Seminera
3 Nefia 25: Asa atao any amin’ny tempoly sy momba ny tantaram-pianakaviana

“3 Nefia 25: Asa atao any amin’ny tempoly sy momba ny tantaram-pianakaviana,” Boky torolalana ho an’ny mpampianatra ny Bokin’i Môrmôna (2024)

“3 Nefia 25,” Boky torolalana ho an’ny mpampianatra ny Bokin’i Môrmôna

3 Nefia 25

Asa atao any amin’ny tempoly sy momba ny tantaram-pianakaviana

Sary
fianakaviana sambatra manao tantaram-pianakaviana

Efa nisy fotoana ve ianao nanazava tamin’ny olona iray ny antony ananantsika tempoly na anaovantsika tantaram-pianakaviana? Zava-dehibe aminao toy ny ahoana ny tantaram-pianakaviana sy ny asa atao any amin’ny tempoly? Raha mbola nampianatra ny Nefita i Jesoa, dia nilaza hafatra iray izay nozarainy tamin’i Malakia tany am-boalohany izay nahitana ny fiverenan’i Elia sy ny anjara asa manan-danja tanany amin’ny asa atao any amin’ny tempoly sy ny tantaram-pianakaviana Izy. Ity lesona ity dia natao hanampiana anao handray anjara amin’ny tantaram-pianakaviana sy ny asa atao any amin’ny tempoly.

Ny razambenao

Adikao ao amin’ny diary fandalinanao ity tetiaram-pianakaviana manaraka ity, ka mameno fampahalalana araka izay betsaka indrindra azonao atao.

Sary
Tabilao iray maneho rohim-pirazanana misy taranaka efatra

Saintsaino ny zavatra fantatrao sy tsapanao momba ny fiainan’ireo olona akaiky anao, ny zavatra mety ho tianao ho fantatra, ary ny fiantraikan’izany teo amin’ny fiainanao.

  • Nahoana no zava-dehibe ny hikatsahantsika ny hahafantatra misimisy kokoa momba ireo razambentsika?

  • Raha refesina amina ambaratonga 1–10 (1 = tsy liana, 10 = faran’izay liana) dia manao ahoana ny fahaliananao ny hahalala ireo razambenao? Amin’ny fandraisana anjara amin’ny asa atao any amin’ny tempoly sy momba ny tantaram-pianakaviana? Nahoana?

Rehefa mandalina ianao, dia mitadiava hevi-baovao izay mety handrisika anao handray anjara misimisy kokoa amin’io asa io.

“Alohan’ny hahatongavan’ilay andro lehibe sady mahatahotry ny Tompo”

Tamin’ny alalan’ny fampiasana sarinteny feno sy teny maneho tandindona noraketin’i Malakia mpaminanin’ny Testamenta Taloha, i Jesoa dia nampianatra ny vahoakan’i Amerika momba ny Fiaviany Fanindroany etỳ an-tany ary naminany momba ny asa atao any amin’ny tempoly sy momba ny tantaram-pianakaviana.

Vakio ny 3 Nefia 25:1–2, hitadiavana ny zavatra nampianarin’ny Mpamonjy fa hitranga rehefa miverina etỳ an-tany izy. Mety hilaina ireto famaritana sy fanazavana sariohatra manaraka ireto.

  • Vodivary: Vodin-javamaniry tavela eo amin’ny saha iray aorian’ny fijinjana ka hodoran’ny mpamboly

  • Faka: Razambe

  • Sampana: Taranaka

  • Fanasitranana ao amin’ny elany: Hery manasitrana sy miaron’ny Tompo sy ny Sorompanavotany

  • Zanak’omby ao am-pahitra: Hokarakaraina tsara sy homen-kanina tahaka ny biby ao am-pahitra i Isiraely

  • Ahoana no hanazavanao ny zavatra hitranga amin’ny Fiaviany Fanindroany araka ny voalazan’ireo andininy ireo? Inona no hitranga amin’ireo ratsy fanahy?

  • Inona no ianaranao avy amin’ireo tandindona ireo momba ny Mpamonjy sy ny fitahiany ho an’ireo izay manara-dia Azy?

Vakio ny 3 Nefia 25:5–6 ary hevero ny hanisy marika ny zavatra mety hataon’ny Mpamonjy mba hanampiana ireo fianakavian’izao tontolo izao alohan’ny Fiaviany Fanindroany. Iray amin’ireo dikan’ny teny hoe “mampitodika” ny hoe mamatotra, na mamehy (jereo ny Teachings of Presidents of the Church: Joseph Smith [2007], 472). Ireo fanamarihana eny ambanim-pejy ao amin’ny soratra masinao dia afaka manampy anao ihany koa hahatakatra tsara kokoa ireo andininy ireo.

Raha tianao dia hevero ny hanisy marika eo amin’ny toerana iverenan’io fampanantenana io ao amin’ireo soratra masina tsirairay (jereo ny Malakia 3:18; Lioka 1:17; Fotopampianarana sy Fanekempihavanana 110:15–16; Joseph Smith—Tantara 1:38–39).

I Elia, mpaminany fahiny iray, dia nihazona ny fanalahidin’ny herin’ny famehezana. Ny herin’ny famehezana dia mampanan-kery any an-danitra ireo ôrdônansy tanterahina amin’ny fahefan’ny fisoronana eto an-tany (Torolalana ho an’ny Soratra Masina, “Famehezana,” scriptures.ChurchofJesusChrist.org).

Sary
I Elia niseho tao amin’ny Tempolin’i Kirtland

Vakio ny Fotopampianarana sy Fanekempihavanana 110:13–16 mba hahitana ny zava-niseho tao amin’ny Tempolin’i Kirtland tamin’ny 1836 momba an’i Elia, i Joseph Smith, ary i Oliver Cowdery.

Noho ilay hery famehezana naverina tamin’ny laoniny, dia afaka manao asa atao any amin’ny tempoly ho an’ny tenantsika sy ireo razambentsika maty isika.

Sary
sary famantarana, raketo an-tsoratra

  1. Valio ity fanontaniana manaraka ity:

Zava-dehibe ny mianatra fa tsy namerina tamin’ny laoniny ireo fanalahidin’ny famehezana fotsiny ny Mpamonjy, fa amin’ny alalan’ny Sorompanavotany ihany no ahafahantsika sy ireo ao amin’ny fianakaviantsika ho voavotra, voadio ary mandray ôrdônansy sy fitahiana mandrakizay, ao anatin’izany ny ôrdônansin’ny famehezana.

Saintsaino hoe nahoana no manan-danja eo amin’ny fiainantsika ny asa atao any amin’ny tempoly sy momba ny tantaram-pianakaviana.   ChurchofJesusChrist.org

Sary
sary famantarana, raketo an-tsoratra

  1. Valio ireto fanontaniana manaraka ireto:

    • Inona no traikefa anananao momba ny tempoly sy ny tantaram-pianakaviana?

    • Inona avy no fitahiana tsapanao teo amin’ny fiainanao vokatr’izany?

Mandray anjara amin’ny asa atao any amin’ny tempoly sy momba ny tantaram-pianakaviana

Mba hanampiana anao handray anjara amin’ny asa izay atao any amin’ny tempoly sy momba ny tantaram-pianakaviana dia ataovy ny iray na roa amin’ireto manaraka ireto. Azonao heverina ihany koa ny hanao zavatra hafa mifandray amin’ny asa atao any amin’ny tempoly sy momba ny tantaram-pianakaviana izay tsapanao fa itarihan’ny Fanahy anao ny hanao azy.

  • Amin’ny alalan’ny fampiasana ny kaontinao ao amin’ny ChurchofJesusChrist.org , midira an-jotra ao amin’ny FamilySearch.org. Mijere loharanom-pahalalana mba hahafantarana momba ny iray amin’ireo razambenao. Hevero ny hanomboka amin’ny hoe “Ahoana no tianao hanombohana?”

  • Mandefasa hafatra an-tsoratra, miantsoa, na manamboara fotoana hiresahana amina ray aman-dreny, na havana hafa mba hahafantarana misimisy kokoa momba ny fiainan’izy ireo, ny tantaran’izy ireo, na ny fiovam-pon’izy ireo ho amin’ny filazantsara. Hevero ny hanao firaketana an-tsoratra izay zavatra ianaranao.

  • Mandraisa anjara amin’ny fanaovana firaketana faobe.  FamilySearch.org

  • Mitadiava anarana razambe efa maty izay mila anaovana asa momba ireo ôrdônansy ao amin’ny tempoly ao amin’ny appli FamilySearch na ao amin’ny FamilySearch.org. Hevero ny hanomboka amin’ny hoe “Ahoana no tianao hanombohana?”

  1. Hazavao ny zavatra nataonao mba hanombohana ny fandraisana anjara amin’ny asa atao any amin’ny tempoly sy ny tantaram-pianakaviana nandritra ny fandalinanao androany. Aorian’izay dia valio ireto fanontaniana manaraka ireto:

    • Inona no zavatra iray tsapanao fa hampanaovin’ny Tompo anao mba hanohizana mandray anjara amin’ny asa atao any amin’ny tempoly sy momba ny tantaram-pianakaviana? Inona no fiovana hoentin’izany eo amin’ny fiainanao?

Rehefa mikatsaka ny hanohy handray anjara amin’ny asa atao any amin’ny tempoly sy momba ny tantaram-pianakaviana ianao, dia tsarovy ity fanambarana avy amin’ny Filoha Russell M. Nelson ity:

Sary
Filoha Russell M. Nelson

Isaky ny manao zavatra izay hanampy olona—amin’ny andanin’ny voaly anankiroa ianao, hanao dingana mitondra any amin’ny fanaovana fanekempihavanana amin’ Andriamanitra sy handray ireo ôrdônansin’ny batisa sy ny tempoly manan-danja, dia manampy amin’ny fanangonana an’i Isiraely izay ianao. (Russell M. Nelson sy i Wendy W. Nelson, “Fanantenana ho an’i Isiraely” [fampaherezam-panahy maneran-tany ho an’ny zatovo, 3 jona, 2018], ChurchofJesusChrist.org)

Hamoaka printy