1 Nifae 4-5

“Sa Taitai Au e le Agaga”

Ina ua mavae ni taumafaiga le manuia se lua ina ia maua mai papatusi apamemea mai ia Lapana, sa tolotolo atu Nifae i Ierusalema i le po ma le faatuatua i le Alii. Peitai, sa itiiti sona manatu i le auala e faataunuu ai lana galuega. Na iai se taimi na e lagona ai, e pei o Nifae, le malosi e uiga i le faia o se mea ae ua e le mautinoa pe faapefea ona faataunuuina? O lenei lesona ua faamoemoe e faamalosia ai lou faatuatuaina o le Tama Faalelagi ma Lona naunautaiga e taiala oe.

Fesoasoani i tamaiti aoga e saunia mo le aoaoina. Ua talanoa mai tusitusiga paia e uiga i se tulaga o le saunia i loto ma mafaufau o i latou o loo sailia le aoaoina faaleagaga. Ia talanoaina e le aunoa ma tamaiti aoga le taua o sauniuniga a le tagata aoao ma uunaia i latou e faamaea sauniuniga a tamaiti aoga i aso taitasi.

Sauniuniga a le tamaitiiti aoga: Tuu atu i tamaiti aoga se kopi o le saunoaga a Peresitene Nelson o loo maua i le amataga o le lesona. Valaaulia i latou e o mai saunia ma ni manatu o tulaga e mafai ai ona latou manuia patino ai mai le mauaina o le taitaiga a le Alii.

Gaoioiga e ono Mafai Ona Aoao Ai

Mauaina o le taitaiga mai le Tama Faalelagi

Faaali atu le saunoaga lenei a Peresitene Nelson ma mafaufau e valaaulia tamaiti aoga e faasoa mai o latou manatu mai le sauniuniga a le tamaitiiti aoga.

Sa faasoa mai e Peresitene Russell M. Nelson se fautuaga taua e uiga i le mauaina o faaaliga faaletagata lava ia. A o e suesue i lana saunoaga, mafaufau pe faapefea ona faatatau ia te oe.

E mafai ona tatou tatalo i lo tatou Tama Faalelagi ma maua mai le taiala ma le taitaiga, ia lapata’ia e uiga i mea lamatia ma mea faalavefau, ma ia mafai ai ona faataunuu mea e le mafai ona tatou faia e i tatou lava. Afai tatou te maua moni lava le Agaga Paia ma aoao ia iloatino ma malamalama i Ana uunaiga, o le a taialaina i tatou i mataupu tetele ma laiti. (Russell M. Nelson, “Faaaliga mo le Ekalesia, Faaaliga mo o Tatou Olaga,” Liahona, Me 2018, 94)

• O a nisi o tulaga i lou olaga, tele pe itiiti, lea o le a fesoasoani ai le mauaina o le taitaiga a le Tama Faalelagi? (Mafaufau e tusi au tali.)

Mafaufau e faaali atu fesili nei ma filifiliga o tali i luga o le laupapa a o lei amataina le vasega pe lolomi foi kopi mo tamaiti taitasi. Tuu atu i tamaiti aoga se taimi e iloilo filemu ai o latou lagona ma tusifaamaumau a latou tali.

Filifili le tali e sili ona faaalia ai ou lagona e uiga i faamatalaga nei.

1. Ou te sailia ma le mataalia le taitaiga a le Tama Faalelagi e fesoasoani ia te au i ou luitau, fesili, ma faaiuga.

   • Tele o taimi

   • O nisi taimi

   • Seāseā

2. Ou te faalagolago i le gafatia ma le finagalo o le Tama Faalelagi e taiala lo’u olaga e ala i le Agaga.

   • Tele o taimi

   • O nisi taimi

   • Seāseā

3. Ou te alu atu ma le faatuatua ma galue i uunaiga a le Agaga Paia, e tusa lava pe le o manino lo’u ala.

   • Tele o taimi

   • O nisi taimi

   • Seāseā

A o e suesue i se taimi na le mautinoa ai e Nifae le mea e fai, saili upumoni e faamalosia ai lou faalagolago i le Tama Faalelagi ma Lona naunautaiga e taialaina oe.

“Inā tatou o aʼe ia”

Manatua na faia e atalii o Liae ni taumafaiga le manuia se lua ina ia maua mai papatusi apamemea mai ia Lapana ma sa fefefe mo o laua ola (tagai 1 Nifae 3:11–27). O a ni ou lagona pe ana e i ai i se tulaga faapena? O a ni ou popolega atonu o i ai? E ui i le molimauina o se agelu, sa lagona e Lamana ma Lemuelu le popole ma sa i ai ni fesili e uiga i le auala e faataunuu ai mea na poloaiina ai i laua (tagai 1 Nifae 3:31).

Faitau le 1 Nifae 4:1–3, ma vaavaai i le ala na tali atu ai Nifae i popolega a ona uso.

• O a ni mea ua faagaeetia ai oe mai nei fuaiupu?

• O le a le faataitaiga mai tusitusiga paia na faaaoga e Nifae e molimau atu ai i le malosi o le Alii ma faaosofia ai ona uso? O a tala mai tusitusiga paia ua e maua ai le lototele ma le malosi i lou olaga?

• E mafai faapefea e le fasifuaitau “Ina tatou o ae ia” ona faatatau i tulaga ma luitau o lou olaga? (Mafaufau e maka le fasifuaitau lenei i au tusitusiga paia i taimi taitasi e faaali mai ai i fuaiupu 1–3.)

Mafaufau e faaali atu le vitio lenei e fesoasoani ai i tamaiti aoga ia malamalama atili i le faasologa o tala. Atonu e aoga le taofi o le vitio mai lea taimi i lea taimi ma faasino atu tamaiti aoga i tusitusiga paia. Mo se faataitaiga, e mafai ona taofi le vitio i le faailotaimi 1:07 mo tamaiti aoga e faailoa mai ai le mea o loo faia e Nifae. Ona mafai lea ona valaaulia tamaiti aoga e faitau ma faailoga le 1 Nifae 4:6–7 ia latou tusitusiga paia.

Faitau le 1 Nifae 4:4–8, ma vaavaai mo mea na faia e Nifae i le taumafaiga lona tolu ia maua mai ai papatusi apamemea. Atonu foi e te manao e matamata i le “The Spirit Directs Nephi to Slay Laban” (3:26), o loo maua i le ChurchofJesusChrist.org, o se vaega o lau suesuega.

• O le a le mea na iloa e Nifae ma o le a foi le mea na ia le iloaina a o ia amataina lenei taumafaiga lona tolu?

• O le a le mea e tulagaese ia oe i le fasifuaitau “E ui i lea sa ou alu atu” i le 1 Nifae 4:7?

• O le a se upumoni e mafai ona e aoao mai i upu a Nifae?

O se tasi lenei o mataupu faavae o le talalelei atonu na e mafaufau i ai: i taimi o le le mautonu, e mafai ona tatou maua le taitaiga mai le Tama Faalelagi e ala i le Agaga a o tatou o atu ma le faatuatua.

Mafaufau e tusifaamaumau lenei mataupu faavae po o se mataupu faavae sa e mafaufau i ai i au tusitusiga paia.

Na aoao mai Peresitene Dallin H. Oaks o le Au Peresitene Sili e uiga i le taua o a tatou faatinoga a o tatou sailia faaaliga ma le taitaiga:

I a’u suesuega o tusitusiga paia ua ou matauina ai, o le tele o faaaliga i fanau a le Atua e oo mai i taimi latou te galulue ai, e le o taimi latou te nofonofo ai i o latou apitaga ma faatalitali i le Alii e ta’u atu ia i latou le laasaga muamua e fai. …

O lea la, tatou te faia ai mea uma tatou te mafaia. Ona tatou faatalitali lea i le Alii mo Lana faaaliga. (Dallin H. Oaks, “I L[ok]na Lava Taimi, i L[ok]na Lava Ala,” Ensign, Aok. 2013, 22–24)

Mafaufau pe faapefea ona fesootai lenei upumoni ma le saunoaga a Peresitene Oaks i tulaga na e faailoaina muamua atu.

• Aisea e te manatu ai e finagalo le Alii ia e agai i luma i le faatuatua i taimi o le le mautonu?

E saunia e le Alii se ala

Na poloaiina Nifae e le Alii e fasioti Lapana. Sa atuatuvale o ia i le manatu o le fasioti tagata, ae sa faaauau pea ona uunaia o ia e le Agaga i luma. Sa usitai Nifae “i le siufofoga o le Agaga” (1 Nifae 4:18), faafoliga o ia lava i ofu o Lapana, ma faatalitonu Sorama, le auauna a Lapana, e aumai papatusi apamemea mai le mea e teu ai ‘oa.

Mafaufau e faitau lenei tala i le 1 Nifae 4:9–24 ma faailoga upu po o fasifuaitau e taua ia te oe. E mafai foi ona e maimoa i le “Nephi Obtains the Sacred Records” (4:20), o loo maua i le ChurchofJesusChrist.org.

E faapefea ona fesootai le aafiaga o Nifae i le mauaina o papatusi i le molimau na ia faasoa mai i le 1 Nifae 3:7?

Tuu atu i tamaiti aoga se taimi e mafaufau ai e uiga i o latou lava tulaga e ono manaomia ai i latou e agai i luma i le faatuatua. Uunaia i latou e mafaufau loloto i mea na latou aoaoina mai le aafiaga o Nifae a o latou faamaumauina filemu o latou manatu ma fuafuaga e agai ai i luma. Mafaufau e valaaulia nisi o volenitia e faasoa mai nisi o o latou manatu ma malamalamaaga pe a uma ona latou tusitusia.

• O le a se mea ua ou aoaoina i le asō e mafai ona fesoasoani ia te au i lo’u tulaga?

• O le a se mea ua ou lagonaina i le asō e mafai ona faamalosia ai lo’u faalagolago i le gafatia ma le finagalo o le Tama Faalelagi e taialaina au?

• O le a se mea e mafai ona ou faia e mulimuli ai i le faataitaiga a Nifae ma agai i luma ma le faatuatua e tusa lava pe foliga mai e le o manino lo’u ala?

Manatu ma Talaaga o Faamatalaga

Ae faapefea pe afai ou te le o mautinoa e uiga i se uunaiga ua ou maua mai le Agaga Paia?

Na aoao mai Elder Ronald A. Rasband o le Korama a Aposetolo e Toasefululua:

O lo’u aafiaga o i ai e faapea e tele lava ina fesootai mai ai le Agaga o se lagona. E te lagonaina i upu e te masani ai, e iai se uiga ia te oe, lea e uunaia oe. …

… E tatau ona tatou mautinoa i a tatou muai uunaiga. O nisi taimi tatou te fetuutuunai ai, tatou te mafaufau pe o tatou lagonaina se musumusuga faaleagaga pe na o o tatou lava mafaufauga. A amata loa ona tatou taumateina faalua o tatou lagona, e oo lava i le faatolu—ma ua tatou faia uma lava—ua tatou tulieseina le Agaga; ua tatou fesiligia fautuaga faalelagi. …

O muai uunaiga o ni musumusuga manino ia mai le lagi. A latou faamaonia pe molimau mai ia i tatou, e ao ona tatou iloaina i latou mo le tulaga ua latou i ai ma aua lava nei o tatou tuuina i latou e see ese atu. (Ronald A. Rasband, “Agaga e Taitai Mai,” Liahona, Me 2017, 94–96)

1 Nifae 4:10–12. Aisea na tatau ai ona fasiotia e Nifae ia Lapana?

Ina ia malamalama atili i le poloaiga a le Alii e faaumatia Lapana, atonu e fesoasoani le manatua o le mea lenei:

1. Na tuuina e le Alii ia Lapana avanoa e lua e faamatuu atu ai papatusi apamemea, a o le’i manaomia le aveesea o lona ola. O Lapana o se tagata pepelo ma faomea, ma e le itiiti ifo ma le faalua ona ia saili e fasioti tagata. E tusa ai ma le tulafono a Mose, o le gaoi ma le taumafai e fasioti tagata e mafai ona faasalaina uma i le oti (tagai i le Esoto 21:14; 22:2; Teuteronome 24:7).

2. Na finagalo le Alii ia maua e Liae ma e tupuga mai ia te ia talafaamaumau faatusitusiga paia, e tusa pe “fano ai le tagata e toatasi” (1 Nifae 4:13) ina ia faataunuuina ai. O papatusi apamemea, sa le gata ina faamanuiaina ai e na tupuga mai ia Liae ae faapena foi nisi o anotusi mo le Tusi a Mamona (e pei o upusii mai ia Isaia ma mai le talafaatusa a Senosa o laau o le olive fanua ma le olive vao). O le Tusi a Mamona, ua faaliliuina mai papatusi auro, ua faamanuiaina ai le isi faitau miliona o tagata ma o le a faamanuiaina ai le faitau miliona o isi. Mulimuli ane, sa lamatia nei mea uma ina ua tu Nifae i luga o Lapana ma mulimuli i le taitaiga a le Agaga.

Gaoioiga Faaopoopo e Aoao Mai Ai

1 Nifae 5:1–9. O le mana o le molimau ma le lotofaafetai

Afai e mafai ona manuia tamaiti aoga mai le aoaoina e uiga i le mana o le molimau ma le taua o le lotofaafetai, mafaufau e faitau le 1 Nifae 5:1–9 pe maimoa le vitio “Saraih Rejoices in the Return of Her Sons” (4:05).

O fesili e pei o fesili nei e mafai ona faaaoga mo talanoaga:

• Na faapefea ona tali atu Liae i faitioga a Saraia? (Atonu e te manao e faailoa atu faapea na tali atu Liae faatasi ma le molimau ma le loto talitonu i le Alii, nai lo le mata’u po o le masalosalo. Sa ia le’i tali atu i le ita po o le le onosai.)

• O le a le mea e mafai ona tatou aoaoina mai le tali a Liae ia Saraia?

• O le a se upumoni e mafai ona tatou aoao mai i le fuaiupu 9? (Fesoasoani i tamaiti aoga e faailoa mai se upumoni e pei o lenei: A tatou maua faamanuiaga mai le Atua, e mafai ona tatou filifili e taofi ma avatu ia te Ia le faafetai.)

1 Nifae 5:10-22. O le tāua o tusitusiga paia

Ina ia faamamafa atu le taua o tusitusiga paia, mafaufau e faitau faatasi ma tamaiti aoga le 1 Nifae 5:10–22 pe faaali le vitio “Lehi Testifies of the Importance of Scripture” (1:41). E mafai e tamaiti aoga ona sailiili i fuaiupu mo anotusi taua o loo i ai i papatusi apamemea. E mafai ona latou faasoa mai pe na faapefea ona avea tusitusiga paia ma se mea “aoga tele” (1 Nifae 5:21) ia i latou ma o latou aiga.