Faatomuaga o Anomea

Vaaiga Aoao

I lenei tausaga i le seminare, o le a e suesueina ai le Tusi a Mamona. O nei lesona o le a fesoasoani e te malamalama atili ai i le taua o le fuafuaga a le Tama Faalelagi ma faaleleia atili ai lou tomai e suesue i tusitusiga paia i aso taitasi. O le a e aoao ai foi i auala e faailoa ai matafaioi autu a le Agaga Paia, le auala e faatino ai i le faatuatua ia Iesu Keriso a o e sailia tali i au fesili, ma le auala e sili ona e maua ai se aoga tele mai ou aafiaga o le seminare.

Saunia e Aoao Atu

O nei faamatalaga e tuuina atu ai i faiaoga ni manatu o mea atonu e manaomia ona muai saunia mo lesona taitasi. Manatua: O nisi po o lesona uma nei e mafai ona aoao atu i le amataga o se tausaga aoga po o se isi taimi o le a manuia ai tamaiti aoga.

O Le Fuafuaga o le Faaolataga

Faamoemoega o le lesona: O lenei lesona e mafai ona fesoasoani ai i tamaiti aoga ia malamalama ma lagona le taua o le fuafuaga a le Tama Faalelagi.

• Sauniuniga a le tamaitiiti aoga: Valaaulia tamaiti aoga e mafaufau e uiga i se mea latou te lagona e le mafai ona latou ola e aunoa ma le i ai o lena mea ma ia saunia e faamatala mai pe aisea. E mafai foi ona latou aumaia lena mea po o se ata i le vasega, pe a talafeagai ai.

• Anotusi e faaali atu: O fesili o loo taliina e le Tusi a Mamona (lisiina i luga o le laupapa, tusia i luga o ni fasipepa ma tuu i luga o puipui, pe faaalia foi i se isi auala)

• Fautuaga faafaiaoga faavitio: Faaali atu fesili o loo taliina e le Tusi a Mamona. Valaaulia tamaiti aoga e faailoa mai pe o le fea fesili e sili ona latou fiafia e aoao i ai. Vaevae i ni vaega toalaiti ma taapeape i ni potu mo fesili taitasi ina ia mafai ai e tamaiti aoga ona talanoaina mea latou te aoaoina faatasi, ma tuuina atu iai se taimi faatapulaa. A uma le taimi, faamae’a vaega mai potu taitasi ina ia mafai e tamaiti aoga ona talanoaina ma le vasega atoa mea sa latou aoaoina.

Suesueina o Tusitusiga Paia

Faamoemoega o le lesona: O le faamoemoega o lenei lesona o le faateleina lea o le naunau ma le tomai o tamaiti aoga e suesue i tusitusiga paia i aso taitasi ma maua faamanuiaga folafolaina e o faatasi ma le suesueina o tusitusiga paia.

• Sauniuniga a le tamaitiiti aoga: Tuu atu i tamaiti aoga le pepa e tufa atu o le “Iloiloga o le Suesueina o Tusitusiga Paia” mai lenei lesona e ave i le fale ma faatumu. Mafaufau e valaaulia tamaiti aoga e fai atu i tagata o le aiga latou te tali foi i fesili ma talanoaina faatasi a latou tali.

• Pepa e tufa atu: “Iloiloga o le Suesueina o Tusitusiga Paia”

Aoaoina e ala i le Agaga

Faamoemoega o le lesona: O lenei lesona e mafai ona fesoasoani i tagata aoga e faailoa mai matafaioi autu a le Agaga Paia, ia e taua mo lo latou tuputupu a’e faaleagaga ma le alualu i luma.

• Sauniuniga a le tamaitiiti aoga: Valaaulia tamaiti aoga e mafaufau i aafiaga na latou lagonaina ai le uunaiga a le Agaga Paia. Uunaia i latou e taulai atu i mafaufauga, lagona, po o uunaiga na o mai faatasi ma aafiaga ma o mai saunia i le vasega e faasoa mai.

• Ata po o le mea faitino: Ata o ituaiga eseese o masini fesootai, e aofia ai se telefoni feaveai

• Vitio: “Feeling the Holy Ghost” (3:17)

• Fautuaga faafaiaoga faavitio: Pe a talanoaina auala eseese e mafai ona tatou lagonaina ai le Agaga Paia, mafaufau e faaaoga le meafaigaluega o le laupapa paepae po o nisi polokalama e faataga ai tamaiti aoga e lisi ni auala eseese na latou lagonaina ai le Agaga.

Aoaoina e ala i le Faatuatua ia Iesu Keriso

Faamoemoega o le lesona: O lenei lesona e mafai ona fesoasoani i tamaiti aoga e maua ai le tele o mea aoga mai o latou aafiaga i le seminare e ala i le malamalama i le uiga o le aoao e ala i le faatuatua ia Iesu Keriso.

• Sauniuniga a le tamaitiiti aoga: Valaaulia tamaiti aoga e faitau parakalafa 1–2 i le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae (2022) ma saunia e faasoa mai mea e mafai ona tatou faia e aoao ai upumoni faaleagaga.

• O Vitio: “An Especially Noble Calling” (11:25; maimoa mai le faailotaimi 2:16 i le 3:49); “Seminary Can Change Lives” (4:14)

• Anotusi e faaali atu: O le saunoaga a Peresitene Russell M. Nelson i le amataga o le lesona; o se ata o se tamaitiiti aoga i le seminare

• Fautuaga faafaiaoga faavitio: Afai e mafai, mafaufau e valaaulia se tamaitiiti aoga se toatasi pe toalua na faauu talu ai nei mai le seminare e auai i le talanoaga faavitio ma faasoa mai mea na fesoasoani ia i latou e aoao ai le talalelei i le seminare. E mafai foi ona latou faasoa mai mea latou te moomoo maimau pe ana ese lo latou faatinoina pe iloaina foi ina ua latou faatoa amataina lo latou aafiaga i le seminare.

Mauaina o le Malamalama Faaleagaga, Vaega 1

Faamoemoega o le lesona: O lenei lesona e mafai ona fesoasoani i tamaiti aoga e faatino i le faatuatua ia Iesu Keriso a o latou sailia tali i fesili ma atugaluga i o latou olaga.

• Sauniuniga a le tamaitiiti aoga: Valaaulia tamaiti aoga e fesili atu i se tagata o le aiga po o se taitai o le Ekalesia ua faaalia le faatuatua tele ia Iesu Keriso po o le a se mea o ia faia e tumau malosi ai pe a feagai ma fesili po o atugaluga e uiga i le talalelei.

• Vitio: “Act in Faith: The Stonemason” (4:57)

• Anotusi e faaali atu: O mau faasino ma aotelega mai le 1 Nifae mo le mau faasino a tamaiti aoga i le taimi o le gaoioiga suesue

• Fautuaga faafaiaoga faavitio: Mafaufau e valaaulia tagata aoga e palota i se auala e iloagofie i tali taitasi i le fesili “O le a sou manatu o le a le uiga pe afai e i ai ni fesili a se tasi e uiga i le talalelei po o le Ekalesia a Iesu Keriso?” Mo se faataitaiga, e mafai ona latou tapeina a latou meapueata pe afai latou te manatu e mafai ona sa’o le tali ma faaola pea a latou meapueata pe afai latou te manatu e le sa’o le tali. Taofi pe a uma filifiliga taitasi ina ia e fesili atu i nisi o tamaiti aoga pe aisea na latou palota ai i le ala na latou faia ai. Fesoasoani ia latou malamalama o soo se tali e mafai ona sa’o pe le sa’o foi e faalagolago i manaoga ma filifiliga a se tagata.