“1 Nephi 17–18: ‘Ako Midangop sa Akong Dios,’” Manwal sa Magtutudlo sa Basahon ni Mormon (2024)
“1 Nephi 17–18: ‘Ako Midangop sa Akong Dios,’” Manwal sa Magtutudlo sa Basahon ni Mormon
1 Nephi 17–18
“Ako Midangop sa Akong Dios”
Kitang tanan makabaton og mga pagsulay ug pag-antos sa atong mga kinabuhi. Ang uban niini moabot isip sangpotanan sa atong kaugalingong sayop nga mga binuhatan o pinaagi lamang sa atong pagpuyo sa usa ka napukan ug dili hingpit nga kalibotan. Sama sa nasinati ni Nephi sa tibuok niyang panaw ngadto sa gisaad nga yuta, pipila ka mga pagsulay ug pag-antos ang mahitabo kon kadtong naglibot kanato sayop nga mogamit sa ilang kabubut-on. Bisan unsa pa ang tinubdan sa atong pag-antos, si Jesukristo nagtanyag og kalig-on ug kaayohan niadtong nagtinguha Kaniya. Kini nga leksiyon makatabang kanimo nga mobati og gugma ug pasalamat alang sa Ginoo, bisan unsa pa ang mga kahimtang nga imong giatubang.
Sabta ang mga panginahanglan sa pagkat-on sa mga estudyante.Tinguhaa nga masabtan ang mga panginahanglan sa pagkat-on sa mga indibidwal sa imong klase. Makatabang kini kanimo sa paghatag og mga kasinatian sa pagkat-on nga makatubag sa ilang mga panginahanglan ug motugot sa mga indibidwal nga makakat-on sa lain-laing mga paagi. Mahimong maglakip kini sa paggamit sa biswal nga mga tabang, buluhaton sa grupo, o indibidwal nga pagtuon. Mahimong sensitibo sa mga estudyante nga adunay piho nga mga hagit sa pagkat-on.
Pagpangandam sa estudyante: Dapita ang mga estudyante sa pag-andam sa pagpaambit og mga kasinatian nga ilang nasinati nga nakatabang nila nga mobati og mas dakong gugma ug pasalamat sa Dios.
Mga Posibleng Kalihokan sa Pagkat-on
Unsaon nimo pag-reak?
Namatikdan ba nimo sukad ang lainlaing mga paagi nga usahay ang mga tawo mo-reak sa managsama nga mga sitwasyon? Basaha ang mosunod nga mga senaryo ug hunahunaa ang pipila sa lain-laing mga paagi nga ang mga tawo sa mga senaryo mahimong mo-reak.
Gamita ang mosunod o paghimo og laing mga senaryo aron matabangan ang mga estudyante sa paghisgot sa lain-laing mga paagi sa pag-reak sa mga kalisdanan o mga pagsulay.
Si Guillermo miadto sa doktor sa mata kay hanap ang iyang panan-aw. Gisultihan siya sa doktor nga siya adunay usa ka talagsaon nga sakit nga makahimo kaniya nga hingpit nga mabuta sulod sa usa ka tuig.
Nasuko ang igsoong lalaki ni Layla ug gitukmod siya, hinungdan nga nasamdan ang iyang bukongbukong. Moduwa unta siya sa duwa sa kampeonato sa iyang team, apan karon dili na siya makadagan.
-
Unsa ang pipila sa lain-laing mga paagi nga ang mga tawo niini nga mga senaryo mahimong mo-reak sa ilang lisod nga sitwasyon?
-
Unsa sa imong hunahuna ang pipila sa mga rason nganong ang mga tawo mosanong sa positibo o negatibo nga mga paagi sa mga pagsulay nga ilang gisinati?
Panglantaw ni Nephi
Samtang imong gitun-an ang Basahon ni Mormon, tingali nakamatikod ka og kalainan tali sa mga lihok ug kinaiya ni Nephi kon itandi niadtong kang Laman ug Lemuel, bisan pa og nag-antos sila og daghan sa samang mga kasakit. Hatagi og pagtagad kini nga kalainan samtang ikaw magtuon sa mosunod nga mga bersikulo.
Alang sa mosunod nga kalihokan sa pagtuon, ang mga estudyante mahimong mobasa sa unang pagtandi uban sa usa ka pares dayon mag-ilis og mga pares alang sa laing grupo sa bersikulo. Sa samang paagi, ang mga estudyante mahimong maghisgot sa mosunod nga mga pangutana nga magpares, sa gagmay nga mga grupo, o isip usa ka klase sa dili pa magtuon sa mga panghitabo sa 1 Nephi 18.
-
Pagbiyahe sa kamingawan:Itandi ang asoy ni Nephi sa 1 Nephi 17:1–3 sa unsay gisulti ni Laman ug Lemuel sa 1 Nephi 17:20–22.
-
Pagtukod og barko:Itandi ang tubag ni Nephi sa 1 Nephi 17:8–9, 15 ngadto sa reaksiyon ni Laman ug Lemuel sa 1 Nephi 17:17–18.
Hukmi kon sa unsang paagi labing maayo nga maapil ang mga estudyante sa panaghisgot sa unsay ilang gibasa. Ang mosunod nga mga pangutana mahimong makatabang niini nga panaghisgot.
-
Unsa nga mga hunahuna o mga impresiyon ang imong nabatonan samtang imong gitandi ang mga pulong ug mga aksiyon ni Nephi ngadto sa kang Laman ug Lemuel?
-
Unsa ang imong namatikdan mahitungod sa relasyon sa matag usa niini nga mga indibidwal ngadto sa Dios?
Kitang tanan adunay mga panahon diin maayo ang atong pagsanong sa lisod nga mga sitwasyon, ug sa ubang mga panahon, dili kaayo maayo. Hunahunaa kon sa kasagaran mobuhat ka ba nga mas sama ni Nephi o mas sama nila ni Laman ug Lemuel kon mag-atubang ka og lisod nga mga sitwasyon. Samtang magpadayon ka sa pagtuon, pangitaa ang mga pagtulun-an nga makatabang nimo sa pagsanong sa mas positibo nga mga paagi kon mag-atubang ka og mga kalisdanan o mga pagsulay.
Si Lehi ug ang iyang pamilya milawig paingon sa gisaad nga yuta
Human makompleto ni Nephi ug sa iyang mga igsoong lalaki ang paghimo sa barko, ang Ginoo nagsugo kang Lehi ug sa iyang pamilya sa pagsugod sa paglawig paingon sa gisaad nga yuta (tan-awa sa 1 Nephi 18:1–8).
Basaha ang 1 Nephi 18:9–21, nga mangita sa pipila sa mga kalisdanan nga nasinati atol niini nga panaw. Samtang magtuon ka, ipadayon ang pagtandi sa mga lihok ug kinaiya ni Nephi ngadto sa kang Laman ug Lemuel. Mahimo usab nimong tan-awon ang bidyo nga “Ang Pamilya ni Lehi Milawig ngadto sa Yutang Saad” gikan sa time code 3:13 hangtod sa 11:31, anaa sa ChurchofJesusChrist.org.
-
Unsa ang mipatigbabaw kanimo gikan niini nga asoy?
-
Pamatikdi kon unsay girekord ni Nephi sa bersikulo 16. Kon duna kay higayon sa pagpangutana kaniya og pipila ka mga pangutana mahitungod sa iyang mga aksyon niini nga bersikulo, unsa ang imong ipangutana kaniya?
-
Sa imong hunahuna unsaon kaha niya pagtubag ang imong mga pangutana?
Si Elder Dale G. Renlund sa Korum sa Napulog Duha ka Apostoles mipaambit og usa ka rason nga si Nephi nakahimo sa pagsanong sa paagi nga iyang gibuhat sa iyang mga kalisdanan.
Tungod kay sila halayo sa Manluluwas, si Laman ug si Lemuel nagbagulbol, nahimong mabingkilon, ug walay pagtuo. Gibati nila nga dili makiangayon ang kinabuhi ug nga sila adunay katungod sa grasya sa Dios. Agig kalainan, tungod kay siya nagpaduol sa Dios, si Nephi siguradong nakamatikod nga ang kinabuhi labing dili makiangayon alang kang Jesukristo. Bisan og hingpit nga inosente, ang Manluluwas mao ang grabing mag-antus.
Kon mas duol kita ni Jesukristo sa mga hunahuna ug mga katuyoan sa atong kasingkasing, mas masabtan nato ang Iyang inosenteng pag-antus, mas mapasalamaton kita sa grasya ug pagpasaylo, ug mas gusto nato nga maghinulsol ug mahimong sama Kaniya. (Dale G. Renlund, ““Nga Ako Unta Makadala sa Tanan nga mga Tawo ngari Kanako,” Liahona, Mayo 2016, 40)
-
Unsa ang kamatuoran nga imong nakat-onan gikan sa pamahayag ni Elder Renlund nga makatabang nimo sa imong mga pagsulay?
Ikonsiderar ang pagpaambit sa mosunod nga kamatuoran kon ang mga estudyante wala makaila og susama sa ilang kaugalingon.
Usa ka kamatuoran nga tingali imong naila mao nga kon kita duol ni Jesukristo, kita mobati og gugma ug pasalamat alang Kaniya bisan sa malisod nga mga panahon.
-
Ngano sa imong hunahuna nga kita mas mobati og gugma ug pasalamat alang ni Jesukristo kon kita mas duol Kaniya?
Kon makagamit ang mga estudyante og tabang sa pagtubag sa miaging pangutana, ikonsiderar ang pagpangutana og dugang nga mga pangutana sama sa “Unsa ang nabuhat sa Ginoo kaninyo nga nakapahimo ninyo nga mapasalamaton alang Kaniya?” o “Kanus-a man kamo mibati og hilabihan kamapasalamaton sa Manluluwas?”
Ikonsiderar ang pagpakita sa mosunod nga mga pangutana ug dapita ang mga estudyante sa pagsulat sa ilang mga tubag sa usa o daghan pa nga mga pangutana diha sa ilang journal sa pagtuon. Dayon pagdapit og mga boluntaryo sa pagpaambit sa pipila sa ilang mga hunahuna.
-
Unsaon nimo pag-ila kon ikaw mahimong layo sa Ginoo? Unsa ang imong buhaton aron maminosan kana nga pagkalayo?
-
Unsay nakatabang nimo nga mas maduol kang Jesukristo?
Ikonsiderar ang paghatag og panahon sa mga estudyante sa pagpamalandong ug sa hilom nga pag-ampo kon unsa kasuod ang ilang gibati ngadto sa Langitnong Amahan ug ni Jesukristo ug sa pagrekord sa bisan unsang mga hunahuna o mga impresiyon nga ilang nabatonan atol niini nga leksiyon diha sa ilang journal sa pagtuon. Ang mosunod nga parapo maoy usa ka paagi nga mahimo nimo kini.