Alma 57

Patuloy na Pagsisikap na Sundin ang mga Kautusan

Ano ang saloobin mo sa pagsunod sa mga kautusan? Bakit mahalaga ang saloobin mo? Habang nakikipaglaban sa isa pang mapanganib na digmaan, sinunod ng mga kabataang mandirigma “ang bawat salita ng pag-uutos nang may kahustuhan,” na “patuloy nilang ibinibigay ang kanilang tiwala sa Diyos” (Alma 57:21, 27). Ang lesson na ito ay naglalayong tulungan kang patuloy na sikaping sundin ang mga utos ng Diyos.

Mga saloobin sa mga kautusan

Ilarawan ang tatlong magkakaibang saloobin na maaaring mayroon ang isang tao sa pagsunod sa mga kautusan ng Diyos at kung bakit.

Maglaan ng sandali para isulat ang mga sagot sa mga sumusunod na tanong sa iyong study journal:

• Ano ang saloobin mo sa pagsunod sa mga kautusan ng Diyos? Bakit mahalaga ang saloobin mo?

• Kung hindi mo kasalukuyang pinagsisikapan na sundin ang mga kautusan sa abot ng iyong makakaya, ano ang humahadlang sa iyo paggawa niyon?

Sa iyong pag-aaral ngayon, maghanap ng mga alituntunin tungkol sa pagsunod na maaaring magbigay-inspirasyon at maghikayat sa iyo at tumulong sa iyo sa anumang tanong o alalahanin. Pag-isipang mabuti kung paano ito maiaangkop at magdudulot ng pagpapala sa iyong buhay.

Mga kabataang mandirigma

Sa nakaraang lesson, nalaman mo kung paano nakatulong ang 2,000 kabataang mandirigma kay Antipus at sa kanyang mga tauhan para matalo ang “pinakamalakas” at “pinakamarami” na hukbo ng mga Lamanita sa bahaging iyon ng lupain (tingnan sa Alma 56:34). Sa Alma 57, ipinagpatuloy ni Helaman ang kanyang liham kay Kapitan Moroni. Animnapu pang anak na lalaki ng mga tao ni Ammon ang sumama sa kanyang hukbo (tingnan sa Alma 57:6), at naharap ang 2,060 kabataang mandirigma sa isa pang banta. Sinalakay ng mga Lamanita ang mga Nephita at malapit na silang madaig ng mga Lamanita nang si Helaman at ang kanyang mga tauhan ay sinamahan ng isang grupo ng mga kawal na ipinasama noong una sa mga bihag na Lamanita (tingnan sa Alma 57:1–18).

Ang dalawang kasanayan sa pag-aaral ng mga banal na kasulatan na magpapalalim sa iyong pag-aaral sa salaysay na ito at makatutulong sa iyo na maipamuhay ang mga aral nito ay ang pagtukoy sa mahahalagang salita o parirala at pag-isipan ang mga ito.

Basahin ang Alma 57:19–23 para malaman ang nangyari. Maaari mong markahan ang mga salita at parirala na naglalarawan sa mga kabataang mandirigma ni Helaman.

Sa talata 21, maaari mong markahan kung paano inilarawan ni Helaman ang pagsunod ng mga kabataang lalaking ito. Basahin ang Alma 58:40, at alamin ang saloobin ng mga mandirigma sa Diyos at sa Kanyang mga kautusan pagkatapos ng kasunod na banta ng digmaan.

• Ano sa palagay mo ang ibig sabihin ng “tinupad gawin ang bawat salita ng pag-uutos nang may kahustuhan” (Alma 57:21) at “patuloy nilang sinusunod ang … kanyang mga kautusan” (Alma 58:40)?

• Paano naiimpluwensiyahan ng ating pananampalataya at pag-alaala kay Jesucristo ang ating hangarin at kakayahang sundin ang mga kautusan ng Diyos?

Basahin ang Alma 57:24–27, at hanapin ang mga salita o parirala na nagpapakita kung paano pinagpala ang mga anak ni Helaman sa kanilang pangalawang digmaan dahil sa kanilang pananampalataya at pagsunod sa Diyos.

• Ano ang natutuhan mo mula sa salaysay na ito na maaaring nauugnay sa iyong buhay ngayon?

Ang isang alituntunin na matututuhan natin ay kung magtitiwala tayo sa Diyos at patuloy nating susundin ang Kanyang mga utos, pagpapalain Niya tayo sa pamamagitan ng Kanyang kagila-gilalas na kapangyarihan.

• Paano nakakaapekto ang kaalaman na may “makatarungang Diyos” na may “mahimala” at “kagila-gilalas na kapangyarihan” (Alma 57:26) sa ating saloobin sa pagsunod sa Kanya?

• Ano sa palagay mo ang saloobin na nais ng Panginoon na taglayin natin kapag nagsisikap tayong sundin ang Kanyang mga kautusan ngunit hindi pa rin tayo lubos na nakakasunod? Paano nakatutulong ang nauunawaan mo tungkol sa Pagbabayad-sala ni Jesucristo para masagot ang tanong na ito?

Mahalagang maunawaan na kapag masunurin tayo sa Kanyang mga utos, pagpapalain tayo ng Diyos sa Kanyang sariling paraan at panahon. Sa dalawang pakikidigma nila, pinagpala ang mga kabataang mandirigma na mapangalagaan ang kanilang buhay sa kabila ng mapanganib na pakikipaglaban at pinsala.

1. Kumpletuhin ang kahit dalawa sa mga sumusunod, at isulat ang natutuhan mo:

   1. Basahin ang kahit dalawa sa mga sumusunod na talata para madagdagan ang iyong naunawaan sa mga layunin ng mga kautusan ng Diyos at kung paano ka Niya mapagpapala sa iyong pagsunod: Abraham 3:25; Juan 14:15; Mosias 2:41; Alma 9:13.

   2. Mag-isip ng mga halimbawa ng pagsunod ng Tagapagligtas sa Ama sa Langit, at pagnilayan ang natutuhan mo mula sa Kanyang halimbawa. Itinuro ni Elder Robert D. Hales (1932–2017) ng Korum ng Labindalawang Apostol na “ang pagmamahal natin sa Tagapagligtas ang susi sa pagsunod na tulad ng Tagapagligtas” (“Kung Ako’y Inyong Iniibig, ay Tutuparin Ninyo ang Aking mga Utos,” Liahona, Mayo 2014, 37). Isipin ang ilan sa mga dahilan kung bakit mahal mo ang Tagapagligtas at kung paano nakakaapekto ang pagmamahal na iyon sa iyong saloobin sa pagsunod sa mga kautusan.

   3. Pagnilayan ang mga paraan na naging masunurin ka sa mga kautusan ng Diyos at ang mga pagpapalang ibinigay Niya sa iyo dahil sa iyong pagsunod.

2. Gawin ang sumusunod na aktibidad sa pagsusulat at sagutin ang mga tanong sa ibaba:

   Mag-isip ng isa sa mga kautusan ng Diyos. Ilarawan kung ano kaya ang totoong pakiramdam ng isang teenager ngayon na nagsisikap na alalahanin ang Panginoon at patuloy na sundin ang kautusang ito. Pagkatapos ay ilarawan kung anong mga pagpapala ang matatanggap ng isang teenager na sumusunod sa ganitong paraan.

   • Ano ang ilang dahilan kung bakit natutukso tayong huwag gawin ang lahat ng ating makakaya para sundin ang isang kautusan? Paano natin mapaglalabanan ang mga tuksong ito?

   • Paano tayo patuloy na kailangang magtiwala sa Tagapagligtas na si Jesucristo sa pagsisikap na sundin ang mga kautusan?

   Para tapusin ang lesson na ito, gumawa ng mithiin sa iyong study journal kung paano mo gustong “[alalahanin ang] Panginoon [mong] Diyos sa araw-araw; [at] … patuloy [na sundin] ang … kanyang mga kautusan” (Alma 58:40). Maaari kang pumili ng isang partikular na kautusan na gusto mong sundin nang mas mabuti. Bilang bahagi ng iyong mithiin, pag-isipang bigyan ng panahon ang iyong sarili—halimbawa, “Sisikapin kong taos-pusong magdasal sa umaga at sa gabi sa loob ng susunod na limang araw” o kaya ay “Ako ay pupunta sa sa araw ng Sabbath sa loob ng susunod na apat na linggo.”

Opsiyonal: Gusto Mo Bang May Matutuhan Pa?

Anong mga pagpapala ang dumarating sa pagsunod sa lahat ng kautusan ng Diyos?

Sinabi ni Pangulong Russell M. Nelson ang isa pang paraan na mapagsisikapan nating sumunod nang may kahustuhan:

“May makakaharap [kayong] mga tao na namimili kung aling mga utos ang susundin at binabalewala ang ibang mga utos na pinili nilang labagin. Ang tawag ko [r]ito ay estilo ng turu-turo sa pagsunod. Hindi uubra ang ganitong pagpili. Hahantong ito sa kalungkutan. Sa paghahandang humarap sa Diyos, sinusunod ng isang tao ang lahat ng Kanyang utos. …

… Ang pagsunod sa mga utos ng Diyos ay magbibigay ng pisikal at espirituwal na proteksyon. (Russell M. Nelson, “Harapin ang Kinabukasan nang may Pananampalataya,” Liahona, Mayo 2011, 34–35)

Bakit tayo binibigyan ng Panginoon ng mga kautusan?

Itinuro ni Elder Dale G. Renlund ng Korum ng Labindalawang Apostol:

Ang mithiin ng ating Ama sa Langit bilang magulang ay hindi ang iutos sa Kanyang mga anak na gawin kung ano ang tama; kundi ang piliin na gawin kung ano ang tama at sa huli ay maging katulad Niya. Kung ang nais lang Niya ay maging masunurin tayo, bibigyan Niya kaagad tayo ng mga gantimpala o kaparusahan para maimpluwensyahan ang ating pag-uugali.

Ngunit hindi nais ng Diyos na maging parang mahusay at masunuring “alagang hayop” lang ang Kanyang mga anak.” …

Ang Diyos ay gumawa ng plano at sa planong iyan magiging mga tagapagmana tayo sa Kanyang kaharian, isang landas ng tipan na hahantong sa pagiging katulad Niya, magkaroon ng uri ng buhay na katulad ng buhay Niya, at mabuhay magpakailanman bilang mga pamilya sa Kanyang kinaroroonan. Ang pagpili para sa sarili ay kinakailangan noon—at ngayon—sa planong ito, na nalaman natin sa ating premortal na buhay. (Dale G. Renlund, “Piliin Ninyo sa Araw na Ito,” Liahona, Nob. 2018, 104)

Ano pa ang itinuro ng mga General Authority at lider ng Simbahan tungkol sa pagsunod?