«3 Նեփի 8–10․ Փրկչի ձայնը խավարում», Մորմոնի Գիրքը. Ուսուցչի ձեռնարկ (2024)
«3 Նեփի 8–10», Մորմոնի Գիրքը. Ուսուցչի ձեռնարկ
3 Նեփի 8–10
Փրկչի ձայնը խավարում
Փրկչի խաչելությունն Ամերիկա աշխարհամասում ուղեկցվեց ծայրահեղ ավերումներով և խավարով։ Երեք օրվա խավարի ընթացքում Հիսուս Քրիստոսը երբեմն խոսում էր մարդկանց հետ։ Բնական աղետները, տառապանքը և փորձությունները թե՛ այն ժամանակ, թե՛ հիմա կարող են հնարավորություն լինել՝ իմանալու Հիսուս Քրիստոսի մասին և դառնալու դեպի Նա։ Այս դասում բացահայտվում են Հիսուս Քրիստոսի բնութագրիչ հատկանիշները, որոնք կարող են օգնել ձեզ ավելի մեծ սեր և վստահություն ունենալ Նրա հանդեպ։
«Մի մեծ մրրիկ»
Մտաբերեք, թե երբ եք ընկել կատաղի փոթորիկների կամ այլ բնական աղետների մեջ, օրինակ՝ երկրաշարժերի, մրրկահողմերի կամ տոռնադոների։ Ինչպիսի՞ն էին այդ փորձառությունները։
Երբ Հիսուս Քրիստոսը Երուսաղեմում խաչվեց, Ամերիկա աշխարհամասում ահավոր փոթորկից ու երկրաշարժից մեծ ավերումներ եղան։ Այդ իրադարձություններով իրագործվեցին Փրկչի մահվան նշանների մասին Սամուել Լամանացու մարգարեությունները (տե՛ս Հելաման 14.20–27)։
Այդ ավերիչ իրադարձությունների մասին իմանալու համար կարդացեք 3 Նեփի 8.5–22 հատվածները։ Կարող եք դիտել նաև «Հիսուս Քրիստոսը հայտնվում է հնագույն Ամերիկա աշխարհամասում» տեսանյութի 0:00–3:19 հատվածը։ Այս տեսանյութը հասանելի է ChurchofJesusChrist.org կայքում:
-
Ի՞նչ կմտածեիք կամ կզգայիք, եթե տեսած լինեիք այդ բաները։
Այս ավերմանը նախորդած տարիներին նեփիացիներից շատերը հեռացան Տիրոջից և վտարեցին այն մարգարեներին, որոնց Աստված ուղարկել էր քարոզելու նրանց (տե՛ս 3 Նեփի 7.7–8, 14, 21)։
Կարդացեք 3 Նեփի 8.23–25 հատվածները և փնտրեք, թե այդ ավերիչ իրադարձությունները վերապրածներն ինչպես արձագանքեցին։
-
Ինչպե՞ս կնկարագրեիք նրանց զգացումները։
Ճշմարտություններ Հիսուս Քրիստոսի մասին
Երբ մարդիկ սգում էին խավարում, լսեցին Հիսուս Քրիստոսի ձայնը, որը խոսում էր նրանց հետ։ Նա շատ քաղաքների անուններ տվեց ու բացատրեց, որ այդ քաղաքներն ու մարդիկ իրենց ամբարշտության պատճառով են կործանվել։ Ապա Նա շատ կարևոր ճշմարտություններ ուսուցանեց մարդկանց Իր մասին։
Այդ ճշմարտությունները դասավորելու համար ձեր օրագրում գրեք Սովորել Հիսուս Քրիստոսի մասին 3 Նեփի գլխում վերնագիրը։ Ձեր օրագրում մի քանի էջ պահեք, որպեսզի կարողանաք հաջորդ մի քանի շաբաթվա ընթացքում նեփիացիների շրջանում Փրկչի ծառայության մասին ուսումնասիրությունից ճշմարտություններ ավելացնել այդ ցուցակին։
Կարդացեք 3 Նեփի 9.13–22 և 10.4–12 հատվածները և փնտրեք, թե ինչ էր ուսուցանում Հիսուս Քրիստոսն այդ մարդկանց Իր մասին։ Այս ճշմարտությունները գրեք սուրբ գրությունների ուսումնասիրության ձեր օրագրի վերնագրի տակ։
-
Թվարկեք 3 Նեփի 9–10 հատվածների ուսումնասիրությունից Հիսուս Քրիստոսի մասին սովորած ճշմարտությունները։ Ապա պատասխանեք հետևյալ հարցերից առնվազն երկուսին․
-
Ի՞նչ էր ուսուցանում Փրկիչն Իր մասին, որը հատկապես կարևոր էր ձեզ համար։ Ինչո՞ւ։
-
Հիսուս Քրիստոսի մասին ձեր սովորած ճշմարտություններն ինչպե՞ս կարող են ազդել Նրա հանդեպ ունեցած ձեր սիրո և վստահության վրա։
-
Ի՞նչ իրավիճակներում եք եղել կամ կարող եք լինել, որոնցում կարևոր է հիշել այս ճշմարտություններից մեկը կամ մի քանիսը։