3 Nīfai 11:18–41

Ko e Fakahā ‘e Sīsū Kalaisi ‘Ene Tokāteliné

Kuó ke fakakaukau nai ki he ngaahi moʻoni ʻoku vahevahe ʻe he kau faifekaú kiate kinautolu ʻoku nau akoʻí? Ko e taha ʻo ʻenau ngaahi pōpoaki mahuʻinga tahá ʻoku fekauʻaki ia mo e meʻa kuo pau ke tau fai ke maʻu ʻa e ngaahi tāpuaki ʻo e moʻui taʻengatá. ʻOku faʻa ui ʻa e pōpoaki ko ʻení ʻi he taimi ʻe niʻihi ko e tokāteline ʻo Kalaisí (2 Nīfai 31:21). Naʻe akoʻi ʻe he Fakamoʻuí ʻa e tokāteline ko ʻení ki he kau Nīfaí hili pē ha taimi nounou mei heʻene hā kiate kinautolu ʻi he temipalé. ʻE tokoni ʻa e lēsoni ko ʻení ke fakamatalaʻi ʻa e tokāteline ʻo Sīsū Kalaisí mo ke maʻu ha mahino lahi ange.

Hoko ko ha tokotaha muimui ʻo Sīsū Kalaisi

Fakakaukau ʻoku ʻi ai hao kaungāmeʻa ʻokú ne fie ʻilo ki he Siasí. ʻOku talaatu ʻe hoʻo kaungāmeʻá ʻokú ne ongoʻi fiefia ʻi he meʻa kuó ne ako mo aʻusiá. ʻOkú ne fie ʻilo ki he meʻa ʻoku totonu ke ne hoko atu ki ai ke muimui kakato ange ki he Fakamoʻuí.

• Ko e hā te ke fakaafeʻi ho kaungāmeʻá ke ne faí? Ko e hā hono ʻuhingá?

“Ko ʻeku tokāteliné ʻeni”

Hili ha taimi nounou mei he hā ʻa e Fakamoʻui kuo toetuʻú ki he kau Nīfaí ʻi he fonua ko Mahú, naʻá Ne akoʻi kiate kinautolu ʻEne tokāteliné. ʻOku faʻa ui ʻa e tokāteline ko ʻení ʻi he taimi ʻe niʻihi “ko e tokāteline ʻo Kalaisí” (2 Nīfai 31:21), ʻoku tokoni ia ke mahino kiate kitautolu ʻa e founga te tau lava ai ʻo muimui ʻia Sīsū Kalaisi mo maʻu ʻa e ngaahi tāpuaki ʻo e moʻui taʻengatá. Te ke maʻu ʻi he ʻahó ni ha faingamālie ke mahino lelei ange kiate koe ʻa e tokāteline ʻo Kalaisí pea fakamatalaʻi ia ʻi he fakalea pē ʻaʻau.

1. Fakakakato ʻa e ʻekitivitī ko ʻení:

1. Ako e ngaahi akonaki ʻa e Fakamoʻuí kau ki Heʻene tokāteliné ʻi he 3 Nīfai 11:31–41.

2. Kapau ʻe fiemaʻu, ako mo ha ngaahi akonaki lahi ange fekauʻaki mo e tokāteline pe ongoongolelei ʻo Sīsū Kalaisí, hangē ko e 2 Nīfai 31:17–21 pe 3 Nīfai 27:19–22. Te ke lava foki ʻo fekumi ki he “tokāteline ʻo Kalaisí” ʻi he Gospel Library app ChurchofJesusChrist.org.

3. Teuteu ha lēsoni miniti ʻe tolu-ki-he-nima fekauʻaki mo e tokāteline ʻo Kalaisí. Fakaʻaongaʻi e sīpinga ʻoku ʻoatu ʻi laló ke tokoni atu ki hono teuteuʻi hoʻo fokotuʻutuʻú. Te ke lava ʻo fakakaukauloto ko ha faifekau koe ʻokú ke teuteuʻi ʻa e lēsoni ko ʻení ki ha taha ʻokú ke akoʻi. Pe ko hoʻo fakakaukau ki ha taha ʻokú ke maheni mo ia pea teuteu ʻo hangē pē te ke vahevahe ʻa e lēsoní kiate kinautolú.

Ko e Palani ʻo e Lēsoni ʻo e Tokāteline ʻo Kalaisí

Tohi ʻa Molomoná – Tohi Lēsoni ʻa e Faiakó (2024)—”3 Nīfai 11:18–41: ʻOku Fakahā ʻe Sīsū Kalaisi ʻEne Tokāteliné”

1. Hiki ha fakamatala fakanounou ʻo e tokāteline ʻo Kalaisí mei he meʻa kuó ke ako mo akoʻí.

2. Hiki ha fehuʻi ʻe ua pe tolu te ke lava ʻo fai ke tokoni kiate kinautolu ʻokú ke akoʻí ke mahino mo nau fakakaukau lahi ange ki he tokāteline ʻo Kalaisí.

3. Fakamatalaʻi ʻa e ʻuhinga ʻokú ke ongoʻi ai ʻoku mahuʻinga ke ke muimui ʻi he ngaahi akonaki ko ʻeni ʻa e Fakamoʻuí? Kapau ʻe lava, fakakau ai haʻo ngaahi aʻusia ʻokú ne fakahaaʻi e founga kuo faitāpuekina ai ʻe he ngaahi akonaki ko ʻení hoʻo moʻuí.

4. Hiki ha fakaafe ʻe taha pe ua te ke lava ʻo fai ke tokoniʻi ʻa kinautolu ʻokú ke akoʻí ke nau fakaʻaongaʻi ʻa e meʻa kuo nau ako fekauʻaki mo e tokāteline ʻo Kalaisí.

5. (Fili pē) Fakakaukau ki ha meʻa pe ʻekitivitī ke tokoni ke mahino lelei ange kiate kinautolu ʻokú ke akoʻí ʻa e tokāteline ʻo Kalaisí.

© 2023 ʻe he Intellectual Reserve, Inc. All rights reserved.

Siviʻi pē ʻo kitá

ʻI hoʻo fakaʻosi ʻa e lēsoní, tuku ha taimi ke ke fakalaulauloto ai ki he founga ʻe lava ke ke fakaʻaongaʻi ai e tokāteline ʻo Kalaisí ʻi hoʻo moʻuí he ʻaho takitaha. ʻE lava ke tokoni ʻa hono siviʻi kitá ke ke ʻiloʻi ʻa e ngaahi founga ʻokú ke lolotonga moʻui ʻaki ai ʻa e tokāteline ʻa e Fakamoʻuí, pea pehē ki he ngaahi founga te ke lava ai ʻo tupulakí.

Tali ki he fakamatala takitaha ko ʻení ʻaki ha taha ʻo e ngaahi tali ko ʻení: “maʻu pē,” “taimi ʻe niʻihi,” pe “tātaaitaha.”

1. ʻOku ou fakaʻaongaʻi ʻeku tui kia Sīsū Kalaisí ʻaki ʻeku feinga ke tauhi ʻa e ngaahi fekaú mo falala te Ne lava ʻo tokoniʻi au ke u ikunaʻi hoku ngaahi faingataʻaʻiá.

2. ʻOku ou fakatomala fakaʻaho koeʻuhí ko ʻeku ngaahi fehalaākí pea feinga ke maʻu e mālohi ʻo e Fakamoʻuí ke ne tokoniʻi au ke u hoko ange ʻo hangē ko Iá.

3. ʻOku ou feinga ke tauhi ʻeku ngaahi fuakava ʻi he papitaisó pea fakafoʻou fakauike ʻa e feinga ke moʻui taau ki hono maʻu ʻo e sākalamēnití.

4. ʻOku ou fakaafeʻi ʻa e Laumālie Māʻoniʻoní ki heʻeku moʻuí ʻi he lotu maʻu pē ki he Tamai Hēvaní pea ako mo feinga ke ngāue ʻo fakatatau ki he ngaahi ueʻi fakalaumālié.

Fili Pē: Fie Ako Lahi Ange?

Ko e hā hono mahuʻinga ʻo e tokāteline ʻo Kalaisí?

Naʻe akonaki ʻa ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Ko ʻetau pōpoakí ʻeni, ʻa e maka ʻoku tau langa aí, ʻa ia ko e fakavaʻe ʻo e meʻa kotoa pē ʻi he Siasí. Pea hangē ko e meʻa kotoa ʻoku haʻu mei he ʻOtuá, ko e tokāteliné ni ʻoku maʻa, ʻoku mahino, ʻoku mahino ngofua—ʻo aʻu pē ki ha valevale. ʻOku tau fakaafeʻi loto fiefia e taha kotoa ke ne tali ia. (D. Todd Christofferson, “Ko e Tokāteline ʻo Kalaisí,” Liahona, Mē 2012, 86)

Naʻe akonaki ʻa Palesiteni Lāsolo M. Nalesoni ʻo pehē:

ʻOku mālohi fau e tokāteline haohaoa ʻa Kalaisí. ʻOkú ne liliu e moʻui ʻa e taha kotoa ʻoku mahino ki aí mo feinga ke fakahoko ia ʻi heʻene moʻuí. ʻOku tokoni mai e tokāteline ʻa Kalaisí ke tau ʻilo mo nofo ʻi he hala ʻo e fuakavá. Ko e nofo ʻi he hala fāsiʻi ko ia kuo fakamahinoʻi lelei maí, ʻe iku ʻo fakafeʻungaʻi ai kitautolu ke maʻu e meʻa kotoa ʻoku maʻu ʻe he ʻOtuá. ʻOku hala ha meʻa ʻe toe mahuʻinga ange ʻi he meʻa kotoa ʻoku maʻu ʻe heʻetau Tamaí! (Russell M. Nelson, “Moʻoni Haohaoa, Tokāteline Haohaoa, mo e Fakahā Haohaoa,” Liahona, Nōvema 2021, 6)

Naʻe mei fēfē nai ha fanongo ki hono fakahā ʻe he Fakamoʻuí ʻEne tokāteliné?

Ke mamata ʻi hano fakatātaaʻi ʻo e ngaahi meʻa ʻoku fakamatalaʻi ʻi he 3 Nīfai 11:18–41, sio ʻi he “Jesus Christ Teaches and Gives Power to Baptize” (7:08).