« អាលម៉ា ៣៤:១–១៧ ៖ ដង្វាយធួនដ៏និរន្តរ៍ និងអស់កល្បជានិច្ច » ព្រះគម្ពីរមរមន សៀវភៅសិក្សាសម្រាប់គ្រូបង្រៀន ( ឆ្នាំ ២០២៤ )
« អាលម៉ា ៣៤:១–១៧ » ព្រះគម្ពីរមរមន សៀវភៅសិក្សាសម្រាប់គ្រូបង្រៀន
អាលម៉ា ១៣:១–១៧
ដង្វាយធួនដ៏និរន្តរ៍ និងអស់កល្បជានិច្ច
តើអ្នកធ្លាប់គិតថា ជីវិតអ្នកនឹងទៅជាយ៉ាងណាដែរឬទេ បើគ្មានព្រះយេស៊ូវគ្រីស្ទ និងដង្វាយធួនរបស់ទ្រង់ទេនោះ ? អាមូលេក បានបង្រៀនពួកសាសន៍សូរាំថា មនុស្សទាំងអស់មានចិត្តរឹងរូស ធ្លាក់ និងរង្វេង បើគ្មានពលិកម្មមួយដ៏និរន្តរ៍ និងអស់កល្បជានិច្ចនៃព្រះរាជបុត្រាព្រះទេនោះ ។ មេរៀននេះមានគោលបំណងជួយអ្នកឲ្យយល់ពីរបៀបដែលព្រះយេស៊ូវគ្រីស្ទអាចប្រទានពរអ្នកបានតាមរយៈពលិកម្មមួយដ៏និរន្តរ៍ និងអស់កល្បជានិច្ចរបស់ទ្រង់ ។
តើជីវិតនឹងខុសគ្នាយ៉ាងដូចម្ដេច ?
តើជីវិតនឹងខុសគ្នាយ៉ាងដូចម្ដេចបើគ្មាន …?
សូមគិតពីរបៀបពីរបីដែលអ្នកអាចនឹងឆ្លើយសំណួរនេះដោយមានមនុស្ស ឬវត្ថុដែលអ្នកពឹងផ្អែកលើ ។ ឧទាហរណ៍ អ្នកអាចនឹងគិតពីរបៀបដែលជីវិតអ្នកនឹងខុសគ្នាបើគ្មានមនុស្ស បច្ចេកវិទ្យា ឬឧបករណ៍មួយចំនួនដែលអ្នកតែងតែប្រើ ឬសកម្មភាពដែលធ្វើជាញឹកញាប់ដែលអ្នកចូលចិត្ត ។
សូមចំណាយពេលបន្តិចដើម្បីបង្កើតបញ្ជីមួយនៅក្នុងសៀវភៅកំណត់ហេតុការសិក្សារបស់អ្នក អំពីវិធីមួយចំនួនដែលជីវិតអ្នកនឹងមានភាពខុសគ្នាបើគ្មានព្រះយេស៊ូវគ្រីស្ទ និងដង្វាយធួនរបស់ទ្រង់ទេ ។ នៅពេលអ្នកសិក្សាថ្ងៃនេះ អ្នកនឹងរៀនអំពីសេចក្តីពិតដែលអាចជួយអ្នកឲ្យយល់កាន់តែច្បាស់អំពីតម្រូវការរបស់អ្នកដើម្បីមានព្រះយេស៊ូវគ្រីស្ទ ។
អាមូលេក ថ្លែងទីបន្ទាល់ដល់ពួកសាសន៍សូរាំអំពីព្រះយេស៊ូវគ្រីស្ទ
អ្នកអាចនឹកចាំថា អាលម៉ា និង អាមូលេក បានផ្សព្វផ្សាយក្នុងចំណោមពួកសាសន៍សូរាំ ដែលជាអ្នកជឿថានឹង « ពុំមានព្រះគ្រីស្ទទេ » ( អាលម៉ា ៣១:១៦ ) ។ បន្ទាប់ពីអាលម៉ាបានបញ្ចប់សារលិខិតរបស់លោកដែលបានកត់ត្រានៅក្នុង អាលម៉ា ៣២–៣៣ ហើយ អាមូលេក បានចែកចាយទីបន្ទាល់របស់លោកផ្ទាល់អំពីព្រះអង្គសង្រ្គោះ ។
សូមអាន អាលម៉ា ៣៤:១–១០ ដោយការរកមើលអ្វីដែលអាមូលេក បានចែកចាយអំពីព្រះយេស៊ូវគ្រីស្ទ និងដង្វាយធួនរបស់ទ្រង់ ។
អាលម៉ា ៣៤:៩–១០ គឺជាវគ្គបទគម្ពីរចំណេះចំណានខាងគោលលទ្ធិ ។ សូមពិចារណាគូសចំណាំវគ្គបទគម្ពីរសចំណេះចំណានខាងគោលលទ្ធិតាមរបៀបដែលងាយចំណាំ ដើម្បីអ្នកអាចងាយរកវាឃើញ ។ អ្នកនឹងមានឱកាសនៅក្នុងមេរៀនបន្ទាប់ដើម្បីអនុវត្តតាមគោលលទ្ធិដែលបានបង្រៀននៅក្នុងវគ្គបទគម្ពីរនេះចំពោះសំណួរ ឬស្ថានភាពមួយ ។
-
តើពាក្យ ឬឃ្លាដែលនិយាយអំពីព្រះយេស៊ូវគ្រីស្ទ និងដង្វាយធួនរបស់ទ្រង់មួយណា ដែលអ្នកបានរកឃើញថាមានអត្ថន័យជាពិសេស ? ហេតុអ្វី ?
-
តើអ្នកបានរៀនអ្វីខ្លះពីខគម្ពីរទាំងនេះ អំពីមូលហេតុដែលយើងត្រូវការព្រះយេស៊ូវគ្រីស្ទដើម្បីឲ្យធួនសម្រាប់យើង?
-
តើអ្នកនឹងសង្ខេបការបង្រៀនរបស់អាមូលេកនៅក្នុង អាលម៉ា ៣៤:៨–១០ ជាសេចក្តីថ្លែងការណ៍នៃសេចក្ដីពិតយ៉ាងដូចម្ដេច ?
អ្នកអាចរកឃើញសេចក្តីពិតមួយដែលស្រដៀងទៅនឹងសេចក្តីពិតដូចតទៅនេះ ៖ បើគ្មានដង្វាយធួនដ៏និរន្តរ៍ និងអស់កល្បជានិច្ចនៃព្រះយេស៊ូវគ្រីស្ទទេ នោះមនុស្សលោកទាំងអស់នឹងវង្វេងជារៀងរហូត ។
-
ហេតុអ្វីបានជាមនុស្សទាំងអស់នឹង « ពុំអាចចៀសផុតពីសេចក្ដីវិនាសបានឡើយ » ឬត្រូវវង្វេងជារៀងរហូតបើគ្មានព្រះយេស៊ូវគ្រីស្ទ និងដង្វាយធួនរបស់ទ្រង់ទេ ?
ដ៏និរន្តរ៍ និងអស់កល្បជានិច្ច
សូមពិចារណាគូសចំណាំពាក្យ « ដ៏និរន្តរ៍ និងអស់កល្បជានិច្ច » នៅចុងបញ្ចប់នៃ ខទី ១០ ហើយចម្លងដ្យាក្រាមខាងក្រោមដាក់ចូលទៅក្នុងសៀវភៅកំណត់ហេតុការសិក្សារបស់អ្នក ៖
-
តើអ្នកគិតថា ដង្វាយធួនរបស់ព្រះយេស៊ូវគ្រីស្ទគឺដ៏និរន្តរ៍ និងអស់កល្បជានិច្ច មានន័យដូចម្តេច ?
ប្រធាន រ័សុល អិម ណិលសុន បានចែកចាយការយល់ដឹងដូចខាងក្រោម ៖
ដង្វាយធួនរបស់ទ្រង់គឺដ៏និរន្តរ៍—គ្មានទីបញ្ចប់នោះទេ ។ វាក៏ជានិរន្ដរ៍ដែលមនុស្សលោកទាំងអស់នឹងត្រូវបានសង្គ្រោះពីសេចក្ដីស្លាប់ដែលមិនចេះចប់ដែរ ។ វាជានិរន្ដរ៍ក្នុងន័យការរងទុក្ខដ៏ខ្លាំងមហិមារបស់ទ្រង់ ។ … វាជាវិសាលភាពដ៏និរន្តរ៍—វាត្រូវធ្វើតែម្ដងសម្រាប់មនុស្សទាំងអស់ ។ ហើយសេចក្ដីមេត្តាករុណានៃដង្វាយធួនមិនត្រឹមតែផ្តល់ឲ្យដល់មនុស្សជាច្រើនមហិមានោះទេ ប៉ុន្ដែវាថែមទាំងដល់ចំនួនដ៏និរន្តរ៍នៃពិភពលោកដែលបានបង្កើតឡើងដោយទ្រង់ផងដែរ ។ វាជានិរន្តរ៍លើសពីទំហំនៃរង្វាស់ ឬការយល់ដឹងខាងសាច់ឈាមណាមួយរបស់មនុស្សទៅទៀត ។ ( រ័សុល អិម ណិលសុន « The Atonement » Ensign ខែ វិច្ឆិកា ឆ្នាំ ១៩៩៦ ទំព័រ ៣៥ )
-
តើសេចក្តីថ្លែងការណ៍នេះបានជួយអ្នកឲ្យស្វែងយល់ ឬមានអារម្មណ៍យ៉ាងណាដែរអំពីព្រះយេស៊ូវគ្រីស្ទ និងពលិកម្មដ៏ធួនរបស់ទ្រង់ ?
តើវាទាក់ទងទៅនឹងរូបអ្នកយ៉ាងដូចម្តេច ?
ខណៈពេលដែលព្រះអង្គសង្គ្រោះអាចប្រទានពរដល់មនុស្សគ្មានកំណត់ចំនួនតាមរយៈដង្វាយធួនរបស់ទ្រង់ នោះទ្រង់ក៏អាចប្រទានពរដល់អ្នកដោយផ្ទាល់បានផងដែរ ។ សូមពិចារណាធ្វើបច្ចុប្បន្នភាពដ្យាក្រាមក្នុងកំណត់ហេតុការសិក្សារបស់អ្នកដើម្បីឲ្យមានលក្ខណៈដូចខាងក្រោម ៖
សូមសិក្សាតាមធនធានឯកសារខាងក្រោមនេះ ដោយរកមើលវិធីមួយចំនួនដែលព្រះអង្គសង្គ្រោះអាចប្រទានពរដល់អ្នកផ្ទាល់ ដោយសារដង្វាយធួនដ៏និរន្តរ៍ និងអស់កល្បជានិច្ចរបស់ទ្រង់ ។
ប្រធាន ថាត អរ ខាលីស្ទើរ អតីតប្រធានសាលាថ្ងៃអាទិត្យទូទៅបានបង្រៀន ៖
មានគ្រាមួយ ខ្ញុំបានជួបនឹងពួកបរិសុទ្ធល្អៗដែលពិបាកនឹងអភ័យទោសដល់ខ្លួនឯង ដែលជាមនុស្សដែលបានដាក់ដែនកំណត់ពុំត្រឹមត្រូវទៅលើព្រះចេស្ដាប្រោសលោះរបស់ព្រះអង្គសង្គ្រោះដោយអចេតនា ។ ដោយពុំដឹងខ្លួន ពួកគេបានបំលែងដង្វាយធួនដ៏និរន្ដរ៍មួយទៅជាដង្វាយធួនដែលកំណត់ ដែលពុំអាចបំពេញបន្ថែមដល់អំពើបាប ឬភាពទន់ខ្សោយជាក់លាក់របស់ពួកគេ ។ ប៉ុន្តែវាគឺជាដង្វាយធួនជានិរន្តរ៍មួយ ដោយសារវាមានរាប់បញ្ចូលនូវរាល់អំពើបាប និងភាពទន់ខ្សោយ ក៏ដូចជារាល់ការបំពាន ឬការឈឺចាប់ដែលបង្កឡើងដោយមនុស្សដទៃផងដែរ ។ ( ថាត អរខាលីស្ទើរ « The Atonement of Jesus Christ » Liahona ខែ ឧសភា ឆ្នាំ ២០១៩ ទំព័រ ៨៥–៨៦ )
-
សូមឆ្លើយសំណួរខាងក្រោមនេះយ៉ាងហោចណាស់មួយ ៖
-
តើអ្នកបានរៀនអ្វីខ្លះអំពីវិធីមួយចំនួនដែលព្រះអង្គសង្គ្រោះអាចប្រទានពរអ្នកដោយផ្ទាល់បានតាមរយៈដង្វាយធួនដ៏និរន្តរ៍ និងអស់កល្បជានិច្ចរបស់ទ្រង់ ?
-
តើជីវិតរបស់អ្នកនឹងខុសគ្នាយ៉ាងដូចម្ដេច បើគ្មានព្រះយេស៊ូវគ្រីស្ទ និងដង្វាយធួនរបស់ទ្រង់ទេនោះ ?
-