3 Նեփի 17

«Ես կարեկցանք ունեմ ձեզ վրա»

Արդեն բավական երկար օր էր անցկացրել Փրկիչը նեփիացի բազմության հետ, երբ հայտարարեց, որ Իր հեռանալու ժամանակն է։ Սակայն բազմությունն արցունքներով աղերսում էր մի փոքր երկար մնալ, ինչը հուզեց Նրա սիրտը։ Հրաշագործ կարեկցանքով Նա բժշկում էր նրանց, աղոթում էր նրանց համար և մեկ առ մեկ օրհնում էր նրանց երեխաներին։ Այս դասը կօգնի ձեզ զգալ, որ Հիսուս Քրիստոսը կարեկցանք ունի ձեր հանդեպ։

Փրկչի ընկալումը

Պատկերացրեք, որ ուղղակի մեկ օր անցկացրել եք Փրկչի հետ, ու Նա հայտարարում է, որ Իր հեռանալու ժամանակն է։

Կարող եք դիտել «Հիսուս Քրիստոսը և հրեշտակները ծառայում են կարեկցանքով» տեսանյութի 0:12–1:30 հատվածը, որը հասանելի է ChurchofJesusChrist.org կայքում։

• Ինչպե՞ս կզգայիք ձեզ այդ իրավիճակում։

Վերջին երկու շաբաթվա ընթացքում դուք ուսումնասիրել եք, թե 3 Նեփի 11–16 գլուխներում ինչ արեց և ուսուցանեց Փրկիչը նեփիացիներին, երբ առաջին անգամ հայտնվեց նրանց։ Մտածեք, թե ինչ արեց Փրկիչը նեփիացիների մեջ, որպեսզի ցուցադրի Իր սերը։ Հիշելու համար վերանայեք այն, ինչ գրել եք ձեր օրագրերի «Սովորել Հիսուս Քրիստոսի մասին 3 Նեփի գրքում» վերնագրի ներքո։

• Փրկչի գործողություններն ինչպե՞ս են արտահայտում Նրա սերը նեփիացիների հանդեպ։

Այսօր ավելի մանրամասն կկարդաք այն մասին, թե ինչպես էր Փրկիչն Իր սիրով լի կարեկցանքն արտահայտում նեփիացիներին։ Ուսումնասիրելու ընթացքում մտածեք, թե Նրա գործերն ինչ են ուսուցանում Նրա բնավորության մասին։ Ուշադրություն դարձրեք, թե ինչ եք զգում Նրա հանդեպ։

Օգտակար կլինի իմանալ, որ 3 Նեփի 11–17 գլուխներում հիշատակվող բոլոր իրադարձությունները մեկ օրում են տեղի ունեցել։

Կարդացեք 3 Նեփի 17․1–6 հատվածները և փնտրեք, թե ինչ կարող եք սովորել Հիսուս Քրիստոսի մասին Նրա խոսքերից ու գործերից։

• Ի՞նչ գտաք այս հատվածներում։

Գուցե նման ճշմարտություն եք բացահայտել․ Հիսուս Քրիստոսը կարեկցանքով է լցված իմ հանդեպ։ Կարող եք այս ճշմարտությունը գրել հատված 6-ի կողքին։

Տասներկու Առաքյալների Քվորումից երեց Ուլիսես Սոարեսն ուսուցանել է.

Իմաստ ունի նկատել, որ Հիսուսի կարեկից գործողությունները ոչ թե պատահական կամ պարտադրված դրսևորումներ էին՝ հիմնված անելիքների ցուցակի վրա, այլ Աստծո և Նրա զավակների հանդեպ Իր մաքուր սիրո և նրանց օգնելու անխախտ ցանկության իրականության ամենօրյա արտահայտություններ: (Ուլիսես Սոարես, «Փրկչի անփոփոխ կարեկցանքը», Լիահոնա, նոյ. 2021 թ․, 14)։

• Սեփական բառերով բացատրեք, թե ինչ է ուսուցանում երեց Սոարեսը Փրկչի կարեկցանքի մասին։

Փրկիչի կարեկցանքը

3 Նեփի 17 գլխի մնացած մասում ներկայացվում է Փրկչի կարեկցող էությունը։ Հիշեք, որ Հիսուս Քրիստոսն արեց այն, ինչ նկարագրվում է 3 Նեփի 17 գլխում, որովհետև Նա ընդունել էր նեփիացիների արդար ցանկություններն ու անկեղծորեն ուզում էր նրանց հետ լինել և օրհնել նրանց։

Ուշադիր ուսումնասիրեք հետևյալ հատվածներից յուրաքանչյուրը և պատկերացրեք, թե ինչ կզգայիք, եթե այնտեղ լինեիք։ Կարդալու և խորհելու ընթացքում հրավիրեք Սուրբ Հոգուն՝ ուսուցանելու ձեզ։ Ձեր մտքերն ու զգացումները գրեք ձեր օրագրի «Սովորել Հիսուս Քրիստոսի մասին 3 Նեփի գրքում» վերնագրով բաժնում։

• 3 Նեփի 17․7–10․ Բժշկելով նրանց հիվանդներին և նրանց չարչարվածներին

• 3 Նեփի 17․13–20․ Աղոթելով նրանց հետ և նրանց համար

• 3 Նեփի 17․11–12, 21–25․ Օրհնելով երեխաներին

Որպեսզի օգնեք ուսանողներին պատկերացնել և զգալ, թե ինչ է վկայում Սուրբ Հոգին 3 Նեփի 17 գլխում սովորածի մասին, կարող եք ցուցադրել «Հիսուս Քրիստոսը և հրեշտակները ծառայում են կարեկցանքով» տեսանյութի 1:30–11:45 հատվածը։

3 Նեփի 17 գլխում սովորածը պատկերացնելու համար կարող եք դիտել «Հիսուս Քրիստոսը և հրեշտակները ծառայում են կարեկցանքով» տեսանյութի 1:30–11:45 հատվածը։

1. Պատասխանեք հետևյալ հարցերից առնվազն երկուսին.

   • Եթե այնտեղ լինեիք, ինչպե՞ս կազդեր այդ փորձառությունը Փրկիչ Հիսուս Քրիստոսի հետ ունեցած ձեր հարաբերության վրա։

   • Ըստ ձեզ՝ Հիսուս Քրիստոսն ինչպե՞ս է այսօր կարեկցանք ցուցաբերում մեր հանդեպ։

   • Ի՞նչ եք ոգեշնչված անելու, որպեսզի արտահայտեք ձեր սերը Հիսուս Քրիստոսի հանդեպ։

Ընտրովի. ցանկանո՞ւմ եք ավելին իմանալ

Փրկիչը ի՞նչ չարչարանքներից բժշկեց մարդկանց։

Առաջին նախագահությունից նախագահ Դալլին Հ. Օուքսն ուսուցանել է.

Երբ Նոր աշխարհում Փրկիչը հայտնվեց արդարակյացներին, Նա կոչ արեց, որ առաջ գան այն մարդիկ, որոնք կաղ են կամ կույր կամ ֆիզիկական այլ տկարություն ունեն։ Նա նույն կոչն արեց նրանց, «որ չարչարված են ինչ-որ ձևով» (3 Նեփի 17․7)։ «Բերե՛ք նրանց այստեղ, և ես կբժշկեմ նրանց» (հ․ 7)։ Մորմոնի Գիրքը պատմում է մեզ, թե բազմությունն ինչպես առաջ եկավ «բոլոր նրանց հետ, ովքեր չարչարված էին ինչ-որ ձևով» (հ. 9)։ Նրանց թվում ամեն տեսակի ֆիզիկական, հուզական կամ մտավոր չարչարանք ունեցող մարդիկ կային, և սուրբ գիրքը վկայում է, որ Հիսուսը «բժշկեց նրանցից ամեն մեկին» (հ. 9) (Դալլին Հ․ Օուքս, «Նա բժշկվում է ծանր բեռ կրողին», Լիահոնա, նոյեմբեր 2006 թ., 6)։

Երիտասարդ կանանց գերագույն նախագահ քույր Բոննի Հ․ Քորդոնը հետևյալ տեսանյութում նույնպես ուսուցանել է Փրկչի բժշկելու ունակության և պատրաստակամության մասին։

Ինչպե՞ս կարող եմ զարգացնել քրիստոսանման կարեկցանք։

Տասներկու Առաքյալների Քվորումից երեց Ուլիսես Սոարեսը կիսվել է․

Հիսուսի կարեկից վերաբերմունքը արմատավորված է գթության մեջ, այսինքն՝ Նրա մաքուր և կատարյալ սիրո մեջ, որը Նրա քավիչ զոհաբերության էությունն է։ Կարեկցանքը հիմնարար բնութագրիչ է նրանց համար, ովքեր ձգտում են սրբագործման և այս աստվածային հատկանիշը զուգորդվում է քրիստոնեական այլ հատկանիշների հետ, օրինակ՝ սգալ նրանց հետ, ովքեր սգում են, ունենալ կարեկցանք, ողորմածություն և բարություն։ Ուրիշների հանդեպ կարեկցանքի դրսևորումը, փաստորեն, Հիսուս Քրիստոսի ավետարանի էությունն է և ակնհայտ ապացույց՝ Փրկիչի հետ մեր հոգևոր և հուզական մտերմության: Ավելին, այն ցույց է տալիս ազդեցության այն մակարդակը, որ Նա ունի մեր կյանքի ուղու վրա և ցուցադրում է մեր հոգիների մեծությունը: (Ուլիսես Սոարես, «Փրկչի անփոփոխ կարեկցանքը», Լիահոնա, նոյ. 2021 թ․, 13–14)։