“Fakataukei Fakatokāteliné: 3 Nīfai 11:10–11—ʻKuó u Fai Ai ʻa e Meʻa Kotoa Pē Kuo Finangalo ʻa e Tamaí Ke u Fai Talu Mei he Kamataʻangá,’” Tohi ʻa Molomoná - Tohi Lēsoni ʻa e Tokotaha Akó (2024)
“Fakataukei Fakatokāteliné: 3 Nīfai 11:10–11,” Tohi ʻa Molomoná - Tohi Lēsoni ʻa e Tokotaha Akó
Fakataukei Fakatokāteliné: 3 Nīfai 11:10–11
“Kuó u Fai Ai ʻa e Meʻa Kotoa Pē Kuo Finangalo ʻa e Tamaí Ke u Fai Talu Mei he Kamataʻangá”
ʻI hoʻo ako ʻa e 3 Nīfai 11, naʻá ke ako ai kau ki he hā ʻa Sīsū Kalaisi ki he kau Nīfaí. Naʻá Ne fakahā ange kuó Ne lavaʻi e finangalo ʻo e Tamai Hēvaní ʻaki ʻEne toʻo kiate Ia ʻa e ngaahi angahala ʻa e māmaní. ʻE lava ke tokoni ʻa e lēsoni ko ʻení ke ke ako maʻuloto ʻa e potufolofola fakataukei fakatokāteline mo e kupuʻi lea folofola mahuʻinga ki he 3 Nīfai 11:10–11, fakamatalaʻi ʻa e tokāteline ʻoku akoʻi ʻi he potufolofolá ni, pea fakaʻaongaʻi e ngaahi tefitoʻi moʻoni ki hono maʻu ʻo e ʻilo fakalaumālié ʻi ha tūkunga moʻoni ʻo e moʻuí.
Ako maʻuloto pea fakamatalaʻi
Ko e kupuʻi lea folofola mahuʻinga ki he 3 Nīfai 11:10–11 ko e “Kuó u fai ai ʻa e meʻa kotoa pē kuo finangalo ʻa e Tamaí ke u fai talu mei he kamataʻangá.” ʻE lava ke ke fakaʻilongaʻi ʻa e konga ko ʻeni ʻo e veesi 11 ʻi ha founga makehe ke kehe ia mei he toenga ʻo e vēsí.
Toutou lau ʻa e kupuʻi folofola mahuʻingá ke tokoni atu ke ke ako maʻuloto ia. Toutou taʻofi ke ke vakai ki he ngaahi fakatātā ko ʻeni ʻo Sīsū Kalaisí pea fakalaulauloto ki he mahuʻinga ʻo e meʻa naʻá Ne fakahokó.
ʻI ha lēsoni kimuʻa, naʻa mou aleaʻi ai ʻa e moʻoni ʻoku maʻu ʻi he 3 Nīfai 11:11 ʻa ia naʻe fakahoko ʻe Sīsū Kalaisi ʻa e finangalo ʻo e Tamaí ʻi Heʻene toʻo kiate Ia ʻa e ngaahi angahala ʻa e māmaní.
Fakakaukauloto naʻe kole atu ʻe ha taha naʻe siʻisiʻi ʻene ʻilo fekauʻaki mo Sīsū Kalaisí ke ke akoʻi ʻa e meʻa ʻokú ke ʻilo fekauʻaki mo Iá.
-
Tali ‘a e fehuʻi ko ‘ení:
-
ʻI hono fakaʻaongaʻi e fakamatala ʻo e moʻoní mo e kupuʻi folofola mahuʻingá, te ke fakamatalaʻi fēfē ʻa e meʻa naʻe fai ʻe Sīsū Kalaisi maʻatautolú pea mo e ʻuhinga ʻoku mahuʻinga aí?
Akoako hono fakaʻaongaʻí
Toe vakaiʻi nounou e ngaahi tefitoʻi moʻoni ʻo hono maʻu ʻo e ʻilo fakalaumālié ʻi he palakalafi 5–12 ʻo e konga “Ko Hono Maʻu ʻo e ʻIlo Fakalaumālié” ʻi he Fakamatala ki he ʻElito ʻo e Fakataukei Fakatokateliné (2023).
Fakamatalaʻi fakanounou ʻi hoʻo tohinoa akó ʻa e ngaahi tefitoʻi moʻoni takitaha ʻe tolu ki hono maʻu ʻo e ʻilo fakalaumālié ʻaki hano tohi ha sētesi ke fakamatalaʻi ʻa e tefitoʻi moʻoni takitaha.
Fakakaukau ki he tūkunga ko ʻení:
Kuo kamata ke feohi ʻa Sesikā ʻi ha taimi lahi ange mo ha ngaahi kaungāmeʻa foʻou. ʻOku ʻikai muimui e ngaahi kaungāmeʻa ko ʻení kia Sīsū Kalaisi, ka ʻokú ne fakatokangaʻi ʻoku hangē ʻoku nau kei fiefia pē taʻe te nau muimui ki he ʻOtuá ʻi heʻenau moʻuí. Kuo akoʻi ʻa Sesikā ke tui mo muimui kia Sīsū Kalaisi. Kuó ne fakafehokotaki maʻu pē ʻa e fiefiá mo e talangofua kia Sīsū Kalaisí, ka ʻoku kamata ke ne fifili pe ko e hā hono mahuʻinga ke muimui kiate Iá.
ʻE lava ke tokoni e ngaahi tefitoʻi moʻoni ʻo hono maʻu ʻo e ʻilo fakalaumālié ʻi ha tūkunga hangē ko Sesikaá.
Vakaiʻi e ngaahi fakakaukaú mo e ngaahi fehuʻí ʻaki ha fakakaukau ʻoku taʻengatá
Hiki ʻa e saati ko ʻení ki hoʻo tohinoa akó ke tokoni ke ke vakai ki he founga ʻe lava ai ʻa Sesikā ʻo vakai ki he hoahaʻa ʻokú ne maʻú ʻaki ha fakakaukau ʻoku taʻengatá. Fakakakato leva ʻa e sātí ʻaki hano hiki kotoa e ngaahi ʻuhinga mo e ngaahi ola te ke lava ʻo fakakaukau ki ai ʻi he ongo kōlomú fakatouʻosi. Fakapapauʻi ke fakakau ha ngaahi fakakaukau mei he 3 Nīfai 11:10–11 ʻi hoʻo fakakakato ʻa e kōlomu ʻi he toʻomataʻú.
|
Muimui ki he Niʻihi Kehé |
Ko e Muimui kia Sīsū Kalaisí | |
|---|---|---|
|
Ngaahi ʻUhingá: | Muimui ki he Niʻihi Kehé | Ko e Muimui kia Sīsū Kalaisí |
|
Ngaahi olá: | Muimui ki he Niʻihi Kehé | Ko e Muimui kia Sīsū Kalaisí |
-
Tali ʻa e ngaahi fehuʻi ko ‘ení:
-
Naʻe tokoni fēfē ke fakakaukau ki he ngaahi fili ʻa Sesikaá ʻi he founga ko ʻení?
-
Makehe mei he 3 Nīfai 11:10–11, ko e hā mo ha toe ngaahi maʻuʻanga tokoni kuo fokotuʻu fakalangi ʻe lava ʻo tokoni ke mahino kia Sesikā ʻa e mahuʻinga ʻo e muimui kia Sīsū Kalaisí?
-
Ko e hā ha meʻa ʻe ala lava ke fai ʻe Sesikā ke fakatupulaki ai ʻene tui kia Sīsū Kalaisí pea loto-fiemālie ange ke muimui kiate Ia?
Fakakaukau ki he founga ʻe lava ai ʻe he meʻa naʻá ke ako he ʻaho ní ʻo faitāpuekina hoʻo moʻuí pe moʻui ʻa ha taha ʻokú ke ʻilo. Ngāueʻi e ngaahi ueʻi fakalaumālie naʻá ke mei maʻu lolotonga e lēsoní.