Ngaahi Peesi Talateu ʻo e Tohi ʻa Molomoná

Ko e Ngaahi Fakamoʻoni ʻa e Kau Fakamoʻoni ʻe Toko Tolú mo e Kau Fakamoʻoni ʻe Toko Valú

“Kuo Mau Mamata ki he Ngaahi Peletí”

Naʻe ʻi ai ha taimi naʻe ʻikai ngofua ai ke fakaʻaliʻali ʻe Siosefa Sāmita ʻa e ʻū lauʻi peleti koulá ki ha taha. ʻI hono fakahoko ʻo e kikité, naʻe faifai pea fakahā ʻe he ʻEikí kia Siosefa ʻe fakangofua mo ha kau fakamoʻoni kehe ke nau mamata ki he ʻū lauʻi peletí mo fakamoʻoniʻi honau moʻoní (vakai, 2 Nīfai 27:12–14). ʻE lava ke tokoni atu e lēsoni ko ʻení ke mahino kiate koe ʻa e mahuʻinga ʻo e kau fakamoʻoni tokolahi ki he Tohi ʻa Molomoná mo fakakaukau ki hoʻo fakamoʻoní.

Ko hono tokoniʻi e kau akó ke nau ako ʻi he Laumālié. Ko e founga ʻe taha ko hono poupouʻi kinautolu ke fakakaukau ki heʻenau ngaahi aʻusia fakataautaha fekauʻaki mo e lēsoni ko ʻení. Tuku ha taimi ke fakalaulauloto ai ki he ngaahi tāpuaki kuo nau maʻu ʻi hono moʻui ʻaki e ongoongolelei ʻo Sīsū Kalaisí mo e founga ʻoku nau hoko ai ʻo hangē ko Iá.

Teuteu ʻa e tokotaha akó: Fakaafeʻi e kau akó ke nau haʻu mateuteu ke vahevahe ha ngaahi aʻusia naʻá ne tokoniʻi kinautolu pe niʻihi kehé ke nau ʻiloʻi ko e Tohi ʻa Molomoná ʻoku mei he ʻOtuá.

Ngaahi ʻEkitivitī Ako ʻOku Ala Fakahokó

Kau fakamoʻoni ʻo e ʻū lauʻi peletí

Fakakaukau ke ngāue ʻaki e palakalafi ko ʻení ke tokoni ki he kau akó ke nau ʻiloʻi ʻa e faingataʻa naʻe foua ʻe Siosefa Sāmita ʻi heʻene hoko ko e fakamoʻoni pē taha naʻe mamata tonu ʻi he ʻū lauʻi peleti koulá ʻi ha kiʻi vahaʻa taimi.

Fakakaukauloto pe naʻe fēfē nai kia Siosefa Sāmita ʻene hoko ko e tangata pē ʻe taha naʻe lava ʻo mamata ki he ʻū lauʻi peleti koulá. Fakakaukau pe naʻe mei faingataʻa fēfē kiate koe ha taʻetui, manukiʻi, mo hano ui koe ko ha tokotaha kākā koeʻuhí ko e ʻikai ke ke fakahā ki he kakaí ʻa e ʻū lauʻi peletí. Fakakaukauloto kapau naʻe pau ke ke talaange kiate kinautolu kuo nau poupouʻi koé he ʻikai lava ke nau sio ki he ʻū lauʻi peletí.

Lolotonga hono liliu ʻo e Tohi ʻa Molomoná, naʻe tala-kae-tohi ʻe Siosefa e ngaahi lea ʻo e ngaahi talaʻofa naʻe fai ʻe he ʻEikí fekauʻaki mo e ʻū lauʻi peletí. Lau ʻa e 2 Nīfai 27:12–14 ke ʻiloʻi e ngaahi talaʻofa naʻe fai ʻe he ʻEikí fekauʻaki mo e ʻū lauʻi peletí (vakai, ʻEta 5:2–4).

• Ko e hā naʻe makehe kiate koe ʻi he ngaahi kikite ko ení? Ko e hā hono ʻuhingá?

• Naʻe ongoʻi fēfē nai ʻa Siosefa ʻi heʻene lau ʻa e kikite ko ʻení? Ko e hā hono ʻuhingá?

• Ko e hā naʻá ke ako mei he potufolofola ko ʻení fekauʻaki mo e ʻEikí pea mo e Tohi ʻa Molomoná?

Ko e moʻoni ʻe taha te tau lava ʻo ako mei he ngaahi kikite ko ʻení naʻe ʻomi ʻe he ʻEikí ha kau fakamoʻoni tokolahi ki he ʻū lauʻi peleti ʻo e Tohi ʻa Molomoná.

• Ko e hā ʻoku faingofua ange ai ke tui ʻoku moʻoni ha meʻa ʻi he taimi ʻoku tokolahi ange ai e kau fakamoʻoní ʻi he toko tahá?

ʻI he hokohoko atu hoʻo akó, fekumi ki he tokoni ʻa e Tamai Hēvaní ʻo fakafou ʻi he Laumālie Māʻoniʻoní ke mahino ʻa e mahuʻinga ʻo e kau fakamoʻoni ki he ʻū lauʻi peleti koulá, pea fakakaukau ki he founga ʻe lava ke tokoniʻi ai koe ʻe heʻenau ngaahi fakamoʻoní ke ke maʻu pe fakamālohia hoʻo fakamoʻoní.

Fakaʻaliʻali ange ʻa e palakalafi ko ʻení pe fakaafeʻi ha tokotaha ako ke ne lau ia.

Naʻe ʻomi ʻe he ʻEikí ha kau tangata ʻe toko tolu pea mo ha kau tangata ʻe toko valu ke nau mamata ki he ʻū lauʻi peletí. Naʻe tokoni ha tokolahi ʻo e kau fakamoʻoni ko ʻení ʻi ha founga ki hono ʻomi ʻo e Tohi ʻa Molomoná. Hangē ko ʻení, naʻe fakaafeʻi ʻe Tēvita Uitemā ʻa Siosefa mo ʻEma ke nau nofo lolotonga e liliu ʻa Siosefá, naʻe mōkesi ʻe Māteni Hālisi hono fāmá ke totongi ʻaki e fakamole ki hono paaki ʻo e Tohi ʻa Molomoná, pea naʻe hoko ʻa ʻŌliva Kautele ko ha tangata tohi ki he konga lahi ʻo e liliú. Naʻe hoko foki e tamai ʻa Siosefá mo hono ongo taʻokete ko Hailame mo Samuelá ko ha ongo fakamoʻoni ki he ʻū lauʻi peletí peá na tokoni kia Siosefa ʻi ha ngaahi founga mahuʻinga. Neongo naʻe mavahe ha niʻihi ʻo e kau tangatá ni kimui ange mei he Siasí, ka naʻe ʻikai ke nau teitei fakaʻikaiʻi ʻenau fakamoʻoni ki he Tohi ʻa Molomoná. (Vakai ki he Ngaahi Tefito ʻi he Hisitōlia ʻo e Siasí, “Kau Fakamoʻoni ʻo e Tohi ʻa Molomoná,” topics.ChurchofJesusChrist.org.)

Lau ʻa e “Ko e Fakamoʻoni ʻa e Kau Fakamoʻoni ʻe Toko Tolú” mo e “Ko e Fakamoʻoni ʻa e Kau Fakamoʻoni ʻe Toko Valú,” ʻo kumi e meʻa ne nau mamata ki ai, ongoʻi mo ʻiló.

 

Fakakaukau ke ʻoange ki he kau akó e laʻipepa tufa ko ʻení pea fakaafeʻi kinautolu ke nau fakafonu ʻa e sātí fakafoʻituitui, fakakalasi, pe ʻi ha fanga kiʻi kulupu iiki .

Ko e Fakamoʻoni ʻa e Kau Fakamoʻoni ʻe Toko Tolú mo e Kau Fakamoʻoni ʻe Toko Valú

	Kau Fakamoʻoni ʻe Toko Tolú:	Kau Fakamoʻoni ʻe Toko Valú:
Ko e meʻa naʻe mamata ki ai mo ongoʻi ʻe he kau fakamoʻoní.
Ko e meʻa naʻe ʻiloʻi ʻe he kau fakamoʻoní.
Ko e meʻa naʻe fakahoko ʻe he kau fakamoʻoní.

• Ko e hā ha ngaahi faitatau mo ha ngaahi faikehekehe naʻá ke fakatokangaʻi ʻi he ngaahi aʻusia ʻa e ongo kulupú?

• Ko e hā ka mahuʻinga ai e ngaahi faikehekehé?

Neongo te tau fakaʻamu he taimi ʻe niʻihi ke maʻu ha ngaahi aʻusia hangē ko e kau fakamoʻoni ko ʻení, ka naʻe fakamoʻoniʻi ʻe he ʻEikí naʻa mo e mamata ki he ngaahi meʻá ni he ʻikai ke ne fakalotoʻi ʻa e kakaí ki he moʻoní (vakai, Tokāteline mo e Ngaahi Fuakava 5:7). Naʻe pehē ʻe Palesiteni Sēmisi E. Fausi (1920–2007) ʻo e Kau Palesitenisī ʻUluakí:

Kuo pau ke tau ʻiloʻi ʻi hotau kuongá mo e taimí ʻa hono moʻoni ʻo e ngaahi meʻa naʻe ʻi he ʻū lauʻi peleti koulá ʻo ʻikai te tau mamata ki ai. ʻOku ʻikai ʻatā ia ke tau mamata mo ala ki ai ʻo hangē ko ia naʻe fakahoko ʻe he Kau Fakamoʻoni ʻe Toko Tolú mo e Kau Fakamoʻoni ʻe Toko Valú. Naʻe ʻi ai ha niʻihi ʻo kinautolu naʻe mamata mo ala ki he ʻū lauʻi peleti koulá naʻe ʻikai ke nau tauhi faivelenga ki he Siasí. ʻE hoko ʻa e mamata ki ha ʻāngeló ko ha aʻusia maʻongoʻonga, ka ʻoku maʻongoʻonga ange ke maʻu ha ʻilo ki he faka-ʻOtua ʻo e Fakamoʻuí ʻo fakafou ʻi he tui mo e fakamoʻoni ʻa e Laumālié [vakai, Sione 20:29]. (James E. Faust, “It Can’t Happen to Me,” Ensign, May 2002, 48)

• Ko e hā ʻoku mahuʻinga ai kiate koe ʻa e meʻa ʻoku akoʻi ʻi he fakamatala ko ʻení?

Ko hoʻo fakamoʻoni kia Sīsū Kalaisí mo e Tohi ʻa Molomoná

Ko ha tefitoʻi taumuʻa ʻe taha ʻo e Tohi ʻa Molomoná ko hono fakalotoʻi ʻa e kakai kotoa pē ko Sīsū ʻa e Kalaisí (vakai ki he peesi talamuʻaki ʻo e Tohi ʻa Molomoná. Fakakaukau angé pe ʻoku mālohi tatau nai hoʻo fakamoʻoni fakataautaha kia Sīsū Kalaisi mo e Tohi ʻa Molomoná ʻo hangē ko hoʻo fiemaʻú. Fakalaulauloto ki he founga ʻe lava ke hoko ai hono maʻu pe fakamālohia ʻo e fakamoʻoni ko iá ko ha tāpuaki kiate koe mo e niʻihi kehé.

Fakakaukau ke ʻoange ki he kau akó ha taimi ke nau fakakaukau ai ki heʻenau teuteu ki he kalasí. Fakaʻaliʻali leva e palakalafi ko ʻení pea poupouʻi kinautolu ke nau fakalaulauloto mo hiki e ngaahi ongo ʻoku nau maʻú.

Hiki hoʻo fakamoʻoni kia Sīsū Kalaisi mo e Tohi ʻa Molomoná. Kapau ʻokú ke ongoʻi ʻoku teʻeki ke ke maʻu ha fakamoʻoni, hiki e meʻa te ke lava ʻo fai ke maʻu ai ha fakamoʻoní. Fakakau e founga ʻe ala tākiekina ai ʻe he ngaahi fakamoʻoni ʻa e niʻihi kehé hoʻo fakamoʻoní. Fakakaukau ke tānaki atu ki heni ʻi he hokohoko atu hoʻo ako e Tohi ʻa Molomoná.

Hili hono maʻu ʻe he kau akó ha taimi feʻunga ke tohi aí, fakaafeʻi ha niʻihi ke vahevahe ʻenau fakamoʻoni kia Sīsū Kalaisi mo e Tohi ʻa Molomoná.

Fakamatala Fakamahinó mo e Puipuituʻá

Ko e hā ʻoku mātuʻaki mahuʻinga ai e ngaahi fakamoʻoni ʻa e Kau Fakamoʻoni ʻe Toko Tolú mo e Kau Fakamoʻoni ʻe Toko Valú?

Naʻe akoʻi ʻe Palesiteni Henelī. B. ʻAealingi ʻo e Kau Palesitenisī ʻUluakí ʻo pehē:

“Naʻe ʻikai teitei fakaʻikaiʻi ʻe he Kau Fakamoʻoni ʻe Toko Tolú ʻenau fakamoʻoni ki he Tohi ʻa Molomoná. Naʻe ʻikai ke nau lava he naʻa nau ʻiloʻi naʻe moʻoni ia. Ne nau fakahoko ha ngaahi feilaulau mo fehangahangai mo ha ngaahi faingataʻa ʻo hulu ange ʻi he ngaahi meʻa kuo ʻilo ki ai e tokolahi taha ʻo e kakaí. Naʻe fakahoko ʻe ʻŌliva Kautele ʻa e fakamoʻoni tatau fekauʻaki mo e tupuʻanga fakalangi ʻo e Tohi ʻa Molomoná ʻi he ʻamanaki ke ne mālōloó. Ka ʻi he ngaahi taimi ʻo e ʻahiʻahí, naʻa nau veiveiua ʻi heʻenau tui naʻe kei hoko pē ʻa Siosefa ko e palōfita ʻa e ʻOtuá pea ko e founga pē ʻe taha ke haʻu ai ki he Fakamoʻuí naʻe fakafou ia ʻi Hono Siasi kuo fakafoki maí. Koeʻuhí naʻe hokohoko atu ʻenau fakapapauʻi e meʻa ne nau mamata mo fanongo ki ai ʻi he aʻusia fakaofo ko iá, lolotonga ha ngaahi vahaʻataimi taimi fuoloa ʻenau mavahe mei he Siasí pea mo Siosefá, ʻoku toe mālohi ange ai ʻenau fakamoʻoní. (Henry B. Eyring, “An Enduring Testimony of the Mission of the Prophet Joseph,” Liahona, Nov. 2003, 90)

 

Ko e hā nai naʻe ʻomi ai ʻe he ʻEikí e faʻahinga aʻusia kehekehe ʻe ua ko ʻení ki he kau fakamoʻoni ʻo e Tohi ʻa Molomoná?

Kapau naʻe tukuakiʻi ʻe he kau fakaanga ʻo e Siasí e Kau Fakamoʻoni ʻe Toko Tolú ʻo pehē ko ʻenau mata meʻa-hā-maí ko ha fakakaukauloto pē, he ʻikai ke fakamatalaʻi ai e aʻusia tonu naʻe maʻu ʻe he Kau Fakamoʻoni ʻe Toko Valú mo e ʻū lauʻi peletí. ʻI he tafaʻaki ʻe tahá, kapau ʻe tukuakiʻi ʻe he kau fakaangá ʻa Siosefa Sāmita naʻá ne faʻufaʻu pē e ʻū lauʻi peleti koulá ke kākaaʻi ʻaki e Kau Fakamoʻoni ʻe Toko Valú, he ʻikai ke fakamatalaʻi ai e ngaahi fakahā fakalangi, kau ai ʻa e hā mai ha ʻāngeló, ʻa ee naʻe mamata ki ai e Kau Fakamoʻoni ʻe Toko Tolú.)

Ko e hā e ongo naʻe maʻu ʻe Siosefa hili e mamata ʻa e niʻihi kehé ki he ʻū lauʻi peletí?

Naʻe lekooti ʻe heʻene faʻē ko Lusi Meki Sāmitá, ʻo pehē, naʻe hili e fakamoʻoni fakalangi ko ʻení, naʻe talaange ʻe Siosefa kiate ia:

ʻOku ʻikai [ke ke] ʻilo e lahi ʻo ʻeku fiefiá. Naʻe tuku ʻe he ʻEikí ʻa e ngaahi lauʻi peletí ke fakahā ki ha toko tolu kehe meiate au, ʻo nau mamata mo kinautolu ki he ʻāngeló pea kuo pau ke nau fakamoʻoni ki hono moʻoni ʻo e meʻa naʻá ku lea ʻakí, he kuo nau ʻilo ʻiate kinautolu ʻoku ʻikai ke u ʻalu holo ʻo kākaaʻi ʻa e kakaí, pea kuó u ongoʻi ai ʻo hangē kuo huʻi atu haʻaku fuʻu kavenga mamafa naʻe fuʻu mafatukituki ke u ala fuesiá, ka kuo pau ʻeni ke nau fuesia ha konga, pea ʻoku fakafiefia ia ki hoku lotó he ʻe ʻikai ke u toe tuʻu toko taha pē ʻi māmani. (Lucy Mack Smith, History, 1844–1845, book 8, page 11, josephsmithpapers.org; naʻe fakatonutonu e sipelá mo e fakaʻilonga leá)

Ko e hā mo ha ngaahi fakamatala kehe ʻe lava ʻo tokoni ke mahino lelei ange kiate au ʻa e ngaahi aʻusia ʻa e kau fakamoʻoni mo e ʻū lauʻi peleti koulá?

Naʻe vahevahe ʻe ʻEletā ʻUlise Soālesi ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e fakamatala ʻo e kau fakamoʻoní. Sio ʻi he “Ko Hono ʻOmi ʻo e Tohi ʻa Molomoná” mei he taimi 7:58 ki he 10:30 ki heʻene toe fakamatalaʻí.

ʻOku fakaikiiki foki e ngaahi aʻusia ʻa e Kau Fakamoʻoni ʻe Toko Tolú mo e Kau Fakamoʻoni ʻe Toko Valú ʻi he Kau Māʻoniʻoní: Ko e Talanoa ʻo e Siasi ʻo Sīsū Kalaisí ʻi he Ngaahi ʻAho Kimui Ní, voliume 1, Ko e Fuka ʻo e Moʻoní, 1815–1846 [2018], 73–75).

Naʻe fakahā foki kia Mele Uitemā ʻa e ʻū lauʻi peletí. ʻOku maʻu ʻa e talanoa ʻo ʻene aʻusiá ʻi he peesi 70–71 ʻo e Kau Māʻoniʻoní, voliume 1.

Ngaahi ʻEkitivitī Fakalahi ki he Akó

Kau fakamoʻoni kehé

ʻE lava ke ʻaonga ki he kau akó haʻanau fakakaukau ki he founga ʻe ala tākiekina ai ʻe he kau fakamoʻoni kehe ʻo e Tohi ʻa Molomoná ʻenau fakamoʻoní. Fakaafeʻi kinautolu ke nau hiki ha lisi ʻo ha kakai kuo nau fanongo ai ki ha fakamoʻoni pe fakamoʻoni ki hono moʻoni ʻo e Tohi ʻa Molomoná. Kole ange ke nau vahevahe ʻa e founga kuo tākiekina ai kinautolu ʻe he kau fakamoʻoni ko iá. Hili iá pea ʻai ke nau hiki ʻenau fakamoʻoní pe fakamatalaʻi nounou ʻa e founga ʻe lava ke tākiekina ai ʻenau moʻuí mo honau vā fetuʻutaki mo Sīsū Kalaisí ʻi hono maʻu ʻenau fakamoʻoní.

 

     

Kapau ʻe ʻaonga ki he kau akó haʻanau ako lahi ange fekauʻaki mo e ngaahi feituʻu naʻe hoko ai e ngaahi meʻa mahuʻinga fekauʻaki mo hono ʻomi ʻo e Tohi ʻa Molomoná, ʻe lava ke vakaiʻi ʻe he kalasí ʻa e ngaahi feituʻu fakahisitōlia ko ʻení ʻo ngaue ʻaki ʻa e ʻinitanetí, ʻa ia ʻoku lava ke maʻu ʻi he ChurchofJesusChrist.org.