Faatomuaga o Anomea

Aoaoina e ala i le Faatuatua

O Le Matafaioi a le Tagata Aoao

E alolofa le Tama Faalelagi ma Iesu Keriso ia te oe ma e finagalo e aoao atu ia te oe le talalelei e ala i le mana o le Agaga Paia. O le a se mea e mafai ona e faia e maua atili ai mea ua La naunau e aoao atu ia te oe? O lenei lesona e mafai ona fesoasoani ia te oe e maua ai le tele o mea mai lou aafiaga i le seminare e ala i le malamalama ai i le uiga o le aoao e ala i le faatuatua ia Iesu Keriso.

O le faia o se matafaioi mataalia i le aoaoina faaleagaga. O le aoaoina o le talalelei lea na te uunaia le liua e manaomia ai taumafaiga faifai pea i le vaega a le tagata aoao. Fesoasoani i au tamaiti aoga ia iloa le taua o le faia o se matafaioi mataalia i le faagasologa o le aoao atu ma le aoaoina mai.

Sauniuniga a le tamaitiiti aoga: Valaaulia tamaiti aoga e faitau parakalafa 1–2 i le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae (2022) ma saunia e faasoa mai mea e mafai ona tatou faia e aoao ai upumoni faaleagaga.

Gaoioiga e Ono Mafai Ona Aoao Ai

E fiafia le Alii i taumafaiga

Mafaufau e tusi le faamatalaga lenei i luga o le laupapa mo le silafia e tamaiti aoga. Atonu e te manao i tamaiti aoga e matamata i le vitio “An Especially Noble Calling,” o loo maua i le ChurchofJesusChrist.org, mai le faailotaimi 2:16–3:49 pe fai i ai e faitau le faamatalaga o loo i lalo.

Na aoao mai Peresitene Russell M. Nelson:

E fiafia le Alii i taumafaiga, aua o taumafaiga e aumaia ai taui lea e le mafai ona oo mai e aunoa [ma taumafaiga]. (Russell M. Nelson, i le Joy D. Jones, “O Se Valaauga e Faapitoa Lona Tamalii,” Liahona, Me 2020, 16)

• E faapefea ona tatou faaaogaina le saunoaga a Peresitene Nelson i o tatou olaga? Mo se faataitaiga, e faapefea ona faatatau i le galuega faafaifeautalai, auaunaga, po o le mauaina o se aoaoga?

• O le a sou manatu e faapefea ona faatatau i le aoaoina o le talalelei a Iesu Keriso i le seminare i lenei tausaga?

Mafaufau e faaali atu parakalafa ma fesili nei mo tamaiti aoga e iloilo leleoa e le tagata lava ia.

Ina ia fesoasoani ia te oe e iloilo lou lava aoaoina i le talalelei, mafaufau e uiga i fesili nei:

• O a ni taumafaiga o loo e faia i le taimi nei e aoao ai le talalelei a Iesu Keriso? Na faapefea ona e valaauliaina le Atua e aoao ia te oe?

• O e lagonaina o loo e mauaina taunuuga e te manao ai ma manaomia? Aisea pe aisea foi e leai ai?

A o e suesue i lenei lesona, mafaufau e uiga i auala e te manao e aoao ma tuputupu ae ai i lenei tausaga i le seminare. Saili le taitaiga a le Tama Faalelagi e ala i le Agaga Paia e fesoasoani ia te oe ia iloa le auala e faaaoga ai lenei lesona i lou olaga.

Aoaoga o le Tusi a Mamona

Faitau ia le itiiti ifo ma le lua o fuaitau nei o le atamai i aoaoga faavae, ma vaavaai pe faapefea e a tatou lava taumafaiga ma manaoga ona faatino se matafaioi ma le ala e faatino ai e le Atua se matafaioi i lo tatou aoaoina o le talalelei.

E mafai ona galulue tamaiti aoga i ni vaega toalaiti, ma faitau taitoatasi e tamaiti aoga fuaitau eseese ma faasoa mai mea latou te aoaoina i a latou vaega.

Mafaufau e tusi ulutala “O A Tatou Taumafaiga” ma le “Matafaioi a le Atua” i luga o le laupapa ma valaaulia tamaiti aoga e tusi mea latou te maua i lalo o le ulutala talafeagai. Uunaia i latou e faasoa i le vasega auiliiliga e uiga i mea na latou tusia.

• 2 Nifae 28:30

• 2 Nifae 32:3

• 2 Nifae 32:8-9

• Eteru 12:6

• Moronae 10:4-5

• O le a se mea na e maua e mafai ona fesoasoani ia te oe e aoao atili ai mai le Atua i le taimi o le seminare?

• O le a sou manatu o le a le taunuuga pe afai e faamoemoe se tasi e tuu atu e le Atua ia i latou le malamalama ae lei faia sa latou lava taumafaiga? Pe afai foi sa latou faia se taumafaiga ae latou te lei sailia le fesoasoani a le Atua? Aisea?

E faavae i mea na e suesueina i le asō, aotele i se fuaiupu se tasi mea ua e malamalama i ai e uiga i le aoaoina o le talalelei.

Mafaufau e valaaulia tamaiti aoga e faasoa mai a latou fuaiupu o aotelega ma le vasega. E mafai ona faailoa mai e tamaiti aoga ni upumoni se tele, e pei o nei:

• O le a aoao i tatou e le Atua i lea fuaitau i luga o lea fuaitau pe afai tatou te mananao e aoao mai ia te Ia.

• E tatau ona tatou naunau e suesue ma tatalo ma le faatuatua ia Iesu Keriso pe afai tatou te mananao ia iloa le upumoni.

Faafetai atu i tamaiti aoga mo o latou manatu faaalia, ma faamautinoa atu ia i latou o mea na latou faasoa mai e saofagā i le aoaoina o tagata uma. E mafai ona fesoasoani lenei mea e faaosofia ai isi tamaiti aoga e faasoa ma fatuina se siosiomaga o le auai.

E mafai e le seminare ona suia lou olaga?

Mafaufau e matamata tamaiti aoga i le “Seminary Can Change Lives” (4:14), o loo maua i le ChurchofJesusChrist.org. Fai i tamaiti aoga e mafaufau e uiga i mafuaaga talafeagai na faaigoa ai vitio “Seminary Can Change Lives” nai lo le “Seminary Will Change Your Life.” Valaaulia tamaiti aoga e faasoa mai o latou manatu pe a uma le vitio.

Faitau le saunoaga lenei a Peresitene Russell M. Nelson, ma vaavaai mo mea o le a fesoasoani e iloa ai pe o le a suia lou olaga e le seminare.

O le tele o lou mulimuli i faataitaiga a Iesu Keriso, o le tele foi lea o lou manuia.

O le ā, le mea, o le a fesoasoani ia te oe ia avea ai o se soo moni o Iesu Keriso? O se tasi o tali o le seminare ma le inisitituti—e le na o le auai ae ia auai ma le mataalia i vasega ma mulimuli ma le faamaoni i soo se galuega atofa e tuuina atu. …

O le faauu mai i le seminare ma le inisitituti o le a faateleina ai lou gafatia e faaeaina ai i mea aupito taua o le a e faia i le olaga. O le a fai mo oe le olioli moni! (Russell M. Nelson, “O se Valaaulia Patino e Auai i le Seminare ma le Inisitituti,” Fep. 2019, ChurchofJesusChrist.org)

• O le a se mea e tulaga ese ia te oe mai le saunoaga a Peresitene Nelson? Aisea?

• E faapefea ona e taulai atu i le mulimuli ia Iesu Keriso i le taimi o lou aafiaga i le seminare?

• O le a sou manatu i le uiga o le “auai atoatoa” i le seminare?

Valaaulia tamaiti aoga e talanoaina ni auala patino e auai atoatoa ai i le seminare. Fesoasoani ia latou malamalama o tamaiti aoga e eseese o latou uiga ma tulaga e mafai ona auai atoatoa i auala eseese. Mo se faataitaiga, e faapefea e se tamaitiiti aoga matamuli ma se tamaitiiti aoga tiotio ona auai ma le mataalia i a latou lava auala?

Auala e maua ai le tele o mea aoga mai le seminare

Mo le gaoioiga lenei, mafaufau e faaali atu le ata lenei po o se isi ata o se alii talavou o loo i le seminare. Valaaulia tamaiti aoga e faia le tulaga ia sili atu ona lagona e moni e ala i le tuuina atu i le alii talavou o se igoa ma faamatala ona uiga, o lona talaaga o le talalelei, o ona lagona e uiga i le seminare, ma isi mea faapena. Ona valaaulia lea o tamaiti aoga e tusi ia latou api talaaga mo suesuega le fautuaga latou te tuuina atu i lenei alii talavou a o lei faasoaina atu a latou fautuaga i le vasega.

Mafaufau faapea o le alii talavou o loo i lenei ata o loo auai i le seminare mo le taimi muamua. E manao o ia e aoao ma tuputupu a’e faaleagaga ae e le o mautinoa pe faapefea ona fai. E faavae i mea ua e aoaoina i le asō ma lou aafiaga ua tuanai i le seminare ma le lotu, tusifaamaumau le fautuaga o le a e tuuina atu ia te ia.

Ia mautinoa e aofia ai

• mea e mafai ona ia faia a o le’i amataina, i le taimi o faagasolo, ma pe a maea le vasega e faalautele ai lona aoaoina faaleagaga

• le ala na te taulai atu ai i le mulimuli i le Faaola ma valaaulia le Agaga Paia e aoao ia te ia

• o faatinoga po o uiga e mafai ona faafaigofie ai pe sili atu ona faafaigata ona aoao ai faaleagaga, mo ia faapea ma isi i le vasega.

A o faasoa mai e tamaiti aoga a latou fautuaga, mafaufau e fesoasoani ia i latou ia iloa le taua o le saunia o o latou loto ma mafaufau e aoao ai a o lei amataina le vasega. E mafai ona e fesoasoani i tamaiti aoga e faia lenei mea e ala i le tuuina atu o valaaulia ia i latou e saunia ai e faaaoga nisi o fautuaga o le “Sauniuniga a tamaiti aoga” o loo maua i le pito i luga o lesona taitasi. Fesoasoani foi ia i latou ia iloa le taua o le faatinoina o upumoni latou te aoaoina pe a latou tuua le vasega.

Faatu se sini ia tele ni mea aoga e maua mai lou aafiaga i le seminare i lenei tausaga. Ina ia faia lenei mea, e ono mafai ona e taliina fesili nei:

• O le a se mea o e faamoemoe e te maua mai le seminare i lenei tausaga?

• O le a se mea ua e naunau e fai e faaali atu ai i le Alii e te manao e aoao mai ia te Ia ma avea atili e faapei o Ia?

Manatu ma Talaaga o Faamatalaga

O le a se mea e mafai ona ou faia e maua ai ma manatua mea e finagalo le Tama Faalelagi e aoao mai ia te au?

Na faamatala mai e Elder Richard G. Scott (1928–2015) o le Korama a Aposetolo e Toasefululua:

Tusi i lalo i se mea malupuipuia ia mea taua ua e aoaoina mai le Agaga. O le a e iloa ai a o e faamaumauina se uunaiga taua, e masani lava o le a oo mai nisi uunaiga semanu e te le mauaina. Ma le isi, o le malamalama faaleagaga e te maua o le a mafai ona e mauaina i lou olaga atoa. I taimi uma, ao ma le po, po o fea lava e te iai, po o a lava au mea e fai, saili ia iloa ma tali atu i le taitaiga a le Agaga. Ia maua se fasipepa po o se kata e faamaumau ai se taitaiga faapena.

Faailoa atu le lotofaafetai i le Alii mo le taitaiga faaleagaga e te maua ma usitai i ai. O lenei faiga o le a faamalosia ai lou gafatia e aoao e ala i le Agaga. O le a faaleleia atili ai le taitaiga a le Alii i lou olaga. O le a e aoao atili a o e faatinoina ai le malamalama, aafiaga, ma musumusuga e fesootai atu ia te oe e ala i le Agaga Paia. (Richard G. Scott, “How to Learn by the Spirit,” New EraSete. 2014, 48)

Aisea e taua ai lo’u auai i le vasega?

Na aoao mai Elder Richard G. Scott (1928–2015) o le Korama a Aposetolo e Toasefululua:

O le faaiuga a tamaiti aoga e auai o se faatinoga lea o le faitalia e faataga ai le Agaga Paia e fesootai mai se savali patino e fetaui ma o latou lava manaoga taitoatasi. …

O lena auai o le a aumaia ai i o latou olaga [tamaiti aoga] le taitaiga a le Agaga. … O le auai e mafai ai e tagata taitoatasi ona oo i le taitaiina e le Agaga. Latou te aoao ia iloa ma lagona le mea e ta’u o le taitaiga faaleagaga. (Richard G. Scott, “To Learn and to Teach More Effectively” [Brigham Young University Education Week devotional, Aug. 21, 2007], 4–5, speeches.byu.edu)

Na saunoa Elder David A.Bednar o le Korama a Aposetolo e Toasefululua e faapea:

O le faatuatua moni e taulai atu i le Alii o Iesu Keriso ma e sosoo lava ma le taitaiina atu ai pea lava i faatinoga. …

 O le aoao e ala i le faatuatua e manaomia ai uunaiga faaleagaga, o le mafaufau, ma le faaletino ae le tau lava ina faaleano iai.… O le faamaoni a’ia’i ma le ogatasi o a tatou faatinoga musuia i le faatuatua, e faailoa atu ai i lo tatou Tama Faalelagi ma Lona Alo o Iesu Keriso lo tatou naunautai e aoao ma talia faatonuga po o aoaoga mai le Agaga Paia. (David A. Bednar, “Saili e Aoao e Ala i le Faatuatua,” Liahona, Sete. 2007, 63–64)

Maimoa le vitio “1.3.3 Spiritual Learning Requires Effort,” o loo maua i le ChurchofJesusChrist.org, mai le faailotaimi 0:00 i le 2:13. Vaavaai mo mea na aoao mai e Elder Bednar e uiga i le taua o le auai atoatoa i le vasega.

Gaoioiga Faaopoopo e Aoao Ai

O se isi gaoioiga e mafai ona amata ai

Ina ia amataina le lesona, mafaufau e valaaulia se tamaititi aoga po o le vasega atoa e fai se mea o le a manaomia ai sina taumafaiga itiiti e faamaea ai—mo se faataitaiga, aumaia o se mea e le mafai ona au iai pe tali se tupua po o se paso lea o le a manaomia ai sina taimi e mafaufau ai. Ofo atu se taui laitiiti ia i latou o e faia le taumafaiga e faamaea le gaoioiga. Ona faaali atu lea o le saunoaga a Peresitene Nelson e uiga i taumafaiga, o loo maua i le amataga o le lesona.

Pepa Autu o le Atamai i Aoaoga Faavae

Valaaulia tamaiti aoga e faitau parakalafa 1–2 o le “Mauaina o le Malamalama Faaleagaga” i le vaega o le Pepa Autu o le Atamai i Aoaoga Faavae (2022). Fai atu ia i latou e maka upu taitasi po o fasifuaitau o loo faamatala ai mea ua faamoemoeina i tatou e aoao ai faaleagaga. Ona fai atu lea ia i latou e maka i se auala e ese mai ai upu po o fasifuaitau taitasi o loo faamatala ai le matafaioi a le Atua i lo tatou aoaoina.

O se isi gaoioiga e mafai ona faaiuina ai

Valaaulia tamaiti aoga e tusi se tusi ia i latou lava, tuu i totonu o se teutusi ua faamauina, ma tuuina mai. Faailoa atu ia i latou o le a le faitauina le tusi ae o le a toe faafoi atu ia i latou i se taimi mulimuli ane i le semesa e fesoasoani ia i latou e fuaina ai lo latou lava alualu i luma. Valaaulia i latou e faaaofia i totonu o le tusi mea latou te faamoemoe e aoao ma lagonaina i le seminare ma mea latou te naunau e fai a o lei amataina, i le taimi faagasologa, ma pe a uma le vasega e faaali atu ai i le Atua latou te mananao e aoao mai ia te Ia ma avea atili e faapei o Ia.