Moroni 10:26–34

“Ejani te Krishti”

Ne u dërguam në tokë për të mësuar dhe për t’u rritur në mënyrë që të mund të fitojmë jetën e përjetshme. Për të na ndihmuar, Ati Qiellor dërgoi Birin e Tij, Jezu Krishtin. Ai ka thirrur gjithashtu profetë për të dhënë mësim dhe dëshmuar për Jezu Krishtin. Në vargjet e fundit të Librit të Mormonit, Moroni i ftoi të gjithë ta ndjekin Shpëtimtarin. Ky mësim mund të të ndihmojë “[të vish] te Krishti dhe [të] përsose[sh] në të” (Moroni 10:32).

Qëllimet e Librit të Mormonit

A ke menduar ndonjëherë rreth arsyes përse Perëndia na e dha Librin e Mormonit?

Sot do të studiosh vargjet e fundit të Librit të Mormonit. Ndërsa studion, mendo rreth qëllimeve dhe bekimeve të Librit të Mormonit.

Te faqja e titullit të Librit të Mormonit, Moroni shpalli se Libri i Mormonit u shkrua për të na bindur se “Jezusi është Krishti”. Termi “Krisht” është “ekuivalenti në greqisht i Mesias. Do të thotë Profeti i vajosur, Prift, Mbret dhe Çlirimtar” (Udhëzuesi për Shkrimet e Shenjta, “Mesia”, scriptures.ChurchofJesusChrist.org).

• Si e ka forcuar studimi i Librit të Mormonit besimin tënd te Jezu Krishti?

• Si të ka ndihmuar studimi i Librit të Mormonit ta ndjekësh Jezu Krishtin?

• Si e ndien se po ecin aktualisht përpjekjet e tua për ta ndjekur Atë?

Ftesat e fundit të Moronit

Pasi dha mësim rreth dhuratave të shpirtit dhe paralajmërimit për pasojat e mosbesimit, Moroni foli rreth Librit të Mormonit.

Lexo te Moroni 10:27–29 duke kërkuar se çfarë profetizoi Moroni se do të ndodhte.

• Çfarë mendon rreth takimit me Moronin te shufra e gjykimit?

Moroni bëri më pas nxitjet e tij të fundit, ose ftesat.

Lexo te Moroni 10:30–34, duke kërkuar se çfarë na ftoi Moroni të bëjmë dhe për bekimet e premtuara që na i tregoi.

Studio të paktën dy ftesa dhe dy premtime nga Moroni 10:30–34. Tabela vijuese mund të ndihmojë. Mund të jetë e dobishme t’i renditësh shkrimet e shenjta shtesë dhe ndihmat për studim në shkrimet e tua të shenjta pranë frazave të veçanta nga Moroni 10:30–34. Mund të studiosh gjithashtu ftesat ose premtimet e tjera që gjen te Moroni 10:30–34, që nuk janë të renditura në tabelë.

Çfarë duhet të bëjmë (ftesat e Moronit)

Çfarë premton Ati Qiellor

Çfarë duhet të bëjmë (ftesat e Moronit) Mbështetuni në çdo dhuratë të mirë. (Shih te Moroni 7:19; Doktrina e Besëlidhje 6:7.) Shmangi dhuratat e liga dhe gjërat e papastra. (Shih te 2 Nefi 4:27–28; Mormoni 9:28.) T’i mohojmë vetes gjithë paperëndishmërinë. (Shih te Përkthimi i Joseph Smith-it, Mateu 16:25–29 [te Mateu 16:24, poshtëshënimi a]; Mosia 3:19.) Ta duam Perëndinë me gjithë fuqinë, mendjen e forcën tonë. (Shih te Mateu 22:36–38; Omni 1:26.)

Çfarë premton Ati Qiellor Hiri i Tij është i mjaftueshëm dhe mund të na bëjë të përsosur. (Shih te 2 Nefi 10:24; 25:23; Ethëri 12:27; Udhëzuesi për Shkrimet e Shenjta, “Hir”, scriptures.ChurchofJesusChrist.org.) Ne do të shenjtërohemi dhe do të marrim një heqje të mëkateve tona. (Shih tek 3 Nefi 27:20; Doktrina e Besëlidhje 76:41; Udhëzuesi për Shkrimet e Shenjta, “Shenjtërim”, scriptures.ChurchofJesusChrist.org.) Ne do të bëhemi të shenjtë pa njollë. (Shih te Levitiku 19:2; Doktrina e Besëlidhje 87:8; Udhëzuesi për Shkrimet e Shenjta, “Shenjtë (i)”, scriptures.ChurchofJesusChrist.org.)

1. Përgjigju për pyetjet vijuese:

   • Cilat ftesa ose premtime janë më kuptimplotat për ty dhe përse?

   • Si mund të të ndihmojë të vepruarit sipas këtyre ftesave që të vish te Jezu Krishti?

   • Çfarë parimesh mund të mësojmë nga Moroni 10:30–34?

Një parim që mësojmë, është: ndërsa vijmë te Jezu Krishti, ne mund të përsosemi në Të.

“Ejani te Krishti dhe përsosuni në të”

Nëse dëshiron, mund të shikosh materialin filmik “Come unto Christ: 2014 Theme Song” [“Ejani te Krishti: Kënga për Temën për Vitin 2014”] (4:48), në dispozicion në ChurchofJesusChrist.org. Përsiat se si të ka ndihmuar hiri i Shpëtimtarit në kohë nevoje.

2. Përgjigju për të paktën një prej pyetjeve vijuese:

   • Çfarë bëri Jezu Krishti që ne të mund t’i marrim premtimet te Moroni 10:30–34 dhe të përsosemi në Të?

   • Si e ke parë hirin (ndihmën ose forcën hyjnore) të Atit Qiellor dhe Jezu Krishtit të veprojnë në jetën tënde?

Mendo për diçka që mund të bësh për të ardhur te Krishti dhe për t’u përsosur në Të. Nëse nuk je i sigurt se çfarë të bësh, përsiatja e pyetjeve vijuese mund të ndihmojë. Nëse ka diçka që ti e ndien se mund ta bësh tani, bëje. Një nga synimet e zhvillimit të të rinjve mund të jetë tashmë duke të të ndihmuar të vish te Krishti. Mund të vazhdosh të punosh për atë synim.

• A ka ndonjë gjë të paperëndishme në jetën time që është e nevojshme t’ia mohoj vetes (për shembull, ndikime të medias ose vese)?

• Si mund ta dua Perëndinë më mirë me gjithë fuqinë, mendjen dhe forcën time?

• Si do të më ndihmojë bërja e këtyre gjërave që të bëhem më shumë si Jezu Krishti?

Fakultative: Dëshiron të Mësosh më Shumë?

Si mund të bekohem ndërsa e pranoj ftesën për të ardhur te Krishti?

Plaku Gerit W. Gong, i Kuorumit të Dymbëdhjetë Apostujve, tregoi:

“Ftesat e Perëndisë janë plot dashuri e mundësi, sepse Jezu Krishti është ‘udha, e vërteta dhe jeta’ [Gjoni 14:6]. Ata të cilët ndihen të rënduar, Ai i fton: ‘Ejani tek unë’ dhe atyre që vijnë tek Ai, Ai u premton: ‘Unë do t’ju jap çlodhje’ [Mateu 11:28]. ‘Ejani te Krishti dhe përsosuni në të, … [duajeni] Perëndinë me gjithë fuqinë, mendjen dhe forcën tuaj, atëherë hiri i tij mjafton për ju, se me anë të hirit të tij ju mund të bëheni të përsosur në Krisht’ [Moroni 10:32].

Tek ajo siguri se ‘me anë të hirit të tij ju mund të bëheni të përsosur në Krisht’, gjenden gjithashtu ngushëllimi, paqja dhe premtimi që mund të vazhdojmë të shkojmë përpara me besim e vetëbesim në Zotin, edhe kur gjërat nuk shkojnë ashtu siç shpresojmë, siç presim ose ndoshta siç dëshirojmë, pa asnjë faj nga ana jonë, edhe pasi të kemi bërë gjithçka mundemi.” (Gerit W. Gong, “Zjarri Ynë i Kampit të Besimit”, Liahona, nëntor 2018, f. 42)

Plaku Xhefri R. Holland, i Kuorumit të Dymbëdhjetë Apostujve, dha mësim:

“‘Po, ejani te Krishti dhe përsosuni në të’, lutet Moroni. ‘Ta doni Perëndinë me gjithë fuqinë, mendjen dhe forcën tuaj, atëherë … me anë të hirit të tij ju mund të bëheni të përsosur në Krisht’ [Moroni 10:32; theksimi i shtuar]. Shpresa jonë e vetme për përsosje të vërtetë është në pranimin e saj si një dhuratë nga qielli – ne nuk mund ta ‘fitojmë’ atë. Prandaj, hiri i Krishtit na ofron jo vetëm shpëtim nga hidhërimi, mëkati dhe vdekja, por gjithashtu shpëtim nga kritika e vazhdueshme ndaj vetes.” (Xhefri R. Holland, “Jini, pra, të Përkryer – Përfundimisht”, Liahona, nëntor 2017, f. 41)

Plaku D. Tod Kristoferson, i Kuorumit të Dymbëdhjetë Apostujve, dha mësim:

“Mbani mend, fuqia shlyese ose hiri i Krishtit jo vetëm që largon fajin e mëkatit dhe të gabimit, por gjithashtu na shenjtëron dhe na bën qenie të shenjta, të afta për të jetuar në praninë e Perëndisë.” (D. Tod Kristoferson, “Zgjedhje dhe Zotim”, [takimi shpirtëror mbarëbotëror për të rinjtë në moshë madhore, 12 janar, 2020], broadcasts.ChurchofJesusChrist.org)

Moroni 10:34. Si do të jetë Gjyqi Përfundimtar?

Presidenti Diter F. Uhtdorf, asokohe i Presidencës së Parë, dha mësim:

“Ajo Ditë e Gjykimit do të jetë një ditë e mëshirës dhe e dashurisë – një ditë kur zemrat e thyera shërohen, kur lotët e pikëllimit zëvendësohen nga lotët e mirënjohjes, kur gjithçka do të vihet në rregull.

Po, do të ketë hidhërim të thellë për shkak të mëkatit. Po, do të ketë keqardhje dhe madje ankth për shkak të gabimeve tona, marrëzisë sonë dhe kokëfortësisë sonë që na bënë të humbasim mundësitë për një të ardhme më të madhërishme.

Por kam vetëbesim se ne jo vetëm që do të jemi të kënaqur me gjykimin e Perëndisë; ne gjithashtu do të mahnitemi dhe pushtohemi nga hiri, mëshira, bujaria dhe dashuria e Tij e pafundme për ne, fëmijët e Tij. Nëse dëshirat dhe veprat tona janë të mira, nëse kemi besim në një Perëndi të gjallë, atëherë ne mund ta presim me dëshirë atë që Moroni e quajti ‘shufr[a e] këndshme [e] Jehovait të madh, Gjykatësit të Përjetshëm’ [Moroni 10:34].” (Diter F. Uhtdorf, “O sa i Madh Plani i Perëndisë Tonë!”, Liahona, nëntor 2016, f. 21)