1 Nephi 16–22

Kinatibuk-ang Pagpasabot

Sa wala madugay human mibiya ang pamilya ni Lehi sa Jerusalem, ang Ginoo mihatag kanila og dugang nga direksiyon pinaagi sa Liahona. Miatubang sila og nagkalain-laing mga hagit didto sa kamingawan, ug ang paagi sa pagreak ni Nephi niini nga mga hagit naghatag kanato og ehemplo kon unsaon pagsanong sa atong kaugalingong mga pagsulay sa kinabuhi. Samtang nagtudlo mahitungod sa pagkatibulaag ug pagpundok sa Israel, si Nephi migamit sa mga panagna ni Isaias sa pagpakita nga ang Ginoo dili makalimot sa nagkatibulaag nga balay ni Israel. Mitudlo usab siya nga bisan unsa pa ang tinubdan sa atong pag-antos, si Jesukristo nagtanyag og kalig-on ug pagkaayo niadtong nagtinguha Kaniya.

Pangandam sa Pagtudlo

Ang mosunod nga impormasyon naghatag sa mga magtutudlo og mga ideya kon unsa ang kinahanglan nga andamon daan alang sa matag leksiyon.

1 Nephi 16–18

Katuyoan sa leksiyon: Kini nga leksiyon makatabang sa mga estudyante sa pag-ila ug pagsunod sa giya sa Ginoo diha sa ilang mga kinabuhi.

• Pagpangandam sa estudyante: Dapita ang mga estudyante sa pagmatikod sa mga paagi nga ang Ginoo naghatag kanila og giya ug direksiyon sa tibuok adlaw.

• Mga hulagway: Usa o daghan pa nga mga hulagway sa Liahona

• Sugyot sa pagtudlo pinaagi sa videoconference: Human mabuhat sa mga estudyante ang tsart ingon sa gitudlo sa leksiyon, ikonsiderar ang pagdapit kanila sa paggamit sa function sa chat o whiteboard aron ipaambit ang unsay ilang nakat-onan mahitungod sa Liahona. Mahimo dayon nilang dungan nga hisgotan kon sa unsang paagi kini nga mga kamatuoran may kalabotan sa pagsabot ug paggamit sa gasa sa Espiritu Santo.

1 Nephi 16–17

Katuyoan sa leksiyon: Kini nga leksiyon makatabang sa mga estudyante nga makat-on unsaon sa pagpahisama sa mga kasulatan ug sa pag-atubang sa mga hagit uban sa hugot nga pagtuo.

• Pagpangandam sa estudyante: Dapita ang mga estudyante sa pagbasa sa 1 Nephi 19:23 ug hunahunaa unsa ang gipasabot sa pagpahisama sa mga kasulatan sa atong mga kaugalingon.

• Mga bidyo: “Gigiyahan sa Ginoo ang Panaw ni Lehi” (16:18; tan-awa gikan sa time code 5:33 hangtod sa 16:18); “Ang Ginoo Misugo ni Nephi sa Paghimo og Barko” (15:12; tan-awa gikan sa time code 0:00 hangtod sa 12:07)

• Sugyot sa pagtudlo pinaagi sa videoconference: Ang senaryo sa sinugdanan sa leksiyon mahimong maayong kahigayonan sa pag-follow up kon kumusta na ang personal nga pagtuon sa kasulatan sa mga estudyante. Agig puli sa senaryo, mahimong mag-post sa screen og pangutana sama sa “Unsa ang pipila ka mga problema nga kasagaran aduna ang mga tin-edyer sa pagbasa sa mga kasulatan?” ug sa pagtugot sa mga estudyante sa pagtubag gamit ang dili magpaila [anonymous] nga polling o pangutana-ug-tubag nga feature.

1 Nephi 17–18

Katuyoan sa leksiyon: Kini nga leksiyon makatabang sa mga estudyante nga mobati og gugma ug pasalamat alang sa Ginoo, bisan unsa pa ang mga kahimtang nga ilang giatubang.

• Pagpangandam sa estudyante: Dapita ang mga estudyante sa pagpangandam sa pagpaambit og mga kasinatian nga ilang nasinati nga nakatabang nila nga mobati og mas dakong gugma ug pasalamat sa Dios.

• Mga bidyo: “Ang Pamilya ni Lehi Milawig ngadto sa Yutang Saad” (12:53; tan-awa gikan sa time code 3:13 hangtod sa 11:31); “Nga Ako Unta Makadala sa Tanan nga mga Tawo ngari Kanako” (13:42; tan-awa gikan sa time code 3:52 hangtod sa 4:40)

• Sugyot sa pagtudlo pinaagi sa videoconference: Alang sa kalihokan nga nagtandi sa mga lihok ug kinaiya ni Nephi ngadto nila ni Laman ug Lemuel, ikonsiderar ang pagdapit sa mga estudyante sa pagpili sa bisan hain sa “Pagbiyahe sa kamingawan” o “Paghimo og barko.” Dayon ipabasa nila ang mga tudling sa kasulatan nga nahiuyon sa ilang gipili ug paandama sa pagpaambit sa unsay ilang nakat-onan diha sa tibuok klase.

1 Nephi 19–22

Katuyoan sa leksiyon: Kini nga leksiyon gituyo aron sa pagtabang sa mga estudyante nga mobati sa gugma sa Ginoo alang kanila ug sa tanang katawhan ug sa Iyang tinguha sa pagpundok kanila ngadto Kaniya.

• Pagpangandam sa estudyante: Ikonsiderar ang paghangyo sa mga estudyante nga motambong nga andam sa pagpaambit og duha o tulo ka pulong nga ilang gamiton sa paghulagway kon unsay gibati ni Jesukristo ngadto kanila.

Rebyo sa Doktrinal nga Kahanas 2

Katuyoan sa leksiyon: Kini nga leksiyon gituyo aron matabangan ang mga estudyante sa pagsag-ulo sa mga pakisayran sa kasulatan ug sa mahinungdanon nga hugpong sa mga pulong sa kasulatan alang sa pipila ka mga tudling sa doktrinal nga kahanas sa Basahon ni Mormon.

Timan-i: Usa ka leksiyon sa tudling sa doktrinal nga kahanas mahimong kinahanglan nga itudlo puli niini nga leksiyon sa pagrebyo. Tan-awa ang eskedyul sa pagtudlo nga gihatag sa area o region director o koordinitor aron maseguro nga matudlo ang matag leksiyon sa tudling sa doktrinal nga kahanas samtang anaa sa sesyon ang seminary.

• Pagpangandam sa estudyante: Dapita ang mga estudyante sa pagpamalandong ug pag-andam sa paghisgot sa bisan unsang mga tudling sa kasulatan nga nakatabang nila sa ilang mga kinabuhi.

• Mga suplay: Duha ka piraso nga papel alang sa matag estudyante aron mahimo ang ilang mga kard sa paghinumdom [memory cards] gamit ang mga gamit sa arte [art] sama sa mga krayola o mga marker

• Sugyot sa pagtudlo pinaagi sa videoconference: Human makompleto sa mga estudyante ang ilang mga kard sa paghinumdom [memory card], ibutang ang mga estudyante sa mga breakout room (magtinagurha o diha sa gagmay nga mga grupo) aron magbansay sa pagsag-ulo sa pipila ka mga tudling sa doktrinal nga kahanas sa iyang mga kard. Ang usa ka estudyante mahimong magbutang sa usa ka bahin sa iyang kard ngadto sa kamera, ug ang laing estudyante o mga estudyante sa breakout room mahimong magbansay paglitok balik-balik sa unsay naa sa pikas bahin sa kard.