Ngaahi Peesi Fakafeʻiloaki ʻo e Tohi ʻa Molomoná

Peesi Talamuʻakí

Ko e Taumuʻa ʻo e Tohi ʻa Molomoná

Ko e hā ʻoku tau fiemaʻu ai e Tohi ʻa Molomoná, hili ko iá kuo tau ʻosi maʻu e folofola ‘a e ‘Otuá ‘i he Tohi Tapú? ʻI he peesi talamuʻaki ʻo e Tohi ʻa Molomoná, ʻoku tokoniʻi ai kitautolu ʻe he palōfita ko Molonaí ke mahino kiate kitautolu e ʻuhinga ʻoku fuʻu mahuʻinga ai e Tohi ʻa Molomoná. ʻOku fakataumuʻa ʻa e lēsoni ko ʻení ke tokoni ke mahino kiate koe peá ke fakamatalaʻi ʻa e ngaahi taumuʻa ʻo e Tohi ʻa Molomoná.

Ko Hono Fakaʻaongaʻi e Kaveinga ʻo e Seminelí mo e ʻInisititiuti Fakalotú. Manatuʻi ko “ʻetau taumuʻá ke tokoni ke mahino mo falala ʻa e toʻutupú mo e kakai lalahi kei talavoú ki he ngaahi akonaki mo e Fakalelei ʻa Sīsū Kalaisí, fakafeʻungaʻi kinautolu ke maʻu ʻa e ngaahi tāpuaki ʻo e temipalé, mo teuteuʻi kinautolu, mo honau fāmilí mo e niʻihi kehé ki he moʻui taʻengata mo ʻenau Tamai Hēvaní” (Ko Hono Akoʻi mo Ako ʻo e Ongoongoleleí: Ko ha Tohi Tuʻutuʻuni maʻá e Kau Faiako mo e Kau Taki ʻi he Seminelí mo e ʻInisititiuti Fakalotú [2012],x).

Teuteu ʻa e tokotaha akó: Fakaafeʻi e kau akó ke nau fakalaulauloto ki he ʻuhinga ʻoku toutou fakamamafaʻi mo fakaʻaongaʻi ai e Tohi ʻa Molomoná ‘i he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.

Ngaahi ʻEkitivitī Ako ʻOku Ala Fakahokó

Ko e mahuʻinga hono ʻiloʻi ha taumuʻa ʻo ha meʻa

Fakakaukau ke fakaʻaliʻali ha ngaahi fakatātā ʻo e ngaahi meʻangāue he ʻikai maheni mo e kau akó pe ko hono ʻomi e ngaahi meʻangāue peheé ki he kalasí ke mamata mo ala ki ai e kau akó. Ko e meʻangāue ʻi laló ko ha meʻafua ʻengikale (cross-staff), ʻa ia naʻe fakaʻaongaʻi ʻi he kuonga muʻá ki he folaú.

Kuó ke sio nai ʻi ha meʻangāue hangē ko ia ʻi he fakatātā ko ʻení? Fakakaukauloto ʻokú ke fakamatalaʻi ki ha taha kehe ʻa e taumuʻa mo e mahuʻinga ʻo ha meʻangāue ʻoku ʻikai ke ke maheni mo ia.

• Ko e hā ʻoku tokoni ai ke ʻilo mo mahino e taumuʻa pe mahuʻinga ʻo ha meʻa kimuʻa pea fakaʻaongaʻi pe vahevahe ia mo e niʻihi kehé?

  

  Fakakaukau ke fakaʻaliʻali ha tatau ʻo e Tohi ʻa Molomoná kimuʻa ʻi he fehuʻi hono hokó.

• ʻE fekauʻaki fēfē nai ʻeni mo e mahino ki he taumuʻa mo e mahuʻinga ʻo e Tohi ʻa Molomoná?

Fakakaukau ki he loto-falala te ke ongoʻi ʻi hono fakamatalaʻi ʻa e taumuʻa mo e mahuʻinga ʻo e Tohi ʻa Molomoná ki ha taha naʻe ʻikai ke ne ʻilo ki ai. ʻI hoʻo ako e lēsoni ko ʻení, kumi pe ko e hā e meʻa ʻoku tokoni ke mahino kiate koe ʻa e taumuʻa mo e mahuʻinga ʻo e Tohi ʻa Molomoná pea mo e founga te ke lava ai ʻo vahevahe hoʻo mahinó mo e niʻihi kehé.

Ko e mahino e taumuʻa mo e mahuʻinga ʻo e Tohi ʻa Molomoná

Fakakaukau ke hiki ʻa e sētesi taʻekakato ko ʻení ʻi he palakipoé pea fakaafeʻi e kau akó ke fakakakato ʻa e sētesí ʻaki e meʻa ʻoku nau maʻú.

Naʻe hiki e Tohi ʻa Molomoná ke …

Naʻe hiki e Tohi ʻa Molomoná ke …

ʻOku ʻi he peesi fakataumuʻá e ngaahi lea fakaʻosi naʻe tohi ʻe Molonai ʻi he ‘ū lauʻi peleti koula fakaʻosí. Lau ʻa e peesi talamuʻakí mo e ʻuluaki palakalafi ʻe tolu ʻo e talateu ki he Tohi ʻa Molomoná. Kumi ha ngaahi founga ke fakakakato ai ʻa e sētesi ʻi ʻolungá. ʻE ala tokoni atu e ngaahi fehuʻi ko ʻení ʻi hoʻo fai ʻení.

• Ko hai naʻe hiki ki ai e Tohi ʻa Molomoná?

• ʻOku fekauʻaki e Tohi ʻa Molomoná mo hai?

• Ko e hā naʻe hiki ai e Tohi ʻa Molomoná?

(Ke maʻu ha fakamatala lahi ange, vakai ki he “Ko ha Fakamatala Nounou ʻo kau ki he Ko e Tohi ʻa Molomoná” ʻi he ngaahi peesi talateú.)

Naʻe fakamoʻoniʻi ʻe ʻEletā ʻUlise Soālesi ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e ngaahi taumuʻa ʻo e Tohi ʻa Molomoná.

ʻOku ou fakamoʻoni ko e Tohi ʻa Molomoná ko e meʻangāue ia ʻa e ʻOtuá ki hono fakahoko ʻo e tānaki ʻo ʻIsileli ʻi hotau kuongá mo tokoni ki he kakaí ke nau ʻiloʻi ʻa Hono ʻAlo, ko Sīsū Kalaisí. (Ulisses Soares, “Ko Hono ʻOmi ʻo e Tohi ʻa Molomoná,” Liahona, Mē 2020, 35)

• Ko e hā kuó ke ako mei hoʻo akó pea mo e fakamatala ʻa ʻEletā Soālesi fekauʻaki mo e ngaahi taumuʻa ʻo e Tohi ʻa Molomoná?

Ko e moʻoni ʻe taha mahalo naʻá ke ʻiló naʻe hiki e Tohi ʻa Molomoná ke tokoni ki hono tānaki ʻo ʻIsilelí mo fakalotoʻi e kakai kotoa pē ko Sīsū ʻa e Kalaisí.

• Ko e hā ha fakamoʻoni ʻo e meʻá ni ʻokú ke vakai ki ai ʻi he palakalafi hono ua ʻo e peesi talamuʻakí?

ʻE lava ke tokoni e ongo ʻekitivitī ko ʻení ke fakaloloto e mahino ʻa e kau akó ki he moʻoni ʻoku fakaʻilongaʻi mataʻāʻā ʻi ʻolungá. ʻE lava ke fakahoko e ngaahi ʻekitivitī ko ʻení ʻi ha ngaahi founga kehekehe. Te ke lava ʻo fakaʻaliʻali e ʻekitivitī takitaha maʻá e kau akó pe ʻoange ha tatau ʻo e ʻekitivitī takitaha. ʻE lava ke fili e kau akó ke nau fakahoko ha taha ʻo kinautolu pea nau feakoʻiʻaki leva e meʻa ne nau akó. Te nau lava foki ʻo ngāue tautau toko ua pe fakakulupu iiki ke fakakakato fakatouʻosi e ongo ʻekitivitií.

ʻEkitivitī A: ʻOku fakataumuʻa e Tohi ʻa Molomoná ke tokoni ki hono tānaki fakataha ʻo ʻIsilelí

ʻOku faʻa lave e Tohi ʻa Molomoná ki he fuakava kuo fai ʻe he ʻEikí ke tānaki ʻa ʻIsilelí. Lau ʻa e lea ʻa Palesiteni Lāsolo M. Nalesoni mo ha fakamoʻoni fakafolofola ʻe ua pe tolu ʻi he ngaahi fakamoʻoni fakafolofola ʻi laló.

[ʻI he] hokohoko atu hoʻo lau e Tohi ʻa Molomoná, te ke ʻilo ai ʻa e tokāteline ʻo e tānaki fakatahá, ngaahi moʻoni kau kia Sīsū Kalaisí, ʻEne Fakaleleí, mo e kakato ʻo ʻEne ongoongoleleí ʻa ia ʻoku ʻikai maʻu ʻi he Tohitapú. ʻOku mahuʻinga fau ʻa e Tohi ʻa Molomoná ki he tānaki fakataha ʻo ʻIsilelí. Ko hono moʻoní, kapau naʻe ʻikai ha Tohi ʻa Molomona, he ʻikai hoko ʻa e talaʻofa ki hono tānaki fakataha ʻo ʻIsilelí. (Russell M. Nelson mo Wendy Nelson, “ʻAmanakiʻanga ʻo ʻIsilelí [fakataha lotu fakaemāmani lahi ʻa e toʻu tupú, 3 Sune 2018],” fakalahi ki he New Era mo e Ensign,13 , ChurchofJesusChrist.org)

• 1 Nīfai 15:14–18

• 1 Nīfai 22:11–12

• 2 Nīfai 29:14

• Molomona 9:36–37

• Molonai 10:31

• ʻOkú ke pehē ʻe tokoni fēfē ʻa e Tohi ʻa Molomoná ke tānaki fakataha ʻa ʻIsilelí?

Fakalaulauloto ki he founga kuo tokoniʻi ai koe pe ko e niʻihi kehé ʻe he Tohi ʻa Molomoná ke tānaki ki he Siasi moʻoni ʻo Sīsū Kalaisí. Fakakaukau ke hiki ʻa e ngaahi tāpuaki kuo maʻú koeʻuhí ko e tānaki ko ʻení.

• Naʻe mei kehe fēfē nai hoʻo moʻuí, kapau naʻe ʻikai e Tohi ʻa Molomoná?

• Ko hai te ke lava ʻo vahevahe ki ai e Tohi ʻa Molomoná?

‘Ekitivitī E: Ko e tefitoʻi taumuʻa ʻo e Tohi ʻa Molomoná ke fakalotoa e kakai kotoa pē ko Sīsū ʻa e Kalaisí.

Fakakaukau ki he meʻa ʻokú ke ʻilo fekauʻaki mo Sīsū Kalaisí mo e founga kuo liliu ai ʻe he Tohi ʻa Molomoná ho vā fetuʻutaki mo Iá. Toʻo leva ha kiʻi taimi ke hiki ai ha potufolofola ʻe ua pe tolu mei he Tohi ʻa Molomoná ʻokú ne akoʻi koe fekauʻaki mo Sīsū Kalaisí. Kapau ʻokú ke fiemaʻu tokoni, vakai ki he “Sīsū Kalaisi” ʻi he Fakahinohino ki he Ngaahi Folofolá.

• Ko e hā ʻoku tokoni e ngaahi veesi ko ʻení ke mahino kiate koe ʻo kau kia Sīsū Kalaisí?

ʻE lava ke liliu ʻa e ʻekitivitī ko ʻení ke tauhoa pe fakakulupu iiki ʻa e kau akó ke nau fakatātaaʻi.

Fakakaukau angé ki haʻo talanoa mo ha kaungāmeʻa ʻoku ʻikai ke maheni mo e Tohi ʻa Molomoná pe ʻoku ʻikai ke ne ongoʻi ʻoku fuʻu ʻaonga. Ko e hā te ke lava ʻo vahevahe mo e tokotahá ni fekauʻaki mo e Tohi ʻa Molomoná mo hono taumuʻá? Fakakaukau ke fakakau ha ngaahi aʻusia fakataautaha, ngaahi kupuʻi lea mei he peesi talamuʻakí mo e talateú, pe ha faʻahinga fakamatala pē mei he Tohi ʻa Molomoná ʻokú ke ongoʻi ʻe ʻaonga.

Fakakaukau ke fakaʻosi ʻaki ha fakamoʻoni fakataautaha ki he taumuʻa mo e mahuʻinga ʻo e Tohi ʻa Molomoná. ʻE lava foki ke vahevahe ʻe he kau akó ʻenau fakamoʻoní pe ngaahi ongo fekauʻaki mo ʻenau ako he kuohilí mo e kahaʻú ʻo e lēkooti toputapú ni.

Fakamatala Fakamahinó mo e Puipuituʻá

 

 

•  

•   

•  

ʻOku ʻuhinga ki he hā ha niʻihi ʻo e ngaahi foʻi lea ʻi he peesi talamuʻakí?

ʻE lava ke tokoni atu ʻa e ngaahi fakaʻuhinga ko ʻení ke mahino kiate koe ha niʻihi ʻo e ngaahi foʻi lea mei he peesi talamuʻaki ʻo e Tohi ʻa Molomoná.

• ʻOku ʻuhinga e Fale ʻo ʻIsilelí ki he hako ʻo ʻĒpalahame, ʻAisake mo Sēkopé. ʻIkai ngata aí, ʻoku kau ʻi he fale ʻo ʻIsilelí ʻa kinautolu ʻoku ʻikai ko ha hako moʻoni ʻo ʻĒpalahame, ʻAisake, mo Sēkopé ka kuo nau tali ʻa e pōpoaki ʻo e ongoongolelei kuo fakafoki maí pea nau omi ki he Siasi kuo fakafoki maí ʻo fakafou ʻi he ngaahi fuakava mo e ngaahi ouau ʻoku fiemaʻú.

• Naʻe ʻuhinga e kau Siú ʻi he kamataʻangá ki ha taha pē mei he faʻahinga ʻo Siutá (ʻa ia ko e taha ʻo e faʻahinga ʻe hongofulu mā ua ʻo ʻIsilelí). Ka neongo ia, naʻe faʻa fakaʻaongaʻi ʻe kinautolu naʻa nau hiki e Tohi ʻa Molomoná ʻa e foʻi lea ko ʻení ke ʻuhinga kiate kinautolu kotoa pē naʻe nofo ʻi he Puleʻanga Fakatonga ʻo Siutá ʻi he kuonga ʻo e Fuakava Motuʻá (2 Nīfai 30:4; 33:8), neongo mahalo ko e hako kinautolu ʻo e ngaahi faʻahinga kehe ʻo ʻIsilelí (ʻAlamā 10:3). ʻOku toe ʻuhinga pē foki ia ki he “kakai ʻoku nau tauhi ki he ngaahi meʻa fakalotu, ngaahi tōʻonga moʻui, mo e ngaahi ʻulungaanga tukufakaholo ʻo e tui faka-Siutá pea tatau ai pē pe naʻe fanauʻi mai kinautolu ko e Siu pe ʻikai” (Fakahinohino ki he Ngaahi Folofolá, “Kau Siú,” scriptures.ChurchofJesusChrist.org).

• ʻOku ʻuhinga ʻa e senitailé ki he “ngaahi puleʻanga” (Bible Dictionary, “Gentile”). ‘Oku faʻa ʻuhinga ia he taimi ‘e niʻihi ki he kakai ‘oku ‘ikai tupu mei he kau ‘Isilelí, pea ʻuhinga he taimi ‘e niʻihi ki he kakai naʻe ʻikai tupu mei he kau Siú, pea ʻuhinga he taimi ‘e niʻihi ki he ngaahi puleʻanga ‘oku ‘ikai te nau maʻu ‘a e ongoongoleleí, neongo ‘oku ‘i ai ha toto ‘o ‘Isileli ‘i hono kakaí. Ko e ʻuhinga fakamuimuí ʻoku lahi taha hono ngāue ʻaki ʻo e foʻi leá ‘i he Tohi ‘a Molomoná mo e Tokāteliné mo e Ngaahi Fuakavá” (Fakahinohino ki he Ngaahi Folofolá, “Kau Senitailé,” scriptures.ChurchofJesusChrist.org).

• Ko e fakanounoú ko hano fakamatalaʻi fakanounou ʻo ha faʻahinga meʻa.

• Ko e toengá ko ha konga ʻoku kei toe.

Ko e hā ʻoku fuʻu mahuʻinga ai e Tohi ʻa Molomoná?

Koeʻuhí ke mahino ʻa e ʻaonga ʻo e Tohi ʻa Molomoná ki he moʻui ʻa ha kakai tokolahi, fakakaukau ke ako e pōpoaki ʻa Palesiteni Lāsolo M. Nalesoní “Ko e Tohi ʻa Molomoná: Ne Mei Fēfē Nai Hoʻo Moʻuí Ka Ne ʻIkai Ia?” (Liahona, Nōvema 2017, 60–63). Tokanga ʻaupito ki he konga “Ko e Lisi Tohi Molomona ʻa Palesiteni Nalesoní” ʻi he fakaʻosinga ʻo e pōpoakí.

Naʻe fōtunga fēfē ʻa e fuofua peesi talamuʻaki ʻo e Tohi ʻa Molomoná?

Te ke lava ʻo sio heni ki ha fakatātā ʻo e peesi talamuʻakí ʻi he ʻū lauʻi peesi ʻa e mīsini pākí.

Te ke lava ʻo mamata ʻi ha ʻīmisi ʻo e peesi talamuʻakí ʻi he pulusinga ʻuluaki ʻo e Tohi ʻa Molomoná ʻi heni.

ʻEkitivitī Fakalahi ki he Akó

“Ko ha Fakamatala Nounou ʻo Kau ki he Ko e Tohi ‘a Molomoná”

Ke tokoni ke mahino ki he kau akó ʻa e Tohi ʻa Molomoná mo e founga hono fakatahatahaʻí, fakakaukau ke ʻomi ha ʻū tohi pe puha ʻokú ne fakafofongaʻi ʻa e ʻū lauʻi peleti kehekehé ʻo hangē ko hono fakamatalaʻi ʻi he “Ko ha Fakamatala Nounou ʻo Kau ki he Ko e Tohi ʻa Molomoná.” Fakaafeʻi e kau akó ke nau lau ʻa e ngaahi palakalafi fakafikefika 1–4 ʻi he fakamatalá pea teuteu ke fakamatalaʻi ʻa e founga naʻe maʻu ai ʻa e Tohi ʻa Molomoná mei he ‘ū lauʻi peleti kehekehe ko ʻení.