Faatomuaga o Anomea

Aoaoina e ala i le Agaga

“E Ala i le Mana o le Agaga Paia”

I le Tusi a Mamona atoa, sa faamamafa mai ai e perofeta le matafaioi taua a le Agaga Paia. E finagalo le Tama Faalelagi ma Iesu Keriso mo oe ia iloa i Laua ma ia aoao le upumoni “e ala i le mana o le Agaga Paia” (Moronae 10:5). O lenei lesona e mafai ona fesoasoani ia te oe e faailoa ai matafaioi autu a le Agaga Paia, ia e taua mo lou tuputupu ae faaleagaga ma le alualu i luma.

Aoao atu e ala i le Agaga. O le Agaga Paia e molimau i le upumoni, e molimau mai ia Keriso, ma e na te suia loto. E na o le Agaga Paia e mafai ai ona tatou ausia le sini autu o le aoaoina o le talalelei—e fausia le faatuatua ia Iesu Keriso ma fesoasoani i isi e avea atili e pei o Ia. Vaavaai mo ni auala e valaaulia ai le Agaga Paia e faatino Ana matafaioi.

Sauniuniga a le tamaitiiti aoga: Valaaulia tamaiti aoga e talanoa ma se tagata o le aiga po o se taitai o le Ekalesia e uiga i nisi o auala e fesootai mai ai le Agaga Paia.

Gaoioiga e Ono Mafai Ona Aoao Ai

Fesootaiga faaleagaga

Mafaufau e faaali atu i tamaiti aoga se ata o faailoilo o le asu, se masini uaealesi, po o se tagata o faaaoga se numera lilo mo faailo, ma fesili i ai pe latou te iloa le mea na faaaoga ai nei mea. Vaevae tamaiti aoga i ni vaega ma valaaulia i latou e fai se lisi o ni mea fou na aafia ai, suia ai, po o ni fesootaiga ua faaleleia i le silia ma le 50 i le 100 tausaga ua tuanai. Faailoa le telefonipoto mai a latou lisi ma mafaufau e fai atu fesili e pei o fesili nei.

Mafaufau i le tele o meafaigaluega eseese o fesootaiga o loo i ai i le lalolagi ma le auala ua aafia ai lou olaga ona o i latou. O se tasi o meafaigaluega taua ua matua faaleleia ai fesootaiga i le lalolagi atoa o le telefonipoto.

• O le a le matafaioi e mafai ona faia e se telefonipoto e fesoasoani ai i tagata ia tumau ai pea ona fesootai?

• E faapefea ona fesoasoani i se tagata ia maua le atamai ma malamalama atili e uiga i le lalolagi?

E sili atu foi ona taua nai lo soo se meafaigaluega o fesootaiga faaletino, sa silafia lelei e le Tama Faalelagi le taua o fesootaiga faaleagaga mo i tatou i le taimi o la tatou faigamalaga i le olaga nei. Ua Ia saunia le Agaga Paia e fesoasoani ia te oe ia tumau ai pea le fesootai atu ia te Ia ma malamalama i mea uma e manaomia mo le fiafia i le taimi nei ma lou faaolataga i se taimi o mulimuli mai.

Mafaufau i ni taimi i lou olaga na e iloa ai le faatosinaga a le Agaga Paia ma le ala ua faamanuiaina ai lou olaga e Lana uunaiga. Atonu e te taumanatunatu pe na aoaoina oe e le Agaga Paia pe na e lagonaina foi Lana uunaiga. A o e suesue ma faailoa mai matafaioi taua a le Agaga Paia, mafaufau pe mafai faapefea e Lana uunaiga ona faamanuiaina lou olaga, ma mafaufau loloto i fesili nei:

• O le a se tele o loʻu malamalama i matafaioi a le Agaga Paia?

• E mafai faapefea ona lelei atili atu loʻu valaaulia o le uunaiga a le Agaga Paia i loʻu olaga?

• Na faapefea ona ou lagona ma iloa le Agaga Paia i lo’u olaga seia oo mai i le taimi nei?

Matafaioi e lua a le Agaga Paia

Mafaufau e vaevae tamaiti aoga i ni paga pe vaelua tutusa le vasega. E mafai e i latou taitoatasi ona suesue ni mau se lua ma fefaasoaai i le tasi ma le isi mea na latou mauaina.

E tele faamoemoega e galue ai le Agaga Paia ma e iai ni matafaioi eseese. Faitau ia seti o mau nei, ma vaavaai mo matafaioi taua e lua a le Agaga Paia.

• Matafaioi 1: 2 Nifae 26:12–13; 3 Nifae 28:11

• Matafaioi 2: 1 Nifae 10:19; Moronae 10:4–5

• O le a se mea na e mauaina?

Faitau le saunoaga lenei a Elder Quentin L. Cook o le Korama a Aposetolo e Toasefululua:

O le Agaga Paia o le na te faaali mai ma o le molimau mai i upumoni uma, aemaise le moni o le Faaola. A aunoa ma le Agaga Paia, e le mafai ona tatou iloa moni o Iesu o le Keriso. O lana matafaioi taua tele o le molimau mai lea i le Tama ma le Alo ma o La faalagiga ma lo La mamalu. (Quentin L. Cook, “O Le Faamanuiaga o Faaaliga Faifai Pea i Perofeta ma Faaaliga Faaletagata Lava Ia e Taiala ai o Tatou Olaga,” Liahona, Me 2020, 98)

• O a upumoni e mafai ona faailoa mai i mau sa e suesueina ma le saunoaga a Elder Cook?

O se tasi o upumoni taua atonu na e faailoa maia e faapea o le Agaga Paia e aoao mai upumoni ma molimau atu i le Tama Faalelagi ma Iesu Keriso.

Mafaufau e tusifaamaumau lenei upumoni po o ni upumoni talitutusa i totonu o au tusitusiga paia po o lau api talaaga mo suesuega. O le tusifaamaumauina e le aunoa o upumoni e mafai ona faamalosia ai lou manatuaga faaleagaga ma faatagaina ai le Agaga Paia e faamanatu mai ia te oe pe a manaomia (tagai Ioane 14:26).

• E faapefea e le malamalama i nei matafaioi e lua a le Agaga Paia ona manuia ai lou olaga?

Mafaufau loloto le leoa i soo se aafiaga atonu na e oo i ai ma le Agaga Paia ma le ala na e maitauina ai le galue o le Agaga Paia i lou olaga.

O nisi tamaiti aoga atonu e le mafai ona mafaufau i se tali i fesili nei. Afai e manaomia, faamanatu atu ia i latou afai e malamalama upumoni o le talalelei i o latou mafaufau ma lagona le lelei i o latou loto, o lona uiga o loo molimau mai le Agaga Paia i le upumoni. E masani lava, pe a lagona e se tagata le uunaiga e faailoga se fuaiupu o se mau, ua musuia ia e le Agaga.

Mafaufau e valaaulia tamaiti aoga e fai ni fesili e uiga i le Agaga Paia.

• Na faapefea ona fesoasoani le Agaga Paia ia e lagona le latalata atili i le Tama Faalelagi ma Iesu Keriso?

• O anafea na e lagonaina ai le Agaga Paia o molimau mai i le upumoni?

• O le a se mea e tatau ona e faia pe afai e te le lagonaina na i ai ni ou aafiaga ma le Agaga Paia?

Lagonaina ma le valaauliaina o le Agaga Paia

E mafai ona fesootai mai le Agaga Paia ia i tatou i le tele o auala. E mafai e le Agaga ona faamalamalamaina lou mafaufau, fesoasoani ia te oe ia maua le filemu ma le olioli, ma taitai oe e fai le mea sao (tagai Mataupu Faavae ma Feagaiga 11:12–13; Kalatia 5:22–23). E masani ona faamatalaina e tusitusiga paia Lana faatosinaga o se “leo filemu itiiti” lea tatou te “lagonaina” (tagai 1 Nifae 17:45).

Na faasoa mai e Elder Ronald A. Rasband o le Korama a Aposetolo e Toasefululua nisi o auala e mafai ona fesootai mai ai le Agaga Paia ia i tatou:

O lo’u aafiaga masani o i ai e faapea e tele lava ina fesootai mai le Agaga o se faalogona. “E te lagonaina i upu e te masani ai, e iai se uiga ia te oe, lea e uunaia oe. …

… E tautala mai le Agaga i upu ia tatou te lagonaina. O nei faalogona e mālū, o se uunaiga ia faatino, ia faia se mea, ia fai atu se upu, ia tali atu i se auala faapitoa. Afai tatou te faasamasamanoa pe faaleamanaia i la tatou tapuaiga, tosoese atu ma faagaseina e le gauai atu i mea faalelalolagi, o le a tatou mauaina i tatou lava ua faaitiitia lo tatou gafatia e lagonaina. (Ronald A. Rasband, “Agaga e Taitai Mai,” Liahona, Me 2017, 94)

Afai e maua, matamata le vitio “Feeling the Holy Ghost” (3:17), o loo maua i le ChurchofJesusChrist.org, e aoao atili ai e uiga i le auala e mafai ai e le Agaga Paia ona fesootai ma oe.

A le o o latou lava aafiaga, o aafiaga o isi, po o aafiaga a i latou atonu na latou faitau i ai i tusitusiga paia, e toatele tagata aoga o le a aoaoina ni auala eseese e faatosinaina ai e le Agaga Paia se tasi. Mafaufau e valaaulia tamaiti aoga e faasoa mai nisi o nei mea ma lisi i luga o le laupapa.

Afai e manaomia e tagata aoga se fesoasoani e malamalama ai i le ala e fesootai mai ai le Agaga Paia, e mafai ona e faasino i le gaoioiga o loo i le itulau e 102 o le Tala’i La’u Talalelei: O Se Taiala mo le Galuega Faafaifeautalai (2019).

Uunaia le vasega e gauai atu i o latou manatu ma lagona i le taimi o le seminare ma a o suesueina le talalelei i le aiga.

• O a nisi auala na e lagonaina ai le faatosinaga a le Agaga Paia?

• E mafai faapefea e le iloaina o le taimi e te lagonaina ai le Agaga Paia ona avea ma se faamanuiaga i lou olaga?

O loo i ai i tusitusiga paia le tele o faataitaiga o tagata taitoatasi o e sa saili ma le filiga i le uunaiga a le Agaga Paia. O Nifae ma atalii o Mosaea i le Tusi a Mamona o nisi ia o i latou.

Faitau le 1 Nifae 2:16–17 ma le Alema 17:2–3, vaavaai mo faatinoga amiotonu na valaaulia ai le Agaga Paia.

A o tali mai tagata aoga i le fesili lenei, mafaufau pe i ai se tasi o nei manatu o le a fesoasoani pe a ta’ua: (1) taumafai ia usiusitai i poloaiga, (2) salamo i mea sese, (3) tatalo mo le taitaiga, (4) auai ma le mataalia, ma le (5) tusifaamaumauina o uunaiga. E mafai ona tatou iloa le Agaga Paia e ala i lagona e mafai ona aofia ai le alofa, olioli, filemu, lotomaualalo, lotofaafetai, migao, faamautinoaga, uunaiga, ma le mafanafana (tagai Kalatia 5:22–23; Mataupu Faavae ma Feagaiga 9:8–9).

• E faavae i nei fuaiupu ma ou lava manatu, o a nisi o auala e mafai ona tatou valaaulia ai le Agaga Paia i o tatou olaga?

Fai se fuafuaga e valaaulia lelei atili ai ma aoao ai mai le Agaga Paia a o e suesue i le talalelei i le seminare, i le aiga, ma i le Ekalesia. Ia aofia ai ni auala patino e mafai ona e valaaulia ai le Agaga Paia i lou olaga ma mea e mafai ona e faia e iloa ai le uunaiga a le Agaga i lou olaga.

Mafaufau e faasoa atu lau fuafuaga i se tagata faatuatuaina o le aiga po o se uo, ma talanoaina soo lou alualu i luma faatasi ma ia.

Manatu ma Talaaga o Faamatalaga

E faapefea ona ou saunia au lava ia maua ma mulimuli i le taitaiga mai le Agaga Paia?

Na aoao mai e Elder Quentin L. Cook o le Korama a Aposetolo e Toasefululua nisi o auala e mafai ona tatou saunia ai i tatou lava e maua faaaliga faaletagata lava ia e ala i le Agaga Paia. Matamata le vitio “The Blessing of Continuing Revelation to Prophets and Personal Revelation to Guide Our Lives” (14:10) mai le faailotaimi 10:08 i le 11:42.

Ua aoao mai Elder Cook e faapea o loo faaauau pea e perofeta ona maua faaaliga e taitai ai le Ekalesia ma e mafai ona tatou maua faaaliga e taitai ai o tatou olaga.

E faapefea ona ou iloa pe o o’u lagonaina le Agaga pe ua na o ni mafaufauga ma ni lagona?

Aoao mai ia Elder David A. Bednar o le Korama a Aposetolo e Toasefululua ma Sister Susan Bednar a o la faamalamalama mai le ala e lagona ma iloa ai le Agaga Paia. Maimoa le vitio “Elder and Sister Bednar—Recognizing the Spirit” (8:12).

Ae faapefea pe afai e leai so’u lotomautinoa i lo’u gafatia e aoao ai mai le Agaga Paia?

Na saunoa mai Elder Richard G. Scott (1928–2015) o le Korama a Aposetolo e Toasefululua:

O le mea atonu e muai foliga mai o se galuega fita tele o le a sili atu ona faigofie ona taulimaina i le aluga o taimi a o e taumafai pea lava pea ia iloa ma mulimuli i lagona e uunaia e le Agaga. O lou lotomautinoa i le taitaiga e te maua mai le Agaga Paia o le a atili foi ona malosi. Ou te molimau atu a o e mauaina le poto masani ma le manuia e ala i le taitaiga a le Agaga, o lou lotomautinoa i uunaiga e te lagonaina e mafai ona sili atu ona mautinoa nai lo lou faalagolago i mea e te vaai pe faalogo i ai. (Richard G. Scott, “To Acquire Spiritual Guidance,” Liahona, Nov. 2009, 7)

O a nisi auala e mafai ona fesoasoani mai ai le Agaga Paia ia te a’u?

Sa aoao mai Peresitene Ezra Taft Benson (1899–1994):

Tatalo i le Tama Faalelagi e faamanuia oe i Lona Agaga i taimi uma. E masani ona tatou ta’ua le Agaga o le Agaga Paia. O le Agaga Paia o se meaalofa foi mai le Tama Faalelagi. E fesoasoani le Agaga Paia ia te oe e filifili le mea tonu. O le a puipuia oe e le Agaga Paia mai le leaga. E musumusu atu o Ia ia te oe i se leo filemu ma le itiiti e fai le mea tonu. Pe a e faia mea lelei, e te maua lagona lelei, ma o le Agaga Paia lena o loo talanoa atu ia te oe. O Le Agaga Paia o se soa ofoofogia. E iai pea o Ia iina e fesoasoani ia te oe. (Ezra Taft Benson, “To the Children of the Church,” Liahona, Me 1989, 82)

Gaoioiga Faaopoopo e Aoao Ai

O le motu o tagata i Nuumau

Mafaufau e faitau le 3 Nifae 11:1–8, ma vaavaai mo mea na faia e tagata i le laueleele o Nuumau e fesoasoani ai ia i latou e faalogo ma malamalama i le siufofoga o le Atua. Talanoaina mea e mafai ona tatou aoao mai a latou faataitaiga e faatatau i le valaauliaina ma le iloaina o le Agaga Paia.