1 Nephi 16–18

Ang Liahona: Usa ka Giya sa Kamingawan

Nakabati ka na ba sukad nga wala kahibalo ug naglibog kon unsa ang kinahanglan nimong buhaton o tutokan sa kinabuhi? Unsa kaha ang kalahian sa imong kinabuhi kon mas makaila ka sa direksiyon nga gipaningkamotan sa Ginoo nga ihatag kanimo? Sa wala madugay human mibiya ang pamilya ni Lehi sa Jerusalem, ang Ginoo mihatag kanila og dugang nga direksiyon pinaagi sa Liahona. Kini nga leksiyon makatabang kanimo sa pag-ila ug pagsunod sa giya sa Ginoo sa imong kinabuhi.

Paggiya sa mga tigkat-on sa pagtinguha og personal nga pagpadayag.Tabangi ang mga estudyante sa pagtuo nga sila mahimong matudloan ug mapalig-on pinaagi sa Espiritu Santo. Dasiga sila sa pagduol sa Langitnong Amahan diha sa pag-ampo aron sa pagdapit sa Espiritu sa pagtudlo kanila.

Pagpangandam sa estudyante: Dapita ang mga estudyante sa pagmatikod sa mga paagi nga ang Ginoo naghatag kanila og giya ug direksiyon sa tibuok adlaw.

Mga Posibleng Kalihokan sa Pagkat-on

Usa ka giya sa kamingawan

Ang mosunod nga kalihokan gituyo aron sa pagtabang sa mga estudyante nga makakita og koneksiyon [relate] ngadto sa kasinatian ni Lehi nga gihatagan sa Liahona. Usa ka alternatibo tingali alang sa mga estudyante mao ang paghimo og ilang kaugalingon nga drowing base sa unsay ilang nahibaloan na mahitungod sa Liahona ug dayon sa paggamit sa impormasyon kon gikinahanglan aron madugangan ang pagsabot.

Susiha ang pipila sa mga paghulagway sa milagrosong himan nga gihatag ngadto kang Lehi sa wala madugay human siya nangulo sa iyang pamilya gikan sa Jerusalem.

• Unsa ang imong nahibaloan mahitungod sa butang nga gipakita niini nga mga hulagway? (tan-awa sa 1 Nephi 16:10).

• Unsa ang katuyoan niini?

Gamita ang mosunod kon gikinahanglan aron matabangan ang mga estudyante nga makasabot unsa ang Liahona. Mahimong makatabang usab ang pagtan-aw sa “Mihatag ang Ginoo og Liahona” (3:02), anaa sa ChurchofJesusChrist.org.

Human gimandoan sa Ginoo sa pagbiyahe og mas layo pa ngadto sa kamingawan, si Lehi nahigmata nga nakakita og usa ka milagroso nga himan, o instrumento, nga gihatag sa Ginoo. Ang Liahona maoy “usa ka tumbaga nga bola nga adunay duha ka igpupunting nga mohatag og mga padulnganan—ingon nga usa ka kompas—ug usab usa ka espirituhanon nga panudlo ngadto ni Lehi ug sa iyang mga sumusunod kon sila magmatarong” (Giya ngadto sa mga Kasulatan, “Liahona,” scriptures.ChurchofJesusChrist.org).

Hunahunaa kon unsa kaha kini nga momata usa ka buntag ug makakita sa tupad sa imong pultahan og instrumento sama sa Liahona nga imong magamit nga mogiya kanimo sa tibuok nimong adlaw.

Ikonsiderar ang pagpangutana sa mosunod nga mga pangutana, timan-i ang mga tubag sa estudyante sa pag-refer og balik ngadto sa paghuman makatuon ang mga estudyante kon sa unsang paagi ang Liahona sama sa Espiritu Santo.

• Unsa kaha ang kalahian sa imong kinabuhi kon aduna kay butang nga sama sa Liahona nga mogiya kanimo?

• Unsa ang pipila ka mga kahimtang nga imong giatubang karon nga gusto nimo og dugang nga direksiyon ug giya?

Si Elder David A. Bednar sa Korum sa Napulog Duha ka Apostoles mihulagway og usa ka rason nga kinahanglan natong tinguhaon nga mas masabtan kon sa unsang paagi milihok ang Liahona. Timan-i nga ang hugpong sa mga pulong nga “usa ka klase ug anino” nagpasabot sa mga butang, mga panghitabo, mga istorya, o mga tawo nga nagrepresentar sa laing butang.

Ang paghulagway sa Basahon ni Mormon sa Liahona, ang tigtudlo o kompas nga gigamit ni Lehi ug sa iyang pamilya sa ilang panaw sa kamingawan, gituyo pag-apil diha sa rekord isip usa ka klase ug anino sa atong panahon ug isip usa ka mahinungdanong leksiyon kabahin sa unsay atong buhaton aron matagamtam ang mga panalangin sa Espiritu Santo. (David A. Bednar, “Nga Kita Unta sa Kanunay Makabaton sa Iyang Espiritu uban Kanato,” Liahona, Mayo 2006, 30)

Mga pagkaparehas tali sa Liahona ug sa Espiritu Santo

Sa imong journal sa pagtuon, paghimo og tsart sama sa mosunod. Ikonsiderar ang paglista sa pipila ka mga pagkaparehas tali sa Liahona ug sa Espiritu Santo nga nahibaloan na nimo. Samtang magtuon ka, ikonsiderar unsay imong nakat-onan nga makatabang nimo nga mas masabtan ang Espiritu Santo ug unsaon nimo nga mas magamit kini nga gasa sa imong kinabuhi.

Mga Kinaiya sa Liahona	Mga pagkaparehas sa Espiritu Santo
Mga Kinaiya sa Liahona	Mga pagkaparehas sa Espiritu Santo

Ikonsiderar ang pagpakita og susama nga tsart ug dapita ang mga estudyante sa pagrekord kon unsay ilang nakat-onan aron maandam sila sa paghisgot sa ilang mga nadiskobrehan.

Basaha ang mosunod nga mga pakisayran sa kasulatan, ug irekord ang mga detalye mahitungod sa Liahona sa wala nga kolum sa imong tsart. Mahimong maglakip kini kon sa unsang paagi milihok ang Liahona, nganong gihatag kini, ug unsay nahitabo nga mihunong kini sa paglihok. Dayon mainampuong ikonsiderar kon sa unsang paagi kining mga detalye mahitungod sa Liahona may kalabotan o nagsimbolo sa mga buhat sa Espiritu Santo. Irekord ang mga pagkaparehas sa tuo nga kolum sa imong tsart. Pananglitan, sa 1 Nephi 16:10, atong nakat-onan nga ang Liahona mitudlo sa dalan nga si Lehi ug ang iyang pamilya kinahanglang moadto diha sa kamingawan. Sa samang paagi, ang Espiritu Santo makatudlo sa direksiyon nga kinahanglan natong adtoan sa kinabuhi.

Tinoa kon mas mapuslanon ba nga ipabasa sa mga estudyante ang mga tudling sa kasulatan nga magtinagsa, magtinagurha, o sa gagmay nga mga grupo. Para sa pagpalain, mahimo nimong i-post ang pito ka mga litrato sa Liahona libot sa kwarto nga adunay usa sa mosunod nga mga pakisayran sa kasulatan nga gilakip sa matag usa niini. Ang mga estudyante mahimong molibot sa palibot sa kwarto nga magsusi sa lain-laing mga litrato ug magrekord sa mga pagtulun-an mahitungod sa Liahona diha sa ilang mga tsart. Mahimo dayon nga mobalik ang mga estudyante sa ilang mga lingkoranan aron mamalandong sa ilang kaugalingon sa pagkaparehas tali sa Liahona ug sa Espiritu Santo.

• 1 Nephi 16:10

• 1 Nephi 16:15–16

• 1 Nephi 16:18–20, 25–27

• 1 Nephi 16:28

• 1 Nephi 16:29

• 1 Nephi 18:8–13, 21–22

• Alma 37:38–42

Dapita ang mga estudyante sa pagpaambit sa mga kamatuoran nga ilang nakat-onan mahitungod sa Espiritu Santo gikan sa ilang pagtuon. Ang mga ehemplo sa mga kamatuoran nga tingali ilang nailhan naglakip sa mosunod: samtang kita maminaw sa mga pag-aghat sa Espiritu Santo, ang Ginoo makagiya kanato sa atong panaw sa kinabuhi; ang Espiritu Santo molihok sa atong kinabuhi sumala sa hugot nga pagtuo, kakugi, ug pagsunod nga atong gihatag niini; ug ang Espiritu Santo naghatag kanato og panabot mahitungod sa mga paagi sa Ginoo.

Kon ang tsart gipakita alang sa klase, ikonsiderar ang pagdapit sa mga estudyante sa pagsulat sa unsay ilang nakat-onan mahitungod sa Liahona. Dayon mahimo ninyong dungan nga hisgotan kon sa unsang paagi kining mga kamatuoran may kalabotan sa pagsabot ug paggamit sa gasa sa Espiritu Santo.

• Kanus-a ikaw o ang uban nakasinati og usa o daghan pa niini nga mga kamatuoran mahitungod sa Espiritu Santo?

• Sa unsang paagi nga ang pagtinguha sa pag-ila ug pagsunod sa direksiyon gikan sa Espiritu Santo makaapekto sa imong relasyon sa Langitnong Amahan ug ni Jesukristo?

Paggahin og panahon sa pagpamalandong sa imong abilidad sa pagdawat og giya gikan sa Espiritu Santo ug sa impluwensiya niini sa mga pagpili nga imong gihimo. Ikonsiderar ang pagrekord sa bisan unsang mga hunahuna o mga impresyon nga aduna ka.

Kon ang mga estudyante nagkinahanglan og dugang nga tabang sa pag-ila ug pagsunod sa direksiyon sa Espiritu Santo, ipaambit ang mga pamahayag gikan sa seksiyon sa “Komentaryo ug Background nga Impormasyon” sa kataposan niini nga leksiyon. Dugang pa, kon itugot sa panahon ug makaayo sa mga estudyante, ikonsiderar ang paggamit sa seksiyon nga “Dugang nga mga Kalihokan sa Pagkat-on”.

Paghatag og pagpamatuod sa kamahinungdanon sa pagtugot sa Espiritu Santo nga mogiya sa atong mga kinabuhi. Mahimo usab nga mopaambit ang mga estudyante sa ilang pagpamatuod ug mga kasinatian.

Komentaryo ug Background nga Impormasyon

Sa unsang paagi nga ang Liahona sama sa Espiritu Santo?

Si Elder David A. Bednar sa Korum sa Napulog Duha ka Apostoles mitudlo:

Ingon nga si Lehi gipanalanginan sa karaang panahon, ang matag usa kanato niining panahona gihatagan og espirituhanong kompas nga makagiya ug makatudlo kanato panahon sa atong mortal nga panaw. …

Samtang kita magpadayon subay sa dalan sa kinabuhi, makadawat kita og giya gikan sa Espiritu Santo ingon nga si Lehi gigiyahan pinaagi sa Liahona. …

Ang Espiritu Santo molihok sa atong kinabuhi sama gayod sa gihimo sa Liahona alang kang Lehi ug sa iyang pamilya, sumala sa kahugot sa atong pagtuo ug kakugi ug pagtagad. (David A. Bednar, “Nga Kita Unta sa Kanunay Makabaton sa Iyang Espiritu uban Kanato,” Liahona, Mayo 2006, 30–31)

Unsaon nako nga mas mailhan ang Espiritu Santo sa akong kinabuhi?

Si Presidente Boyd K. Packer (1924–2015) sa Korum sa Napulog Duha ka Apostoles mitudlo:

Ang Espiritu dili mokuha sa atong pagtagad pinaagi sa pagsinggit o sa pag-uyog kanato sa bug-at nga kamot. Kondili mohunghong kini. Hinay kini nga mohapuhap nga kon kita bisi kaayo mahimong dili gayod nato kini mabati. …

Usahay, moduso kini nga kita igong mopatalinghog niini. Apan kasagaran, kon dili kita mopatalinghog sa malumo nga pagbati, ang Espiritu moatras ug mohulat nga kita mangita ug maminaw ug mosulti sa atong kaugalingong sinultihan, sama kang Samuel sa karaang panahon, “Sulti [Ginoo], kay ang imong sulugoon namati.” (1 Sam. 3:10.) (Boyd K. Packer, “The Candle of the Lord,” Ensign, Ene. 1983, 53)

Dugang nga mga Kalihokan sa Pagkat-on

Ubang pagkaparehas sa Liahona

Dapita ang mga estudyante sa pag-ila sa ubang mga himan agi og dugang sa Espiritu Santo nga gigamit sa Ginoo sa paghatag kanato og giya. Ang mga pananglitan naglakip sa patriyarkal nga mga panalangin, mga kasulatan, ug tambag gikan sa mga ginikanan o sa mga lider sa Simbahan. Mahimong hisgotan sa mga estudyante kon sa unsang paagi kining dugang nga mga kapanguhaan sama sa Liahona.

Ang Liahona ug ang patriyarkal nga mga panalangin

Kon ang mga estudyante makabenepisyo gikan sa panaghisgotan mahitungod sa patriyarkal nga mga panalangin, ikonsiderar ang pag-refer sa impormasyon sa “Patriyarkal nga mga Panalangin” (Mga Hisgotanan sa Ebanghelyo, topics.ChurchofJesusChrist.org).

Ang mosunod nga mga pamahayag ni Presidente Thomas S. Monson (1927–2018) ug ni Presidente Bonnie H. Cordon, Kinatibuk-ang Presidente sa Young Women, mahimo usab nga makatabang.

Ang sama nga Ginoo kinsa mihatag og Liahona alang kang Lehi naghatag kanimo ug kanako karon og usa ka talagsaon ug bililhon nga gasa sa paghatag og direksiyon sa atong mga kinabuhi, sa pagbutang og timaan sa mga kapeligrohan ngadto sa atong kahilwasan, ug sa pagplano sa dalan, bisan sa luwas nga agianan—dili ngadto sa gisaad nga yuta, apan sa atong langitnong puloy-anan. Ang gasa nga akong gipasabut nailhan nga imong patriyarkal nga panalangin. …

… Ang imong panalangin dili angay nga pil-on og maayo ug itago. Dili kini i-frame o ipatik. Hinunoa, kini kinahanglang basahon. Kini aron higugmaon. Kini kinahanglan nga sundon. Ang imong patriyarkal nga panalangin motabang kanimo sa pinakangitngit nga kagabhion. Kini mogiya kanimo sa mga kapeligrohan sa kinabuhi. … Ang imong patriyarkal nga panalangin alang kanimo usa ka personal nga Liahona nga magplano sa imong agianan ug mogiya sa imong dalan. (Thomas S. Monson, “Your Patriarchal Blessing: A Liahona of Light,” , Nob. 1986, 65–66)

Pangitaa ang inyong patriyarkal nga panalangin, tayhopa ang mga abog kon gikinahanglan, apan tun-i kini kanunay. Kon wala pa ka, pagkuha—sa dili madugay. Ayaw paglangan sa pagdiskobre og unsay gusto sa Ginoo nga isulti kaninyo karon mahitungod sa kon kinsa kamo. (Bonnie H. Cordon, “Duol ngadto kang Kristo ug Ayaw Pag-inusara,” Liahona, Nob. 2021, 11)

Kon ang mga estudyante wala makadawat sa ilang patriyarkal nga panalangin, mahimo nimo silang dapiton nga mainampoong ikonsiderar ang pagdawat niini ug sa paghisgot niini uban sa ilang mga ginikanan o sa mga lider sa Simbahan.