1 Nifae 1

“Na O Mai Ai Perofeta e Toatele”

E le o taimi uma e faasoa mai ai e perofeta ni savali e lauiloa i le lalolagi, ae o a latou aoaoga ma lapataiga e faaalia ai le alofa o le Alii mo Lona nuu. Na valaauina Liae e le Atua e talai atu le salamo i tagata o Ierusalema. E ui i ana aioiga ma lapataiga, sa latou teena ana upu ma saili e fasioti o ia. O lenei lesona e mafai ona fesoasoani ia te oe e lagona ai le taua o le talia ma le mulimuli i perofeta a le Atua.

Faaaogaina o le molimau a perofeta. O perofeta e valaauina ma saunoa mo le Atua (tagai Bible Dictionary, “Perofeta”). O le isi auala taua e molimau atu ai ia Iesu Keriso o le faatagaina lea o le molimau a perofeta ina ia lagonaina i totonu o o tatou potu aoga. A o e suesue i tusitusiga paia po o lauga o konafesi, vaavaai mo molimau faaperofeta ia Iesu Keriso. Fuafua ni auala talafeagai e fesoasoani ai i tamaiti aoga e vaai ma faalogo i nei molimau o se vaega o lo latou aafiaga e aoao ai.

Sauniuniga a le tamaitiiti aoga: Valaaulia tamaiti aoga e o mai saunia e faasoa mai ni lapataiga talu ai nei na latou faalogo i ai mai perofeta ma mafaufau loloto i le ala na latou tali atu ai i na lapataiga.

Gaoioiga e ono Mafai Ona Aoao Ai

Lapataiga

Faaali atu le ata lenei, faamatalaga, ma fesili.

Vaai faalemafaufau i le maua o le avanoa e faaopeopea ai pe alo se paopao i luga o lenei vaitafe.

• Mata e i ai ni ou atugaluga? Aisea pe aisea foi e leai ai?

A o lata ona e amataina lau tafaoga, ua lapataia oe e se tasi e faapea e foliga toafimalie le vaitafe ae o se vaega o le a faamaonia ai le matautia ma le lamatia o le ola.

• Mata e te faatuatuaina le tagata na lapataia oe? Aisea pe aisea foi e leai ai?

O le ata lenei o le vaitafe lava lea e tasi faatasi ai ma le vaega na e vaai muamua i ai o loo otooto atu:

Faaali atu le ata lenei ma valaaulia tagata aoga e tali mai i fesili e faatatau i ai.

• O le a se mea ua e iloa nei ma lagonaina e uiga i le tagata na tuuina atu le lapataiga?

• O le a se mea e mafai e lenei tulaga faalemafaufau ona aoao ai i tatou e uiga i le matafaioi a perofeta a le Atua?

Faamanatu i tamaiti aoga a latou sauniuniga mo le vasega a o latou mafaufau loloto i mea nei.

• O mea matautia ua lapataia ai i tatou e perofeta i o tatou aso

• O faamanuiaga o le usiusitai ma taunuuga e ono i ai o le le amanaiaina o a latou lapataiga

• O ou lagona e uiga i le mulimuli i a latou lapataiga

• O le pogai e te manaomia ai lapataiga a le Atua e ala mai i Ana perofeta

A o e suesue, vaavaai mo upumoni e mafai ona fesoasoani ia te oe e lagona ai se naunautaiga sili e mulimuli i perofeta a le Atua.

“Na O Mai Ai Perofeta e Toatele”

O le tusi o le 1 Nifae o loo amata pe tusa o le 600 TLM i Ierusalema. I lea taimi, o le toatele o Iutaia sa faagaloina le Atua ma tapuai atu i le atua pepelo o Paala, ma faatuatuaina upu a perofeta pepelo, ma faia amioga e agasala e pei o le gaoi, fasioti tagata, ma le ola le mama a’ia’i (tagai Ieremia 2; 7). Mafaufau pe faapefea ona tutusa nei tulaga ma le lalolagi i aso nei.

Faitau le 1 Nifae 1:1–4, ma vaavaai le ala na amata ai e Nifae lana talafaamaumau.

• O le a sou manatu i le mea e taua ona malamalama i ai mai nei fuaiupu? Aisea?

O perofeta o loo ta’ua i le fuaiupu 4 e mafai ona aofia ai perofeta o le Feagaiga Tuai o Ieremia, Sapakuka, Opetaia, Nauma, Sefanaia, ma isi.

Faitau le 1 Nifae 1:5–15 ma vaavaai mo faamatalaga auiliili e uiga i le valaauga o Liae e avea o se perofeta. Atonu e te manao e matamata i le “The Lord Commands Lehi’s Family to Leave Jerusalem” mai le faailotaimi 0:39 i le 5:53, o loo maua i ChurchofJesusChrist.org.

• O le a se mea o tumatila mai ia te oe i le aafiaga o Liae? Aisea?

• O le a se mea na aoaoina e Liae e uiga i le Tama Faalelagi ma Iesu Keriso mai mea na ia vaai i ai?

• Aisea o le a taua ai le iloa o nei upumoni e uiga i le Tama Faalelagi ma Iesu Keriso i ou tulaga?

Faitau le 1 Nifae 1:18–20 e vaai i mea na aoao atu e Liae ma le tali atu i ai o tagata Ierusalema. Atonu e te manao e maimoa i le “The Lord Commands Lehi’s Family to Leave Jerusalem” mai le faailotaimi 5:53 i le 7:26.

• I ana taumafaiga, na faapefea ona faapei Liae o Iesu Keriso?

• O le a se mea ua e aoaoina e uiga i perofeta mai aafiaga o Liae?

O se upumoni e tasi e mafai ona tatou aoao mai le faataitaiga a Liae o le valaauina e le Atua o perofeta e lapatai mai e uiga i taunuuga o le agasala ma molimau atu ia Iesu Keriso.

Valaaulia tamaiti aoga e talanoaina fesili nei i ni paga po o ni vaega laiti.

• O faapefea ona e vaaia perofeta o faataunuuina nei tiutetauave i o tatou aso?

• O a ni auala o faaalia ai e nisi o tagata i aso nei le ita i perofeta pe teena a latou upu? Aisea e te manatu ua latou tali atu ai faapea?

Sa faamalamalama mai e Elder Neil L. Andersen o le Korama a Aposetolo e Toasefululua le taua o mea o loo aoao mai e perofeta a le Atua:

O le taulaina o o tatou agaga i le Alii o Iesu Keriso e manaomia ai le faalogo atu ia i latou Na te auina mai. …

O le siufofoga o le perofeta, ao saunoa mai ma le agalelei, o le a matele ina avea o se siufofoga e aioi mai ia i tatou ina ia suia, ia salamo, ma ia toe foi mai i le Alii. A manaomia se faasa’oga, aua ne’i tatou faatuai. Ma aua ne’i popole pe a feteenai le siufofoga o le perofeta ma manatu lauiloa o nei aso. O le taimi lava e amata ona saunoa ai le perofeta e amata ai foi ona vevela faitioga a le au le talitonu feitagai. A e lotomaualalo i le mulimulitaia o fautuaga a le perofeta a le Alii, ou te folafola atu ia te outou se faamanuiaga faaopoopo o le saogalemu ma le filemu. …

… O se tiutetauave tupito ma se meaalofa silisili ona faapelepele a se perofeta ia i tatou o lana molimau mautinoa, lona iloa faamaoni, o Iesu o le Keriso. (Neil L. Andersen, “O Le Perofeta a le Atua,” Ensign poo le Liahona, Me 2018, 26–27)

• Aisea e te manatu ai o le tiutetauave tupito o le perofeta o le faasoa atu lea o lana molimau ia Iesu Keriso?

• O le a se mea e mafai ona fesoasoani ia te oe e tali atu ai ma le faamaoni i fautuaga ma lapataiga a perofeta a le Atua i o tatou taimi?

O le matafaioi a perofeta ma le taua o le mulimuli ia i latou

Faaali atu faatonuga nei. Tuu atu i tamaiti aoga ni nai minute e faamaumau ai o latou manatu.

Manatu faapea o lau uo e le auai i le Ekalesia ua auina atu ia te oe le feau tusitusia lenei:

“Ou te manatua lou fai mai e uiga i le i ai o perofeta i lau ekalesia. E moni lena mea? O a mea a tou perofeta e fai? E pei i latou o perofeta i le Tusi Paia?”

E te manao ia mautinoa ua manino le taliina o a latou fesili. Saunia se tali e faaaoga ai mea taitasi nei:

E mafai e tamaiti aoga ona maua punaoa nei i le polokalama o le Potutusi o le Talalelei. Afai e manaomia, tuu atu ni kopi lolomi mo tamaiti aoga e iloilo ai.

1. O fuaitau ma faataitaiga mai le 1 Nifae 1 (ma isi fuaitau o mau e uiga i perofeta atonu e te iloaina) e mafai ona fesoasoani ia i latou e malamalama ai i le matafaioi a se perofeta.

2. O faataitaiga o auala na fesoasoani ai perofeta o aso nei ia te oe e latalata atili atu ai ia Iesu Keriso. Mafaufau e faasoa atu faataitaiga na faatosinaina ai oe e perofeta mai lauga o konafesi aoao talu ai nei, tusiga i mekasini a le Ekalesia, po o le tamaitusi o le Mo le Malosi o le Autalavou.

3. Faataitaiga mai lou olaga po o olaga o isi e faaalia ai taunuuga lelei o le faalogo i perofeta. Mafaufau e faaopoopo atu lau lava molimau e uiga i perofeta.

A uma ua lava se taimi e saunia ai, faavasega tamaiti aoga i ni paga. Valaaulia i latou e vaai faalemafaufau faapea na latou filifili e tali faafesagai le fesili a a latou uo nai lo le ala atu i se feau tusitusia. E mafai e tamaiti aoga taitasi ona auauai a o faamatala atu e le tagata o le Ekalesia ia te ia po o lana uo.

Mafaufau e talanoaina faataitaiga o fautuaga, faasa’oga, ma taitaiga lata mai nei lea na fofogaina mai e perofeta ma aposetolo soifua.

A uma, faasoa atu se molimau patino i le ala na fesoasoani ai perofeta ia te oe e latalata atili atu ai ia Iesu Keriso. Mafaufau pe valaaulia ni tamaiti aoga ua loto i ai e faasoa a latou molimau.

Mafaufau loloto le ala na e tali atu ai i lapataiga talu ai nei mai perofeta. Saili le fesoasoani a le Tama Faalelagi e ala i le Agaga Paia e faailoa ai auala e mafai ona e uai atu ai ma le faaeteete i a latou apoapoaiga. Tusi na manatu i lau api talaaga mo suesuega ma filifili ma le agaga tatalo se tasi e faaaoga i lou olaga.

Manatu ma Talaaga o Faamatalaga

E faapefea ona avea le savali o le salamo e faasoa mai e perofeta o se faamoemoe ma se savali aoga?

Ua faamatala e Peresitene Russell M. Nelson ia tali e ono aofia ai. Maimoa le “E Mafai Ona Tatou Faia Ia Lelei Atu ma Ia Tatou Lelei Atu” mai le faailotaimi 0:22 i le 2:37, o loo maua i le ChurchofJesusChrist.org.

1 Nifae 1:20. O a mea e iloa ai le “alofa mutimutivale agamalu o le Alii”?

Na faamalamalama mai e Elder David A. Bednar o le Korama a Aposetolo e Toasefululua e faapea:

O le alofa mutimutivale o le Alii o ni faamanuiaga patino taitasi, o le malosi, puipuiga, mautinoa, taitaiga, alofa ma le agalelei, faamafanafanaga, lagolagosua, ma meaalofa faaleagaga tatou te maua mai i le Alii o Iesu Keriso, ma maua mai ona o Ia, ma e ala mai foi ia te Ia. (David A. Bednar, “O Le Alofa Mutimutivale o le Alii,” Ensign poo le Liahona, May 2005, 99)

Aisea e aoao atu ai e perofeta upumoni e tusa lava pe le ta’uta’ua?

Maimoa le “O Le Alofa ma Tulafono a le Atua” mai le faailotaimi 13:48 i le 15:39 e faalogologo ai ia Peresitene Russell M. Nelson o faamalamalama mai nisi o tali talafeagai i lenei fesili.

O faapefea ona molimau mai perofeta ia Iesu Keriso i aso nei?

Mafaufau e maimoa i le molimau a Peresitene Russell M. Nelson ia Iesu Keriso i le “Molimau Faapitoa o Keriso—Peresitene Russell M. Nelson” (5:47).

Gaoioiga Faaopoopo e Aoao Mai Ai

1 Nifae 1:1. “Ona ua ouvaai i puapuaga e tele … , e ui i lea, sa alofagia tele au e le Alii”

Valaaulia tamaiti aoga e mafaufau loloto i puapuaga (o se mea e afua ai le tiga po o le mafatia) na latou oo i ai ma i latou o siomiaina i latou pe atonu o loo feagai nei ma i latou. Valaaulia i latou e faitau le 1 Nifae 1:1. Fai atu ia i latou e faasoa mai pe faapefea ona “alofagia tele [i tatou] e le Alii” i le lotolotoi o o tatou puapuaga. Mafaufau e maimoa le “Joy and Spiritual Survival” (17:01) mai le faailotaimi 5:13 i le 6:18 e vaai ai ia Peresitene Russell M. Nelson o faamatala mai le ala e mafai ona tatou maua ai le olioli i le taimi o puapuaga.

E mafai e tamaiti aoga ona faitau le 2 Nifae 2:2 ma le Mataupu Faavae ma Feagaiga 90:24 e iloa ai pe mafai faapefea e le Atua ona liliu o tatou puapuaga mo lo tatou lelei. Valaaulia i latou e mafaufau loloto pe na faapefea ona alofagia i latou e le Alii i o latou puapuaga ma pe na faapefea ona fesoasoani le Atua e liliu o latou puapuaga mo lo latou lelei. Valaaulia i latou e faasoa mai le ala e mafai ai e le vaaia o nei mea lelei i o latou puapuaga ona fesoasoani ia i latou e onosaia ai ma le faamaoni na puapuaga.

1 Nifae 1:20. “O le alofa mutimutivale agamalu o le Alii”

A uma ona suesue i le tala i le valaauina o Liae o se perofeta ma teena e lona nuu, valaaulia se tamaitiiti aoga e faitau le 1 Nifae 1:20, ma vaavaai mo mea na manao Nifae i lana aufaitau ia malamalama i ai e uiga i le Alii.

Ina ia fesoasoani i tamaiti aoga ia malamalama i le uiga “o le alofa mutimutivale agamalu o le Alii,” mafaufau e faasoa atu le saunoaga a Elder David A. Bednar o le Korama a Aposetolo e Toasefululua o loo maua i le vaega “Manatu ma Talaaga o Faamatalaga”.

O le isi, valaaulia tamaiti aoga e faitau le Moronae 10:3 ma vaavaai mo se tasi o valaaulia mulimuli a Moronae i le aufaitau o le Tusi a Mamona i le faaiuga o le faamaumauga.

Faamalamalama atu e faapea, mai le amataga e oo i le iuga, o loo i ai i le Tusi a Mamona le tele o faataitaiga ma aoaoga e faaalia ai le natura alofa mutimutivale o le Alii. Mafaufau e valaaulia tamaiti aoga e mafaufau ma faasoa mai nisi o nei faataitaiga.

Valaaulia tamaiti aoga a o amata la latou suesuega o le Tusi a Mamona i lenei tausaga e vaavaai mo faamaoniga o le alofa mutimutivale o le Alii. E ono fesoasoani foi mo i latou le fai faapitoa o se itulau i a latou api talaaga mo suesuega pe fatu se faailoga faapitoa i le Potutusi o le Talalelei lea e mafai ona fesoasoani ia i latou e faatulaga ai mea latou te maua. Mafaufau e toe tulitatao mai lea taimi i lea taimi ma valaaulia tagata aoga e faasoa mai ni faataitaiga na latou maua.