Etera 12:28–41

I Jesoa Kristy: “Ilay loharanon’ny fahamarinana rehetra”

Miankina amin’izay katsahintsika, no ahafahantsika mahita tsara be dia be na ratsy be dia be eo amin’izao tontolo izao. Rehefa nahafantatra ny faharavan’ny Jaredita sy nanatri-maso ny faharavan’ny Nefita i Môrônia, dia niangavy ny mpamaky ny asa sorany rehetra izy mba hikatsaka an’i Jesoa Kristy sy ireo fitahiana azony omena. Ity lesona ity dia afaka manampy anao hahatsapa faniriana lehibe kokoa hikatsaka an’i Jesoa Kristy eo amin’ny fiainanao.

Loharano

Ny loharano dia faritana ho “fivoahana na famatsiana ny zavatra iray”—ohatra, “loharano mivoaka avy ao amin’ny tany” (Merriam-Webster.com Dictionary, “fountain”).

• Raha toa ianao ka afaka mahita loharano mahagaga iray izay mampikoriana tsy tapaka izay zavatra rehetra nosafidìnao, dia ho inona no tianao havoakan’izany?

Manaova sary maimaika mampiseho loharano mamoaka ny zavatra nosafidinao, ary hazavao fohifohy ny antony ilanao izany.

Vakio ny Etera 12:28, hitadiavana ny loharano notondroin’ny Tompo taorian’ny nampianarany an’i Môrônia momba ny fahafahany mamadika ny fahalemena ho tanjaka.

• Inona ilay loharano notondroin’ny Tompo?

• Inona no ampianarin’io andininy io momba ny fanatonantsika an’i Jesoa Kristy?

Fahamarinana iray ampianarin’io andininy io ny hoe ny finoana, fanantenana ary ny fiantrana dia mitondra antsika ho ao amin’i Jesoa Kristy, ilay Loharanon’ny fahamarinana rehetra.

1. Valio ireto fanontaniana manaraka ireto:

   • Nahoana no anarana mety amin’i Jesoa Kristy ny hoe “ilay Loharanon’ny fahamarinana rehetra”?

   • Inona no heverinao na tsapanao fa mikoriana avy any Aminy lalandava?

   • Ahoana araka ny eritreritrao no itondran’ny finoana, fanantenana ary fiantrana antsika hankamin’i Jesoa?

Mitanisà ohatra sasantsasany izay maneho ny maha Loharanon’ny fahamarinana rehetra ny Mpamonjy. Mety ho avy amin’ny soratra masina, na avy amin’ny fiainanao, na avy amin’ny fiainan’ny olona fantatrao izany ohatra izany. Raha mila fanampiana amin’ny fieritreretana ohatra iray ianao, dia azonao atao ny mamaky ny tantaran’ny Mpamonjy ao amin’ny Marka 2:1–12 na mijery ny “Jésus pardonne les péchés d’un paralytique et le guérit” (2:57).

Saintsaino ny fiantraikan’ireo ohatra ireo amin’ny fahatsapanao momba an’i Jesoa Kristy. Eritrereto ny fanirianao amin’izao fotoana izao hanatona an’i Jesoa Kristy sy handray anjara amin’ny fahamarinana izay avy Aminy. Matanjaka tahaka ny anirianao azy ve ny fanirianao? Nahoana, na nahoana no tsia?

Rehefa manohy mandalina ianao, dia mikatsaha fahamarinana momba an’i Jesoa Kristy izay afaka ny hisy fiantraikany tsara eo amin’ny fanirianao sy ny fahafahanao manatona Azy ary mandray anjara amin’ny fahamarinana atolony.

Fanomezana izay mikoriana avy eo amin’i Kristy

Vakio ny Etera 12:29–37, hitadiavana ireo fitahiana izay atolotr’i Jesoa Kristy ireo izay manatona Azy amim-pinoana, fanantenana ary fiantrana.

2. Valio ireto fanontaniana manaraka ireto:

   • Inona avy no fitahiana nolazain’i Môrônia fa avy amin’ny fikatsahana an’i Jesoa?

   • Inona amin’ireny fitahiana ireny no niainanao na ny hafa rehefa nikatsaka ny Mpamonjy ianareo?

   • Inona amin’ireny fitahiana ireny no tena tsy andrinao indrindra izay handraisana azy amin’ny hoavy? Nahoana?

Katsaho i Jesoa

Any amin’ny fiafaran’ny Etera 12, i Môrônia dia nizara zava-masina niainany. Vakio ny andininy 39, ary miezaha maka sary an-tsaina ny hoe mety ho toy ny ahoana tokoa izany zavatra niainana izany tamin’i Môrônia.

Vakio ary hevero ny hanisy marika ny fanasan’i Môrônia ao amin’ny andininy 41.

• Rehefa avy niaina ny zavatra nolazalazainy ao amin’ny andininy 39 izy, dia inona araka ny eritreritrao no antony anolorany antsika io fanasana io?

Tahaka an’i Môrônia, ny Loholona Melvin J. Ballard (1873–1939) tao amin’ny Kôlejin’ny Apôstôly Roambinifolo dia niaina zava-masina niaraka tamin’ny Mpamonjy. Vakio ny fanoritsoritany io zavatra niainana io, ary miezaha indray maka sary an-tsaina ny hoe mety ho nanao ahoana izany.

Hitako tanaty nofin’ny alina ny tenako indray hariva, tao amin’izany trano masina izany, dia ny tempoly. Taorian’ny fotoana elaela nanaovana vavaka sy nisian’ny fifaliana, dia nampahafantarina aho fa tokony hanana tombontsoa manokana amin’ny fidirana amin’ny iray tamin’ireo efitrano aho mba hihaona amin’ny olona iray be voninahitra, ary rehefa niditra ny varavaravana aho, dia hitako teo amina toerana avoavo ny zava-mananaina be voninahitra indrindra hitan’ny masoko hatramin’izay, izay tsy noeritreretiko mihitsy hoe misy any amin’ny tontolon’ny mandrakizay rehetra.

Rehefa nanatona mba hampahafantarina aho, dia nitsangana Izy ary nanatona ahy niaraka tamin’ny sandriny nitolotra, ary nitsiky Izy rehefa niteny tamin’ny feo malefaka ny anarako. Raha hiaina an-tapitrisan-taona aho, dia tsy ho hadinoko na oviana na oviana izany tsiky izany. Nandray ahy teny an-tsandriny Izy ary nanoroka ahy, namihina mafy ahy teo an-tratrany ary nitahy ahy, mandra-pahatonga ny tsokan-taolako ho toy ireny mitsonika ireny! Rehefa vitany izany, dia niankohoka teo an-tongony aho ary rehefa nosasako tamin’ny ranomasoko sy ny oroka nataoko izany, dia hitako ny dian’ny fantsika teo amin’ny tongotr’ilay Mpanavotra izao tontolo izao. Ny fahatsapana izay niainako teo anatrehan’Ilay , mahefa ny zava-drehetra mba hianoka tamin’ny fitiavany, sy ny fitahiany dia lehibe tokoa ka raha afaka mandray ny zavatra izay nandramako fotsiny aho, dia homeko ny momba ahy rehetra, ny zavatra rehetra antenaiko, mba hahatsapako ny zavatra tsapako tamin’izany!

… Hitako i Jesoa tsy eo ambonin’ny hazofijaliana amin’izao fotoana izao. Tsy mahita ny handriny voatsindrona tsilo na ny tanany rovitry ny fantsika aho, fa mahita Azy mitsiky, miaraka amin’ny sandry mitolotra, miteny amintsika rehetra hoe: “Manatòna ahy!” (Melvin J. Ballard, “I Know That He Lives,” Ensign, Dec. 2014, 80)

3. Valio ireto fanontaniana manaraka ireto:

   • Inona ny zavatra nanan-danja indrindra taminao tamin’ny zavatra niainan’ny Loholona Ballard? Nahoana?

   • Inona no eritreritra na fahatsapana momba ny Mpamonjy entin’ny zavatra niainan’ny Loholona Ballard sy i Môrônia ao an-tsainao?

Saintsaino ny zavatra nianaranao sy tsapanao androany. Inona no tena nanaitra ny fanirianao hikatsaka an’i Jesoa eo amin’ny fiainanao? Manolora tena hanao asa mifanaraka amin’izay bitsika na fahatsapana rehetra azonao.

Tsy voatery atao: Te hianatra misimisy kokoa ve ianao?

Inona no atao hoe fiantrana?

Ny Loholona Marvin J. Ashton (1915–94) tao amin’ny Kôlejin’ny Apôstôly Roambinifolo dia nampianatra hoe:

Tsy zavatra omenao fotsiny ny tena fiantrana fa zavatra iray izay azonao ary lasa ampahan-javatra iray ao amin’ny tenanao. Ary rehefa tonga voavoly ao am-ponao ny hatsaran’ny fiantrana, dia tsy mitovy amin’ny taloha intsony ianao. …

Ny fiantrana lehibe indrindra angamba dia tonga rehefa mifaneho hatsaram-panahy isika, rehefa tsy mitsara na manasokajy ny olona hafa isika, rehefa mino fotsiny isika fa afaka mahavita izay tsara indrindra ny olona iray, na mangina. Ny fiantrana dia fanekena ireo zavatra mampiavaka ny hafa, ny fahalemeny ary ny tsy fahatanterahany; fananana faharetana amin’ny olona izay namitaka antsika; na fanoherana ny fiontanam-po ny ho lasa tafintohina rehefa misy olona iray tsy manatanteraka zavatra iray araka izay mety nantenaintsika azy. Ny fiantrana dia fandavana ny hanararaotra ny fahalemen’ny hafa ary vonona ny hamela ny olona iray izay nanao ratsy antsika. Ny fiantrana dia fanantenana ny tsara indrindra avy amin’ny tsirairay. (Marvin J. Ashton, “The Tongue Can Be a Sharp Sword,” Ensign, May 1992, 19)

Etera 12:41. Ahoana no ahafahako mikatsaka an’i Jesoa, ary inona no fitahiana afaka ny ho tonga rehefa manao izany aho?

Nampanantena toy izao ny Filoha Russell M. Nelson:

Raha mizotra mianatra ny zavatra rehetra azonareo ianarana momba an’i Jesoa Kristy ianareo dia mampanantena anareo aho fa … hitombo ny fahaizanareo hiala amin’ny fahotana. Ny fanirianareo hitandrina ireo didiny dia hitombo izaitsisy. (Russell M. Nelson, “Mpaminany, fitarihana, ary lalàn’ Andriamanitra” [fampaherezam-panahy ho an’ny tanora tokan-tena sy mpivady vao herotrerony, 8 jan. 2017], )broadcasts.ChurchofJesusChrist.org)

Jereo ny “Wise Men Still Seek Him [Mbola mikatsaka Azy ny olona hendry]” (3:31) na ny “Seek, and Ye Shall Find [Mitadiava dia hahita ianareo]” manomboka eo amin’ny kaodim-potoana 13:59 hatramin’ny 15:16 mba hahitana ohatra sasantsasany izay afaka manampy amin’ny famaliana io fanontaniana io.