1 Nephi 19–22

“Sila Mahimo nga Makalimot, apan Ako Dili Makalimot Kaninyo”

Unsa ang imong bation kon ikaw mahinumdoman sa usa ka tawo nga importante kanimo? Samtang nagtudlo mahitungod sa pagkatibulaag ug pagpundok sa Israel, si Nephi migamit sa mga panagna ni Isaias sa pagpakita nga ang Ginoo dili makalimot sa nagkatibulaag nga balay ni Israel. Kini nga leksiyon gituyo aron sa pagtabang kanimo nga mobati sa gugma sa Ginoo alang kanimo ug sa tanang mga tawo ug sa Iyang tinguha sa pagpundok kaninyo ngadto Kaniya.

Pagdapit sa mga estudyante sa pagpaambit. Pangita og mga gutlo sa leksiyon nga makaaghat ka sa mga estudyante sa pagpamalandong sa ilang mga pagbati mahitungod sa usa ka butang, ug dayon hangyoa sila sa pagpaambit sa ilang gibati o sa pagsulat sa ilang mga pagbati ug dayon ipaambit. Ang paghatag sa mga estudyante og kahigayonan sa pagsulti sa mga hunahuna ug mga pagbati makatabang kanila nga mobati nga mas masaligon sa pagpahayag og pagpamatuod.

Pagpangandam sa estudyante: Ikonsiderar ang paghangyo sa mga estudyante nga motambong nga andam sa pagpaambit og duha o tulo ka pulong nga ilang gamiton sa paghulagway kon unsay gibati ni Jesukristo ngadto kanila.

Mga Posibleng Kalihokan sa Pagkat-on

Ang gugma sa Manluluwas alang kanato

Ikonsiderar ang pagsugod sa klase pinaagi sa pagkanta og kanta nga may kalabotan sa gugma ni Jesukristo alang kanato, sama sa “Gugma sa Atong Manluluwas” (music.ChurchofJesusChrist.org). Ang mga estudyante mahimong dapiton sa pagpaambit sa mga pulong o hugpong sa mga pulong gikan sa kanta nga mahinungdanon kanila.

Adunay mga higayon nga ang matag usa kanato mahimong makaila ug makabati sa gugma sa Dios sa atong mga kinabuhi, apan sa ubang mga higayon tingali dili nato kini mailhan. Hunahunaa nga nakigsulti ka sa usa ka higala nga nisulti kanimo nga dili siya segurado nga gihigugma siya sa Dios.

• Unsa kaha ang imong mapaambit gikan sa mga kasulatan nga makatabang sa imong higala?

• Unsa nga mga kasinatian ang mahimo nimong ipaambit sa imong higala kon giunsa nimo pagkahibalo ug pagkabati ang gugma sa Langitnong Amahan ug ni Jesukristo?

Hatagi ang mga estudyante og panahon sa klase sa pagbuhat sa mosunod. Dapita ang mga estudyante sa pagrekord sa pipila sa ilang mga hunahuna o mga pangutana diha sa journal sa pagtuon ug mangita sa mga tubag atol sa leksiyon.

Pamalandongi ang imong kaugalingon nga mga pagbati mahitungod sa gugma sa Dios alang kanimo, lakip ang bisan unsang mga pangutana o mga kabalaka nga tingale aduna ka. Samtang magtuon ka, pangitaa ang mga kamatuoran nga makatabang nimo nga mas makasabot ug makabati sa gugma sa Langitnong Amahan ug ni Jesukristo kanimo.

Si Nephi nagtudlo mahitungod sa gugma sa Manluluwas alang kanato

Sa 1 Nephi 19, si Nephi nanagna sa umaabot nga kinabuhi ug misyon ni Jesukristo. Basaha ang 1 Nephi 19:7–10, nga mangita sa unsay gitudlo ni Nephi kon unsaon pagtratar si Jesukristo sa Iyang panahon dinhi sa yuta ug nganong andam Siya nga trataron niini nga paagi.

• Unsa nga mga pulong o hugpong sa mga pulong ang mipatigbabaw kanimo gikan niini nga mga bersikulo? Ngano man?

• Sa unsang paagi nga ang pagsabot sa mga pagtulun-an niini nga mga bersikulo makaapekto sa imong mga pagbati alang sa Langitnong Amahan ug ni Jesukristo?

I-summarize ang mosunod nga parapo o dapita ang usa ka estudyante sa pagpaambit niini ngadto sa klase.

Human sa pagrekord sa iyang kaugalingong mga panagna mahitungod ni Jesukristo, si Nephi mipaambit sa mga panagna gikan sa propeta sa Daang Tugon nga si Isaias mahitungod sa pagkatibulaag ug pagpundok sa Israel. Kini nga mga panagna importante kang Nephi ug sa iyang pamilya, kinsa natibulaag gikan sa ilang yutang natawhan sa Jerusalem tungod sa pagkadautan sa mga tawo nga nagpuyo sa maong dapit. Ang mga panagna ni Isaias nagpakita nga daghan sa mga Israelita ang mobati nga nakalimtan sa Ginoo sa ilang pagkatibulaag nga kahimtang.

Basaha ang 1 Nephi 21:14–16 ug pangitaa ang mga pulong sa Ginoo niadtong mobati nga nakalimtan.

Kon ang mga estudyante nanginahanglan og tabang sa hugpong sa mga pulong nga “ang inyong mga paril anaa kanunay sa akong atubangan” (1 Nephi 21:16), mahimo nimong ipasabot nga kini nga hugpong sa mga pulong nagpakita nga ang Ginoo kanunay nga nagbantay ug nanalipod sa Iyang katawhan.

• Giunsa nimo pagkakita sa gugma sa Manluluwas nga gipadayag niini nga mga bersikulo?

• Unsa ang kamatuoran nga imong masulti mahitungod ni Jesukristo base sa unsay imong nakat-onan karon?

  Usa ka kamatuoran nga mahimong maila sa mga estudyante mao nga ang Ginoo nahigugma kanato ug dili gayod makalimot kanato. Ikonsiderar ang pagsulat niini sa pisara.

• 1 Nephi 22:9–12

• 1 Nephi 22:24–25

• 3 Nephi 22:7–8

• Unsa ang pipila ka mga sitwasyon nga makapalisod sa pipila ka mga tawo sa pagtuo niini nga kamatuoran?

• Unsa ang makatabang kanato nga mas makaila ug makabati sa gugma ni Jesukristo alang kanato?

Ang gugma sa Manluluwas gipakita pinaagi sa Iyang kaandam sa pagpundok sa mga tawo ngadto Kaniya

Ang katawhan sa karaang Israel nagkatibulaag sa matag higayon nga sila mohunong sa pagsimba kang Jehova ug molapas sa ilang mga pakigsaad ug sa mga sugo sa Dios (tan-awa sa 2 Nephi 6:10–11; 10:3–6). Ang katawhan sa Israel mapundok sa higayon nga sila moduol kang Kristo, modawat sa Iyang ebanghelyo pinaagi sa bunyag, ug motuman sa Iyang mga sugo. Ang Manluluwas misaad sa nagkatibulaag nga Israel nga Siya dili makalimot kanila ug nga Siya mopundok kanila ngadto Kaniya sa kataposang mga adlaw (tan-awa sa 1 Nephi 15:13–14; 2 Nephi 6:11; 9:1–2; 10:7–8).

Tun-i ang mga ulohan sa kapitulo sa 1 Nephi 21 ug 22 aron mas masabtan kon unsa ang gipanagna ni Isaias ug gitudlo niini nga mga kapitulo.

Tun-i ang mosunod nga mga tudling sa kasulatan mahitungod sa pagpundok sa Israel sa ulahing mga adlaw. Hatagi og pagtagad ang mga pulong o hugpong sa mga pulong nga nagpakita sa gugma sa Ginoo alang sa Iyang mga katawhan.

Paghunahuna og mga paagi sa pag-apil sa mga estudyante niini nga kalihokan sa pagtuon. Usa ka paagi mao ang pagsulat sa matag pakisayran sa kasulatan sa lain nga notecard o gamay nga piraso sa papel aron adunay igo alang sa matag estudyante sa klase. Dapita ang mga estudyante sa pagtuon sa bersikulo nga anaa sa ilang papel, pag-ila kon unsay buhaton sa Ginoo sa pagpundok sa Israel, ug dayon ibaylo ang ilang papel ngadto sa usa ka klasmeyt. Mahimong ibaylo sa mga estudyante ang mga papel sa makadaghang higayon.

• 1 Nephi 22:9–12

• 1 Nephi 22:24–25

• 3 Nephi 22:7–8

• Unsa nga mga saad ang gihimo sa Ginoo niini nga mga bersikulo? Sa unsang paagi kini nga mga saad nagpakita sa Iyang gugma alang sa tanang katawhan?

• Unsa nga mga ehemplo ang imong mahunahunaan sa imong kinabuhi o sa kinabuhi sa uban diin ang Ginoo mipundok sa mga tawo ngadto Kaniya?

Dapita ang mga estudyante sa pagpakigbahin sa ilang mga pagbati, mga kasinatian, ug mga pagpamatuod. Pagpamatuod ngadto sa mga estudyante mahitungod sa gugma ni Jesukristo alang kanila sa tagsa-tagsa ug alang sa tanan sa kalibotan.

Komentaryo ug Background nga Impormasyon

Sa diha nga ako makasala, ako ba dili takos sa gugma sa Dios?

Si Brother Bradley R. Wilcox sa Kinatibuk-ang Kapangulohan sa Young Men mitudlo:

Hinumdomi nga ang kausaban posible, ang paghinulsol usa ka proseso, ug ang pagkatakos dili ang pagkawalay tatsa. Labing importante, hinumdomi nga ang Dios ug si Kristo andam nga motabang kanato dinhi mismo ug karon. …

Daghan kaayo ang nasakitan tungod sa nabungkag ug naabusahan nga mga relasyon mao nga lisod alang nila nga motuo sa kalooy ug pagkamainantoson sa Dios. Sila nanlimbasog sa pagkakita sa Dios kon unsa Siya—usa ka mahigugmaon nga Amahan kinsa motabang kanato sa atong mga panginahanglan ug nakahibalo unsaon sa “paghatag sa mga maayo nga butang ngadto kanila nga mangayo kaniya” [3 Nephi 14:11]. Ang Iyang grasya dili lang usa ka premyo alang sa mga takos. Kini mao ang “balaang panabang” nga Iyang gihatag nga motabang kanato nga mahimong takos. Dili lang kini usa ka ganti alang sa mga matarong. Kini mao ang “gasa sa kalig-on” nga Iyang gihatag nga motabang kanato nga mahimong matarong. [Dieter F. Uchtdorf, “Ang Gasa sa Grasya,” Liahona, Mayo 2015, 107]. Dili lamang kita naglakaw padulong sa Dios ug ni Kristo. Kita naglakaw uban Kanila. (Bradley R. Wilcox, “Ang Pagkatakos Dili ang Pagkawalay Tatsa,” Liahona, Nob. 2021, 62, 67)

Ngano nga gikompara ni Kristo ang Iyang kaugalingon sa usa ka inahan?

Si Elder Dale G. Renlund sa Korum sa Napulog Duha ka Apostoles mitudlo:

Nangutana si Jehova, “Mahimo ba sa usa ka inahan sa pagkalimot sa iyang masuso nga anak, nga siya walay kaluoy diha sa iyang anak nga lalaki sa iyang sabakan?” Sama nga dili mahitabo nga ang mahigugmaong inahan mahikalimot sa iyang masuso nga anak, si Jehova mipahayag nga ang Iyang debosyon mas nagmakanunayon. Siya mipamatuod: “Oo, sila mahimo nga makalimot, apan Ako dili makalimot kaninyo. … Tan-awa, Ako mikulit kaninyo diha sa mga palad sa akong mga kamot; ang inyong mga paril anaa kanunay sa akong atubangan” [1 Nephi 21:15–16]. Tungod kay si Jesukristo milahutay sa walay kataposan matubsanon nga sakripisyo, Siya hingpit nga makasabot kanato [tan-awa sa Alma 7:11–13]. Siya sa kanunay nasayod bahin kanato ug sa atong mga kahimtang. (Dale G. Renlund, “Makapungot nga Pagkadili Makiangayon,” Liahona, Mayo 2021, 42-43)

Sa unsang paagi nato maila ang gugma sa Dios alang kanato?

Si Sister Susan H. Porter sa Kinatibuk-ang Kapangulohan sa Primary mitudlo:

Ang gugma sa Dios dili makita sa mga sirkumstansiya sa atong kinabuhi kon dili sa Iyang presensiya sa atong kinabuhi. Makahibalo kita sa Iyang gugma kon kita makadawat sa kalig-on nga lapas sa atong kalig-on ug kon ang Iyang Espiritu magdala og kalinaw, kahupayan, ug direksiyon. Usahay mahimong malisod nga mobati sa Iyang gugma. Makaampo kita aron mabuka ang atong mga mata nga makakita sa Iyang kamot sa atong kinabuhi ug makakita sa Iyang gugma diha sa katahom sa Iyang mga gilalang. (Susan H. Porter, “Ang Gugma sa Dios: Ang Labing Hingpit nga Kalipay sa Kalag,” Liahona, Nob. 2021, 35)

Dugang nga mga Kalihokan sa Pagkat-on

1 Nephi 19:18–19. Usa ka importante nga katuyoan sa Basahon ni Mormon

Sa 1 Nephi 19:18–19, si Nephi mipasabot sa iyang nag-unang katuyoan sa paghimo sa iyang rekord. Ikonsiderar ang pagdapit sa mga estudyante sa pagbasa niini nga mga bersikulo ug sa pagpangita kon unsay gitudlo ni Nephi kon nganong gibuhat niya ang iyang rekord.

Ikonsiderar ang paggamit niini nga mga bersikulo aron matabangan ang mga estudyante nga makasabot nga ang pagbasa sa mga kasulatan usa ka gamhanang paagi sa paghinumdom sa Manluluwas nga si Jesukristo kada adlaw. Ikonsiderar ang pagpangutana og usa o daghan pa sa mosunod nga mga pangutana isip kabahin niini nga diskusyon:

• Sa unsang paagi ang Basahon ni Mormon makatabang nato sa paghinumdom ni Jesukristo?

• Paghunahuna og higayon nga mibati ka nga mas duol sa Manluluwas tungod sa imong pagtuon sa kasulatan. Unsa ang kalainan nga nahimo niana sa imong adlaw o sa imong pagpamatuod?

• Unsa nga mga kausaban ang imong gibati nga kinahanglan nimong himoon sa imong kaugalingong personal nga pagtuon aron mas mahinumdoman nimo ang Manluluwas nga si Jesukristo?

Kalihokan sa paggamit

Sa kataposan sa leksiyon, ikonsiderar ang pagpaambit sa mosunod nga pamahayag ni Elder Gerrit W. Gong sa Korum sa Napulog Duha ka Apostoles: “Nagdapit kanato ang Manluluwas sa kanunay nga paghinumdom Kaniya sama sa Iyang kanunay nga paghinumdom kanato” (“Kanunay nga Mohinumdom Kaniya,” Liahona, Mayo 2016, 110).

Dapita ang mga estudyante sa pagkonsiderar sa mga pagpili nga tinuyo nilang mahimo aron mas mahinumdoman ang Langitnong Amahan ug si Jesukristo atol sa ilang adlaw o semana.

1 Nephi 22:15–28. “Ang mga matarong dili kinahanglang mahadlok”

Ang mga estudyante mahimong makabenepisyo gikan sa panaghisgotan sa mga pagtulun-an ni Nephi sa ikaduhang katunga sa 1 Nephi 22. Ikonsiderar ang paghangyo sa mga estudyante sa paghisgot sa mga rason nganong ang ubang mga tawo mahadlok sa mga panghitabo sa kataposang mga adlaw. Ipasabot nga si Nephi mitapos sa iyang unang basahon pinaagi sa pagpaambit sa mga pagtulun-an nga makahatag og paglaom sa mga matarong kinsa nagpuyo sa kataposang mga adlaw.

Dapita ang mga estudyante sa pagbasa sa 1 Nephi 22:15–28, nga mangita og mga pagtulun-an nga makatabang nato nga mobati og paglaom ug mabuntog ang mga kahadlok mahitungod sa pagkabuhi sa kataposang mga adlaw. Dapita ang mga estudyante sa pagpaambit sa ilang mga hunahuna ug mga panabot.