi fakanounou fēfē ʻa e ngaahi akonaki ʻa ʻAmuleki ʻi he ʻAlamā 34:8–10 ko ha fakamatala ʻo e moʻoní?

Mahalo kuó ke ʻiloʻi ha foʻi moʻoni hangē ko ʻení: ʻO ka ne taʻeʻoua ʻa e Fakalelei taʻe-fakangatangata mo taʻengata ʻa Sīsū Kalaisí, ʻe hē ʻa e faʻahinga kotoa ʻo e tangatá ʻo taʻengata.

• Ko e hā ka “malaʻia” ai ʻa e kakai kotoa pē pe hē ʻo taʻengata ka ne taʻeʻoua ʻa Sīsū Kalaisi mo ʻEne Fakaleleí?

Taʻefakangatangata mo taʻengata

Fakakaukau ke fakaʻilongaʻi ʻa e ongo foʻi lea “taʻe-fakangatangata mo taʻengata” ʻi he fakaʻosinga ʻo e veesi 10 pea hiki ʻa e fakatātā ko ʻení ʻi hoʻo tohinoa akó:

• ʻOkú ke pehē ʻoku ʻuhinga ki he hā ʻa e pehē ʻoku taʻe-fakangatangata mo taʻengata ʻa e Fakalelei ʻa Sīsū Kalaisí?

Naʻe vahevahe ʻe Palesiteni Lāsolo M. Nalesoni ʻa e ngaahi fakakaukau ko ʻení:

ʻOku taʻe-fakangatangata ʻEne Fakaleleí—ʻo ʻikai hano ngataʻanga. Naʻe ʻikai foki hano ngataʻanga he ʻe fakahaofi ʻa e faʻahinga kotoa ʻo e tangatá mei he mate ʻoku ʻikai hano ngataʻangá. Naʻe taʻe-fakangatangata ia ʻi he ngaahi tuʻunga ʻo ʻEne mamahi lahí. … Naʻe toe taʻe-fakangatangata ia ʻi hono lahí—he naʻe pau ke fakahoko tuʻo taha pē ia maʻá e taha kotoa. Pea naʻe ʻikai ngata ʻene aʻu atu e ʻaloʻofa ʻo e Fakaleleí ki ha niʻihi tokolahi pē, ka ki he ngaahi māmani taʻe-faʻalaua naʻá Ne fakatupú. Naʻe ope atu ʻene taʻe-fakangatangatá ʻi he meʻa ne malava ke fakafuofuaʻi ʻe he meʻafua ʻa e tangatá pe mākupusi fakamatelié. (Russell M. Nelson, “The Atonement,” Ensign, Nov. 1996, 35)

• Ko e hā naʻe tokoni ʻa e fakamatala ko ʻení ke ke ako pe ongoʻi fekauʻaki mo Sīsū Kalaisi mo ʻEne feilaulau fakaleleí?

Ko e hā ʻene fekauʻaki mo koé?

Neongo ʻe lava ke tāpuakiʻi ʻe he Fakamoʻuí ha kakai taʻe-fakangatangata ʻo fakafou ʻi Heʻene Fakaleleí, ka te Ne lava foki ʻo tāpuakiʻi fakataautaha koe. Fakakaukau ke liliu ʻa e fakatātā ʻi hoʻo tohinoa akó ke hangē ko ʻení:

Ako e ngaahi maʻuʻanga tokoni ko ʻení, ʻo kumi ha niʻihi ʻo e ngaahi founga ʻe lava ke tāpuekina fakataautaha ai koe ʻe he Fakamoʻuí koeʻuhí ko ʻEne Fakalelei taʻe-fakangatangata mo taʻengatá.

• ʻAlamā 34:11–17

• 2 Nīfai 9:10

• Tokāteline mo e Ngaahi Fuakava 58:42

Naʻe akoʻi ʻe Palesiteni Teti R. Kalisitā, naʻe hoko ko e Palesiteni Lahi ʻo e Lautohi Faka-Sāpaté ʻo pehē:

Kuó u feʻiloaki mo ha Kāingalotu lelei ʻoku faingataʻa ke nau fakamolemoleʻi kinautolu, ʻoku nau fakangatangata e ivi huhuʻi ʻo e Fakamoʻuí, ko e fai ʻi he taʻeʻilo mo e maʻuhala. ʻOku ʻikai ke nau fakatokangaʻi, kuo nau liliu ha Fakalelei ʻoku taʻe fakangatangatá ki ha fakangatangata ʻo pehē he ʻikai lava ke ne hakeakiʻi ʻenau angahalá pe vaivaí. Ka ko ha Fakalelei ʻeni ʻoku ʻikai ke fakangatangata he ʻokú ne fālute mo fakakau e angahala mo e vaivai kotoa pē, ʻo aʻu ki he ngaohikovia pe mamahi ne fakatupu ʻe he niʻihi kehé. (Tad R. Callister, “Ko e Fakalelei ʻa Sīsū Kalaisí,” Liahona, Mē 2019, 85–86)

1. Tali ha fehuʻi ʻe taha pe lahi ange ʻo e ngaahi fehuʻi ko ʻení:

   • Ko e hā naʻá ke ako fekauʻaki mo ha niʻihi ʻo e ngaahi founga ʻe lava ke tāpuekina fakataautaha ai koe ʻe he Fakamoʻuí ʻo fakafou ʻi Heʻene Fakalelei taʻe-fakangatangata mo taʻengatá?

   • Naʻe mei kehe fēfē nai hoʻo moʻuí ka ne taʻeʻoua ʻa Sīsū Kalaisi mo ʻEne Fakaleleí?

Fili Pē: Fie Ako Lahi Ange?

ʻE lava fēfē ke tāpuekina fakataautaha au ʻe Sīsū Kalaisi ʻi Heʻene Fakalelei taʻe-fakangatangata mo taʻengatá?

Naʻe akoʻi ʻe ʻEletā Maikolo Sione U. Tei ʻo e Kau Fitungofulú:

ʻOku faʻa ʻi ai e taimi ʻoku faingofua ange ke tau fakakaukau mo lea ʻaki fakalūkufua e Fakalelei ʻa Kalaisí ʻo ʻikai ke fakatokangaʻi hono mahuʻinga fakataautaha ki heʻetau moʻuí. ʻOku taʻe-fakangatangata mo taʻengata e Fakalelei ʻa Sīsū Kalaisí pea ʻoku mākupusi kotoa ʻe hono māukupú mo e lolotó ʻa e ngaahi ola fakataautaha mo fakafoʻituituí. ʻOku maʻu ʻe he Fakamoʻuí ʻa e mālohi ke fakamaʻa, fakamoʻui, mo fakamālohia fakataautaha kitautolu, koeʻuhi ko ʻEne feilaulau fakaleleí. (Michael John U. Teh, “Ko Hotau Fakamoʻui Fakatāutahá,” Liahona, Mē 2021, 99)

ʻE lava fēfē ke ʻomi ʻe Sīsū Kalaisi mo ʻEne Fakaleleí ha ʻamanaki lelei kiate au?

Naʻe akoʻi ʻe ʻEletā Tieta F. ʻUkitofa ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻOku liliu fakaʻaufuli ʻe he Fakalelei taʻe-fakangatangata ʻa e Fakamoʻuí ʻa e anga ʻo ʻetau vakai ki heʻetau ngaahi maumaufonó mo e tōnounoú. Te tau lava ʻo ako mei ai mo ongoʻi ha ʻamanaki lelei, kae ʻikai nofotaha ai mo ongoʻi he ʻikai toe lava ʻo huhuʻi mei ai pe siva e ʻamanakí. ʻOku fakaʻatā ʻe he meʻaʻofa faifakamaʻa ʻo e fakatomalá ke tau liʻaki ʻetau ngaahi angahalá pea hoko ko ha fakatupu foʻou.

Koeʻuhí ko Sīsū Kalaisi, ʻoku ʻikai fiemaʻu ia ke ʻilo ʻaki kitautolu ʻetau ngaahi tōnounoú. Te nau lava ʻo fakaleleiʻi kitautolu. (Dieter F. Uchtdorf, “ʻOku ʻIate Kitautolu ʻa e ʻOtuá,” Liahona, Mē 2021, 8–9)

Naʻe akoʻi ʻe ʻEletā Kēleti W. Kongo ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻI heʻetau ongoʻi, pe lolotonga ongoʻi taʻepauʻia, tuenoa, fakaʻitaʻi, ʻita, tukuhifoʻi, pe fakamavaheʻi mei he ʻOtuá mo Hono Siasi kuo fakafoki maí, ʻe ala fiemaʻu ha ngāue mo e tui lahi ange ke toe hū ki Heʻene hala ʻo e fuakavá. Ka ʻoku ʻaonga ia! Kātaki ʻo haʻu, pe toe haʻu pē, ki he ʻEiki ko Sīsū Kalaisí! ʻOku mālohi ange e ʻofa ʻa e ʻOtuá ʻi he ngaahi afo ʻo e maté—fakatuʻasino pe fakalaumālie. ʻOku taʻe-fakangatangata mo taʻengata e Fakalelei ʻa Kalaisí. ʻOku tau hē kotoa pē pea ʻikai maaʻusia. ʻE malava ke tau hē ʻi ha taimi. ʻOku fakapapauʻi angaʻofa mai ʻe he ʻOtuá, ʻoku tatau ai pē pe ʻoku tau ʻi fē pe ko e hā kuo tau faí, ʻoku ʻikai teitei ai ha feituʻu te ke taʻelava ʻo foki mei ai. ʻOkú Ne tatali mai ke fekita mo kitautolu. (Gerrit W. Gong, “Ko ʻEtau Tafuʻanga Afi ʻo e Tuí,” Liahona, Nōvema 2018, 41)