1 Nephi 16–17

Paglihok sa Hugot nga Pagtuo sa Malisod nga mga Sitwasyon

Hunahunaa ang mga hagit nga giatubang ni Lehi ug sa iyang pamilya human mibiya sa Jerusalem ug samtang nagpuyo sa kamingawan. Ang paagi ni Nephi sa pagreak sa iyang mga hagit naghatag kanato og ehemplo kon unsaon pagsanong sa atong kaugalingong mga pagsulay sa kinabuhi. Kini nga leksiyon makatabang nimo nga makat-on unsaon sa pagpahisama sa mga kasulatan ngadto sa imong kaugalingon ug sa pag-atubang sa mga hagit uban sa hugot nga pagtuo.

Pagtabang sa mga estudyante sa pagpalambo sa mga kahanas sa pagtuon. Aron matabangan ang mga estudyante nga magmalamposon sa ilang pagtuon sa kasulatan, giyahi sila sa lain-laing mga kahanas ug pamaagi sa pagtuon sa kasulatan. Pagpili og mga kahanas ug mga pamaagi nga nakatutok sa pagtabang sa mga estudyante sa pagdapit sa Espiritu ngadto sa ilang pagtuon, mas makasabot sa mga kasulatan, ug sa paggamit sa mga baroganan sa ebanghelyo sa ilang mga kinabuhi.

Pagpangandam sa estudyante: Dapita ang mga estudyante sa pagbasa sa 1 Nephi 19:23 ug hunahunaa unsa ang gipasabot sa pagpahisama sa mga kasulatan sa atong mga kaugalingon.

Mga Posibleng Kalihokan sa Pagkat-on

Pagpangita og kahulugan diha sa mga kasulatan

Ang mosunod gituyo aron sa pagtabang sa mga estudyante sa paghunahuna mahitungod sa bili sa pagpahisama sa mga kasulatan ngadto sa ilang mga kinabuhi. Kini tingali usa ka maayong panahon sa pag-follow up kon kumusta na ang ilang personal nga pagtuon sa kasulatan. Agi og puli sa senaryo, mahimo kang magsugod pinaagi sa pagpangutana, “Unsa ang pipila ka mga problema nga kasagaran aduna ang mga tin-edyer sa pagbasa sa mga kasulatan?”

Hunahunaa ang usa ka tawo nga nagpakigbahin kanimo nga siya nagtuo nga ang pagbasa sa mga kasulatan dili takos sa iyang panahon. Gibati niya nga ang mga kasulatan dili kaayo mapuslanon alang sa mga hagit ug mga isyu sa atong panahon.

• Unsaon nimo pagtubag sa iyang kabalaka?

Pamalandongi ang imong kaugalingong pagtuon sa kasulatan ug ang bili ug ang gamit sa mga kasulatan sa imong kinabuhi. Ikonsiderar ang mga butang nga nakapalisod sa paghimo sa mga kasulatan nga makahuluganon ug ang bisan unsa nga nakatabang kanimo sa pagbuntog niini nga mga babag.

Aron matabangan ang iyang mga igsoong lalaki nga makat-on ug mogamit sa mga kasulatan sa ilang panahon, si propeta Nephi mitudlo og bililhong leksiyon nga makatabang usab nato sa atong pagtuon sa kasulatan.

Basaha ang 1 Nephi 19:23, nga mangita sa unsay gitudlo ni Nephi.

• Unsaon nimo paghulagway sa imong kaugalingong mga pulong ang kamatuoran nga gitudlo ni Nephi?

Pagpahisama sa mga kasulatan sa atong mga kaugalingon

Usa ka kamatuoran nga tingali imong maila gikan niini nga bersikulo mao nga samtang atong ipahisama ang mga kasulatan ngadto sa atong mga kaugalingon, kita makakat-on ug makakuha og kaayohan gikan niini.

• Unsa ang imong nahibaloan mahitungod sa pagpahisama sa mga kasulatan?

• Unsa nga mga kasinatian ang imong nasinati sa pagpahisama sa mga kasulatan?

• Sumala sa bersikulo 23, unsa ang katuyoan ni Nephi sa pagbasa ug pagpahisama sa mga pulong ni Isaias?

• Sa unsang paagi nga ang pagpahisama sa mga kasulatan makatabang nimo nga makaila ug makatuo kang Jesukristo sa mas hingpit nga paagi?

Ang pagpahisama sa mga kasulatan nagpasabot sa pagpangita og koneksiyon sa unsay narekord niini ngadto sa atong kaugalingong mga kinabuhi.

Ang mosunod nga proseso makatabang kanimo sa imong mga paningkamot sa pagpahisama sa mga kasulatan ngadto sa imong kinabuhi. Irekord kini nga mga lakang sa imong journal sa pagtuon.

Ipakita ang mosunod nga mga lakang aron ang mga estudyante makadangop niini sa tibuok leksiyon.

1. Pangita og importanteng mga detalye.

2. Paghimo og mga pagtandi sa imong kinabuhi.

3. Pangita og bililhong mga leksiyon.

4. Tinoa ang personal nga aplikasyon.

Niini nga leksiyon, makabaton ka og mga kahigayonan sa pagbansay sa pagpahisama sa mga kasulatan ngadto sa imong kinabuhi samtang magtuon ka sa pipila ka mga panghitabo nga nahitabo sa pamilya ni Lehi didto sa kamingawan.

Si Nephi nabalian sa iyang gapasan

Ang mosunod gituyo aron sa paggiya sa mga estudyante sa pagpahisama sa mga kasulatan ug sa pag-andam kanila sa pagbuhat niini sa ilang kaugalingon unya sa leksiyon.

Lakang 1: Pangita og importante nga mga detalye

Pagbansay niini nga lakang pinaagi sa pagtuon sa 1 Nephi 16:17–25, 30–32 ug mangita og importanteng mga detalye. Kini nga mga detalye mahimong maglakip sa mga tawo, mga dapit, mga butang, mga aksyon, o mga panghitabo. Mahimo ka usab nga motan-aw sa “Gigiyahan sa Ginoo ang Panaw ni Lehi,” anaa sa ChurchofJesusChrist.org, gikan sa time code 5:33 hangtod sa 16:18 isip parte sa imong pagtuon.

• Unsa nga importanteng mga detalye ang imong nakit-an?

Ang mga detalye nga tingali imong namatikdan naglakip ni Nephi nga nabalian sa iyang gapasan; ang pagbagulbol ni Lehi, Laman, Lemuel, ug sa anak nga mga lalaki ni Ishmael; Si Nephi naghimo og bag-ong gapasan; ug si Nephi mibalik ngadto sa iyang amahan alang sa direksiyon mahitungod sa pagkuha og pagkaon.

Lakang 2: Paghimo og mga pagtandi sa imong kinabuhi

Hunahunaa ang mga aspeto sa imong kinabuhi nga may koneksiyon sa mga detalye nga imong naila sa miaging lakang. Ang mosunod nga pangutana makatabang kanimo sa pagbuhat niini:

• Unsa nga mga sitwasyon sa akong kinabuhi ang sama sa mga sitwasyon niini nga mga bersikulo?

Mahimo nimong matandi si Nephi nga nabalian sa iyang gapasan ngadto sa wala damha nga mga kalisdanan sa imong kinabuhi. Mahimo usab nimong matandi ang mga pulong ug mga aksiyon ni Nephi ug sa mga sakop sa iyang pamilya ngadto sa mga reaksiyon sa mga tawo kon mag-atubang og lisod nga mga sitwasyon.

Lakang 3: Pagdiskobre og bililhong mga leksiyon

Hunahunaa kon unsay imong nakat-onan gikan sa mga kasulatan nga mahimong magamit nimo. Mahimo usab nimong hunahunaon ang unsay imong nakat-onan mahitungod sa Manluluwas.

• Unsa ang pipila ka mga leksiyon nga imong nakat-onan gikan sa asoy ni Nephi nga nabalian ug nag-ayo sa iyang gapasan nga mahimong magamit sa imong kinabuhi?

• Unsa ang gitudlo niini nga asoy kanimo mahitungod ni Jesukristo?

Usa ka kamatuoran nga tingali imong naila gikan niini nga asoy mao nga kon kita mohimo sa atong kaugalingong paningkamot ug magtinguha sa direksiyon sa Ginoo, diha Siya motabang kanato sa atong mga kalisdanan.

Lakang 4: Tinoa ang personal nga aplikasyon

• Tinoa ang personal nga aplikasyon pinaagi sa pagpamalandong sa imong kaugalingon nga kinabuhi.

• Unsa ang pipila ka mga paagi nga imong magamit kini nga kamatuoran sa imong kinabuhi?

Taliwala sa daghang mga paagi sa paggamit niini nga kamatuoran, mahimo nimong ikonsiderar kon unsaon nimo sa pagsunod ang ehemplo ni Nephi kon makasinati ka og wala damha nga mga hagit o mobati nga walay pag-uswag sa kinabuhi. Inay magbagulbol o walay buhaton, mahimo kang mohimo og inisyatibo ug mopadayon uban sa hugot nga pagtuo ug pagsalig nga si Jesukristo motabang kanimo.

• Sa unsang paagi nga ang pagsunod niini nga sumbanan sa pagtuon nakatabang nimo nga makakita og kahulugan niini nga asoy sa kasulatan?

Si Nephi gisugo sa paghimo og barko

Ang mosunod gituyo aron sa pagtabang sa mga estudyante sa paggamit sa kahanas sa pagpahisama sa mga kasulatan sa ilang kaugalingon. Awhaga una ang mga estudyante sa pagbansay nga magtinagsa. Dayon ang mga estudyante mahimong magpundok nga magpares o diha sa gagmay nga mga grupo aron ipaambit ang ilang nakit-an.

I-tutok ang mga estudyante ngadto sa upat ka mga lakang nga gipakita bag-ohay lang sa leksiyon aron ilang magamit kini samtang nagbuhat sila sa ilang kaugalingon.

Human sa panaw sa kamingawan sulod sa walo ka tuig, si Lehi ug ang iyang pamilya miabot sa usa ka yuta sa baybayon, nga ilang ginganlan og Bountiful tungod sa kaabunda sa prutas ug dugos didto (tan-awa sa 1 Nephi 17:4–6).

Basaha ang 1 Nephi 17:5–20, 48–55; 1 Nephi 18:1–4, ug gamita ang upat ka lakang bag-ohay lang aron matabangan ka nga mapahisama kini nga asoy sa imong kinabuhi. Mahimo usab nimong tan-awon ang bidyo nga “Ang Ginoo Misugo ni Nephi sa Paghimo og Barko ” gikan sa time code 0:00 hangtod sa 12:07, anaa sa ChurchofJesusChrist.org. Tugoti ang Espiritu sa paggiya sa imong mga hunahuna ug pagtuon. Hunong sa kanunay sa paghunahuna kon sa unsang paagi ang unsay imong nakat-onan mahimong ikatandi sa piho nga mga sitwasyon sa imong kinabuhi. Irekord ang mga impresyon nga imong madawat.

Dapita ang mga estudyante sa pagpaambit sa ilang mga nadiskobrehan gikan sa matag usa sa upat ka mga lakang. Mahimo usab nimong ipaambit kon sa unsang paagi ang pagpahisama sa mga kasulatan ngadto sa imong kinabuhi nakaapekto sa imong pagtuon sa kasulatan.

Komentaryo ug Background nga Impormasyon

Ngano nga ang paghimo og barko malisod man alang ni Nephi?

Si Elder David A. Bednar sa Korum sa Napulog Duha ka Apostoles mitudlo:

Si Nephi dili usa ka marinero. Siya gimatuto sa Jerusalem, usa ka sulod nga siyudad, inay sa daplin sa mga utlanan sa Dagat Mediteranyo. Murag dili tingali siya daghan og nahibaloan o adunay kasinatian sa mga himan ug kahanas nga gikinahanglan sa paghimo og barko. Tingali wala pa siya sukad makakita kaniadto og barko nga naglawig sa kadagatan. Labing importante, niana, si Nephi gisugo ug gitudloan sa pagtukod og usa ka butang nga wala pa gayod niya matukod kaniadto. (David A. Bednar, “Learning to Love Learning,” Ensign, Peb. 2010, 28)

1 Nephi 17:45. Unsay buot ipasabot sa “ingon sa walay pagbati”?

Si Presidente James E. Faust (1920–2007) sa Unang Kapangulohan mitudlo:

Usahay … makakita kita og lugar nga walay signal [dead spots] diin ang signal nga moabot sa cell phone mopalyar. Mahitabo kini kon ang tiggamit sa cell phone naa sa usa ka tanel o sa pig-ot nga walog sa kabukiran nga may sapa [canyon] o kon adunay lain nga nag-ali.

Mao usab kini sa balaang komunikasyon. … Tingali adunay usa ka butang sa atong mga kinabuhi nga nagpugong kanato sa pagpaminaw sa mensahe tungod kay kita “ingon sa walay pagbati” [1 Nephi 17:45]. Kasagaran natong ibutang ang atong mga kaugalingon sa espirituhanong kawalay signal [dead spots]—mga lugar ug mga sitwasyon nga makababag sa balaanong mga mensahe. Pipila niining kawalay signal [dead spots] naglakip sa kasuko, pornograpiya, kalapasan, kahakog, ug ubang mga sitwasyon nga makapasilo sa Espiritu. (James E. Faust, “Did You Get the Right Message?,” Liahona, Mayo 2004, 67)

Dugang nga mga Kalihokan sa Pagkat-on

Dugang nga mga leksiyon gikan sa nabali nga gapasan

Ikonsiderar ang pagtabang sa mga estudyante sa pag-ila sa dugang nga mga leksiyon gikan sa kasinatian sa nabali nga gapasan. Ang usa ka paagi sa pagbuhat niini tingali mao ang paghatag og gibug-aton nga agig dugang ni Laman ug Lemuel nga nagbagulbol, ang Amahan nga si Lehi nagbagulbol usab. Dapita ang mga estudyante sa pag-ila kon unsay wala buhata ni Nephi niini nga sitwasyon (wala siya moadto sa iyang amahan, motambag kaniya, mopakaulaw kaniya, o motawag kaniya ngadto sa paghinulsol, kay dili kana responsibilidad ni Nephi) ug unsa ang iyang gibuhat (siya mihangyo nga si Lehi mangutana sa Ginoo kon asa Siya buot nga sila moadto aron mangayam og pagkaon). Unsa ang atong makat-onan gikan niini nga panglantaw? Sa unsang paagi kini magamit sa atong relasyon sa gi-ordenar nga mga sulugoon sa Ginoo sa atong panahon?

Pagpahisama sa mga anak ni Israel

Samtang gitul-id ang iyang mga igsoong lalaki, si Nephi mipahisama sa kasinatian ni Moises ug sa mga anak ni Israel ngadto sa sitwasyon sa iyang pamilya. Ikonsiderar ang pagdapit sa mga estudyante sa pagbasa sa mga pulong ni Nephi diha sa 1 Nephi 17:21–47, nga mangita sa pagkaparehas niadtong duha ka mga kasinatian. Unsa nga mga pagkaparehas ang maila sa mga estudyante tali niini nga mga asoy ug sa ilang kaugalingong mga kinabuhi? Ngano kaha nga ang paghinumdom niining duha ka mga kasinatian hilabihan kamapuslanon sa atong panahon?

Gipalig-on sa Ginoo

Mahimong makaayo sa mga estudyante ang panaghisgot sa 1 Nephi 17:3. Ikonsiderar ang pagdapit og usa ka boluntaryo sa pagbasa niini nga bersikulo ug hangyoa ang mga estudyante sa pag-ila sa kamatuoran nga gitudlo niini. Ang mga estudyante mahimong makaila og butang nga susama sa mosunod: kon kita motuman sa mga sugo, nan ang Ginoo molig-on kanato ug mohatag og paagi aron kita makatuman sa Iyang gisugo.

Dapita ang mga estudyante sa paghunahuna o pagpangita og ebidensiya niini nga baroganan diha sa asoy ni Lehi ug sa iyang pamilya. Dapita sila sa paghunahuna og ebidensiya niini nga kamatuoran sa ilang kaugalingong mga kinabuhi.