Helamàna 13–16

Mahatakatra ny mpaminanin’ny Tompo

Ahoana no fahatsapanao tamin’ny fotoana nahenoanao olona naneho ahiahy na fanakianana momba ny mpaminany? Rehefa nitsangana teo amin’ny manda i Samoela ilay Lamanita ary niantso ny olona hibebaka, dia samy hafa ny fihetsika navalin’izy ireo ny teniny. Miaina valiny mitovitovy amin’izany amin’ny mpaminany ny olona amin’izao androntsika izao. Ity lesona ity dia afaka manampy anao hahatakatra ny anjara asan’ny mpaminany sy ny fomba ahafahan’izy ireny manampy antsika.

Matoky ny mpaminanin’ny Tompo

Ataovy sary ao anatin’ny diary fandalinanao ity manaraka ity:

Manodidina ilay sary maneho ny vondrona tsirairay, mitanisà antony sasantasany mahatonga ny olona mino sy manaraka mpaminany na tsy mino sy manakiana azy ireny mihitsy aza.

Makà fotoana hisaintsainana ny zavatra efa nianaranao sy fantatrao momba ny mpaminany ka afaka manampy anao sy ny hafa hino fa avy amin’ Andriamanitra izy ireny. Ohatra, mety nanao lisi-pahamarinana momba ny mpaminany ianao rehefa nandalina momba an’i Nefia ao amin’ny Helamàna 7–10.

Ao amin’ny Helamàna 13, nandefa mpaminany fanampiny ny Tompo, i Samoela ilay Lamanita. Ity lesona ity dia topimaso ankapobeny amin’ireo fampianarany (jereo ny Helamàna 13–16). Rehefa mandalina ianao, dia afaka manampy ao amin’ny lisi-pahamarinana momba ny mpaminany nataonao. Mikatsaha hevi-baovao izay mety hanampy ny olona iray izay sahirana mafy amin’ny finoana.

Nitory tamin’ny Nefita i Samoela

Vakio ny Helamàna 13:1–7; 14:9, ary tadiavo ny zavatra manaitra anao momba an’i Samoela.

• Avy amin’ny ohatra nasehon’i Samoela, inona no nianaranao momba ny mpaminany? (Hevero ny hampidirana ny fahamarinana rehetra hitanao ao amin’ny lisitrao.)

Iray amin’ny fahamarinana mety hitanao ny hoe ny hafatry ny mpaminany iray dia tsy avy amin’ny tenany fa avy amin’ny Tompo izany. Hevero ny hanisy marika ireo andianteny ao amin’ny Helamàna 13:5, 7; 14:9 izay manohana io fahamarinana io. Azonao atao ihany koa ny mamaky ny Helamàna 7:29 sy ny Fotopampianarana sy Fanekepihavanana 1:38; 21:4–5 amin’ny maha soratra masina mifandray azy ireo ary ampifandraiso amin’ireo andininy ao amin’ny Helamàna 13 izy ireo.

• Ahoana no mety hahafahan’ny fahatakarana io fahamarinana io miantraika amin’ny fomba ihainoantsika ny mpaminany?

• Ahoana no mety hahafahan’izany manampy rehefa alaim-panahy hiahiahy na hanakiana azy ireny isika?

1. Vitao ireto manaraka ireto:

   Makà minitra vitsy hamerenana mijery ampahan’ny lahateny nataon’ny mpaminany tao amin’ny fihaonambe maneran-tany vao haingana. Mieritrereta ny Tompo sy ny ahiahiny momba anao. Miezaha mamaky ilay lahateny toy ny hoe hafatra avy amin’ny Tompo. Omano ny iray amin’ireto manaraka ireto:

   • Mitadiava andianteny na fampianarana manokana inoanao fa nomen’ny tsindrimandrin’ny Tompo. Zarao hoe nahoana.

   • Lazalazao ny zavatra azonao atao mba handraisana fijoroana ho vavolombelona manokana fa ny hafatra iray avy amin’ny mpaminany dia avy amin’ny Tompo.

Namaly ny mpaminany ny Nefita

Vakio ny Helamàna 13:24–29; 14:10, hitadiavana ny fihetsiky ny Nefita nanoloana ny mpaminany.

• Inona avy no fahamarinana azonao fantarina ao amin’ireo andininy momba ny mpaminany ireo?

Mety nahita fahamarinana mitovitovy amin’ity manaraka ity ianao: tsy dia tian’ny ratsy fanahy ny mpaminanin’ny Tompo. Azonao atao ny mirakitra an-tsoratra io fahamarinana io eo akaikin’ireo andininy ireo.

• Amin’ny lafiny inona no ahitanao io fahamarinana io amin’izao androntsika izao?

• Ahoana no mety haha “mpitarika adala sy jamba” ireo izay manakiana sy manohitra ny mpaminany? (Helamàna 13:29).

• Raha tsy manatona ny Mpamonjy hibebaka sy hihatsara isika, ahoana no mety itovian’izany amin’ny fisafidianana kokoa ny “haizina raha mihoatra amin’ny fahazavana”? (Helamàna 13:29).

Nampianatra toy izao ny Filoha Spencer W. Kimball (1895–1985):

Ny mpaminany … dia tsy afaka manova ny hafatry ny Tompo mba hanaovana izay hahazoan’ny olona aina fotsiny. Tena tsara fanahy izy ireny ka tsy ho olon-doza be. Tena ankasitrahako ny tsy fitadiavan’ny mpaminany laza. (Spencer W. Kimball, “Listen to the Prophets,” Ensign, mey 1978, 77)

2. Manorata valiny amin’ity rafi-tantara manaraka ity ao anatina fehezanteny telo farafahakeliny:

   Alaovy sary an-tsaina hoe mino ny olona iray fa tokony ho afaka “manao izay rehetra irian’ny fo[ny] izy” (Helamàna 13:27). Vokatr’izany, sosotra izy ireo rehefa manasa azy ireo hibebaka ny mpaminany. Miainga amin’ny zavatra nianaranao, manomàna valinteny iray amin’io ahiahy na fanakianana io.

Niaro an’i Samoela ny Tompo

Jereo tsara ilay sary avy any amin’ny fanombohan’ilay lesona. Izy io dia maneho ny zavatra nitranga tany amin’ny fiafaran’ny toritenin’i Samoela.

Vakio ny Helamàna 16:1–8, hitadiavana sy hanisiana marika ny porofon’ny fahamarinana hoe Miaraka amin’ny mpaminaniny ny herin’ Andriamanitra. (Hevero ny hampiditra io fahamarinana io ao amin’ny lisitrao.)

• Inona no porofo nahitanao fa niaraka tamin’i Samoela Andriamanitra?

Na dia tsy ny mpaminany rehetra aza no arovana amin’io fomba io, Andriamanitra dia miaro ny mpaminaniny mandra-pahavitan’izy ireo ny asany (jereo ny Môzià 13:1–4; Fotopampianarana sy Fanekempihavanana 122:9).

3. Ataovy ireto sahanasa roa manaraka ireto, ary valio ny fanontaniana manaraka:

   Mifantena mpaminany iray avy ao amin’ny soratra masina na tantaran’ny Fiangonana. Tanisao ny porofo fa niaraka tamin’izany mpaminany izany Andriamanitra. Hevero ny hijery ireto ohatra manaraka momba an’i Noa, i Mosesy, i Petera ary i Joseph Smith ireto.

   

   (jereo ny Genesisy 7:7, 10–13, 17, 23)

   

   (jereo ny Eksodosy 14:21–30)

   

   (jereo ny Asan’ny Apostoly 12:4–11)

   

   (jereo ny Joseph Smith—Tantara 1:15–25)

   Tanisao amin’izay ny porofo fa miaraka amin’ny mpaminaniny maoderina ihany koa Andriamanitra. Mety ho ohatra tafiditra amin’izany ny fomba nanampian’ny fampianarana sy fanasan’ny mpaminany maoderina antsika hitety ny fahasarotan’izao androntsika izao.

   • Nahoana no mety hanampy ny fahatsiarovana ireny porofo ireny?

Tahaka ireo vahoakan’i Nefia, isika dia manana hery hisafidianana raha hanaiky ireo fampianaran’ny mpaminany na hamaly amin’ny fanakianana sy fahatezerana. Ao amin’ny diary fandalinanao, raketo an-tsoratra ny zavatra nianaranao momba ny mpaminany sy ny fahatsapanao momba azy ireny. Rehefa manohy mandalina ny zavatra nampianarin’i Samoela ilay Lamanita ianao amin’ity herinandro ity, dia katsaho am-bavaka ny hianatra sy hampihatra ny fampianarana nentanim-panahy nataony.

Tsy voatery atao: Te hianatra bebe kokoa ve ianao?

Ahoana no fomba itenenan’ Andriamanitra amin’ny alalan’ireo mpaminaniny sy ny hafa ankehitriny?

Nanao izao fijoroana ho vavolombelona manaraka izao ny Loholona Neil L. Andersen ao amin’ny Kôlejin’ny Apôstôly Roambinifolo:

Omeko anareo ny tenivavolombeloko fa i Jesoa no Kristy, fa Izy no mitarika ny raharahan’ity asa masina ity, ary ny fihaonamben’ny Fiangonana maneran-tany no iray amin’ireo fotoana tena manan-danja hanomezany fitarihana ho an’ny Fiangonany sy ho antsika manokana.

… Antenaintsika ny haheno “ny sitrapon’ny Tompo, … ny sain’ny Tompo, … ny feon’ny Tompo, dia ny herin’ Andriamanitra ho famonjena” (Fotopampianarana sy Fanekempihavanana 68:4). Matoky ny teny nampanantenain’ny Tompo isika: “Na amin’ny alalan’ny feoko na amin’ny alalan’ny feon’ny mpanompoko, dia iray ihany izany” (Fotopampianarana sy Fanekempihavanana 1:38). …

Mampanantena anareo aho fa rehefa manomana ny fanahinareo ianareo, ka tonga miaraka amin’ny fanantenana fa haheno ny tenin’ny Tompo, dia hisy eritreritra sy fahatsapana ho tonga ao an-tsainareo izay natao manokana ho anareo. (Neil L. Andersen, “Hearing the Voice of the Lord at General Conference” [lahatsoratra amin’ny endrika nomerika ihany], Liahona, mar. 2019, ChurchofJesusChrist.org)

Ny Loholona Robert D. Hales (1932–2017) tao amin’ny Kôlejin’ny Apôstôly Roambinifolo dia niresaka momba ny tenin’i Samoela ary nampitaha azy ireny tamin’ny tenina mpaminany maoderina.

Nahoana no mety hitera-doza ny fandavana ny tenin’ny mpaminany?

Nampianatra toy izao ny Filoha Henry B. Eyring ao amin’ny Fiadidiana Voalohany:

Tsy misafidy ny hahaleo tena amin’ny fitaomana avy any ivelany isika rehefa mandà ny torohevitra avy amin’ Andriamanitra. Fitaomana hafa no safidiantsika. Lavintsika ny fiarovan’ilay Ray any An-danitra manana fitiavana tonga lafatra sy tompon’ny hery rehetra ary mahalala ny zavatra rehetra, izay no tanjony, tahaka ny an’ny Zanany Malala, dia ny hanome antsika ny fiainana mandrakizay, ny hanome antsika izay rehetra ananany, ary ny hitondra antsika hiverina hody miaraka amin’ny fianakaviana mba hofihininy amin’ny sandrim-pitiavany. Rehefa mitsipaka ny toroheviny isika dia mifidy ny fitaoman’ny hery hafa, izay mikasa ny hanao izay hahatonga antsika ho fadiranovana ary ny fankahalana no hery manosika azy. (Henry B. Eyring, “Finding Safety in Counsel,” Ensign, mey 1997, 25)