1 Nifae 2

“Ua E Saili Mai ia te A’u ma le Filiga”

O nisi taimi e poloaiina ai i tatou e le Alii e fai mea atonu e faigata ona tatou malamalama i ai pe faia. Ina ua uma ona valaau atu i tagata o Ierusalema ia salamo, sa usitai Liae i se faaaliga e siitia atu lona aiga i le vao. Nai lo le muimui e pei o Lamana ma Lemuelu, sa liliu atu Nifae i le Alii mo se malamalama atili ma sa faamalūlūina lona loto. O lenei lesona ua faamoemoe e fesoasoani ia te oe ia lagona ai se naunautaiga sili e liliu atu i le Alii pe a Ia fetalai atu ia te oe e fai ni mea faigata.

Manatuaina o le faitulafono. Pe a aoao atu e uiga i tulafono ma poloaiga a le Atua, ia manatua e aoao atu foi e uiga i le faitulafono. Fesoasoani i tamaiti aoga e mafaufau i mea ua aoao mai e poloaiga a le Atua e uiga ia te Ia, o Lona finagalo e taiala ma faamanuia i latou, ma le alofa o loo ia te Ia mo i latou. Fesoasoani i tamaiti aoga ia malamalama o tulafono ua tuuina mai e se Tama oi le Lagi alofa e fesoasoani ai ia i latou ia avea atili e faapei o Ia ma Lona Alo Pele.

Sauniuniga a le tamaitiiti aoga: Fesili i se uo po o se tagata o le aiga, “O anafea na e saili ai ma maua le fesoasoani a le Alii e talitonu ai ma usitai i Ana upu, e tusa lava pe sa faigata?”

Gaoioiga e ono Mafai Ona Aoao Ai

Tali atu i le fautuaga a le Alii

Mafaufau e faaali atu tulaga faataitai ma fesili nei. Tuu atu ia lava se taimi i tamaiti aoga e mafaufau loloto ai ma talanoaina pe faapefea ona latou taliina fesili.

Manatu faapea o loo e faalogologo i le konafesi aoao ma ua tuuina mai e le Peresitene o le Ekalesia se fautuaga e te manatu o le a faigata ona mulimuli ai. A maea le konafesi, ua amata ona e faalogo atu i isi tagata o le Ekalesia o faitio e uiga i lana fautuaga ma fesili mai pe aisea e saunoa mai ai le perofeta ia i tatou e fai lenei mea. A o e faalogologo i nei finauga, ua amata ona e mafaufau po o le a se mea e tatau ona e faia.

• O a ni auala le lelei e tali atu ai i faitioga ma tuuaiga a tagata o le ekalesia?

• O a nisi o auala lelei i lenei tulaga? O le a le mea o le a faafiafiaina ai le Alii?

I le 1 Nifae 2, o le a e vaai ai i fanau a Liae o tali atu i auala eseese i se poloaiga faigata na tuuina atu e le Atua ia i latou e ala mai i Lana perofeta. A o e suesue, vaavaai mo mataupu faavae e mafai ona fesoasoani ia te oe pe afai e foliga mai e faigata ona mulimuli i le perofeta.

Ua poloaiina e le Alii Liae e tuua Ierusalema

Atonu e te manatua na poloaiina Liae e le Alii e lapatai atu i tagata o Ierusalema o le a faaumatia i latou pe afai latou te le salamo. Faitau le 1 Nifae 2:1–5, ma vaavaai mo le fautuaga a le Alii ia Liae ina ua uma ona ia talai atu le salamo. Atonu foi e te manao e matamata le “Lehi Counsels with His Family to Leave Jerusalem” (2:27), o loo maua i le ChurchofJesusChrist.org.

Mafaufau e faaali atu le faafanua lenei. Ina ia fesoasoani i tamaiti aoga e vaai faalemafaufau i le mamao atonu na malaga ai le aiga o Liae, e mafai foi ona e tuuina atu se faataitaiga o se nofoaga pe tusa ma le 200 maila (320 kilomita) mai le mea o loo outou i ai ma au tamaiti aoga.

O le mamao atonu na malaga ai le aiga o Liae mai Ierusalema i tuaoi o le Sami Ulaula pe tusa ma le 200 maila (320 kilomita). O la latou malaga semanu e alu ai le tele o aso ma taitai atu ai i latou i se atunuu vevela ma le naumati lea sa lauiloa i le i ai o tagata gaoi e faatalitali e faoa tagata malaga e lei saunia.

• Afai o oe o se tasi o le fanau a Liae, o le a sou manatu o le a sau tali atu i lea tulaga? Aisea?

• O a ni au fesili atonu sa i ai?

• E faapefea ona e vaaia le alofa mutimutivale o le Alii o faaalia i Lana poloaiga e tuua Ierusalema?

O se tasi auala e fesoasoani ai i tamaiti aoga e suesue lenei mataupu o le fesoasoani lea ia i latou e faatusatusa ma le eseesega o tali a Lamana ma Lemuelu i tali a Nifae ma Sama. O le faatusatusaina ma le eseesega o tagata taitoatasi i tusitusiga paia o se tomai e suesue ai tusitusiga paia lea e mafai ona fesoasoani i tamaiti aoga e mafaufau ai i a latou lava taumafaiga e mulimuli i le Atua. Mafaufau e faataitai e tamaiti aoga lenei tomai e ala i le fatuina o le siata o loo i lalo i luga o le laupapa paepae. Valaaulia tamaiti aoga e tusi mea ua latou mauaina i le laupapa. Atonu foi e aoga le faasino atu o lenei mea o se tomai i le suesueina o tusitusiga paia e mafai ona latou faaaogaina i tusitusiga paia i a latou lava suesuega faaletagata lava ia.

Tali a Lamana ma Lemuelu	Tali a Nifae ma Sama
Tali a Lamana ma Lemuelu 1 Nifae 2:11–13	Tali a Nifae ma Sama 1 Nifae 2:16-21

Atonu foi e te manao e maimoa le “Ua Tatalo Nifae mo Lamana ma Lemuelu” (6:02), o loo maua i le ChurchofJesusChrist.org, ma vaavaai mo isi malamalamaaga e mafai ona e faaopoopo atu i lau siata.

• O le a se mea na e matauina a o e faatusatusaina faatinoga a Lamana ma Lemuelu i faatinoga a Nifae ma Sama?

  O le valaaulia o tamaiti aoga e aotele mai mea ua latou aoaoina e mafai ona avea o se auala lelei e mafai ai ona latou faailoa mai mataupu faavae mai tusitusiga paia. O le a tele ina iloa e tamaiti aoga ia mataupu faavae e talitutusa ma mataupu faavae o loo i le tusi lesona a le faiaoga. Afai e faasoa mai e tamaiti aoga upumoni e ese mai mea o loo i totonu o le tusi lesona, atonu o mea latou te mauaina o le a sili atu ona anoa ia latou. Saili le taitaiga mai le Agaga Paia e iloa ai po o a mataupu faavae o le a sili ona anoa e talanoaina ma le vasega.

• I se fuaiupu se tasi, e faapefea ona e aoteleina mea sa e aoaoina mai faataitaiga a Lamana ma Lemuelu? E faapefea ona e aoteleina mea ua e aoaoina mai faataitaiga a Nifae ma Sama?

Faaaoga sina taimi e iloilo ai mea na e tusia. Mafaufau poo a faatinoga poo faamoemoega e sili ona talitutusa ma au oe lava ia. O a manaoga, manatu, po o lagona e oo mai ia te oe a o e faia lenei faatusatusaga?

Mai ia Lamana ma Lemuelu atonu na e iloaina ai o le le iloaina o faiga a le Alii ma le le talitonu i Ana perofeta e mafai ona mafua ai ona tatou muimui. Mai ia Nifae atonu na e aoao ai a tatou saili ma le filiga ia malamalama i poloaiga a le Alii, e mafai ona Ia faamaluluina o tatou loto e fesoasoani ia i tatou ia talitonu ma usiusitai.

O le faamatalaga a Nifae e faapea o le Alii “na faamaluluina [lona] loto” (1 Nifae 2:16) ua faailoa mai ai, e faapei o Lamana ma Lemuelu, sa le o se poloaiga faigofie lenei mo ia e usitaia. Mafaufau pe na faapefea e le faaiuga a Nifae e liliu atu i le Alii i lenei tulaga ona aafia ai lona olaga atoa. Mafaufau pe na faapefea ona ese olaga o Lamana ma Lemuelu pe ana faapea la te mulimuli i le faataitaiga a Nifae.

• O a nisi o tulaga o loo e feagai pe atonu e te feagai ai e te manuia ai mai le mulimuli i le faataitaiga a Nifae?

• E mafai faapefea e le sailia ma le lotomaualalo o le Alii i nei tulaga, nai lo le le talitonu ma le muimui, ona aafia ai lou olaga i le taimi nei ma i le lumanai?

• O le a se mea ua e malamalama i ai e uiga i le Atua e mafai ona taofia ai oe mai le muimui pe a Ia fetalai atu ia te oe e fai se mea faigata?

Na faasoa mai e Elder Neil L. Andersen o le Korama a Aposetolo e Toasefululua mea e mafai ona tatou faia pe a tatou le muai malamalama ai pe ioe i fautuaga mai le perofeta a le Alii.

Aua nei faate’ia oe pe a i ai se taimi e le muai ogatusa ai ou lava manatu patino ma aoaoga a le perofeta a le Alii. O taimi nei o le aoaoina, o le lotomaualalo, pe afai tatou te o ifo i o tatou tulivae i le tatalo. Tatou te savavali i luma i le faatuatua, faalagolago i le Atua, iloaina o le a i ai le taimi o le a tatou maua ai le manino atili faaleagaga mai lo tatou Tama Faalelagi. Sa faamatalaina e le tasi perofeta le meaalofa lemafaatusalia o le Faaola o le “tofatumoanaina [o] le loto o le Alo i le finagalo o le Tamā.” [Mosaea 15:7]. O le lafoai atu o o tatou loto i le finagalo o le Atua, o le mea moni, e le o le lafoai ua toilalo ae o le amataga lea o se manumalo mamalu. (Neil L. Andersen, “O Le Perofeta a le Atua,” Ensign poo le Liahona, Me 2018, 26)

• O a faamanuiaga ua oo mai ia te oe a o e saili e tuuina atu lou loto i le Tama Faalelagi, e pei ona sa faia e Iesu ma Nifae?

Faaaoga sina taimi e tusifaamaumau ai ou manatu ma uunaiga faaleagaga. O le a se mea ua e aoaoina e te manao e manatua? O a ni fetuunaiga ua e lagona le musuia e fai i lou olaga e faavae i mea ua e suesueina i le aso?

Manatu ma Talaaga o Faamatalaga

E mafai faapefea e le faamalosia o la’u sootaga ma le Faaola ona aafia ai le ala ou te tali atu ai i tulaga faigata?

Na aoao mai foi Elder Craig C. Christensen o le Au Fitugafulu:

Ina ua uma ona faalogo atu i lona tama o tautala i le tele o ona aafiaga faaleagaga, sa manao Nifae ia iloa mea na iloa e lona tama. O se tulaga na sili atu nai lo le na o se fiailoa—o se mea sa ia galala e fiaai ma fiainu i ai. E ui sa “talavou lava” o ia ae sa ia te ia “le naunau tele e fia iloa mealilo a le Atua.” [1 Nifae 2:16]. Sa ia naunau ia “vaai, ma faalogo, ma iloa e uiga i ia mea, i le mana o le Agaga Paia.” [1 Nifae 10:17].

… Ona o lona loto talitonu ma ana taumafaiga maelega, sa faamanuiaina ai Nifae i se aafiaga ofoofogia. Sa ia maua se molimau o le soifua mai, soifuaga, ma le Faasatauroga o le Faaola o Iesu Keriso lea o le a oo mai; sa ia vaai i le oo mai o le Tusi a Mamona ma le Toefuataiga o le talalelei i aso e gata ai—o taunuuga uma ia o lona manaoga faamaoni ia iloa mo ia lava ia.

O nei aafiaga patino ma le Alii na saunia ai Nifae mo faigata ma luitau o le a vave ona feagai ma ia. O ia mea na mafai ai ona ia tu malosi e tusa lava pe na tauivi isi tagata o lona aiga. Na mafai ona ia faia lenei mea ona sa ia aoaoina mo ia lava ma na ia iloaina mo ia lava. Na faamanuiaina o ia i lana lava molimau. (Craig C. Christensen, “Ua Ou Iloa Nei Mea Mo Au Lava Ia,” Ensign poo le Liahona, Nov. 2014, 50–51)

Vaai faalemafaufau i tusitusiga paia

Ina ia vaai faalemafaufau atili i tusitusiga paia, mafaufau e maimoa le “Lehi’s Family Departs into the Wilderness” (3:47) e faaopoopo i le iloiloina o le anotusi.

Gaoioiga Faaopoopo e Aoao Mai Ai

Ia lotofaafetai i soo se tulaga

A uma ona suesue e uiga i le aiga o Liae ua tuua Ierusalema, valaaulia tamaiti aoga e faitau le 1 Nifae 2:7, ma vaavaai mo mea na faia e Liae. Talanoaina le faataitaiga a Liae o le tuuina atu o le faafetai e ala i le faia o fesili e pei o le “Aisea e te manatu ai na avatu e Liae le faafetai ina ua mavae le tuulafoaiina o le tele o mea?” po o le “O le a le aafiaga e te manatu sa i ai i le lotofaafetai o Liae i lona aiga?”

Faasoa atu le saunoaga lenei a Peresitene Dieter F. Uchtdorf, a o avea ma se tasi o le Au Peresitene Sili, ma uunaia tamaiti aoga e taumafai ia lotofaafetai i soo se tulaga.

E mafai ona ou fautua atu ia tatou mafaufau i le lotofaafetai o se aga masani, o se ala o le olaga e tutoatasi e aunoa ma le aafia i ni tulaga tatou te oo i ai? I se isi faaupuga, ou te fautua atu e faapea nai lo le “faafetai mo mea,” ia tatou taulai atu ia “faafetai i o tatou tulaga”—e tusa lava po o a na mea. (Dieter F. Uchtdorf, “Ia Lotofaafetai i Soo Se Tulaga,” Ensign po o le Liahona, Me 2014, 75)

Aafiaga mo se taimi umi o faaiuga

Fai atu i tamaiti aoga e faasoa mai o latou lagona i faaiuga a Nifae, Sama, Lamana, ma Lemuelu i le 1 Nifae 2 atonu na aafia ai o latou olaga atoa. Valaaulia tamaiti aoga e suesue nisi po o fuaitau uma nei o mau. A o latou suesue, valaaulia i latou e mafaufau pe na faapefea e mea na tutupu o loo tusia i le 1 Nifae 2 ona aafia ai le tali atu a Lamana, Lemuelu, ma Nifae i nei fuaiupu.

	Lamana ma Lemuelu	Nifae
Ua poloaiina atalii o Liae e toe aumai papatusi apamemea	Lamana ma Lemuelu 1 Nifae 3:5	Nifae 1 Nifae 3:6-7
Ua faamautinoa mai e se agelu i atalii o Liae o le a tuuina atu e le Alii Lapana i o latou lima	Lamana ma Lemuelu 1 Nifae 3:31	Nifae 1 Nifae 4:1-3
Ua faasoa mai e Liae lana faaaliga i le laau o le ola	Lamana ma Lemuelu 1 Nifae 15:2–3, 8–9	Nifae 1 Nifae 10:17; 11:1
Ua gau le aufana a Nifae	Lamana ma Lemuelu 1 Nifae 16:18-20	Nifae 1 Nifae 16:23, 30-32
Ua poloaiina Nifae e fau se vaa	Lamana ma Lemuelu 1 Nifae 17:17-18	Nifae 1 Nifae 17:8–9, 50-51
Ua tali atu atalii o Liae i le taitaiga fou ina ua mavae le maliu o Liae	Lamana ma Lemuelu 2 Nifae 5:1–3, 20	Nifae 2 Nifae 5:5-11