Moroni 7:20–43

Pagkakaroon ng Pag-asa kay Cristo

Naranasan mo na bang mangailangan ng higit pang pag-asa sa iyong buhay? Si Moroni, na mag-isang nagpagala-gala sa loob ng maraming taon matapos malipol ang kanyang mga tao, ay isinulat ang mga salita ng kanyang ama tungkol sa pag-asang may darating na magagandang bagay sa atin sa pamamagitan ni Cristo. Ang lesson na ito ay makatutulong sa iyo na makadama ng higit pang pag-asa sa pamamagitan ni Jesucristo.

Manangan sa bawat mabuting bagay

Sa Moroni 7, sinabi ni Mormon na nais niyang tulungan ang kanyang mga tao kung paano nila malalaman kung paano sila “makapa[na]nangan sa bawat mabuting bagay” (talata 21).

• Nang gamitin ni Mormon ang pariralang “mabuting bagay,” ano sa palagay mo ang tinutukoy niya?

• Ano ang ilan sa espirituwal at walang hanggang “mabubuting bagay” na gusto mong tanganan, o tanggapin, sa buhay na ito o sa kabilang-buhay?

Maaalala mo na sa Moroni 7:12–19, itinuro ni Mormon na lahat ng mabubuting bagay ay nagmumula kay Jesucristo. Basahin ang Moroni 7:20–26, at alamin ang itinuro ni Mormon tungkol sa kung paano matatanggap ang mabubuting bagay na ito mula kay Cristo.

• Ano ang nalaman mo?

• Anong mga salaysay ang naiisip mo kung saan nagpadala ang Ama sa Langit ng mga anghel upang ipahayag na si Jesucristo ang Tagapagligtas ng sanlibutan?

Ang kahulugan ng pag-asa

Para matulungan kang maghandang malaman ang iba pa tungkol sa mga turo ni Mormon tungkol sa pag-asa, basahin ang salaysay na ito mula kay Elder Dieter F. Uchtdorf ng Korum ng Labindalawang Apostol:

Bago ako nag 12-anyos, dalawang beses napilitang lisanin ng aming pamilya ang aming tahanan at magsimulang muli sa gitna ng kaguluhan, takot, at kawalang-katiyakan na dulot ng digmaan at hidwaan sa pulitika. Maligalig na panahon iyon para sa akin. …

Ang panahong ito ng kawalan ng pag-asa matapos ang Ikalawang Digmaang Pandaigdig ay nagkaroon ng malaking epekto sa mundo. Nagkaroon ito ng epekto sa akin.

Noon, sa aking pag-iisa sa pinakamalulungkot na oras ko, madalas kong maisip, “May pag-asa pa bang natitira sa mundo?” (Dieter F. Uchtdorf, “Kasama Natin ang Diyos,” Liahona, Mayo 2021, 8)

• Ano ang ilang dahilan kung bakit nakadarama ang mga tao ng kawalan ng pag-asa sa panahon ngayon?

Ginunita ni Elder Uchtdorf na “habang nalulunod ang mundo sa pagdududa, kapaitan, pagkamuhi, at pangamba,” nakita niya ang isang bagay na “[pumuspos sa kanya] ng pag-asa“ (“Kasama Natin ang Diyos,” Liahona, Mayo 2021, 8).

Nakararanas ka ba ng kawalan ng pag-asa sa iyong buhay? Isipin kung ano ang nagbibigay sa iyo ng pag-asa kahit sa pinakamahihirap na kalagayan. Habang patuloy mong pinag-aaralan ang lesson na ito, hanapin ang mga katotohanan na makatutulong sa iyo na mapuspos ka ng pag-asa.

Itinuro ni Mormon ang tungkol sa pag-asa

Basahin ang Moroni 7:40–44, at alamin kung paano nauugnay sa pag-asa ang ating pananampalataya kay Jesucristo.

• Paano mo ibubuod ang talata 41 sa sarili mong mga salita?

Isang katotohanan mula sa mga turo ni Mormon

Ang isang katotohanan na matututuhan natin mula kay Mormon ay kung sasampalataya tayo kay Jesucristo, magkakaroon tayo ng pag-asa sa pamamagitan ng Kanyang pagbabayad-sala na ibabangon tayo tungo sa buhay na walang hanggan.

• Ano sa palagay mo ang ibig sabihin ng magkaroon ng pag-asa kay Jesucristo?

• Bakit kailangan nating maging mapagpakumbaba, o “maamo at may mapagpakumbabang puso“ (Moroni 7:43), upang sumampalataya kay Jesucristo at magkaroon ng pag-asa?

Para makakita ng halimbawa ng isang taong nakahanap ng pag-asa sa pamamagitan ng pananampalataya kay Jesucristo, rebyuhin ang isa sa mga sumusunod na salaysay. Habang ginagawa mo ito, alamin kung paano nakaranas ng pag-asa ang taong iyon sa pamamagitan ni Jesucristo.

• Basahin ang Alma 22:12–18, ang kuwento tungkol sa ama ni Haring Lamoni.

• Basahin ang Alma 36:12–21, o panoorin ang “Nagpatotoo si Alma sa Kanyang Anak na si Helaman,” na mapapanood sa ChurchofJesusChrist.org, mula sa time code na 1:30 hanggang 2:32.

  Nagpatotoo si Alma sa Kanyang Anak na si Helaman | Alma 36–37

  Ipinaliwanag ng Nakababatang Alma ang kanyang pagbabalik-loob sa kanyang anak na si Helaman. Nangako si Alma na kung susundin ni Helaman ang mga kautusan ng Diyos, uunlad siya. Iniutos ni Alma sa anak na ingatan ang mga sagradong talaan ng mga tao.

• Panoorin ang “Finding Hope through the Resurrection of Christ“ (4:41), na makikita sa ChurchofJesusChrist.org.

  Finding Hope Through the Resurrection of Christ

  Jesus Christ is central to our Heavenly Father’s plan of salvation. Through our Savior’s atonement and resurrection, He made it possible for us to live again with our loved ones for eternity.

• Panoorin ang “Ang Dalubhasang Manggagamot,” na makikita sa ChurchofJesusChrist.org, mula sa time code na 8:49 hanggang 11:53.

  The Master Healer

  Sister Stephens testifies of the Savior’s power to heal us from our sins, from the unrighteous actions of others, and from difficulties of mortality.

Mahalagang pansinin na kahit nagpapakita tayo ng pananampalataya kay Jesucristo at umaasa sa mga pagpapalang ibinibigay Niya, maaari pa rin tayong magkaroon ng mahihirap na sandali sa ating buhay. Ngunit kapag patuloy tayong sumasampalataya sa Tagapagligtas at tumutuon sa Kanya at sa buhay na walang hanggan na ginawa Niya na posible para sa atin, matatamo natin ang pag-asang hinahangad natin.

1. Gawin ang sumusunod na aktibidad at sagutin ang huling tatlong tanong:

Pagkakaroon ng Pag-asa kay Jesucristo

Manwal ng Titser para sa Aklat ni Mormon (2024)—“Moroni 7:20–43: Pagkakaroon ng Pag-asa kay Cristo”

Para matulungan kang pag-isipan kung paano nakakaapekto sa ating buhay sa iba’t ibang sitwasyon ang pagkakaroon ng pag-asa dahil kay Cristo, pumili ng isa sa mga sumusunod na sitwasyon (o mag-isip ng sarili mong sitwasyon):

• Bumalik si James sa masasamang gawi na inakala niyang tinalikdan na niya.

• Tumigil sa pagsisimba ang ama ni Becca at sinabi nito na hindi na siya naniniwala sa Diyos.

• Nahihirapan si Analise na gawin ang lahat ng kanyang obligasyon sa paaralan, trabaho, at tahanan.

Tapusin ang dalawang pariralang ito, at ilahad kung paano maaaring tingnan ng indibiduwal ang kanyang sitwasyon sa ibang paraan:

• Nang walang pag-asa kay Jesucristo,

• Nang may pag-asa kay Jesucristo,

• Paano maaaring sumampalataya ang taong ito kay Jesucristo? Tingnan kung makakahanap ka ng banal na kasulatan na isasama sa iyong sagot.

• Paano makatutulong ang pagsampalataya sa ganitong paraan para magkaroon ang taong ito ng higit na pag-asa sa pamamagitan ni Jesucristo?

• Ano kaya ang sasabihin mo sa taong ito kung tatanungin ka niya kung bakit ka umaasa kay Jesucristo? (Tingnan sa 1 Pedro 3:15.)

© 2023 ng Intellectual Reserve, Inc. All rights reserved.

Opsiyonal: Gusto Mo Bang May Matutuhan Pa?

Paano tayo mapagpapala ng pagkakaroon ng pag-asa kay Cristo?

Ipinahayag ni Pangulong M. Russell Ballard ng Korum ng Labindalawang Apostol:

Umasa kay Cristo

Nagbahagi si Pangulong Ballard ng limang mahahalagang alituntunin na makatutulong sa sinumang nalulungkot, kabilang na ang mga walang-asawa, na matagpuan ang pag-asa kay Jesucristo.

Ang sinasabi kong pag-asa kay Cristo ay hindi pangangarap lamang. Sa halip, ang pag-asang sinasabi ko ay pag-asam sa isang bagay na matutupad. Kailangan ang ganitong pag-asa upang madaig ang hirap, mapagyaman ang espirituwal na katatagan at lakas, at malaman na mahal tayo ng ating Amang Walang Hanggan at na mga anak Niya tayo na mga kabilang sa Kanyang pamilya. (M. Russell Ballard, “Umasa kay Cristo,” Liahona, Mayo 2021, 54)

Paano ko mapapalaki ang aking pag-asa kay Jesucristo?

Ipinahayag ni Pangulong M. Russell Ballard ng Korum ng Labindalawang Apostol:

Natutuhan ko sa pagdaan ng mga taon na lumalakas ang ating pag-asa kay Cristo kapag naglilingkod tayo sa ibang tao. Sa paglilingkod na kahalintulad ng ginawa ni Jesus, likas na pinalalakas natin ang ating pag-asa sa Kanya. (M. Russell Ballard, “Umasa kay Cristo,” Liahona, Mayo 2021, 55)

Paano kung hindi ko nakikita ang mga bagay na inaasam ko?

Ipinaliwanag ni Elder Alvin F. Meredith III ng Pitumpu:

Look down the Road

Elder Meredith uses the story of Peter walking on water to teach that if we focus on Christ and beware of distractions, we can be rescued.

Sa harap ng paghihirap o pagsubok, maaari kayong maging katulad ko at umasa na masasagip kayo kaagad. Ngunit tandaan na madaling-araw na nang tulungan ng Tagapagligtas ang mga Apostol—matapos silang bayuhin ng bagyo nang halos buong magdamag [tingnan sa Marcos 6:48]. Maaari nating ipagdasal na kung ang tulong ay hindi darating kaagad, dumating sana ito sa hatinggabi o bago magmadaling-araw. Kapag kailangan nating maghintay, huwag mag-alala dahil laging nakamasid ang Tagapagligtas, tinitiyak na hindi natin kakailanganing magtiis nang higit sa ating makakaya [tingnan sa 1 Corinto 10:13]. Sa mga naghihintay sa madaling-araw, na marahil ay nasa gitna pa rin ng pagdurusa, huwag mawalan ng pag-asa. Ang pagsagip ay laging dumarating sa matatapat, sa buhay mang ito o sa mga kawalang-hanggan. (Alvin F. Meredith III, “Tumingin sa Paroroonan,” Liahona, Nob. 2021, 115–16)