“3 Nīfai 8–10: Ko e Leʻo ʻo e Fakamoʻuí ʻi he Fakapoʻulí,” Tohi ʻa Molomoná - Tohi Lēsoni ʻa e Tokotaha Akó (2024)
“3 Nīfai 8–10,” Tohi ʻa Molomoná - Tohi Lēsoni ʻa e Tokotaha Akó
3 Nīfai 8–10
Ko e Leʻo ʻo e Fakamoʻuí ʻi he Fakapoʻulí
Naʻe fakaʻilongaʻi ʻe he fakaʻauha mo e fakapoʻuli lahi ʻi he Ongo ʻAmeliká, ʻa hono tutuki ʻo e Fakamoʻuí. Naʻe folofola ʻa Sīsū Kalaisi ki he kakaí ʻi ha taimi lolotonga e ʻaho ʻe tolu ʻo e fakapoʻuli matolú. ʻI he kuonga muʻá mo e taimí ni, ʻe lava ke hoko e ngaahi fakatamaki fakaenatulá, faingataʻaʻiá, mo e ngaahi ʻahiʻahí ko ha ngaahi faingamālie ke ako mo tafoki ai kia Sīsū Kalaisi. ʻE ʻomi ʻe he lēsoni ko ʻení ha ngaahi ʻulungaanga ʻo Sīsū Kalaisí ʻe lava ʻo tokoni atu ke ke ongoʻi ha ʻofa mo ha falala lahi ange kiate Ia.
“Fuʻu matangi lahi”
Fakakaukau ki ha ngaahi taimi naʻá ke aʻusia ai ha ngaahi matangi mālohi pe fakatamaki fakaenatula hangē ko e mofuiké, afaá, pe ʻahiohió. ʻOku fēfē ʻa e ngaahi aʻusia ko ʻení?
ʻI he taimi naʻe tutuki ai ʻa Sīsū Kalaisi ʻi Selusalemá, naʻe fakatupu ʻe ha matangi mo ha mofuike fakalilifu ʻi he ongo ʻAmeliká ha fakaʻauha lahi. Naʻe fakahoko ʻe he ngaahi meʻá ni ʻa e kikite ʻa Samuela ko e tangata Leimaná fekauʻaki mo e ngaahi fakaʻilonga ʻo e pekia ʻa e Fakamoʻuí (vakai, Hilamani 14:20–27).
Lau ʻa e 3 Nīfai 8:5–22 ke ako fekauʻaki mo e ngaahi fakaikiiki ʻo e ngaahi meʻa fakalilifu ko ʻeni naʻe hokó. Te ke lava foki ʻo mamata ʻi he foʻi vitiō, “Ko e Hā ʻa Sīsū Kalaisi ʻi he Ongo ʻAmelika he Kuonga Muʻá,” mei he time 0:00–3:19. ʻOku maʻu ʻa e vitioó ʻi he ChurchofJesusChrist.org.
-
Ko e hā naʻá ke mei fakakaukau ki ai pe ongoʻi kapau naʻá ke aʻusia ʻa e ngaahi meʻa ko ʻení?
ʻI he ngaahi taʻu kimuʻa ʻi he fakaʻauha ko ʻení, naʻe tafoki ha tokolahi ʻo e kau Nīfaí mei he ʻEikí pea kapusi ki tuʻa ʻa e kau palōfita kuo fekauʻi mai ʻe he ʻOtuá ke malanga kiate kinautolú (vakai, 3 Nīfai 7:7–8, 14, 21).
Lau ʻa e 3 Nīfai 8:23–25, ʻo kumi ʻa e meʻa naʻe fai ʻe kinautolu naʻa nau hao moʻuí hili ʻenau aʻusia e ngaahi tūkunga fakaʻauha ko ʻení.
-
Te ke fakamatalaʻi fēfē nai ʻenau ngaahi ongó?
Ngaahi moʻoni fekauʻaki mo Sīsū Kalaisí
ʻI he tangi ʻa e kakaí ʻi he fakapoʻulí, naʻa nau fanongo ki he leʻo ʻo Sīsū Kalaisí ʻoku folofola mai kiate kinautolu. Naʻá Ne folofola ʻaki ha ngaahi kolo lahi peá Ne fakamatalaʻi kuo fakaʻauha e ngaahi kolo mo e kakai ko iá koeʻuhí ko ʻenau faiangahalá. Naʻá Ne akoʻi leva ki he kakaí ha ngaahi moʻoni mahuʻinga lahi fekauʻaki mo Ia.
Ke tokoni atu ki hono fokotuʻutuʻu ʻo e ngaahi moʻoni ko ʻení, faʻu ha ʻuluʻi tohi ʻi hoʻo tohinoa akó ʻoku ui ko e: Ako fekauʻaki mo Sīsū Kalaisi ʻi he 3 Nīfaí. Mahalo te ke fie tuku ha ngaahi peesi lahi ʻi hoʻo tohinoa akó ke ke lava ʻo tānaki atu ha ngaahi moʻoni ki he lisi ko ʻení lolotonga hoʻo ako e ngāue fakafaifekau ʻa e Fakamoʻuí ki he kau Nīfaí ʻi he ngaahi uike siʻi ka hokó.
Lau ʻa e 3 Nīfai 9:13–22 mo e 10:4–12, ʻo kumi ʻa e meʻa naʻe akoʻi ʻe Sīsū Kalaisi ki he kakaí ni fekauʻaki mo Iá. Hiki e ngaahi moʻoni ko ʻení ʻi lalo ʻi he ʻuluʻi tohi ʻi hoʻo tohinoa akó.
-
Hiki e ngaahi moʻoni naʻá ke ako fekauʻaki mo Sīsū Kalaisí ʻi hoʻo ako ʻa e 3 Nīfai 9–10. Hili iá pea tali ha fehuʻi ʻe ua pe lahi ange mei he ngaahi fehuʻí ni:
-
Ko e hā naʻe akoʻi ʻe he Fakamoʻuí fekauʻaki mo Ia naʻe mātuʻaki mahuʻinga kiate koé? Ko e hā hono ʻuhingá?
-
ʻE liliu fēfē ʻe he ngaahi moʻoni kuó ke ako fekauʻaki mo Sīsū Kalaisí hoʻo ʻofa mo e falala kiate Iá?
-
Ko e hā ha ngaahi tūkunga kuó ke ʻi ai, pe te ke ʻi ai, ʻa ia ʻe mahuʻinga ai hoʻo manatu ki ha taha ʻo e ngaahi moʻoni ko ʻení pe ki ha ngaahi moʻoni lahi ange?