Faatomuaga o Anomea

Suesueina o Tusitusiga Paia

Pipiimau i le Afioga a le Atua

E tulaga ese tusitusiga paia i o latou gafatia e faaloloto ai le faatuatua ma le alofa i le Tama Faalelagi ma Iesu Keriso. O suesuega faifai pea ma anoa e valaaulia ai le faatuatua ma faamalosia ai o tatou olaga i aso taitasi. O le faamoemoega o lenei lesona o le faateleina lea o lou naunau ma le tomai e suesue ai i tusitusiga paia i aso taitasi ma maua faamanuiaga folafolaina e o faatasi ma le suesueina o tusitusiga paia.

Uunaia ai o se uiga masani o le suesue i tusitusiga paia i aso taitasi. E laiti ni mea o le a i ai se aafiaga mamana ma tumau mo le manuia i olaga o tamaiti aoga nai lo o le fesoasoani ia i latou e aoao ia fiafia i tusitusiga paia ma suesue i ai i aso taitasi. O se tasi auala e faia ai lenei mea o le talanoaina lea ma tamaiti aoga o meaaogā ma faamanuiaga o le suesueina o tusitusiga paia, faaletagata lava ia i aso taitasi.

Sauniuniga a le tamaitiiti aoga: Tuu atu i tamaiti aoga le pepa e tufa atu o le “Iloiloga o le Suesueina o Tusitusiga Paia” mai lenei lesona e ave i le fale ma faatumu. Mafaufau e valaaulia tamaiti aoga e fai atu i tagata o le aiga e latou te tali foi i fesili ma talanoaina faatasi a latou tali.

Gaoioiga e Ono Mafai Ona Aoao Ai

Suesueina o tusitusiga paia i aso taitasi

Ina ia fesoasoani i tamaiti aoga ia iloa le taua o taumafaiga faifai pea i le aluga o taimi i le suesueina o tusitusiga paia, mafaufau e valaaulia se tamaititi aoga e lagona le toamalie e fai ni faamalositino push-ups e sau i luma o le vasega ma faataitai. A uma ona ia faia, mafaufau e fesili atu, “Ua sili atu le malosi o le tamaitiiti aoga i le taimi nei ina ua uma ona ia faia ni push-ups? Aisea pe aisea foi e leai ai?

Afai e manao se tagata ia sili atu le malosi e ala i le faia o ni push-ups, o le a se mea e tatau ona ia faia? O le a le umi e mafai ai ona vaaia lea o se malosi faasili mataina? O a ni luitau e ono mafai ona faatoilalo e se tagata?

• E faapefea ona fesootai lenei faataitaiga i le suesueina o tusitusiga paia?

Faitau saunoaga nei mai ia Peresitene Thomas S. Monson (1927–2018) ma Julie B. Beck, sa avea ma Fesoasoani Muamua i le Au Peresitene Aoao o Tamaitai Talavou, ma toe iloilo mea na laua aoao mai e uiga i le suesueina o tusitusiga paia:

O le faaaluina o le taimi i aso taitasi i le suesueina o tusitusiga paia, o le a le masalomia le faamalolosia ai o faavae o lo tatou faatuatua ma molimau o le upumoni. (Thomas S. Monson, “Le Faavae Malosi,” Liahona, Nov. 2006, 68)

E ui ou te le’i lelei atoatoa ai, … ou te faafetai ua ou amataina se mausa o le faitauina [o tusitusiga paia] i lo’u olaga atoa. O le a le mafai ona aoaoina lesona o loo i ai i tusitusiga paia, i le na o le faatasi ona faitau, pe e ala i le suesueina o ia fuaiupu filifilia i se vasega. (Julie B. Beck, “E Fiafia Lo’u Agaga i Tusi Paia,” Liahona, Me 2004, 107)

• O le a se mea sa e mauaina?

Mafaufau e faaali atu lenei iloiloga faaletagata lava ia i le suesueina o tusitusiga paia ina ia mafai ai e tamaiti aoga ona faauma e i latou lava.

Mafaufau pe o a ni ou lagona e uiga i au suesuega o tusitusiga paia.

Pepa e tufa atu: “Iloiloga o le Suesueina o Tusitusiga Paia”

Tusi Lesona a le Faiaoga o le Tusi a Mamona (2024)—”Suesueina o Tusitusiga Paia”

Faatulaga oe lava i faamatalaga nei i luga o se fua mai le 1 i le 5 (1 e maualalo ma le 5 e maualuga):

• O le suesueina o tusitusiga paia i aso taitasi o se faamuamua mo au.

• Ua ou iloa ma o loo ou faaaoga tomai mo le suesueina o tusitusiga paia (tatalo, mafaufau loloto, vaefaamatalaga, faamatalaga, ma isi mea faapena) e fesoasoani ia te au e malamalama atili ai i tusitusiga paia.

• Ou te malamalama i mea sa ou faitauina i tusitusiga paia.

• O le suesueina o tusitusiga paia e fesoasoani ou te lagona ai le latalata atili atu ia Iesu Keriso.

E mafai ona valaaulia tamaiti aoga e faasoa mai ni luitau atonu o loo latou feagai e faatatau i le suesueina anoa o tusitusiga paia i aso taitasi. Mafaufau e valaaulia tamaiti aoga e faasoa mai ni vaifofo talafeagai i luitau. Fesoasoani i tamaiti aoga ia malamalama e tusa lava po o fea o latou i ai i le iloiloga, e mafai lava ona latou tuputupu ae i lo latou tomai e maua ai faamanuiaga o le suesueina o tusitusiga paia.

© 2023 Puletaofia e le Intellectual Reserve, Inc. Ua taofia aiā tatau uma.

Faamanuiaga mo le suesueina o tusitusiga paia

Faitau fuaiupu nei, ma vaavaai mo faamanuiaga e maua mai le suesueina o tusitusiga paia.

E mafai ona valaaulia tamaiti aoga e tusi faamanuiaga eseese o le suesueina o tusitusiga paia i luga o le laupapa. A o latou tusia, valaaulia i latou e tuu foi se maka faasa’o i autafa o soo se faamanuiaga ua latou mauaina.

• 1 Nifae 15:24

• 2 Nifae 32:3

• Mosaea 1:3–5

• Alema 17:2–3

• Alema 37:8–9

• O a upumoni e fesootai ma le suesueina o tusitusiga paia e mafai ona e faailoa mai i nei fuaiupu?

E mafai e tamaiti aoga ona faailoa mai upumoni e pei, afai tatou te faalogo i le afioga a le Atua, ma pipiimau i ai, Na te faamanuia i tatou ia tetee atu i faaosoosoga ma le leaga (tagai 1 Nifae 15:24); O le a fesoasoani Iesu Keriso ia i tatou ia iloa le mea e fai i o tatou olaga a o tatou taumamafa fiafia i Ana afioga (tagai 2 Nifae 32:3); ma o le suesueina o tusitusiga paia e mafai ona fesoasoani ou te iloa ai ma olioli ia Iesu Keriso (tagai Alema 37:9).

• O fea o nei upumoni po o faamanuiaga ua oo ia te oe?

Mo faamanuiaga faaopoopo e maua mai le suesueina o tusitusiga paia, tagai “Manatu ma Talaaga o Faamatalaga.”

E mafai faapefea ona ou maua ni mea se tele mai le suesueina o tusitusiga paia?

O le fesili lenei e mafai ona talanoaina e tamaiti aoga i ni vaega toalaiti po o ni paga. Mafaufau e valaaulia tamaiti aoga e faasoa mai o latou malamalamaaga. E mafai ona e fai i le vasega e faasoa mai ni faamatalaga faaopoopo e uiga i a latou tali, e pei o le pe faapefea, o anafea, pe aisea foi latou te faaaogaina ai lena faiga.

• O le a se mea e mafai ona fesoasoani i se tagata ia faateleina ai mea na te maua mai ana suesuega o tusitusiga paia?

Faitau le saunoaga lenei a Elder D. Todd Christofferson o le Korama a Aposetolo e Toasefululua ma vaavaai mo ni tomai faaopoopo e mafai ona fesoasoani e suesue ai tusitusiga paia ia sili atu ona aoga.

O se mea lelei i nisi taimi le faitau o se tusi mai tusitusiga paia, mo sina taimi ia maua ai se lagona aoao o lana savali, ae ina ia liua, e tatau ona e manatu mamafa i le tele o le taimi e te faaaluina i tusitusiga paia, nai lo le tele o lau faitau i lena taimi. Ou te iloa o nisi taimi tou te faitauina ai ni nai fuaiupu, ona mafaufau lea i ai, ma toe faitau ma le faaeteete na lava fuaiupu, ma a o outou mafaufau pe o le a le uiga, tou te tatalo mo se malamalama, tuufesilisili i lou mafaufau, ma faatalitali mo ni lagona faaleagaga, ma tusitusi i lalo lagona ma malamalamaaga e oo mai ina ia mafai ai ona outou manatua ma aoao atili ai. O le suesue ai faapea, atonu e le tele ni mataupu po o ni fuaiupu tou te faitauina i se afa itula, ae peitai o le a e tuua ai se avanoa i lou loto mo le upu a le Atua, ma o le a fetalai atu o Ia ia te oe. (D. Todd Christofferson, “Pe a Liua Mai Oe,” Liahona, Me 2004, 11)

• O le a se mea o e vaaia i nei manatu e mafai ona faamanuia ai lou aafiaga i le suesueina o tusitusiga paia?

E mafai e tamaiti aoga ona faaopoopo nisi malamalamaaga i le laupapa e lei tusiaina.

E faaopoopo atu i le tomai o le suesueina o tusitusiga paia lea e sosoo mai ai, o le tele o manatu o tomai o loo tuuina atu i le vaega o “Gaoioiga Faaopoopo e Aoao Ai” o loo i lalo e mafai ona faaaoga.

E mafai ona e valaaulia tamaiti aoga e fai filemu le gaoioiga lenei e i latou lava. Ona vaevae lea o i latou i ni vaega toalaiti po o ni paga e fefaasoaai mea sa latou aoaoina.

Faaalu le isi 5 po o le 10 minute e taumafai ai e faaaoga ia fautuaga na tuuina mai e Elder Christofferson. Faaalu se taimi e mafaufau loloto ai, toe faitau, tatalo, fai ni fesili, ma tusi ni lagona uunaia. O nisi nei o fuaitau o mau e mafai ona e faaaogaina (lagona le saoloto e filifili ni fuaitau eseese o le Tusi a Mamona).

Mosaea 3; Alema 32; 3 Nifae 11

A lava loa le taimi e suesue ai tagata aoga, ona fai lea i ai e faasoa mai mea sa latou aoaoina. Atonu e fesoasoani fesili nei.

• O le a se aafiaga na oo ia te oe i le suesueina ai o tusitusiga paia i lenei auala?

• E mafai faapefea e le suesue i lenei auala ona aafia ai lau suesuega patino o tusitusiga paia?

Fai se sini mo le suesueina o tusitusiga paia

O se tasi o faamoemoega o le seminare o le fesoasoani lea ia te oe ia faalatalata atili atu ia Iesu Keriso e ala i le suesue i tusitusiga paia i aso taitasi. Ina ia fesoasoani ia te oe, o loo i ai se tulaga manaomia o togi a le seminare e faitau ai le tusi o tusitusiga paia o le tausaga lenei ia le itiiti ifo ma le 75 pasene o aso o le kalena o le semesa.

Saili musumusuga e ala i le Agaga Paia e faatu ai se sini o suesuega faaletagata lava ia. Ina ia avea ma fesoasoani, amata i le ofoina atu o se tatalo e saili ai musumusuga mai le Tama Faalelagi. Mafaufau i fesili nei a o e faatuina se sini:

• O le a le taimi ma o fea foi se nofoaga e mafai ona ou suesue ai a’u tusitusiga paia i aso taitasi?

• O le a le tele o le taimi i aso taitasi o le a ou suesue ai?

• O le a se mea e mafai ona ou faia e valaaulia atoatoa ai le Agaga Paia i lo’u aafiaga i le suesueina o tusitusiga paia?

Manatu ma Talaaga o Faamatalaga

O a ni faamanuiaga faaopoopo e mafai ona maua mai i le suesueina o tusitusiga paia?

Na aoao mai Elder D. Todd Christoffferson o le Korama a Aposetolo e Toasefululua:

I le iuga, o le faamoemoega tutotonu o tusitusiga paia uma o le faatumuina lea o o tatou agaga i le faatuatua i le Atua le Tama, ma Lona Alo o Iesu Keriso. (D. Todd Christofferson, “O Le Faamanuiaga o Tusitusiga Paia,” Liahona, Me 2010, 34)

Na aoao mai Peresitene Russell M. Nelson:

O le faatofuina i aso taitasi i le afioga a le Atua e taua tele mo le ola faaleagaga, aemaise lava i nei aso o le faatupulaia o suiga faigata. Pe a tatou taumamafa i afioga a Keriso i aso taitasi, o le a ta’u mai e afioga a Keriso ia i tatou le auala e tali atu ai i faigata tatou te le’i mafaufauina o le a tatou fetaia’i. (Russell M. Nelson, “Faalogo ia te Ia,” Liahona, Me 2020, 89)

Maimoa le vitio “Scriptures Legacy” mai le faailotaimi 4:51 i le 6:24 ma le 13:00 i le 15:24. O loo faapupula mai ai le ositaulaga na faia mo tusitusiga paia ina ia oo mai ai, ma le ala latou te faamanuiaina ai olaga. O loo maua lenei vitio i le ChurchofJesusChrist.org.

Gaoioiga Faaopoopo e Aoao Ai

Faaaofiaina o le tatalo i le suesueina o tusitusiga paia

Fesoasoani i tamaiti aoga ia malamalama i auala eseese e mafai ona faaaoga ai le tatalo e faaleleia ai le suesueina o tusitusiga paia. Mafaufau e fai atu fesili nei:

• O le a se mea e mafai ona e ono tatalo ai i le amataga ma i le taimi o le suesueina o tusitusiga paia?

Mafaufau e faasoa atu le saunoaga lenei a Peresitene Howard W. Hunter (1907–95): ”E leai se isi mea e sili atu ona aoga nai lo le tatalo e tatala ai lo tatou malamalama i tusitusiga paia. O le tatalo e mafai ai ona tatou fetuunai o tatou mafaufau e saili tali i a tatou sailiiliga” (“Reading the Scriptures,” Ensign, Nov. 1979, 64).

Mafaufau loloto

Atonu e te manao e fesoasoani i tamaiti aoga ia malamalama o le mafaufau loloto i le afioga a le Atua e mafai ona taitai atu ai i faaaliga faaletagata lava ia. O fuaitau nei e fesoasoani e faapupula ai lenei upumoni: 1 Nifae 11:1; Helamana 10:2–3; Mataupu Faavae ma Feagaiga 76:19; Mataupu Faavae ma Feagaiga 138:1, 11. Mafaufau i fesili nei mo talanoaga:

• Aisea e te manatu ai o le mafaufau loloto e mafai ona taitai atu ai i faaaliga faaletagata lava ia?

• Mata o le a se mea e mafaufau loloto i ai se tagata a o suesue i tusitusiga paia?

• E faapefea ona e faatagaina lenei tomai e faamanuia atoatoa atili ai au suesuega?

Vaavaai mo mataupu faavae

O le fesoasoani i tamaiti aoga e faailoa mataupu faavae e mafai ona fesoasoani e faaleleia atili ai a latou suesuega o tusitusiga paia. Atonu e te manao e faasoa atu lenei faamatalaga i tamaiti aoga e fesoasoani ai ia latou iloa po o a mataupu faavae.

Na saunoa Elder Richard G. Scott (1928-2015) o le Korama a Aposetolo e Toasefululua: “O mataupu faavae o upumoni mama, ua afifi mo le faaaogaina i le tele o tulaga eseese. O se mataupu faavae moni e manino atili ai le faiga o faaiuga e tusa lava po o taotaomia i ni tulaga e sili ona fenumiai ma fai faamalosi” (“Mauaina o le Malamalama Faaleagaga,” Ensign, Nov. 1993, 86).

Faaaogaina o vaefaamatalaga

O se tasi auala e mafai ai e tamaiti aoga ona maua se suesuega faagaeetia o tusitusiga paia o le faaaogaina lea o vaefaamatalaga. O loo i ai mau faasino i isi fuaiupu po o meafaigaluega faaopoopo e fesoasoani ai i tamaiti aoga ia malamalama atili i mea o loo latou faitauina.

Mafaufau e tuu atu i tamaiti aoga se avanoa e faataitai ai e ala i le faaali atu o se faataitaiga lea na fesoasoani ai vaefaamatalaga e faaloloto ai le malamalama.