3 Nīfai 11:1–11

“Ko Au Ko Sīsū Kalaisi”

Lolotonga e fakatahataha ʻa e kau Nīfaí ʻi he temipalé ʻo talanoa fekauʻaki mo e ngaahi fakaʻilonga ʻo e pekia ʻa Sīsū Kalaisí, naʻe “hāʻele hifo [ʻa e Fakamoʻuí] ʻo tuʻu ʻi honau haʻohaʻongá” (3 Nīfai 11:8). Naʻá Ne akoʻi kiate kinautolu Hono misioná mo e meʻa kotoa pē kuó Ne fai maʻanautolú. ʻE lava ke tokoni ʻa e lēsoni ko ʻení ke fakatupulaki hoʻo ʻofa mo e houngaʻia ʻia Sīsū Kalaisi koeʻuhí ko Ia mo e meʻa naʻá Ne fai maʻaú.

Vakai ki muʻa

• Ko e fē nai ha taimi naʻá ke ʻamanaki atu ai ki ha meʻa pea ʻikai ke ke faʻa tatali ke hoko? Ko e hā hono fuoloa hoʻo tatalí? Naʻe ongo fēfē ʻa e faifai peá ke aʻusia iá?

ʻOku tau ako ʻi he Tohi ʻa Molomoná, ko e meʻa naʻe ʻamanaki atu ki ai ʻa e kau Nīfaí ʻi ha ngaahi toʻu tangata lahi ko e hāʻele mai ʻa e ʻAlo ʻo e ʻOtuá ki he māmaní. Talu mei he taimi naʻe ʻave ai ʻe Līhai mo Selaia ʻena fānaú ki he feituʻu maomaonganoá ʻo mavahe mei Selusalemá, naʻá na ʻiloʻi ʻe fekauʻi mai ʻe he ʻOtuá Hono ʻAló hili ha taʻu ʻe 600 ko ha “Fakamoʻui ʻo e māmaní” (1 Nīfai 10:4).

Naʻe mahino foki kiate kinautolu ʻe ʻi ai ha ʻaho ʻe hāʻele mai ai ʻa Sīsū Kalaisi ki he kau Nīfaí ʻi he fonua ʻo e talaʻofá (vakai, 1 Nīfai 12:6; 2 Nīfai 26:1; ʻAlamā 45:9–10). Te tau lava ʻo lau ʻi he 3 Nīfai 11 fekauʻaki mo e hāʻele naʻe talia fuoloa ko ʻení.

Naʻe ʻikai maʻu ʻe he taha kotoa ʻi he kau Nīfaí mo e kau Leimaná ha mahino totonu kia Sīsū Kalaisi. ʻOku pehē pē mo e maʻu hala ʻa e kakaí he ʻahó ni fekauʻaki mo Sīsū Kalaisi, pea ʻoku ʻi ai ha niʻihi ʻoku nau fakaʻikaiʻi ʻEne moʻuí. ʻOku tui ha niʻihi ko Sīsuú ko ha takimuʻa maʻongoʻonga ka ʻoku ʻikai ke nau tali ko Ia ʻa e ʻAlo ʻo e ʻOtuá.

• ʻOkú ke pehē ko e hā ʻoku mahuʻinga ai ke tau maʻu ha mahino totonu ki he tuʻunga moʻoni ʻo Sīsū Kalaisí?

• Ko e hā ʻe lava ʻo tokoni ke mahino lelei ange kiate kitautolu ko hai ʻa Sīsū Kalaisi pea mo e meʻa kuó Ne fai maʻatautolú?

ʻI he taimi naʻe hā ai ʻa Sīsū Kalaisi ki he kau Nīfaí, naʻá Ne fakatou fakahā mo e Tamai Hēvaní ha ngaahi meʻa mahuʻinga fekauʻaki mo Hono tuʻunga moʻoní. ʻI hoʻo ako he ʻaho ní, tokanga ki he meʻa ʻoku finangalo ʻa e Tamai Hēvaní mo Sīsū Kalaisi ke ke ʻilo fekauʻaki mo e Fakamoʻuí pea mo e meʻa kuó Ne fai maʻaú.

ʻI ha lēsoni kimuʻa, mahalo naʻá ke kamata faʻu ha lisi ʻo e ngaahi meʻa ʻokú ke ako fekauʻaki mo Sīsū Kalaisi ʻi hoʻo ako ʻa e tolu Nīfaí. Kapau kuo teʻeki ke ke kamata ha lisi, kamata ha lisi ʻi hoʻo tohinoa akó, pea tānaki atu ki ai ʻi he lolotonga ʻo e lēsoní.

Ko e hā ʻa Sīsū Kalaisi ki he Kau Nīfaí

Lau ʻa e 3 Nīfai 11:1–11, ʻo kumi ha ngaahi fakaikiiki fekauʻaki mo e hā ʻa Sīsū Kalaisi ki ha falukunga kakai naʻe fakataha ki he temipale ʻi he fonua ko Mahú. Te ke lava foki ʻo mamata ʻi he “Ko e Hā ʻa Sīsū Kalaisi ʻi he Ongo ʻAmelika he Kuonga Muʻá” mei he taimi 11:19–13:29. ʻOku maʻu ʻa e vitioó ni ʻi he ChurchofJesusChrist.org. 

• Ko e hā naʻe makehe kiate koe ʻi hoʻo ako e ngaahi veesi ko ʻení?

• Kapau naʻá ke ʻi ai, ko e hā ha ngaahi lea te ke fakaʻaongaʻi ke fakamatalaʻi ʻaki ʻa e meʻa naʻá ke mei fakakaukau ki ai pe ongoʻí? Ko e hā hono ʻuhingá?

Naʻe fakamatalaʻi ʻe ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e hā mai ʻa Sīsū Kalaisí mo e meʻa naʻá Ne folofola ʻaki ki he kakaí ʻi he foungá ni:

Naʻe hoko ʻa ʻene hā maí mo ʻene folofola ko iá ko e tefitoʻi meʻa mahuʻinga taha, mo e tumutumu ʻo e hisitōlia kotoa ʻo e Tohi ʻa Molomoná. …

Naʻe talanoa ʻa e taha kotoa kiate Ia, hiva kau kiate Ia, fakaʻānaua kiate Ia, mo lotua ʻEne hā maí—ka ko ʻeni kuó Ne ʻi ai tonu. Ko e ʻaho mahuʻinga tahá ʻeni! Kuo hāʻele mai ʻa e ʻOtua ʻokú Ne liliu ʻa e pō fakapoʻulí ki he maama ʻo e pongipongí. (Jeffrey R. Holland, Christ and the New Covenant: The Messianic Message of the Book of Mormon [1997], 250–51)

ʻOku tokoni ʻa e fuofua folofola ʻa Sīsū Kalaisi ki he kau Nīfaí ke mahino kiate kitautolu ko hai Ia mo e meʻa kuó Ne fai maʻatautolú.

Toe lau ʻa e 3 Nīfai 11:10–11, ʻo tokanga ki he ngaahi foʻi lea mo e kupuʻi lea naʻe fakaʻaongaʻi ʻe Sīsū Kalaisi ke fakamatalaʻi ʻaki Ia mo e meʻa naʻá Ne fakahoko maʻatautolú. Fakapapauʻi ke tānaki e ngaahi moʻoni ko ʻení ki hoʻo lisí ʻi hoʻo tohinoa akó.

Ko ha potufolofola fakataukei fakatokāteline ʻa e 3 Nīfai 11:10–11. Fakakaukau ke fakaʻilongaʻi e ngaahi potufolofola fakataukei fakatokāteliné ʻi ha founga makehe koeʻuhí ke faingofua ange hoʻo maʻu kinautolú. Te ke maʻu ha faingamālie ʻi he lēsoni hokó ke akoako fakaʻaongaʻi ʻa e tokāteline ʻoku akoʻi ʻi he potufolofola ko ʻení ki ha fehuʻi pe tūkunga.

1. Tali ʻa e ngaahi fehuʻi ko ‘ení:

• Ko e hā ha ngaahi moʻoni naʻá ke ako fekauʻaki mo Sīsū Kalaisi?

• Ko e fē ʻi he ngaahi moʻoni ko ʻení ʻokú ke pehē ʻoku makehe tahá? Ko e hā hono ʻuhingá?

Naʻe fakahoko ʻe Sīsū Kalaisi ʻa e finangalo ʻo e Tamaí

Ko e taha ʻo e ngaahi moʻoni te tau lava ʻo ako mei he ngaahi veesi ko ʻení naʻe fakahoko ʻe Sīsū Kalaisi ʻa e finangalo ʻo e Tamaí ʻi Heʻene toʻo kiate Ia ʻa e ngaahi angahala ʻo e māmaní.

Te tau lava ʻo fakaloloto ʻetau mahino ki he moʻoni ko ʻení ʻaki ʻetau vakai fakalelei ange ki he ngaahi kupuʻi lea naʻe fakaʻaongaʻi ʻe Sīsū Kalaisi ke fakamatalaʻi ʻaki ʻa e meʻa naʻá Ne fakahokó. Hiki e ngaahi kupuʻi lea ko ʻeni mei he 3 Nīfai 11:11 ʻi hoʻo tohinoa akó mo ha feituʻu ʻatā ʻi he tafaʻakí pe ʻi lalo ai ke fai ai ha tohi.

• Kuó u inu mei he ipu kona ko ia naʻe tuku ʻe he Tamaí kiate aú.

• Kuó u fakaongongoleleiʻi ʻa e Tamaí ʻi heʻeku toʻo kiate au ʻa e ngaahi angahala ʻa e māmaní.

• Kuó u fai ai ʻa e meʻa kotoa pē kuo finangalo ʻa e Tamaí ke u fai talu mei he kamataʻangá.

Ako ha potufolofola ʻe tolu pe lahi ange mei heni, ʻo kumi e ngaahi akonaki ʻe lava ʻo tokoni ke fakalahi hoʻo mahino ki he meʻa naʻe fai ʻe Sīsū Kalaisi maʻatautolú. Hiki ʻi he tafaʻaki ʻo e ngaahi kupuʻi leá ʻa e potufolofola naʻá ne tokoniʻi koé mo e meʻa naʻá ke akó.

• Luke 22:42–44

• Mōsaia 3:7

• Mōsaia 15:5–7

• ʻAlamā 7:11–12

• Tokāteline mo e Ngaahi Fuakava 19:16–19

• Tokāteline mo e Ngaahi Fuakava 45:3–4

• Mōsese 4:1–2

2. Tali ha fehuʻi ʻe taha pe lahi ange ʻo e ngaahi fehuʻi ko ʻení:

• Ko e hā ʻokú ke fie talaange ki he kakaí fekauʻaki mo Sīsū Kalaisi ʻo makatuʻunga ʻi he meʻa kuó ke ongoʻi he ʻaho ní?

• Ko e hā ʻokú ke fie fai ʻi hoʻo moʻuí koeʻuhí ko e meʻa ʻoku mahino pe ongo kiate koe fekauʻaki mo Sīsū Kalaisí?

• Ko e hā ʻe taau ai ke ke muimui kia Sīsū Kalaisi ʻi he kotoa hoʻo moʻuí?

Fili Pē: Fie Ako Lahi Ange?

3 Nīfai 10:18. ʻOku ʻi ai nai ha faʻahinga fakaʻilonga fekauʻaki mo e taimi naʻe hāʻele mai ai ʻa e Fakamoʻuí ki he Ongo ʻAmeliká ʻoku fehokotaki mo e taimi naʻe tutuki ai Iá?

ʻOku talamai ko e ngaahi fakaʻauha ʻi ʻAmelika ʻi he taimi ʻo e pekia ʻa e Fakamoʻuí naʻe hoko ia ʻi he ʻaho fā ʻo e ʻuluaki māhina ʻo e taʻu hono tolungofulu mā faá (3 Nīfai 8:5), pea naʻe hā ʻa e ʻEiki Toetuʻú ki he kau Nīfaí ʻi he “konga fakamuimui ʻo hono tolungofulu mā fā ʻo e taʻú” (3 Nīfai 10:18). ʻOku ʻuhinga ʻeni naʻe hoko ʻa e hā ʻa e ʻEiki Toetuʻú ki he kau Nīfaí ʻi ha ngaahi māhina hili ʻEne pekiá mo e Toetuʻú (Vakai, Bruce R. McConkie, The Mortal Messiah: From Bethlehem to Calvary, 4 vols. [1981], 4:307).

3 Nīfai 11:11. ʻE tokoniʻi fēfē au ʻe he sīpinga ʻa Sīsū Kalaisi ʻo e inu ʻi he ipu mahí?

Naʻe fakahoko ʻe ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ha poupou ʻo pehē:

Maʻu fakauike ʻa e sākalamēnití peá ke pikitai ki he ngaahi talaʻofa haohaoa ʻo e Fakalelei ʻa Sīsū Kalaisí. Tui ki he ngaahi maná. Kuo lahi ha ngaahi mana kuó u mātā neongo hono talamai he ʻikai toe felave ha meʻá. He ʻikai ʻaupito teitei mole ʻa e ʻamanaki leleí ia. Kapau he ʻikai hoko mai leva mo kakato e ngaahi mana ko iá pe hangehangē ka ʻikai pē ke hoko maí, manatuʻi ʻa e sīpinga ne tā ʻe he Fakamoʻuí Heʻene mamahí: kapau he ʻikai fakalaka ʻa e ipu mahí meiate koe, inu ia peá ke toʻa, ʻo falala ʻoku ʻi ai ha ngaahi ʻaho fakafiefia ʻoku toka mei muʻa. (Jeffrey R. Holland, “Hangē ha Ipu Kuo Maumaú,” Liahona, Nōvema 2013, 41)

Ko e hā naʻe finangalo ai e Tamai Hēvaní ke toʻo ʻe Sīsū Kalaisi kiate Ia ʻa e ngaahi angahala ʻo e māmaní?

Naʻe akonaki ʻa ʻEletā ʻUlise Soālesi ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Naʻe fakahoko lelei ʻe Kalaisi ʻa e finangalo ʻo e Tamaí ʻi Heʻene feilaulau manavaʻofa mo taʻefakangatangatá. Naʻá Ne ikunaʻi e huhu fakatuʻasino mo fakalaumālie ʻo e maté, naʻe hoko mai ki he māmaní ʻi he Hingá, pea ke tau malava ai ke maʻu ʻa e faingamālie nāunauʻia ʻo e fakamoʻui taʻengatá.

Ko Sīsū pē ʻa e Tokotaha te Ne malava ke fakahoko ʻa e feilaulau taʻengata mo haohaoa ko ʻení maʻatautolu hono kotoa. Naʻe fili pea tomuʻa fakanofo Ia ʻi he Fakataha Lahi ʻi he Langí, kimuʻa ia pea toki fakatupu e māmaní. (Ulisses Soares, “Sīsū Kalaisi: Ko e Tauhi ʻo Hotau Laumālié,” Liahona, Mē 2021, 82)