2 Nephi 1

Pagkaplag sa mga baroganan sa Ebanghelyo

Hunahunaa kon unsa kaha ang imong bation kon ang usa ka tawo nga imong gidayeg hapit na matapos ang iyang kinabuhi ug mopaambit og kataposang tambag o pahimatngon kanimo. Nasayod si Lehi nga hapit na siya mamatay, mao nga namulong siya sa iyang mga anak aron sa pagdasig kanila sa pagsunod sa mga sugo sa Dios. Ang mga kamatuoran nga iyang gitudlo mahimong tinubdan sa inspirasiyon ug giya alang kanimo. Kini nga leksiyon makatabang kanimo sa pagkat-on sa pag-ila sa mga baroganan nga, kon gamiton, makagiya kanimo sa pagdawat sa tabang sa Dios sa imong kinabuhi.

Pagtabang sa mga estudyante nga makadiskobre sa doktrina ug mga baroganan sa ebanghelyo. Bisan tuod usahay mapuslanon ang pagtudlo og doktrina o baroganan ngadto sa mga estudyante, ang ilang gikinahanglan sa kasagaran mao ang paggiya ug pag-awhag sa pagdiskobre sa doktrina ug mga baroganan alang sa ilang kaugalingon. Makugihong motabang sa mga estudyante sa pag-angkon og abilidad sa pag-ila sa doktrina ug mga baroganan nga sila ra.

Pagpangandam sa estudyante: Dasiga ang mga estudyante sa paghimo sa ilang inadlaw nga pagtuon sa kasulatan. Dapita sila sa pagpangita sa tinuod nga mga baroganan diha sa 2 Nephi 1 ug motambong nga andam sa pagpaambit og ehemplo.

Mga Posibleng Kalihokan sa Pagkat-on

Unsa ang pangitaon

Ipakita ang mosunod nga hulagway ug dapita ang mga estudyante sa pagkompleto sa nag-ubang kalihokan.

Isip alternatibo nga paagi, mahimo nimong itago ang lain-laing mga butang sa kwarto [room], sultihi ang mga estudyante kon unsay pangitaon, ug dapita ang klase sa pagpangita niini.

Tan-awa pag-usab ang hulagway sa ubos ug tan-awa kon pila sa mga gitago nga mga butang ang imong makit-an sa sunod nga minuto.

• Hain nga mga butang ang dali nimong nakit-an? Hain ang nagkinahanglan og dugang nga paningkamot?

• Sa unsang paagi nausab ang imong abilidad sa pagpangita sa gitago nga mga butang kon wala ka mahibalo kon unsay pangitaon?

Dapita ang mga estudyante sa pagpaambit sa ilang mga tubag sa mosunod nga pangutana sa tinagurha o sa gagmay nga mga grupo una pa nila kini ipaambit sa klase.

• Sa unsang paagi kini nga kalihokan susama sa pagtuon sa mga kasulatan?

Ang imong mga kasinatian sa mga kasulatan mahimong mapalambo kon mangita ka og mga baroganan samtang ikaw magtuon.

Si Elder David A. Bednar sa Korum sa Napulog Duha ka Apostles mipasabot unsa ang usa ka baroganan:

Ang baroganan sa ebanghelyo usa ka lagda nga gibase sa doktrina alang sa matarong nga paggamit sa moral nga kabubut-on. Ang mga baroganan naggikan sa mas halapad nga mga kamatuoran sa ebanghelyo ug naghatag og giya ug mga sumbanan samtang magpadayon kita sa dalan sa pakigsaad. (David A. Bednar, “Ang mga Baroganan sa Akong Ebanghelyo,” Liahona, Mayo 2021, 123)

Pipila ka mga ehemplo sa mga baroganan nga imong natun-an bag-o lang sa 1 Nephi mao nga kon kita motuman sa atong mga pakigsaad, kita masangkapan sa katarong ug sa gahom sa Dios (tan-awa sa 1 Nephi 14:14) ug samtang atong ipahisama ang mga kasulatan ngadto sa atong kaugalingon, kita makakat-on ug makakuha og kaayohan gikan niini (1 Nephi 19:23).

• Unsaon nimo pag-summarize kon unsa ang baroganan?

• Unsa ang pipila ka rason nga ang pag-ila sa mga baroganan makatabang sa atong kinabuhi?

Paminaw og maayo sa mga tubag sa mga estudyante. Seguroha nga nakasabot sila unsa ang baroganan ug sa unsang paagi ang mga baroganan makahatag og direksiyon sa atong kinabuhi.

Pagpangita sa mga baroganan

Dapita ang mga estudyante sa pagpaambit sa ilang mga tubag sa mosunod nga mga pangutana. Mahimo silang mamalandong sa ilang pagpangandam alang sa klase samtang sila mopasabot o mopakita og ehemplo sa mga paagi sa pagpangita og mga baroganan gamit ang mga bersikulo gikan sa 2 Nephi 1.

• Unsa ang imong nahimo sa nangagi nga nakatabang kanimo sa pagpangita sa mga baroganan diha sa mga kasulatan?

• Unsa ang nakahagit kanimo samtang naningkamot ka sa pagpangita og mga baroganan?

Usa ka epektibong paagi sa pagpangita og mga baroganan diha sa mga kasulatan mao ang pagbasa nga mangita og importante nga mga pulong, hugpong sa mga pulong, o mga ideya. Ang mosunod nga mga pangutana mahimong makatabang kanimo sa pagbuhat niini:

Ipakita diha sa pisara ang mosunod nga mga pangutana ug instruksiyon aron kopyahon sa mga estudyante ngadto sa ilang mga journal sa pagtuon. Mahimo kini nga mapuslanon nga pakisayran sa tibuok dagan sa seminary ug sa ilang kaugalingong personal nga pagtuon sa kasulatan.

• Unsa nga mga pulong o hugpong sa mga pulong ang gibalikbalik o ingon og mahinungdanon?

• Unsa nga mga pasidaan o mga saad ang gilakip niini nga mga bersikulo?

• Unsa kaha ang unod nga ideya o punto nga gisulayan pagpasabot sa tagsulat?

• Unsa ang gipasabot og maayo sa Espiritu Santo kanimo?

Gikan niini nga mga pulong, hugpong sa mga pulong, o mga ideya, pagsulat og pamahayag sa kamatuoran nga makatabang kanimo sa imong kinabuhi. Human sa pagsulat, pangutan-a ang imong kaugalingon sa mosunod nga mga pangutana:

• Tinuod ba kini nga baroganan sa tanang sitwasyon, panahon, ug kultura? Kon dili, unsa nga mga pagbag-o ang maghimo niini nga tinuod?

• Kini ba nga baroganan makapaduol kanako ug sa uban ngadto sa Langitnong Amahan ug ni Jesukristo?

Ang 2 Nephi 1 naglangkob sa pipila sa kataposang tambag ni Lehi ngadto sa iyang mga anak sa wala pa siya mamatay. Siya mipahinumdom kanila sa kaayo sa Dios ug mitudlo og pipila ka mga baroganan nga iyang gilaoman nga mogiya kanila sa tibuok nilang kinabuhi.

Basaha ang 2 Nephi 1:1–4 nga mangita og tinuod nga mga baroganan. Ikonsiderar ang paggamit sa mga pangutana nga may pinabaga nga lingin [bullet] nga nalista sa ibabaw.

• Unsay imong nakit-an?

Dapita ang pipila ka mga estudyante sa pagpaambit. Mahimong nakaila sila og nagkalainlaing mga baroganan. Pasalamati sila sa ilang mga paningkamot ug pahibaloa sila nga ang ilang pagpaambit bililhon kanimo ug sa ubang mga sakop sa klase.

Usa ka ehemplo sa baroganan nga gitudlo ni Lehi mao: mapanalipdan kita sa Ginoo pinaagi sa pagsunod sa Iyang mga pasidaan (tan-awa sa 2 Nephi 1:3–4).

Human makaila sa usa ka kamatuoran, makatabang ang pagpamalandong kon unsay gipasabot niini ug sa unsang paagi kini makatabang kanimo sa imong kinabuhi.

Dapita ang mga estudyante sa pagpaambit og mga paagi nga mas masabtan nila o magamit ang mga kamatuoran nga bag-o lang nilang napalgan. Kon gikinahanglan, ipangutana ang pipila o ang tanan sa mosunod nga mga pangutana.

Pipila sa mosunod nga mga pangutana mahimong mapuslanon:

• Sa unsang paagi napanalipdan ka sa Ginoo o ang mga tawo nga imong nailhan human mosunod sa Iyang mga pasidaan?

• Unsa ang gitudlo sa Iyang mga pasidaan kanimo mahitungod Kaniya ug sa unsay Iyang gibati kanimo?

Pamalandongi kon sa unsang paagi nga ang Ginoo mahimong nagpasidaan kanimo karon ug unsaon nimo sa pagsanong.

Palamboa ang imong abilidad sa pagpangita og mga baroganan

Palamboa ang imong abilidad sa pagpangita og mga baroganan diha sa mga kasulatan pinaagi sa pagsunod niini nga proseso sa mga kalihokan sa ubos.

Basaha ang labing menos duha sa mosunod nga mga tudling sa kataposang tambag ni Lehi ngadto sa iyang anak nga mga lalaki. Mahimo usab nimong tan-awon ang “Gitudloan ni Lehi ang Iyang Pamilya” gikan sa time code 0:39 hangtod sa 3:35, anaa sa ChurchofJesusChrist.org, sa pagrepaso niini nga mga tudling. Gamita ang proseso sa “Pagpangita sa mga baroganan” aron sa pag-ila sa tinuod nga mga baroganan.

Ipakita ang mosunod nga mga tudling o isulat kini sa pisara.

• 2 Nephi 1:13–15, 23

• 2 Nephi 1:16–20

• 2 Nephi 1:24–29

Pagpili og kamatuoran gikan sa 2 Nephi 1 nga imong gibati nga labing makatabang kanimo, ug isulat ang mosunod sa imong journal sa pagtuon:

1. Ang baroganan nga imong napalgan ug ang bersikulo o mga bersikulo diin imo kining nakit-an

2. Usa ka pagpasabot kon unsa sa imong hunahuna ang gipasabot niini nga baroganan

3. Mga paagi nga imong gibati nga ang kamatuoran mahimong mogiya kanimo ug magdala og mahinungdanong mga panalangin sa imong kinabuhi

4. Unsa ang imong nakat-onan mahitungod sa Langitnong Amahan ug ni Jesukristo gikan niini nga baroganan

Dapita ang mga estudyante sa pagpaambit sa ilang mga tubag. Usa ka paagi sa pagbuhat niini mao ang pagpasulat sa daghang mga estudyante og mga baroganan nga ilang napalgan diha sa pisara. Dayon dapita ang usa ka estudyante sa pagpili og usa sa daghang mga baroganan nga gisulat sa iyang mga klasmeyt nga daw makapainteres o makahuluganon kaniya. Ang estudyante nga nakadiskobre niana nga baroganan mahimong mopaambit sa iyang mga tubag sa mga pangutana sa ibabaw. Ang kalihokan mahimong balikon sa makadaghang higayon. Ipasabot og maayo ang mahangtorong mga kamatuoran nga gipaambit sa mga estudyante ug sa unsang paagi ang pagkahibalo ug paggamit niini nga mga kamatuoran makatabang kanato sa atong mga kinabuhi. Dayega sila sa ilang kalamposan. Ikonsiderar ang pagpaambit og usa ka baroganan nga imong nakaplagan usab.

Pamalandongi ang imong gibuhat sa pag-ila ug pagsabot sa mga baroganan diha sa 2 Nephi 1.

• Sa unsang paagi nga ang kanunay nga pagpangita sa mga baroganan diha sa imong personal nga pagtuon sa kasulatan makatabang kanimo?

• Sa unsang paagi kini makaimpluwensiya sa imong relasyon ni Jesukristo ug sa imong tinguha nga mahimong sama Kaniya?

Pagpamatuod sa kaimportante sa pagpangita sa mga baroganan diha sa mga kasulatan, ug dapita ang mga estudyante sa paggamit kanunay sa mga kahanas nga ilang nakat-onan karon sa ilang pagtuon sa mga kasulatan.

Komentaryo ug Background nga Impormasyon

2 Nephi 1:13, 23. Unsa ang “mga kadena” nga gipasabot ni Lehi?

Tan-awa ang “Tanang Tawo sa Tanang Dapit” gikan sa time code 3:47 hangtod sa 4:58 aron makita si Elder Marvin J. Ashton (1915–94) sa Korum sa Napulog Duha ka Apostoles ug Presidente Dallin H. Oaks sa Unang Kapangulohan mipasabot sa mga tubag niini nga pangutana.

2 Nephi 1:9, 20. Unsay buot ipasabot sa “mouswag”?

Ang mga ekspresyong “mouswag sa yuta” ug “ipahimulag gikan [sa Ginoo]” gipahimutang ingon og magkasukwahi sa usag usa. Kini nagpakita nga ang pag-uswag sa yuta kusganon nga naglambigit sa pagbaton sa presensiya sa Ginoo uban kanato.

Si Presidente Dieter F. Uchtdorf, kaniadto sa Unang Kapangulohan, mihulagway sa kauswagan nga moabot kon kita motuman sa mga sugo:

Ang pagsunod sa Manluluwas dili makakuha sa tanan ninyong mga pagsulay. Hinoon, mokuha kini sa mga babag tali kaninyo ug sa tabang nga gustong ihatag sa inyong Langitnong Amahan. Ang Dios magauban kaninyo. Mogiya Siya sa inyong mga lakang. Molakaw Siya tupad ninyo ug gani moalsa kaninyo kon dako kaayo ang inyong panginahanglan. (Dieter F. Uchtdorf, “Tinguha alang sa Panimalay,” Liahona, Nob. 2017, 22)

Dugang nga mga Kalihokan sa Pagkat-on

Pagkat-on og dugang mahitungod kang Kristo pinaagi sa mga pagtandi

Kon ang mga estudyante makabenepisyo gikan sa kahanas sa pagtuon sa kasulatan sa pagkat-on mahitungod ni Kristo pinaagi sa mga pagtandi, dapita sila sa pagsiksik sa 2 Nephi 1 ug pangitaa ang mga paagi nga sila si Nephi ug Lehi susama sa Manluluwas sa ilang mga tinguha alang sa uban, sa ilang mga lihok ngadto kanila, ug sa ilang mga pagtulun-an. Pananglitan, ang mga estudyante mahimong makamatikod nga ang mga kahingawa ug gugma ni Lehi susama sa Manluluwas diha sa 2 Nephi 1:16, diin ang iyang nag-unang mga tinguha alang sa kaayohan sa uban. Tingali makamatikod sila nga si Nephi susama ni Kristo nga iyang giluwas ang iyang mga igsoong lalaki (tan-awa sa 2 Nephi 1:24). Dapita ang mga estudyante sa pagpaambit unsay ilang nakat-onan mahitungod sa Manluluwas pinaagi sa pagbuhat niini ug sa unsang paagi nga ang paghimo niini nga makanunayon makapalig-on sa ilang relasyon uban Kaniya ug makadugang sa ilang tinguha nga mahisama Kaniya.

2 Nephi 1:9, 20. “Sanglit kamo maghupot sa akong mga sugo kamo mouswag dinhi sa yuta”

Kon ang mga estudyante makabenepisyo sa pagtuon niini nga kamatuoran, ikonsiderar ang mosunod nga mga kalihokan:

Ipakita ang pulong nga mouswag ug dapita ang mga estudyante sa pagpaambit kon unsaon nila pagpasabot kini nga pulong ug nganong kini tinguhaon. Kon gikinahanglan, ipaambit ang mga pagpasabot kon unsa ang gipasabot sa pag-uswag gikan sa seksiyon nga “Komentaryo ug Background nga Impormasyon”. Dapita sila sa pagsiksik og pulong alang sa “mouswag” diha sa 2 Nephi 1 ilabi na ang (mga bersikulo 9, 20) ug dayon diha sa Basahon ni Mormon sa kinatibuk-an aron makita kon unsay gidapit sa Ginoo nga atong buhaton aron mouswag. Dapita sila sa pagpaambit nganong gibati nila nga ang pagkamasulundon sa mga sugo mosangpot sa kauswagan. Hangyoa sila sa pagpaambit og mga ehemplo gikan sa kinabuhi sa Manluluwas sa dihang Iyang gipakita kini nga kamatuoran. Mahimo usab nilang ipaambit ang ubang mga istorya sa kasulatan, mga ehemplo gikan sa ilang kinabuhi, o mga kasinatian gikan sa kinabuhi sa uban aron sa paghulagway sa kaimportante niini nga kamatuoran.